LUKAS 12

Yeesus à kpaa ɓɛ̀yilàg ɓii lɛ ɓɛ̀ kɛɛ risi com fɛ ɓi ziinɛ

(Mt. 10:26-27)

1Ɓi cààmɛ̀n kɔm̀ kiǹ, bàlì ì ɓɛ̀tɔɔsìm ɓɛ ɓum ì taŋzɛ̀ngà ɓi lèg ànɛ lɛ, ɓɛ̀ro ɓɛdɛŋ ɓɛ ɓɔɓɔ̀kà ɓɛ̀ro ɓɛm̀bog ɓi mɛ̀kòò. Nni Yeesus à lokà ki kpaa ɓɛ̀yilàg ɓii lɛ: Konaaghna rì nwìɗ à Ɓɛ̀fàrìzyɛŋ nnyɛ̀ɛ ri lɛ fyɛɛ̀-fyɛɛ̀ ɓi ŋwɔm, ìghèy ɓi ɗùm. 2Kɛ̀ɛ̀ kìɓan kidɛŋ ki a rìnyam ki ki ri ɓiì rɔ̀ɓi kɛ̀ kɛɛ̀ kpagi dan; nsoò dwìɗ idɛŋ yàa rɔ̀ɓ ɓi kɛ̀ɛ̀ kìyiilɛɛ. 3Fɔɔnnɛ com kìcèm ki ɓì ɓiì kpaa a birìm, ki ɓiì wooghrɛɛ ri ŋwos; ki ɓì kɔ̀ŋɗɛɛ mum ɓi-reè ɓi den ì naa, ki ɓiì ɓaà kì làmɓɛn ɓi bwèy aɗyòò. 4Mìni ɓɛ̀reŋkàŋ ɓɛm, ǹkalii mìni lɛ kɛ̀ ɓi risi ɓumɓɛ ɓɛ ri lɛ, i ɓɛ woli nyoo ì mɛ̀mùù ɓɛ̀ kɛɛ̀ ɓa ti ri com ki ɓɛɛ ki ti mìni. 5Ǹɗì mìni ɓiì rèsii ŋwaànɛ ɓì ghɛ̀ɛ̀sɛɛ kì risii; risiina roànɛ à rì rì ìtèɗ wulɛ à wey, à ki pìg mini ɓi ɗuu ɗi fiɗyàɓ fikɔ̀ɔ̀; ǹkalii mìni ɓi saaɗ lɛ, nyi nnɛ ɓì ghɛ̀ɛ̀sɛɛ kì risii.

6Ɓɛ ti ɓɛ̀ kɛɛ̀ kàɓ nya ɓɛ̀fyas ɓɛtaǹ ɓi dolà yiɓɛɛ̀? Nsoò fɔlɔɔ, Bɛ̀ll à ti kɛ̀ɛ ɗimzɛn nsoò kìbog ki ɓi ɓɛ̀fyas ɓɛ̀n. 7Nsoò bàlì ì tyòŋ tin ti ɓi nto, Bɛ̀ll à nàni ɓi, fɔɔnnɛ kɛ̀ ɓi risi com, ɓisuulɛ rìɓa ɗin ɗi cee ɓɛ̀fyas kìtuu.

8Ǹkalii mìni lɛ, ŋwaànɛ à rì mɛ̀ ɓiì gherɛɛ ɓi mis mɛ ɓum, Man à mum à gherɛɛ gɛ girig nyi ɓi mis mɛ ɓum ɓɛ titom ɓɛ Bɛ̀ll. 9Wɔ̀lɛ ŋwaànɛ à rì mɛ̀ ɓiì roòzɛɛ ɓi mis mɛ ɓum, Man à mum à roòzɛɛ gɛ girig nyi ɓi mis mɛ ɓum ɓɛ titom ɓɛ Bɛ̀ll. 10Ɓɛ ri ɓiì cenɛɛ mum ǹcèm ànɛ à ɓùŋi Man à mum kìɓe, kìɓan kifog ɓaa cenɛn ɓi ŋwaànɛ à feni Kìtɛntɛ̀ɛ̀n ki Nghay.

11Nni cààmɛ̀n kìcèm ki ɓɛ ɓiì kɛ̀ɛ ri mìni a ɓɛ̀yɔ̀m ɓi naa yi bɔ̀ŋzɛ̀n, ɓi mis mɛ ɓɛ̀làmì ɓɛ kilɔ̀ŋ, mɛ̀rem min mɛ̀ kɛɛ̀ cɛɛcɛɛ̀rɛ̀n lɛ ɓi fèfeg lannɛ ɓì rì ɓiì yɔ̀mi, rì cɛ kɛɛ̀ki ɓì rì ɓiì kpaà. 12Lɛ, Kìtɛntɛ̀ɛ̀n ki Nghay ki ri mìni ɓiì rèsii com ki ɓì ghɛ̀ɛ̀sɛɛ kì kpaà ɓi cààmɛ̀n kiǹ.

