Gn 16
16
Xyo'lajik laj Ismael
1Lix Saray, rixaqil laj Abrán, maak'a' xkok'al; ab'anan wank jun li ixq aj k'anjel chiru, Ejiipt xtenamit, x'Agar xk'ab'a'. 2Kixye ut lix Saray re laj Abrán: “Laa'at nakanaw naq li Qaawa' xinxkanab' cho'q xma'al ixq. Nintz'aama b'i' chawu naq tatwanq rik'in lix Agar, laj k'anjel chiwu: mare anchal tinmaatani jun k'uula'al rik'in”, chan.
Laj Abrán kixpaab' li kiyehe'k re xb'aan lix Saray. 3Jo'kan naq, lajeeb'aq chihab' rokik laj Abrán sa' xteepal Kanahán, lix Saray, rixaqil laj Abrán, kixb'oq lix Agar laj Ejiipt, ut kixq'axtesi re laj Abrán li xb'eelom, cho'q rixaqil. 4Laj Abrán kiwank rik'in lix Agar, ut a'an kikanaak sa' yu'am. Ab'anan, naq kixk'e reetal naq wank sa' yu'am, ki'ok chi xtz'eqtaanankil lix Saray.
5Toja' naq lix Saray kixye re laj Abrán: “Aamaak laa'at naq yookin chi xk'ulb'al li rahilal a'in. Laa'in xinq'axtesi aawe lix Agar; ab'an, naq a'an xk'e reetal naq wank chik sa' yu'am, maak'a' chik nin'ok wi' re. Li Qaawa' chiraqoq aatin sa' qab'een chi qakab'ichal”. 6Kichaq'ok laj Abrán ut kixye: “Li ixq aj k'anjel chawu wank rub'el aawoq rub'el aawuq'. B'aanu re li k'aru taawaj”. K'ajo' naq lix Saray kijosq'o'k sa' xb'een lix Agar, ut a'in ki'elelik chiru. 7Ab'an koxtawe'q xb'aan li x'ánjel li Qaawa' chire jun yo'leb'aal ha' sa' li chaqich'och', a' li wank sa' xb'ehil Sur: 8“Agar, aj k'anjelat chiru lix Saray, b'ar xatchalk chaq ut b'ar xik aawe?”, chu'uxk re xb'aan li ánjel. Kichaq'ok a'an ut kixye: “Yookin chi elelik chiru lix Saray laj eechal we”.
9Ut li x'ánjel li Qaawa' kixye re: “Sutq'in wi' chik rik'in laj eechal aawe ut paab'an chiru”. 10Kixye ajwi':
“Tink'ihob'resi eb' laawalal aak'ajol
toj reetal ink'a' chik taaruuq rajlankileb'
xb'aan xk'ihaleb'.
11K'e reetal, wankat sa' yu'am;
taawanq jun aak'uula'al,
ut a'an aj Ismael taak'e cho'q xk'ab'a',
xb'aan naq li Yos xatrab'i sa' laarahilal.
12Chanchanaq junaq b'uur li wank sa' pim;
taayaloq rik'ineb' chixjunil
ut chixjunileb' te'yaloq rik'in.
Sa' xka'yab'aal chixjunileb' li riitz'in
tixyiib' li xmuheb'aal”.
13Toja' naq lix Agar kixk'e “laa'at li Yos li na'ilok we” cho'q xk'ab'a' li Yos ki'aatinank re, xb'aan naq kixye sa' xch'ool: “Arin xwil ru li na'ilok we”. 14Jo'kan naq li xjulel li ha' a'an “xha'el li Yo'yo li na'ilok we” nayeemank re. A'an wank sa' xyanq Kadés rik'in Béred.
15Laj Abrán kiwank jun xk'uula'al rik'in x'Agar,#16,15 Gal 4,22. ut aj Ismael kixk'e cho'q xk'ab'a'. 16Waqib' ro'k'aal (86) chihab' wank re laj Abrán naq kiyo'laak laj Ismael rik'in lix Agar.
Attualmente Selezionati:
Gn 16: QQC
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Q'eqchi DC Bible © Bible Society in Guatemala, 2005.
