YOHANE 2

La'nwə lɔmdyə́ Kana: dzə mtiŋ

1A lə nə pɑ̌ nə batə tyɛ'dzʉ yɑtá, pú ghə la'nwə̀ lɔmdyə́ Kana Galilea, má Yeso pɑ́ tsʉ'u. 2A lə bɑ pu ké ba Yeso pu a pɑkhʉ̌ pyə nə la'nwə bɔ̌. 3Pá' mlu' lə pɑ jak a, má Yeso ghɔm bi e gɑ: wap ka piŋ gə mlu'. 4Da' gɑ́ Yeso ghɔm bi e gɑ: Pǔ kɑ́ mɑmjwi? Yɑ cwə̌ jɑ tə́ wuŋ sɔ̌'. 5Map e lə ghɔm bi mghɛ fa' gɑ: E ghɔm gɑ́ po ghə pɑ gɑ kɑ́ lə, po ghə pɑ́ po'o. 6A lə́ nə pɑ̌ po'o mkɔ́p pɑ tsʉ'u nthɔk bɑ mkɔ́p mwɔ', mkɔp myə pɑ Yudea lə́ nə sɔk mnwə map a. Bǎ ya kɔp lə́ lə bɑ bi a pɑ́ ywə ko nə mfo' məbʉ̌ə kɑ mfo' mənthá lə. 7Yeso lə́ ghɔm bi mghɛ fa' gɑ: Po nyəŋ shyə nthʉm mkɔ́p mɔ̌ tə a lo; wap lə nyəŋ shyə nə́ tə a kəm shwə o. 8Yeso ghɔm bi pu gɑ: Pó tu' cwəlɔ nə gɔ hɑ́ bi tá la'nwə́. Wap lə nə̌ gɔ hɑ bi e; 9e zhwi'tə shyə bɑ ǎ zhi mlu', la' e zhyə tsʉ' yə a fɑ nə a, nə pa' da' pɔ pyə wap lə tu' a nə lə́ bɑwə jyə́, a pɑ po'o e ghɔm bi tá jwigʉɔ gɑ: 10Guŋ pɔ awɛ də́ŋdzə hɑ pɑ mlu' pɑpuŋ, pu nwə́ tə bam tə́ e hɑ myə a ka ghyɛ' buŋ a; tə sɔ' m nə o, bɑ ǒ lwɔ' myə pɑpuŋ tə ŋkhəm cwəlɔ!

11Yəŋ bɑ dzə̀ mtiŋ myə Yeso lə pɑ Kana Galilea gə lə. E lə la'tə ghu'tə e, pɑkhʉ̌ pyə pìŋ biŋ e. 12A lə cyə̌ cwəlɔ, e tsəŋ gɔ Kapɛrnaum pu a map e, ba mfɑ pyə pu a pɑkhʉ̌ pyə, da' gɑ ŋkho wə shwə pɑ nə pǒ mtyɛ'dzʉ́.

Nə lɔnyə Dyə Si

(Mt 21.12-17; Mk 11.15-17; Lk 19.45-46)

13Paska pɑ Yudea lə pɑ̌ sɔ' Yeso pʉɔ gɔ Yerusalɛm. 14E lə yɔ pɑ tɛmtɔ Dyə Si bɑ wap cwətə́: Pɑ tɛ mna', ba mjʉ̀jʉ̀, ba mzhwə̀ pu a pɑ kwyəpnyə ŋkhap. 15E lə́ lɑ̌ gwɑ gə nthé, nə jəŋ guŋ yap awɛ Dyə Si, ba mjʉ̀jʉ̀, ba mna'; sa'tə ŋkhap pɑ kwyəpnyə ŋkhap, ŋkwɔk mtɑpe map; 16biŋ gɔm bi pɑ tɛ mzhwə gɑ: Po té guŋ tsə bǎ awɛ tsɔ'ɔ, po kɑ piŋ dɑ Dyə Ta á gə dyə mtɔ̌.

17Pɑkhʉ̌ pyə lə kámtə gɑ́ a bɑ pu lě bvə gɑ:

Ji dyə o wə shəŋtə jɛ́ a.

18Da' gɑ́ pɑ Yudea pa' gɑ: O gɔ la'tə wɔk ya nthi mtiŋ msya tə́ gə po'o? 19Yeso pa' bi pu gɑ: Po sa'tə Dyə Si yəŋ gɑ, a biŋ bʉ' nə mtyɛ'dzʉ mɑnthá. 20A pɑ po'o pɑ Yudea ghɔm bi e gɑ: Pu lə lɑ gu' shwɔp nthɔk mghap pfʉə tə́ nə ŋkwɑ Dyə Si yə̌ŋ, ǒ piŋ gɔm gɑ́ o gɔ pu' nə mtyɛ'dzʉ mɑnthá lə́? 21Da' gɑ e lə́ gɔm Dyə Si yə a bɑ nɑ e a. 22A po'o tə́ cwə yə Yeso lə yǎm nə vʉ̌ a, pɑkhʉ̌ pyə kamtə gɑ́ e lə́ ghɔm po'o, bíŋ ywə yə pu lə və a, biŋ bíŋ ba ghɔm tsyə e lə ghɔm a.

Yeso jyə́ ywə yə a bɑ nə́ mo a

23Bó'gwyə pɔ lə yɔ mtiŋ msya myə Yeso lə ghə nə cwə yə e lə̌ bɑ́ Yerusalɛm nə cwə ŋwɛnyə Paska a, biŋ tso tsyə. 24Da' gɑ́ la' Yeso tak nɑ e bi pú, nə pa' a lə bɑ e zhyə wap awɛ. 25Tə la' e yɑwə́ byap gɑ pu siŋ e sɔm nwə nə nwə mo pɑ́! Nə pa' a lə bɑ e zhyə́ ywə yə a bɑ nə mo a.

Attualmente Selezionati:

YOHANE 2: NTGomala

Evidenziazioni

Copia