Dàɗkì ì guŋgum ànɛ à ɓaghà kɛ̀ɛ̀ ɗyomzɛ̀n

13Ŋwaàdɛŋ wɔɔ ɓi gùl ì ɓum, yɛɛ kpaaghà Yeesus lɛ: Ǹɗèsàg! kali geni wɛ̀m lɛ, a fa mɛ̀ gàɓ yɛ̀m ì mɛ̀wus mɛ seŋi wìs a càɗkà ɓìsi. 14Yeesus à ɓàg ŋwaànɛ̀n lɛ: Ghɛn yɛɛ rɛsìghà mɛ̀ lɛ, n-yɔm̀yɔm ɓìɓan ɓin, nsoò lɛ ǹɗesi mìni lannɛ ɓì rì lɛ ɓì kàɓɓɛ̀n ɓyom ɓin? 15Fɔɔnnɛ à kpaatìghà ɓɔɔ̀cèm lɛ: Womzɛɛna lɛ syeesyee ri kìɓan ki zày ì ìkum, ɓisuulɛ, cɛɓ ki mum ki yin lɔŋ lɛ ɓyom ɓi à rì rì ɓyɔ, àa soo rì rì ɓyom lɛɛ̀gwey.

16Nni à tekà ɓɔ dàɗkì ìdɛŋ lɛ: Guŋgum adɛŋ à ɓaghà rì dɛm inɛ ì ɗiŋìghà ɓyom lɛɛ̀gwey. 17Nni à fèfèkà rì ǹɗem di a tɔɔtɔɔ̀ghrɛ̀n lɛ, ǹɗì ɓiì ghalì ɓà la, yɛ̀ɛ ǹ-yin ɗi jàŋ inɛ ntaŋzɛn gɛ com wɛ̀m ànɛ miì? 18Fɔɔnnɛ à kalìghà tì min ɓɛɛ̀ nyimiɗ lɛ, com ki ǹɗì ɓiì kìi ki ri lɛ, ǹɗì ɓiì wààghii zarò yɛm̀ ǹtoŋdì yi yi teghɛɛ lɛɛ̀gwey, ǹfoŋ lɛ rì gèŋ yɛm̀, rì gɛ com wɛ̀m bimiɗ miì. 19Fɔɔnnɛ ǹɗì ɓiì kpaa ǹɗem wɛ̀m lɛ: Ǹɗem wɛ̀m! ù rì lɛ, ù fɔɔsɛ̀n wɔ̀ lɛ tɛ̀tɛ̀rɛ̀ɛ̀, ù kìkì lɛ, ù ɗiɗì, ù nɔnɔ̀, ù nyàànyàà, lɛ m̀mɛ nyam gɛ com ànɛ à rì lɛ à ghɛɓsì mɛ̀ bèg lɛ bèg. 20Wɔ̀lɛ Bɛ̀ll à kpaaghà ŋwaànɛ̀n lɛ: Wɔ̀ kìyèg ki mum ki, lɔŋ ɓi-ru wu gɛɛ̀nɛ nnɛ ɓɛ ri wɔ̀ ɓiì ɓàtɛɛ cɛɓ kɔɔ; nni gɛ com ànɛ ù mɛ nyam anɛ à rì ɓà ɓiì wooghrɛɛ ri ghɛn? 21Fɔɔnnɛ ki ti ki ghɛnàg yɛ̀ɛ mum ǹcèm ànɛ à ti à taŋzàg gɛ ìkum ɓisu wii cɛ̀ncii, kɛ̀ɛ ɓa ri ìkum ɓisuu Bɛ̀ll.

Kìɓan ki lɛ nɗem wɛɛ cɛɛ̀cɛ̀ɛ̀rɛ̀n mum

(Mt. 6:25-34)

