Jean 6

Ndohi 5.000 ta ngècè skwi nʼndai

(Mt. 14,13-21; Marc 6,30-44; Luc 9,10-17)

1Te deɓaʼa Yèsu a mdo a wud woyam mbiaʼa Tibériade, te Galilee. 2A ndohi rèdèdèa ta dzodzora, te man ta rka nrkedai man a gu a sam ndohi matakwan. 3Aman Yèsu a golahi nengaʼa to do a géɗ za, a ta nzahi a pa. 4Ndul ndul Pâque, ngolala ndohi Juif.

5A Yèsu a nʼngul dai, a nrka ndohi ta haya a sam na, a ngaɗa na Philippe: Nga da shum skwi nʼndi ndohi haha tema? 6Ma haha a goɗa, a woya a njkédèʼa. Yèsu a sun skwi man a woya a ngiaʼa. 7A Philippe a ngaɗa na: Ko skwi te di gozhèm cèw a ga ta ma azɓai. 8Staɗ te va golahi nengaʼa, nzlembaɗ na André, kramam Simon Pierre, a ngaɗa na: 9Kra ngiɗè a zhè a haha, movar zlam a klèf cèw te rai. Aman a sam ndohi kumba, kala mè? 10A Yèsu a ngaɗa ta: Va-gaɗa ta ndohi aman ta nzahai! Kuza kumba a samaʼa. A ndohi 5.000 ta nzahai. 11Yèsu a nco movar, a nshüd gèɗ, a nkezla ta ndohi man ta nza tʼhai. Lèmèlèmè klèf ba, a ta ndau a ta ngeza. 12Aman a ngeza ta ma, Yèsu a ngaɗa ta golahi nengaʼa: Va-ɓica njèkèdiaʼa, da ksar na ɓai! 13A ta ɓicaʼa njekèdi movar zlam, man ta ndaha, gadagar 12.

14Aman ndohi ta rka nrkedi haha, man Yèsu a gau, ta gaɗa: Nengaʼa ndo nhadka ma, man ta gaɗa, a di a shkè a herkeda, a vava. 15Aman Yèsu a rka, ta woy a ta shkè a ta gshèʼa, a ta woy a ta fi a bai, a ndo na a deɓa a za zaʼa. Nengaʼa a géɗ na.

Yèsu a de a géɗ iyam mbiaʼa

(Mt. 14,22-27; Marc 6,45-52)

16Adakwaɗ golahi Yèsu to do a ma woyam, a to do ta a wurom, a ta shkè a wud woyam mbiaʼa a kokwar Capernaum. 17Vaɗ ma; Yèsu a mshkè a sam ta di ɓai. 18A kozlar a ngai, a nslambaɗda iyam te woyam mbiaʼa. 19A ta wurr wurom, a gi km 5, a ta rka Yèsu, man a shkè a géɗ iyam, ndul ndul a ma wurom, a ta gu zlau. 20A Yèsu a ngaɗa ta: I zhè! Kin gu zlau ɓai! 21A ta woy a ta cè a wurom, a nasa nasa wurom a ndikè a dzah.

Ndohi ta hesh Yèsu

22Te mangoslèmaʼa, ndohi nhayaʼa te wud woyam, a dzah, ta rka wurom ngiɗè ɓai, sèi man a golahi Yèsu, man ta shkè a vna. Ta suna, a ta gaɗa. Yèsu to do te pa a golahi nengaʼa ɓai. Sèi golahi nengaʼa man to do a vna. 23Te deɓaʼa wuromhi ngiɗè ta shkè te kokwar Tibériade, ndul ndul a sam man ta ndau movar, tedeɓ nshid gèɗ Bai Yèsu. 24Aman ndohi ta rkaʼa, Yèsu azɓai, a golahi nengaʼa tʼazɓai, tengaʼa ba to do a wuromhai, a ta shkè a kokwar Capernaum, a ta hèsh Yèsu.

