MATYOO Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Rìwòŋzàg ɗi mɛ̀to mɛ ɓiɓan mɛ ɓi kaàtà ànɛ ɗi wuɓsɛɛ rì ɗi Marikus ɓi ɓìɓan fɛlɛ yɛ̀ɛ ɓi:

- Rìlààlàmɓɛ̀n ɗi ɓɔlɛ ɗi Zyaŋ Bàɓtis (Mt. 3:1-12)

- Yeesus à ɓaɓtɛɛ, Satàn a fèèghrɛ̀n nyi (3:13--4:11)

- Kìsay ki Yeesus à kìghà a Galile: A kighà lɛ à kalì ɓìɓan ɓi Bɛ̀ll, à rèsàg gwìy yi ɓum, à wɔ̀ɔ̀zì ɓɛ̀roroɓ (4:12--18:35).

- Rìkɛ̀ɛ̀ ɗii ɗi a Yorisalɛm (19:1--20:34)

- Bimiɗ à sɔnɗì ànɛ Yeesus à ghagsìghà à Yorisalɛm ɓɛ ɓan nyi, ɓɛ yɔm̀ nyi, ɓɛ wey nyi, wɔ̀lɛ rìghèmɓɛ̀n ɗii, ɗì kìɓan ki lɛ, ajɛ̀m ì rìghèmɓɛ̀n ɗii, à rèèrèsɛ̀ngà a ɓum, ɓi yakà ɓum rìwog (21:1--28:20).

Kìɓan kìfog, Matyoo à rèsii lɛ rì rìfuu yì ɗi Yeesus rì rìyalɛ̀n ɗii, rì ɓìɓan ɓi ɓi kilɛ̀ngà ɓi cɛɓ kii di à kaka man à mɓweɗ (Mt. 1:1--2:23). Lɔŋ ɓi rìtumɛ̀n ɗiǹ Matyoo à ghɛ̀lɛɛ kì rèsii rikuu ɗi mum ɗi Yeesus àrì; Yeesus ànɛn innɛ à ɓiì nɔ̀ɔnɔɔ̀tì ɓi kaàtà ànɛ bimiɗ. Mii mɛ à ghɛ̀lɛɛ nyi kì faà mɛ ri lɛ:

- Kiris ànɛ àrì rìfòm ɗi ɗi ri biì ghɛɓsii ɓum yɛ̀ɛ Bɛ̀ll à kàkà.

- Emanuɛl, yɛɛ lɔɔ lɛ <<Bɛ̀ll rì ɓìsi>>. Àrì roànɛ Bɛ̀ll à roozighà mɛ̀kàg mɛ à faghà ɓi Fìɗyàɓ fi Bee ɓi nyi.

Syeesyee à Ɓɔlɛ ànɛ Matyoo à kàngà àrì tì rì kìɓan kidɛŋ lɛ à taŋzɛɛ kigwey ki ɓi mɛ̀rèsàg mɛ Yeesus ɓi jaŋ yitaǹ:

1) Ɓìɓan ɓi Bɛ̀ll ɓi Yeesus à kpaaghà ɓi dòn aɗyoo (5:1--7:29). Ɓi jàŋ inɛ̀n Yeesus à kpaa yɛ̀ɛ rìgherɛ̀n ɗi kɔɔ̀kɔɔ̀ ɗi ghɛɛ̀sɛɛ kì ɓaà ɓi san ànɛ a ɓɛ̀roɓɛ ɓɛ ri kɛ̀n ɓi kìlɔ̀ŋ ki aɗyoo.

2) Ɓìɓan ɓi ɓɛ̀roɓɛ ɓɛ ghɛɛ̀sɛɛ kì ghagsii ɓɔlɛ à rìyù ɗi kilɔ̀ŋ ki aɗyoo kiŋcèm ɓɛ ghɛɛ̀sɛɛ kì kìi (10).

3) Dàɗkì taàɓɛ̀ɛ̀ yi Yeesus à tekà à ràɗ ɗì kìlɔ̀ŋ ki aɗyoo; ɓi cààmɛ̀n ki kìlɔ̀ŋ kiǹ ki kaka ki nyamɛn, kìɓan kifog ki ri ɓiì ràgɛɛ lɛ tɛntɛ̀ɛ̀n rì ìtèɗ (13).

4) Ɓɛ̀syàpiìtɛ̀rɛ̀ 18 ɓɛ resii lannɛ ɓɔn ɓɛ ɓi nyɔɔnyɔn à kìlɔ̀ŋ ànɛn ɓɛ ghɛɛ̀sɛɛ kì ghɛɓi ɓi rìgeni.

5) Ɓi ɓɛ̀syàpiìtɛ̀rɛ̀ 24 ri 25 Yeesus a reɓi yɛ̀ɛ ɓɛ ghɛɛ̀sɛɛ kì ɓoŋɓoŋi rìkpaŋ ɗi kilɔ̀ŋ ki Bɛ̀ll ɓi rìlèg ɗi zi.

Bi Syeesyee à Ɓɔlɛ ànɛ Matyoo à kàngà, Yeesus àrì fɛlɛ yɛ̀ɛ Nɗèsàg ànɛ à yùu kì nɛmì nyɔɔnyɔn à kìlɔ̀ŋ ànɛn à ki fa ɓɛroɓɛ ɓɛ ɓiì ɗiŋii miì mɛ̀rèsag mɛ ɓɛ ghɛɛ̀sɛɛ kì terì lɛ ɓɛɛ ɓa ɓɛ̀tɛɛzì kìɓan ki kilɔ̀ŋ kiǹ ɓi mis mɛ ɓum ɓɛdɛŋ.

Attualmente Selezionati:

MATYOO Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ: BAFNT

Evidenziazioni

Copia

Vuoi avere le tue evidenziazioni salvate su tutti i tuoi dispositivi?Iscriviti o accedi

Ulteriori informazioni su Bafia Nouveau Testament

MATYOO Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

I Versetti Biblici più popolari da
MATYOO Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Bibbia:

Bafia

Versione: Bafia Nouveau Testament - BAFNT