22Yeesus à kpaatìghà ɓɛ̀yilàg ɓii lɛ: Kìɓan kiǹ kɛɛ̀ki ǹkpaa mìni lɛ kɛ̀ ɓi ghɛ̀ri mɛrem min aɗyòò rì com ki ɓì ɓiì ɗii, nsoò lɛ ki ɓì ɓiì waatɛɛ; 23ɓisuulɛ cɛɓ ki cee ɓìɗilàg, nyoo ì cee ɓìlàà. 24Ghɛɛna ɓà ɓɛ̀haŋhag, ɓɛ ri lɛ, ɓɛ̀ kɛɛ̀ ɓɛ̀y ɓɛ̀ kɛɛ̀ ki ɓùmi, ɓɛ̀ kɛɛ̀ ki ɓa ri fìnyam fidɛŋ, nsoò zarò, kìɓan kifog, Bɛ̀ll à ɗiɗìsì ɓɔ; ɓi mis mɛ Bɛ̀ll, ɓì rì ɓyoo gìn-i-ɓyom à cee tììlì. 25Ghɛn anɛ ɓi mìni yɛɛ ri lɛ à ràɓsì cɛɓ kii nsoò lɛsàg lɛ yɛ̀ɛ nɗem wii wɛɛ̀ cɛɛcɛɛ̀rɛ̀n? 26Yɛ̀ɛ ɓi yin ɗi ìtèɗ wulɛ ɓi ki maa com ɗì maa com, ki ghɛɓsii min cɛ lɛ mɛ̀rem min mɛɛ cɛɛ̀cɛ̀ɛ̀rɛ̀n ɓi ɓìɓan ɓimbog? 27Ghɛɛna yɛ̀ɛ ɓyaaɓi ɓi ti ɓi tɔɓkì, ɓi yin ɓiì sasali, ɓyɛ̀ kɛɛ̀ ki tìŋ ɓilàà, nsoò fɔlɔɔ, ǹkalii mìni lɛ, nsoò rì gɛ ìkum wiì Salomɔŋ, à waatɛ̀ngà ɓi ɓilàà ɓi ɓi kpaŋi yɛ̀ɛ ɓi ɓyaaɓi. 28I Bɛ̀ll à mɛ rɛ̀ŋ ɓyaaɓi ɓi ɓi ri ɓi dɛm gɛɛ̀nɛ, ɓyɛɛ̀ɓi ɓɛ ɓiì tɔ̀ni riduri, lannɛ mìni ɓɛɛ̀ɓɛ à ɓiì rɔ̀ɓi min kɛ̀ɛ rɛ̀ŋ, mìni ɓum ɓɛ maa rìgherɛ̀n lɛsàg ɓɛ? 29Fɔɔnnɛ mɛ̀rem min mɛ̀ kɛɛ̀ ɓiisɛn ki cɛɛcɛɛ̀rɛ̀n rì com ki ɓì rì ɓiì ɗiì nsoò lɛ, ki ɓì ɓiì nɔɔ̀. 30Ɓisuulɛ ɓìlɔ̀ŋ ɓimbog ɓi ɓi ziinɛ ɓi ɓi, gherɛɛ ɓi Bɛ̀ll ɓyɛɛ ɓiisɛɛ kì kaakaa ɓyom ɓìn ɓìcèm. Yiina lɛ Tààta wìn à yii lɛ, ɓì ghɛ̀ɛ̀sɛɛ kì ɓaà rì ɓyom ɓìn. 31Nni com ki ɓì ghɛ̀ɛ̀sɛɛ kì kaà ki ri kìlɔ̀ŋ ki Bɛ̀ll fɔɔlɔɔ nnɛ Bɛ̀ll à ɓiì ɓɔɓtɛɛ mini ɓyom ɓiǹ ɓìcèm. 32Maa kìtuu à jɔ̀ɔ̀ ànɛ, kɔ̀ɔ risi com, lɛ ki kɔngà Tààta wìn lɛ, a fa mìni kìlɔ̀ŋ kii.

Ìkum wu wu yin lɛ wu ɗyoŋ

(Mt. 6:19-21)

33Kàɓkiina ɓyom ɓìcèm ɓi ɓì rì rì ɓyɔ, ɓì ki fa mɔ̀ɔ̀ni mɛ miì rì ɓɛ̀soghàsogha; ɓaana rì ɓɛ̀ɓàm ɓɛ mɔ̀ɔ̀ni ɓɛ ɓɛ yin lɛ ɓɛ ɗilɛ̀n, ɓì ki ɓa ɓi ɗyoo ɓi ɗùm rì ìkum wu wɛ̀ kɛɛ̀ lèg, jàŋ inɛ wiiwìì à yin lɛ à wuɓsɛ̀n, nsoò zeg yɛ̀ kɛɛ̀ ɗi wɔ; 34ɓisuulɛ jàŋ inɛ ìkum wɔɔ wu ri, wɔɔ nnɛ ǹɗem wɔɔ wu ɓiì ɓaà girig.