Yèsu, movar nshèffè

25Aman ta ngotso tʼwud woyam mbiaʼa, ta gaɗa na: Rabbi, ka shkè haha a ngèmè? 26A Yèsu a mʼmbeɗa ta a ma: A vava a vava i gaɗa kinè, kin woy iyè a géɗ man kin rka nrkedi ka ɓai, aman a géɗ man kin ndau movar man a ngeza kinè. 27Kin gu mizlinè a géɗ skwi nʼndi man a di agédèsh na ɓai, aman a géɗ skwi man a va kinè nshèffè a mèdèp, nengaʼa man kra-ndo a di a va kinè, kra-ndo man Zhiklè, Bab na, a tsoko na va, 28A ta gaɗa na: Nga da gi be kè, aman nga gi mizlinè Zhiklè? 29A Yèsu a mʼmbeɗa ta a ma: Na haha mizlinè Zhiklè, aman kin cè nengaʼa man Zhiklè a zlündkoɗa, a ndav kinè. 30A ta gaɗa na: Ka ngra nga nrkedi mè, a nga ce ka a ndav? Ka gi mè? 31Bababhi nga ta ndau manna tʼhèshèkèɗ, ara man ta Windo te ɗèlèwèr Zhiklè: A mva ta movar te zhiklè.

32Yèsu a ngaɗa ta: A vava, a vava, i gaɗa kinè, Moise a mva kinè movar te zhiklè ka ɓai. Aman Bab ga a va kinè skwi nʼndi zuraʼa te zhiklè. 33Nasa movar Zhiklè, man a shkèhi te zhiklè, a va ta nshèffè a ndohi herkeda.

34Ta gaɗa na: Bai, va-nga movar haha pèc pècèk! 35Yèsu a ngaɗa ta: Iyè movar nshèffè. Ko wawa man a shkè a sam ga, mi a da keɗaʼa te deɓaʼa azbai; ko wawa man a cyè a ndav na, iyam a da dza na te deɓaʼa azɓai. 36Aman i gaɗa kinè, kin rkayè, aman kin cyè a ndav ɓai. 37Ndohi tèlèba man Bab ga a payè, ta shkè a sam ga. Ko wawa man a shkè a sam ga, i ckoɗauda azɓai. 38I shkè te zhiklè, a i gi skwi ara ndav ga man a woya ka ɓai. I shkè, aman i gi skwi man nengaʼa man a zlindekayè a woyaʼa. 39Nasa skwi man nengaʼa man a zlindekayè a woyaʼa: aman te va ndohi tèlèba man a payè, ko staɗ i zhidè azɓai, aman i slambaɗda ta a pats nʼndikèma skwai. 40Aman nasa skwi man nengaʼa man a zlindekayè a woyaʼa. Aman ko wawa man a rka kra na, a cè nengaʼa a ndav na, a ngècè nshèffè a mèdèp, a i slambaɗda a pats nʼndikèma skwai.

41A ndohi Juif ta gu ma a géɗ ma nengaʼa, man a gaɗa: Iyè movar man a shkè-hai te zhiklè. A ta gaɗa: 42Nengaʼa Yèsu, kra Joseph, man nga sun bab na, a mam na, ka ɓi ɗè? A gaɗ haha mè, man a gaɗa: I shkèhai te zhiklè? 43A Yèsu a mʼmbeɗa ta a ma: Kin gu ma a va kinè ɓai! 44Ndo ngiɗè a slaha a nshkè a sam ga azɓai, sèi man Bab ga man a zlindekayè a vütkoɗa, a i slèmbèɗè nengaʼa a pats nʼndikèma skwai. 45Ta Windo te ɗèlèwèr ndohi nhadka ma: Zhiklè a slebda ta tèlèba.

Ndo man a tsena ma Zhiklè, a shindè ma nengaʼa, nengaʼa a shkè a sam ga. 46A géɗ man ndo a rka Bab ga a di ɓai. Sèi nengaʼa man a shkè te Bi Zhiklè, nengaʼa a rka Bab na a di na. 47A vava, a vava, i gaɗa kinè: Ko wawa man a co a ndav na, a nʼngotso nshèffè a mèdèp. 48Iyè movar nshèffè. 49Bababhi kinè ta ndau manna tʼhèshèkèɗ, a ta bazl ta. 50Na haha movar man a shkèhai te zhiklè. Ndo man a ndiaʼa, a metsi azɓai. 51Iyè movar a nshèffè te pa, man a shkèhai te zhiklè. Ndo man a ndi movar haha, a nzi a nshèffè a mèdèp. A movar man i va na, zluèɗ va ga, man i vi a géɗ nshèffè ndohi herkeda.

