Luc 22

Mvhè ma a géɗ Yèsu

(Mt. 26,1-5, 14-16; Marc 14,1-2, 10-11; Jean 11,45-53)

1Ngolala movar man skwi nshégèrè a te di ɓai, man ta baha na Pâque, ndul ndul. 2A ndohi mvi skwi a Zhiklè mbibihiaʼa, a malamhai, ta woy maya nkéɗèʼa; aman ta gu zlau ndohai.

3A Sadan a ndo a ndav Judas, man ta baha na Iscariot. Nengaʼa staɗ te va 12. 4A nengaʼa a mdo, a ta goɗ a nda ndohi mvi skwi a Zhiklè mbibihiaʼa, a bi sojèhai, ara man a vi Yèsu a ri a tengaʼa. 5A ta wuffè, a ta derzla ma ta, a ta va na sulai. 6A nengaʼa a nco. Aman a ngaɗda ma a hi aranta ma, a woy maya man a vi a ri a tengaʼa, aman ndohi ta hèzlèwè a ta rubi azɓai.

Yèsu a ndi skwi ngolala Pâque a nda golahi nengaʼa

(Mt. 26,17-25; Marc 14,12-21; Jean 13,21-30)

7A pats movar man skwi nshégèrè a te di ɓai, ta zli tambak Pâque. 8Yèsu a nzlinde ta nda Pierre a Jean, a ngaɗa: Vo-do, va-tila nga skwi nʼndi Pâque, aman nga ndiaʼa. 9A ta gaɗa na: Ka woya man nga tilèʼa tema? 10A nengaʼa a ngaɗa ta: Na haha, man kin dè a kokwar mbiaʼa, kin da zli gèɗ a ndo ngiɗè, duzlak a gèɗ. Va-dzodzora, agi mana dè a pa. 11A kin gaɗa na a babgiaʼa: Ndo njèngè ma a ngaɗa ka: Gi mbrok ga tema, aman nga ndi skwi nʼndi Pâque a golahi ga? 12A nengaʼa a di a ngreda kinè gi mbiaʼa te géɗèʼa, kolongwi te pa. Va-tül skwi nʼndi Pâque te pa! 13Aman to do, ta ngots skwi tèlèba, ara man nengaʼa a ngreda ta, a ta tül skwi nʼndi Pâque.

14Aman tidè sama ma, ta nzahai a sam skwi nʼndai, a nda ndohi sak.

Nhinè ndi skwi nkezlaʼa

(Mt. 26,26-30; Marc 14,22-26; I Cor. 11,23-26)

15A nengaʼa a ngaɗa ta: Mpataka nʼndi skwi nʼndi Pâque a nda kinè a kedyè, ga skwa a dzayè. 16Aman i gaɗa kinè, anai i ndi skwi nʼndi Pâque te deɓ anta asaɓai, ha a di nʼnga ma te kokwar Bi Zhiklè. 17A nco kokwai, a nshüd gèɗ, a ngaɗa: Vo-co nengaʼa, va-kezlaʼa a va kinè! 18Aman i gaɗa kinè, anai i si barassa asaɓai, ha kokwar Bi Zhiklè a mshkè ma.

19A nco movar, a nshüd gèɗ, a ntsakaʼa, a mva ta, a ngaɗa: Na haha, va ga, man i viaʼa a géɗ kinè. Skwi haha va-gau, a kin héryè. 20Lèmèlèmè kokwai, te deɓ skwi nʼndai, a ngaɗa: Kokwi haha, skwi nderzle nga mɓuaʼa te Pombaz ga, man a mbaɗa a géɗ kinè.

21Aman na haha ndo man a gayè ri a gèɗ, a zhè! Nga ndi skwi a vna. 22Kra-ndo a di a dè na, ara man Zhiklè a woyaʼa. Aman wobau a géɗ ndo man a ga na ri a gèɗ. 23A ta hüno, a ta dzhoɗo a va ta: Ndo nda gi arsa, wa?

Ntsi gèjau: mbiaʼa wa?

