मत्ती 11
11
ईसु और जल संस्कार दैनै बारो यहून्ना
(लूका 7:18–35)
1अपने भेजे भए बारैह चेलौ कै समजानै के बाद ईसु बहाँ सै चलो गओ और गलील मुलक के सैहरौं मै परचार करल लगो। 2यहून्ना नै जब जेल मै मसी के कामौ की चरचा सुनी तौ अपने चेलौ कै उस्सै जौ पूँछनै भेजो, 3कै, का आनै बारो तूई है, या हम किसी दूसरे को पैंड़ो देखैं? 4ईसु नै उनकै जबाब दओ, “जाऔ जो कुछ तुम सुनौ और देखौ हौ, बौ सब जाकै यहून्ना कै बतादो। 5कै अन्धे देख रए हैं, लंगड़े चल रए हैं, कोढ़ी सुद्द करे जा रए हैं, बैहरे सुन रए हैं, मुरदे जिन्दे करे जा रए हैं, और कंगालौ कै अच्छी खबर सुनाई जा रई है। 6और धन्न है बौ, जो मेरे ऊपर बिसवास करै है।”
7जब बे बहाँ सै चल दए, तौ ईसु यहून्ना के बारे मै लोगौ सै कैललगो, “तुम बियाबान मै का देखनै गए हे? का हवा सै हलते भए ढरसल कै? 8फिर तुम का देखनै गए हे? देखौ, बढ़िया लत्ता पैहरे भए आदमी कै? ना! बढ़िया लत्ता पैहरनै बारे तौ राजमहलौं मै रैहबैं हैं। 9तौ फिर काए गए हे? का किसी नबी कै देखनै कै? हाँ, मैं तुमसै कैरओ हौं, नबी सै बी बड़े आदमी कै। 10जौ बौई है जिसके बारे मै लिखो है, देखौ, मैं अपने दूत कै तेरे अग्गे भेज रओ हौं, जो तेरे अग्गे-अग्गे तेरो रस्ता तईयार करैगो। 11मैं तुमसै सच कैरओ हौं, कै जो बईयरौं सै जलमे हैं, उनमै सै यहून्ना जल संस्कार दैनै बारो बड़ो है। फिर बी सुरग के राज मै छोटे सै छोटो आदमी बी यहून्ना सै बड़ो है। 12#लूका 16:16यहून्ना जल संस्कार दैनै बारे के टैम सै आज तक लोग सुरग के राज के ताँई जोर दे रए हैं और जिनमै दम है बे उसकै छीन्नै की कोसिस कर रए हैं। 13यहून्ना तक के नबी, और मूसा के नियम सिरप भबिसबानी कर सके। 14#मत्ती 17:10–13; मरकु 9:11–13तुम चाँहौ, तौ मेरी बात मान लो, एलिया जो आनै बारो हो, बौ जौई है। 15जिसके सुन्नै के कान हौं, बौ सुन ले।
16 “मैं जा पीड़ी की तुलना किस्सै करौं? बे उन बालकौ के जैसे हैं, जो बजार मै बैठे भए एक दूसरे सै चिल्लाकै कैबै हैं। 17कै हमनै तुमरे ताँई ढोल बजाए, पर तुम ना नाचे, हम रोए और तुमनै छाती ना पीटी। 18कैसेकै यहून्ना औरौं की हाँई ना खातो आओ ना पीतो, और बे कैबै हैं कै बामै दुसट आत्मा है। 19आदमी को लौंड़ा खातो पीतो आओ, और बे कैबै हैं कै देखौ, ‘जौ आदमी पेटू और पियक्कड़ है, चुंगी लैनै बारे और पापिऔं को दोस्त है।’ पर गियान अपने कामौ मै सच्चो ठैराओ गओ है।”
अबिसवासिऔं कै ईसु की चितौनी
(लूका 10:13–15)
20तब ईसु उन सैहरौं कै धिक्कारल लगो जिनौनै उसके जादातर चमत्कार देक्कै बी अपने पापौं सै मन ना फिराओ। 21हाय, खुराजिन और बैतसैदा सैहर के लोगौ, जो चमत्कार के काम तुमरे बीच मै करे गए हैं, अगर बे सूर और सैदा सैहरौं के लोगौ के बीच मै करे जाते तौ, बे ना जानै कब के बोरी पैहरकै और छार लगाकै अपने पापौं सै मन फिरा लेते। 22पर मैं तुमसै कैरओ हौं, कै नियाय के दिन तुमरी हालत सूर और सैदा की हालत सै जादा बुरी होगी।
23 “और अरे, कफरनहूम के लोगौ! का तुमकै सुरग तक ऊँचो उठाओ जागो? ना! तुमकै तौ अधलोक मै नरक तक नीचे गिरा दओ जागो, कैसेकै जो चमत्कार तुम्मै करे गए हैं, अगर सदोम मै करे जाते, तौ बौ जघै आज तक बनी रैहती। 24#मत्ती 10:15; लूका 10:12पर मैं तुमसै कैरओ हौं कै नियाय के दिन तेरी हालत सदोम की हालत सै जादा बुरी होगी।”
ईसु कै अपनानै बारौ कै सुक चैन
(लूका 10:21,22)
25उसई टैम ईसु नै कैई, “हे परम पिता, सुरग और धरती के परभु, मैं तेरो धन्नबाद करौं हौं, कै तैनै जे बात गियानिऔ और समजदारौं सै छिपा कै, बालकौ के ऊपर परकट करीं हैं। 26हाँ, परम पिता, कैसेकै तेकै जौई अच्छो लगो।
27 #
यहून 3:35;
यहून 1:18; 10:15 “मेरे अब्बा नै मैंकै सब कुछ सौंपो है, अब्बा कै छोड़कै कोई बी लौंड़ा कै ना जानै है, इसई हाँई अब्बा कै कोई बी ना जानै है, सिरप लौंड़ा जानै है और बौई, जिसके ऊपर लौंड़ा उसकै परकट कन्नो चाँहै है।
28 “हे थके-माँदे और बोज सै दबे भए लोगौ, मेरे धौंरे आऔ, मैं तुमकै सुक चैन दंगो। 29मेरो जुआ अपने ऊपर उठा लो, और मैंसै सीकौ, मैं सौभाब सै नमर और दीन हौं, और तुम अपने मन मै सान्ति पाऔगे। 30कैसेकै मेरो जुआ सरल और मेरो बोज हल्को है।”
Attualmente Selezionati:
मत्ती 11: TKB
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
New Life Compute Institute [NLCI] - CC BY-NC-ND 4.0
