Luc 24

Nslambaɗkada Yèsu auda te ndev ndohi mʼmetsaʼa

(Mt. 28,1-10; Marc 16,1-8; Jean 20,1-10)

1A pats nshèlèkuraʼa te pats luma, a prèk te gai, ta shkè a gi dzavai, a ta cko ɓurdi man ta tildahai. 2A ta ngots ngezlambar kwa, ngudumbala auda te ma gi dzavi ma. 3Aman to do a pa, ta ngatsa va Bi Yèsu te pa bai. 4Aman ta hur ma haha a vata, ngurhi cèw, a maslaka a va, man a si dai, ta zlatsa a ma ta. 5A zlau a ndza ta a vata, a ta peda di ta a hai. Aman ngurhi ta gaɗa ta: Kin woya ndo man a zhè a nshèffè te va ndohi mʼmetsaʼa èhèmè? 6Nengaʼa az a haha bai, nengaʼa a nslambaɗa na ma. Va-huro, ara man a gaɗa kinè, man a zhè te kokwar Galilée dai, man a ngaɗa: 7Sèi ta va na kra-ndo a ri a ndohi malihai, a ta gezlalaʼa, te deɓ mʼmèn makar a da slambaɗkaɗauda. 8A ma nengaʼa a nhaka ta a gèɗ.

9A ta men ta a deɓa, a ta gaɗa ta ma haha a tengahi 11, a ndohi ngiɗè tèlèba. 10Tengaʼa man ta ngreda ta skwi haha a ndohi sak: Marie Magdala, a Jeanne, a Marie, mam Jacques, a ngwozi ngiɗè man ta zhè a sam ta. 11A ta tsena ma haha ara tsaval ambalai, a ta ca a ndav ɓai. 12Aman Pierre a nslambaɗa, a nhu a gi dzavai, a nguɓda deɓa a hai, a nrka maslaka nsuɗa te pa. A nʼndo na ngwai, a nrzl na a géɗ skwi man a rkaʼa.

Yèsu a dè a kokwar Emmaus

(Marc 16,12-13)

13Na haha, a pats nasa, ndohi Yésu cèw to do a kokwar ngiɗè, nzlembaɗ na Emmaus, dra daf kata te kokwar Jérusalem. 14A ta tsu-tsaval a géɗ skwi tèlèba man a ga. 15Te deɓaʼa ngu ar haha: Aman ta gèɗè, Yèsu a ri na a nherda ta va, a dè a nda tengaʼa. 16Aman ta sun ɓai, nengaʼa a nyakeda ta va a dai. 17A nengaʼa a ngaɗa ta: Ma mè, man kin gèɗè a civèɗ? A ta zlatsa a pa, a ta lèyè. 18Staɗte va tengaʼa, nzlembaɗ na Cléopas, a mʼmbeɗa na a ma: Ka staɗgenè te kokwar Jérusalem, man ka sun skwi man a gu te pa tok tok sata ɓi dè? 19A nengaʼa a ngaɗa ta: Mè? A ta gaɗa na: Ma Yèsu, ndo Nazareth, ndo nhadka ma, man a ngu mizlinè njè-ma a wuɗai a sam di Zhiklè, a sam ndohi tèlèba. 20Ara ndohi mvi skwi a Zhiklè mbibihiaʼa, a bihi ta gso, ta ga na kita a gèɗ, a ta gezlalaʼa. 21Nga, nga huro, nengaʼa ndo mʼmbel Israel. Mʼmèn mamakar antanta, man skwi haha a gau. 22Aman ngwozi nga ngiɗè ta dzakaɓama nga gèɗ, a to do a prèk a gi dzavai. 23A ta ngatsa va nengaʼa bai. A ta shkè, a ta gaɗa, ta rka golahi Zhiklè, man ta gaɗa ta, na zhè a nshèffè. 24A ndohi ngiɗè te va nga to do a gi dzavai, a ta ngotso, ara ngwozi ta menda nga; aman ta rka nengaʼa ɓai. 25A nengaʼa a ngaɗa ta: Kinè ndohi man maya kinè azɓai, kin wosl ɓai, aman kin cè ma ndohi nhadka ma a ndav. 26Sèi skwa a dza na Kristi di ka ɓi ɗè, ga a dè a sam nʼnjèl nengaʼa? 27Te deɓaʼa a hinè a sam Moise, a sam ma ndohi nhadka ma tèlèba, a nsenda ta ma tèlèba te ɗèlèwèr Zhiklè a géɗ Yèsu. 28A ta ndulndul a kokwar man ta woy a ta dè a pa. A nengaʼa a ngu ara man a woya a ndè a ma ma. 29A ta tsu riaʼa, a ta gaɗa na: Nza a sam nga, ani dakwaɗ ma, pats a woya a nkèlè ma. A nengaʼa a mdo, a ta nzi a nda tengaʼa. 30Te debaʼa, aman ta nza a sam skwi nʼndai, a nco movar, a nshüd gèɗ, a ntsakaʼa, a mva ta. 31A di tengaʼa a mwin na, a ta sun nengaʼa. A nasa nasa cerk nʼaz a sam ta ɓai. 32A ta goɗ a va ta: A mʼmbeɗama nga ndav bi dè, aman a nsenda nga ma a civeɗ, a nʼngreda nga ma Zhiklè? 33A nasa nasa ta slambaɗa, a ta men ta a deɓa a kokwar Jérusalem. A ta ngats ta 11, aman ta ɓica va. 34A ta gaɗa: Bai a nslambaɗkaɗauda a vava, a ngudoko na va a di a Simon. 35A ta ngra ta skwi tèlèba man a gau a civèɗ, ara man ta sun nengaʼa, man a tsaka ta movar.