52A ndohi Juif ta gu ndzoan a va ta, a ta gaɗa: Nengaʼa a slaha a va nga zluèɗ va na, aman nga ndiaʼa ɗè?

53A Yèsu a ngaɗa ta: A vava, a vava, i gada kinè: Aman kin ndi zluèɗ va krando azɓai, kin si Pombaz va nengaʼa azɓai, kin ngècè nshèffè te ndav kinè azɓai. 54Ndo man a ndi zluèɗ va ga, a si Pombaz va ga, a nʼngotso nshèffè a mèdèp, a i da slambaɗdeko nengaʼa auda a pats nʼndikè ma skwai. 55Zluèd va ga, skwi nʼndi nzuraʼa; Pombaz va ga, skwi nsi nzuraʼa. 56Ndo man a ndi zluèɗ va ga, a si Pombaz va ga, a nzi te iyè, a iyè i nzi te nengaʼa. 57Ara man Bab ga, man a zhè a nshèffè, a zlindekayè, a i nzi a nshèffè man a Bab ga, lèmèlèmè ko wawa man a ndi zluèɗ va ga, a nzi a nshèffè a géɗ ga. 58Na haha movar man a shkèhai te zhiklè. Ara man a bababhi kinè ka ɓai, man ta ndau, a ta bazl ta. Ndo man a ndi movar haha, a nzi a nshèffè a mèdèp. 59Ma haha a njè ta te gi njèngè ma Zhiklè te kokwar Capernaum.

Ma nshèffè a mèdèp

60Golahi nengaʼa kumba, man ta tsenaʼa, ta gaɗa: Na haha ma mwuɗitpa, nslaha man a ncinèʼa wa? 61Aman Yèsu a sun te ndav na, golahi nengaʼa ta gu ma a géɗ ma haha, a ngaɗa ta: Ma haha a slafadama kinè sak dè? 62Aman te deɓaʼa kin da rka kra-ndo, man a dè deɓaʼa sam man a shkè te pa, kè? 63Sèi Mèzhèɓ Zhiklè a vi nshèffè. Zluèɗ-va-ndo, skwi ambalai. Ma man i gèɗèʼa, nengaʼa Mèzhèɓ Zhiklè a nshèffè. 64Aman ndohi tsaɗ tsaɗ ta zhè te ndev kinè, ta cè a ndav azɓai. Te nhinkaɗ na Yèsu a sen ta ndohi man ta da cè a ndav azɓai, a ndo man a da ga na ri a gèɗ. 65A ngaɗa ta: Gar haha i gaɗa kinè: Ndo ngiɗè a slaha a nshkè a sam ga azɓai, sèi Bab ga a va na civèɗ.

66Te deɓ nasa golahi nengaʼa kumba ta men ta a deɓa, a ta dzadzara te deɓa asaɓai.

67A Yèsu a ngaɗa ta 12: Kinè ba, kin woy a kin min kinè a deɓa dè? 68A Simon Pierre a ngaɗa na: Bai, nga dè a sam ngè? Ka ngots ma nshèffè a mèdèp. 69A nga co a ndav nga, a nga suna, ka, ka ndo nkezlaʼa man a shkè te Bi Zhiklè. 70Yèsu a ngaɗa ta: I par kinè 12 ka ɓi dè? Staɗ te va kinè, nengaʼa ndo madzagai. 71A ngoɗ ma a géɗ Judas Iscariot, kra Simon, nengaʼa man te deɓa a nʼnga na ri a gèɗ. Nengaʼa staɗ te va 12.

Attualmente Selezionati:

Jean 6: MOF89

Evidenziazioni

Copia