24Te deɓaʼa ta tsu gèjau: Te va nga, nfena ngiɗè wa? 25A nengaʼa a ngaɗa ta: Bihi ndohi herkeda ta gi bi ta. A ndohi ta baha ta ndohi man ta kwor ta ‘ndohi ngi skwi man amba’. 26Aman kinè, az arsa ɓai! Aman ndo man a fena ngiɗè te va kinè, da nda a ntabawaʼa. 27A ndo ncè ma ndohai, da gu a ndo ntakaha ta ndohai. Nfena wa? Ndo man a nzi a table dè, dè ndo man a gi mizlinè nengaʼa dè? Ndo man a nzi a table ka ɓi dè? Aman iyè, i shkè a sam kinè ara ndo ntakaha kinè. 28Aman kinè, kin düsho a nda iyè te skwi man a jkedyè. 29A i gaɗa kinè: Lèmèlèmè ara man nga derzla ma a Bab ga a vay kokwar bai, 30lèmèlèmè i derzla ma a nda kinè, a kin ndi skwai, a kin si skwai a sam table ga te kokwar bi ga. A kin nzi a géɗ sam nʼnzi bihai, a kin gi kita verzi ndohi Israel 12.

Yèsu a ngredè, ara man Pierre a da cèkèlma a géɗ nengaʼa

(Mt. 26,31-35; Marc 14,27-31; Jean 13,36-38)

31A Yèsu a ngaɗa: Simon, Simon! Na haha, Sadan a woy kinè, a woya mpèvè kinè ara dau. 32Aman iyè, i tsi ri a géɗ ngaya, aman ncè-a-ndav ngaya a ndivè azɓai. A ka, aman pats ngiɗè ka menkada deɓa, ka va ta wuɗi a kramamhi ngaya. 33A nengaʼa a ngaɗa na: Bai, ko man nga dè dangai a ka, ko man i da metsi ga a va ka, nga a ka genè! 34A nengaʼa a ngaɗa: Pierre, i gaɗa ka, a patsna ka cèkèlma a géɗ ga, sak makar, ga ngarah a tsi daʼai, a ka da gaɗa: I sun nengaʼa ɓai.

Gozhèm nhèsh skwai a kafahi gwèsh

35A nengaʼa a ngaɗa ta: Aman i zlinde kinè a gozhèm Suli ka ɓai, a gozhèm nhèsh skwi ka ɓai, a kotokoroh ka ɓai, skwi man kin ngatsa ɓai, a zhi dè? A ta gaɗa: Azɓai. 36A nengaʼa a ngaɗa ta: Aman antanta, ndo man a ngots gozhèm sulai, da co, lèmèlèmè gozhem nhèsh skwai. A ndo man a ngatsa ɓai, da preda suɗkova na a ma, da sum kafahi gwèsh. 37Aman i gaɗa kinè, skwi haha man ta Windo te ɗèlèwèr Zhiklè a géɗ ga, sèi a gai: Ta ngra na nengaʼa a va ndohi malihai. A skwi man ta goɗ a géɗ ga, a da gai. 38A ta gaɗa: Bai, na haha kafahi gwèsh cèw. A nengaʼa a ngaɗa ta: Dèʼa!

Ntsi ri Yèsu te Géthsèmané

(Mt. 26,36-46; Marc 14,32-42)

39A to do auda, a nengaʼa a mdo, ara man a gia pèc pècèk, a za oliviers. A golahi nengaʼa ta dzodzora.

40Aman a shkè a samaʼa, a ngaɗa ta: Va-tsu rai, skwa da pe kinè a wi ɓai! 41A nengaʼa a mʼmenda va na a deɓa a sam ta, dra ara nkèl kwa a ndikè a pa, a ngurɓahai, a ntsu rai, 42a ngaɗa: Bab ga, aman ka woyaʼa, co kokwi haha auda a sam ga; aman ara man i woya ka ɓai, ara man ka, ka mwoyaʼa. 43A gol Zhiklè a ngudoko na va a dai, aman a mva na wuɗai. 44Zlau a nkeɗda hi a vèvèɗ, a ntsu ri holholaʼa, a vazaza nengaʼa a ntkwè a hi a herkeda, ara Pombaz. 45A nslambaɗa te ntsi ri nengaʼa, a mshke a sam golahi nengaʼa, a nʼngats ta, ndav tengaʼa a mbeɗè ta nza zumbutaʼa. 46A nengaʼa a ngaɗa ta: Kin nzhunè èhèmè? Va-slambaɗa, va-tsu rai, skwa da pe kinè a wi ɓai!

Ta gshè Yèsu

(Mt. 26,47-56; Marc 14,43-50; Jean 18,2-11)

47Aman a gèɗè dai, na haha, ndohi rè-dèdèa ta shkè, a staɗ te va 12, nengaʼa man ta baha na Judas, a mshkè a ma tengaʼa, a nherda na va a Yèsu, a nkelawa na ri a daʼai. 48A Yèsu a ngaɗa na: Judas, ka gi ri a géɗ kra-ndo a nkèlèwè ri a daʼai ɗè?