Yèsu a ngudoko ta va a di a golahi nengaʼa

(Mt. 28,16-20; Marc 16,14-18; Jean 20,19-23)

36Aman ta gèɗè te rai, nengaʼa a nzlatsa te va tengaʼa, a ngaɗa ta: gumi a nda kinè! 37Aman ta gudzai, a ta gu zlau, a ta huro, ta rka mèzhèɓ skwi ngiɗè. 38A nengaʼa a ngaɗa ta: Kin gudzi èhèmè, a kin hér gèɗ zlau èhèmè? 39Va-rkaʼa ri ga a sak ga, i nengaʼa. Va-tarahayè, va-rka; aman mèzhèɓ a nʼngots zluèɗ va a vatasl ɓai, ara man kin rka man i ngotso. 40[Aman a ngaɗa ta ma haha, a nʼngra ta ri nengaʼa a sak nengaʼa.] 41Aman ta ca a ndav di ɓai, a géɗ man ta wuffè, a ta rzl ta, a ngaɗa ta: Kin ngots skwi nʼndi a haha dè? 42A ta va na klèf msula kètè. 43A nengaʼa a mco, a nʼndau a sam di ta.

44Te deɓaʼa a ngaɗa ta: Ma haha man i gaɗa kinè, man i zhè a sam kinè dai: Aman skwi tèlèba man ta Windo a géɗ ga te ɗèlèwèr Moise, a ndohi nhadka ma, a Psaumes, sèi a gai. 45Te deɓaʼa a winè maya ta, aman ta sun ma Zhiklè, a ngaɗa ta: 46Gar haha ta Windo te ɗèlèwèr Zhiklè, sèi skwa a dza na Kristi. Te deɓ mʼmèn makar a da slambaɗkad na te mʼmetsai. 47A ta da njè ma nʼngwèdè ndav, a ma mprè malai a nzlembaɗ na a ndohi herkeda tèlèba, a hinè te kokwar Jérusalem.

48Aman kinè, kin gi a ndohi malwuɗihi te skwi sa. 49Anai i zlinda kinè skwi man bab ga a mpasla kinè rai. Aman kinè, va-nza a kokwar, ha pats man kin ngots wuɗi te zhiklè.

Ndè Yèsu a zhiklè

(Marc 16,19-20)

50A Yèsu a nde ta auda a kokwar Bétha-nie, a mpeda ri a zhiklè, a mpshè ta ma. 51Te deɓaʼa nʼnga ar haha: Man a mpshè ta ma, a mdo na auda a sam di ta, a mdo na zhiklè. 52A ta tsi riaʼa, a ta men ta a deɓa a kokwar Jérusalem a mwuffè mbiaʼa. 53A ta nza a gi Zhiklè pèc pècèk, a ta slubordo Zhiklè.

Attualmente Selezionati:

Luc 24: MOF89

Evidenziazioni

Copia