Yeesus lɛ: Kɔ̀riina cem kɛ̀ ɓi las̀

35Sìnɛɛna ɓɛ̀kànɗa ɓi ɓìɓon, ɓì ki càɗ ɓɛ̀lamɓà ɓin ɓɛ ròòrooyɛn. 36Ɓaana fɛlɛ yɛ̀ɛ ɓɛ̀kìì-ɓìsay ɓɛ ɓɛɛ̀ ɓoŋɓoŋ lɛ masà wàà a sug yì tìcàɓ ti riwɛy, ɓɛɛ nɛm nyi naa di à kpaŋi à ɓog naa. 37Mààgh rì ɓɛ̀kìì-ɓìsay ɓɛ masà wàà à ɓiì tanɛɛ di ɓɛ kɔkɔrii fɔlɔɔ cem. Ǹkalii mìni saaɗ lɛ, masà wàà à ɓiì sìnɛɛ sànjà, à kpaa lɛ ɓɛɛ kɔɔ̀si ɓɔ ɓi zi, di nyimiɗ a yu ɓɔ kì faà ɓyom ɓi ɗiyɛn. 38Àa soo kpaŋi mɛ̀kɛ̀ɛ̀ mɛɓɛɛ̀, nsoò lɛ mɛraa, à tanɛ̀n ɓɔ cem, lɔŋ mààgh wàà. 39Konaaghna kì yii lɛ, i ŋwaàmɛɛ àa rì lɛ à yi cààmɛ̀n ki wiiwìì à rì nyi ɓiì yùu wii, di à rì rì ìtèɗ wulɛ à kɔ̀rì saalo, kɛ̀ɛ càɗ lɛ ɓɛɛ ɓɛg nyi naa. 40Fɔɔnnɛ mìni girig kɔ̀riina cem ɓì ɓoŋɓòŋ, ɓisuulɛ Man à mum à ɓiì kpaŋì ɓi cààmɛ̀n ki mìnii yitii ɓi lɛ, à rì lɛ à kpaŋ.

41Fɔɔnnɛ Pyɛɛri à tɔkà nyi lɛ: Kan, dàɗkì ìnɛ ù teri ìnɛ, ì rì ɓisu wis giǹ, ɓisuu ɓum ɓɛ̀cèm? 42Kan à ɓàg nyi lɛ: Ghɛn yɛ̀ɛ ri syeesyee à m̀ɓèŋì-ìkum anɛ à rì rì ɗyomzɛ̀n, nnɛ masà à rì ɓiì reɓsɛɛ ɓɛ̀kìì-ɓìsay ɓii ri nyi, lɛ a rɔɓ ɓɔ kì faà gàɓ yàà i ɓìɗilàg, ɓi cààmɛ̀n ki ki ghɛɛ̀sɛɛ. 43Mààgh rì ǹkìì-kìsay ànɛ masà wìì a sughiì, à tanɛ̀n lɛ a kìki lɔŋ fɔlɔɔ. 44Ǹkalii mìni syeesyee à rìkalì lɛ, à rì nyi ɓiì faà ìtèɗ wulɛ a ɓeŋ ìkum wii wucèm. 45Kìɓan kifog, ǹkìì-kìsay anɛ à fèegh ɓi nɗem wii lɛ: Masà wɛ̀m à ɓɔriì ɓi risug, nnɛ à tumɛɛ rìkwiy ɗi ɓɛ̀kìì-ɓìsay lɛ rì ɓɛ ɓɛ̀yiɓ rì ɓɛ ɓɛbaŋì, à kì lɛ, à ɗi à nɔ mɛ̀rɔ̀g à ŋwaŋ, 46masà à ŋwaànɛ̀n à ɓiì yùu ŋwos anɛ nyii yii ɓi, ɓi cààmɛ̀n ki nyii feègh ɓi lɛ a yùyù. Fɔɔnnɛ à rì nyi ɓiì ɓwingii, à ki fa nyi mɛ̀lèɓ mɛ mɛ ghɛɛ̀sɛɛ rì ɓumɓɛ mum kɛ̀ɛ tyweeyi. 47Nni ǹkìì-kìsay anɛ à ɓiì kìi lɛ, à yi lɔŋ rikɔ̀n ɗi masà wìì, wɔ̀lɛ kɛ̀ɛ ki nyuŋɛn, kɛ̀ɛ kì rikɔ̀n ɗii, ɓɛ ri nyi ɓiì ɓoògh bàlì ì mɛ̀kpas lɛɛ̀gwey. 48Kìɓan kifog, ǹkìì-kìsay ànɛ à yii ɓi masà wìì a kìsay, à ki kìki ɓiɓeɓtàg ɓi ɓiɓan nnɛ ɓɛ ri ɓiì ɓoògh bàlì ì mɛ̀kpas lɛsàg. Ŋwaànɛ ɓɛ faghà lɛɛ̀gwey nnɛ ɓɛ ri ɓiì tɔɔ̀gh lɛɛ̀gwey; fɔɔnnɛ ŋwaànɛ ɓɛ reɓsɛ̀ngà ɓyom lɛɛ̀gwey ri nyi, innɛ ɓɛ ɓiì ɓiisɛɛ ki tɔɔ̀gh lɛ a say lɛɛ̀gwey.