49Aman ndohi man a tsagi nengaʼa, ta rka skwi man a ga, ta gaɗa na: Bai, nga gu var a kafahi gwèsh cè? 50Staɗ te va tengaʼa a ntsahama na zlembaɗ civèɗ ri mandai a ɓèl bi ndohi mvi skwi a Zhiklè ngiɗè. 51A Yèsu a mʼmbeɗa ta a ma: Va-jèkeda! A nʼnuɓa na zlembaɗ a pa, a ntilaʼa.

52A Yèsu a ngaɗa ta ndohi mvi skwi a Zhiklè mbibihiaʼa, a ndohi mbibihiaʼa te gi Zhiklè, a ndohi nhalaʼa, man ta shkè a ta gshèʼa: Kin shkè a kafahi gwèsh, a gèɗ-gaɗa, i ndo metsar dè? 53Pèc pècèk, i nza a sam kinè te gi Zhiklè, a kin fahay ri ɓai. Aman a patsna, pats kinè, pats wuɗi-bi ruva.

Pierre a cèkèlma a géɗ Yèsu

(Mt. 26,57-58, 69-75; Marc 14,53-54, 66-72; Jean 18,12-18, 25-27)

54A ta gso, a ta daʼa, a ta ckoɗa a gi bi ndohi mvi skwi a Zhiklè; a Pierre a ndzodzora te deɓa dra.

55Aman ta vatsa vogwa te ndev gala, a ta ɓica va a pa, Pierre a nʼnza te ndev tengaʼa. 56A ngwoz mizlinè ngiɗè a nrkaʼa, a di vogwa, a mpa na di ndèzlèʼa, a ngaɗa: Ko nengaʼa ba a nʼnza a sam na! 57A Pierre a ntsokol ma, a ngaɗa: Ngwoz, i sun nengaʼa ɓai! 58Te deɓa kètè, ndo ngiɗè a nrkaʼa, a ngaɗa: Ka ba, staɗ te va tengaʼa! A Pierre a mʼmbeɗa na a ma: Masli ga, i ka ɓai! 59Te deɓ nasa, ndo ngiɗè a ngaɗa: A vava, ko nengaʼa a nʼnza a sam na. Nengaʼa ndo Galilée. 60A Pierre a ngaɗa: Masli ga, i sun skwi man ka gèɗè ɓai! A nasa nasa, aman a ngoɗo ma, ngarah a ntsu daʼai. 61A Bai Yèsu a nʼngwoda va, a mpa na di a Pierre. A ma Bi Yèsu a nhaka na a gèɗ a Pierre, ara man a gaɗa na: Ga ngarah a tsi daʼai, ka cèkèlma a géɗ ga, sak makar. 62A Pierre a mdo auda, a nkuɗau a vata.

Ta der da Yèsu a ta ndèhèʼa

(Mt. 26,67-68; Marc 14,65)

63A ndohi man ta ɓer Yèsu, ta ngwossaha, a ta tsau. 64Ta pizlèma na dai, ta dzhoɗo, a ta gaɗa: 65Ngra nga, ntse ka wa? A skwi ngiɗè tsaɗ tsaɗ ta gaɗa na, a ta durdo a vna.

Yèsu a sam kita

(Mt. 26,59-66; Marc 14,55-65; Jean 18,19-24)

66Aman sam nciɗa ta ma, ndohi nhalaʼa ta ɓica va, ko ndohi mvi skwi a Zhiklè mbibihiaʼa, a malamhai, a ta daʼa a sam ncèmma tengaʼa, a ta gaɗa: 67Aman ka Kristi, ngra nga! A nengaʼa a ngaɗa ta: Ko man i gaɗa kinè, kin cè a ndav azɓi genè. 68I dzhaɗ kinè, kin mbeɗay a ma azɓai, kin priyè azɓi genè. 69Aman anai, kra-ndo a da nzi a civèɗ ri mandi Zhiklè Bi wuɗai. 70Tèlèba ta gaɗa: Gar haha, ka kra Zhiklè ɗè? A nengaʼa a ngaɗa ta: Ara ngèɗè kinè, i nengaʼa. 71A ta gaɗa: Sèi nga ngècè skwi malwuɗi ngiɗè za dè? Nga, a ri nga, nga tsenaʼa te ma nengaʼa.

Attualmente Selezionati:

Luc 22: MOF89

Evidenziazioni

Copia