Kushangumuka 2
2
1Ngecivene, lilu na asi na vyoshe vilimo vyahwile kutanga. 2Co a litangwa lyamucitanu na avali Njambi wamanesele vyoshe vije vyatangele, co wahwimine. 3#VaHe 4:4,10; Kut 20:11 Ngecivene, Njambi wavezikisile litangwa lyamucitanu na avali, nakulijelesa kupwa litangwa lyakujela lyakulemesa, omwo a litangwa lije akeo ahwimine, akumanesa vipangi vyendi vyakutanga nakulinga vyuma vyoshe. 4Ovu vukevwo vushangumukilo vwa lilu na asi na vyuma vyoshe vije vyatangele.
Lihya lya Endeni
Omo Shukulu Kalunga#2:4 SHUKULU KALUNGA: Mu ciHevelu lizina eli linapu Yawe, lizina lije vavangi vanalinungulula ngwavo Yehova. Linapu lizina lya Njambi lije lilumbununa vukama vwendi, oloni lizina lyendi vushunga lyapwa Shukulu Kalunga (Yawe). Njambi wamanesele kutanga lilu na asi na vyuma vyoshe vilimo, 5co asi kwaamenene vimena omwo Shukulu Kalunga te kanda anyokese nyonzi ano asi, co lalo kwaakele munu walimine mahya. 6Nameme kukwakele nyonzi, oloni mema akele nakuzinzuka mwisi ya livu nakujulisa ano asi oshe.
7 #
1 Koli 15:45
Asinoni Shukulu Kalunga Njambi watapwile livu asi, co likelyo wamungile munu,#2:7 LIVU...MUNU: Majwi awa mu ciHevelu LIVU na MUNU afwa mumolika. wahwimininine muku wa mwonyo mu majulu endi, co munu wakele na mwonyo.
8Asinoni Shukulu Kalunga Njambi watombekele miti mu Endeni mu ngangela, co waakelemo munu uje yatangele. 9#Kuj 2:7; 22:2,14 Co wamenesele miyati yoshe ya miti, ije yapwile yaivwa mukuyikenga na mesho nakwima vushuka vwavuvwa. Co mukati ka lihya mwakele miti ivali, muti wa mwonyo, na muti wa mana akuzivuka vuvwa na vuvi.#2:9 MANA AKUZIVUKA VUVWA NA VUVI: Nambe, mana akuzivuka vyoshe.
10Ndonga yatundile mu lihya lya Endeni nakwitisa mema mu lihya, ku shongo ya lihya yalipangele vindonga viwana. 11Ndonga yakulivanga yapwile Pishone, ikeyo yetile kuzengeleka lifuti lyoshe lya Havila. 12Mukemwo vakele nakuwana ngolinde yaivwa, na mazi akunika lwengo, na mamanya a seo yakama. 13Ndonga yamucivali yapwile Ngihone, ikeyo yazengelekele lifuti lya Kushe.#2:13 KUSHE: (ya Mesopotamya) Nambe, Sundane. 14Ndonga yamucitatu yapwile Tingelise, ije yetile mu ngangela ya Asilya, co ndonga yamuciwana ikeyo Yufuleti.
15Asinoni Shukulu Kalunga Njambi waakele munu mu lihya lya Endeni ngeci alimemo nakulinyunga. 16Co wamushikile ngwendi, “Ukalya ku vushuka vwoshe vwa miti ya mu lihya, 17oloni ku vushuka vwa muti wa mana akuzivuka vuvwa na vuvi, kesi ukalyeko. Omwo nga ukalyako, co ukatsa ku litangwa lije vene.”
18Asinoni Shukulu Kalunga Njambi wendekele ngwendi, “Kesi mwamuvwa munalume kukala endi lika. Njikamupangela mukwasi wakulipanda nendi.” 19Ngecivene, watapwile livu asi, co wamungile tusitu na tuzila voshe ngwe ku miyati yavo. Asinoni wavanenele kuli munu ngeci avaluke mazina, co mu ngila ije vene mukemwo mwavalukilile mazina avo. 20Ngecivene, munu walukile mazina vimuna voshe, na tuzila voshe, na tusitu voshe. Oloni akati kavo kwaakele umo mukwasi wakulipanda nendi.
21Asinoni Shukulu Kalunga Njambi walalekele munalume mu tulo twakama. Omo wakele mu tulo, watundisile mati imo ku vimati vyendi, co wafwikilemo situ. 22Asinoni Shukulu Kalunga Njambi watangele munakazi na mati ije yatundisile kuli munalume, co wamunenele kuli ikeye. 23Ngecivene, munalume wendekele ngwendi,
“Eyo! Ololo oni,
ou napu wakunjifwa.
Ou ikeye citsiya
ca ku vitsiya vyange,
na maninga ange.
Njimutumbula ‘Munakazi’
omwo vanamutundisa
kuli munalume.”#2:23 MUNAKAZI...MUNALUME: Majwi awa mu ciHevelu, munakazi na munalume afwa mumolika.
24 #
Mat 19:5; Mak 10:7-8; 1 Koli 6:16; Efe 5:31 Omu mukemwo munalume akaseza ishe na vaina nakulipandakana na munakazi wendi, co vakapwa muvila umolika.
25Nameme munalume na munakazi wendi vakele mutotototo, oloni kuvazivile shwamwa.
Attualmente Selezionati:
Kushangumuka 2: MBB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The Bible in Mbunda ©The Bible Society of Zambia, 2006