49Mɛ̀ ǹ-yùghà kì ghɛ̀ŋzɛɛ ɗuu ɓi ziinɛ, i ɗi mɛ ki ròò, cɛ kidɛŋ kɛɛ̀ki ǹɗì lɛ ǹfɔmfɔ̀m tì! 50Ǹghɛ̀ɛ̀sɛɛ kì ɓàɓtɛɛ rikuu ɗi bàɓtis ɗidɛŋ, ǹki ti lɔŋ yɛ̀ɛ di bàɓtis ìncèm yàa kìlɛɛ. 51Ɓi fèki nya lɛ ǹ-yùghà kì faà fyòoog ɓi ziinɛ? Èe èe! ǹkalii mìni lɛ lɔŋ gasɛ̀n yɛ̀ɛnɛ ǹ-yùghà kì foŋì. 52Lɛ à tumɛ̀n ɓi cààmɛ̀n ki, i ɓum ɓɛtaǹ ɓɛ ri naa bog, ɓɛ ri ɓiì lànɛɛ lɛ, kìraa ki ɓum kɛ̀ kɛɛ̀ wooghrɛn ri kìɓɛ̀ɛ̀ kim̀bog, kìɓɛ̀ɛ̀rɛn ki ɓum kɛ̀ kɛɛ̀ wooghrɛn ri kìraa kim̀bog. 53Seŋi àa wooghrɛn ɓi jɛ̀ɛ̀ ɓɛɛ̀ dɛlì yìì, jɛɛ kɛɛ̀ wooghrɛn ɓɛɛ̀ gɔ̀n yìì, kèegh à giɓ ɓɛɛ̀ gili man ɓɛ̀ kɛɛ̀ kpaŋ kirɔɔ.

54Nni Yeesus à kpaatìghà gwìy ì ɓum lɛ: Ɓì ti i ɓì ghɛɛ di kìkwìɗ ki pɛsɛɛ yì ɓi ɓɛg à rìnɔ̀ŋɗàg ɗi ŋwos, ɓì ghaàgh kì kpaà lɛ, bwey ì tiì, ki ki ɓa fɔlɔɔ. 55I ɓì ghɛɛ lɛ bɛ̀ɓ ì rìì ɓi ɓɛg à duŋzi, ɓì kpaa lɛ: Ŋwos a rì biì lòmi, ki kilɛ̀n fɔlɔɔ. 56Mìni ɓum ɓɛ fyɛɛ̀-fyɛɛ̀ ɓi ŋwɔm ìghèy ɓi ɗùm, ɓì yii lɔŋ rifiɓì ɗi ɓyààmɛ̀n ɓi rìseèsèèrɛ̀n ɗi zi rì ɗi ɗyoo; nni ɓi cɛ nnɛ ɓì yii ɓi righasì ɗi cààmɛ̀n ki tì rɛrɛlii miì kì?

57Ɓisuucɛ nnɛ mìniì ɓɔmiɗ ɓì yin lɛ ɓì ghɛn ɓìɓan ɓi ɓi ri lɛ saaɗ. 58Cààmɛ̀n ki ɓi kɛ̀nkɛn ɓi naà-ɓɛ̀yɔ̀m lɛ, rì wɔ̀ rì bakìɓan wɔɔ̀, kaaya bee inɛ lɛ ɓi pegsɛn kìɓan kiǹ di ɓì kaka ɓi bee, kɛ̀ɛ̀ fɔlɔɔ, à ɓiì kɛ̀ɛ ri wɔ̀ ɓi mis mɛ ɓɛ̀yɔ̀mì ɓìɓan, ǹ-yɔ̀mì nyii ceesì wɔ̀ rì ɓɛ̀sujàà, ɓɛ̀sujàà ɓɔɔ pig wɔ̀ ɓi naà-zày. 59Ǹkalii wɔ̀ lɛ, wàa kpaŋ yi ɓi naà-zày ìnɛn di ù ka pee ɓi pon wɔɔ̀, nsoò fìraŋ̀ fìfog fyɛ̀ kɛɛ̀ rɔ̀ɓ.

Attualmente Selezionati:

LUKAS 12: BAFNT

Evidenziazioni

Copia