यहून्नो 5
5
निंज़ो सारे साल बे टेहची मीहबी ठीक लहज़ी
1दिऊ थोड़े अरे टेमो थल यहुदी मीहतु इच्च़ा त्यार शुई, दंङ यीशु यरूशलेम शहरो हखा इलि। 2यरूशलेम शहरंङरिंड मा फाटको कछंङ इच्च़ा कुण्ड़ तोहई अपि इब्रानी भाषा रिंड बैतहसदा कुट्रा तोईरे; दोऊ पिला हासी ङा ब्रम्दा तोईरे। 3देहर महस टेहची, कांणे, लट्टे ए कारची अंङ ओ दोरे तिऊ त्रुलज़िमी उम्मीद रिंड दोहर बंगजा तोईरे। 4छना कुचे ठेहराएसी टेमारिंङ परमेश्वरो स्वर्गदूतारे कुंडा रिंड तकसा ती बि तुरफी लहज़ातेर: तिऊ तुरफी लहज़ी थल अरीला तुई कुण्ड़ो अंद्रेग य्वाते दुह अईन शुहचे य्वाते चाहे दोऊ अंऊला बीमारी छरिंङ माह शुई। 5दोर्तिंङ इच्च़ा मीह तोहई, अरी निंज़ो सारे साल बेहच़ी टेहची तोहई। 6यीशु ज़ि दुह दोर्तिंङ शुहबी रंङ साते दंङ दीह ञेंह कि दुह महस ध्याड़ा बे दी हलाता रिंङ तोह, दुह रुहक्ती, “छि कांह ठीक शुबी ततना?”
7दुह टेहची दोई जुबाब रेंई, “हे प्रभु, गिऊ कछंङ अरीला मीह माह कि अपेहल ती त्रुलबि लोहर, दंङ गिह्बी तक्सिमी थल्जी मदत लोहर; गेह कुण्ड़ा रिंङ इबिमी कोशिश लहज़ातग पर अरीया ऊई गिहबे तुई तक्सा य्वातोर।” 8यीशु ज़ि दोबि कुंई, “खड़े अहच़ु, केनोह बिस्तरा कुरच़ु, दंङ जो।” 9दुह मीह दोहथले ठीक शुहचे इलि, दंङ एनोह बिस्तरा कुरच़ा देखा नोखा ज़ोई लेहती।
10अपेहल दिह भत्ते धिर शुहते दुह अरामो ध्याड़ा तोहई दंङ यहुदी नेता ज़ि दोबि अरी ठीक शुहचे तोहई, कुट्री लेहतिर, मुसा ओ कानूनो हिसाबे ता “तोग ता अरामो ध्याड़ा शुह, कनिंङ बिस्तरा उठाएच़ी माह जूंस।” 11दोई दोतिंङ जुबाब रेंई, “अच़ि गेह अईन लह्तो, दोई ए गेरंङ साते कुहतो, ‘केनोह बिस्तरा उठातु दंङ जो।’ ” 12दोच़ी दुह रुहक्ती, दुह अरी मीह शुह अच़ि करंङ साते कुहतो, “बिस्तरा कुरच़ु, दंङ जो?”
13पर अरी अईन शुहचे इल्दे दोई माह ञेंहच़ाते कि दुह अरी शुह; छना कुचे दुह ठहरि रिंङ भीड़ शुबि रंङ साते यीशु दोरच़ी अच़ा इलि। 14दी गप्पो थल दुह मीह यीशु बि मंदिरो ल्वाड़िंङ दोई। यीशु ज़ि दोबि कुंई, “खंणु, कांह अईन शुहचे इलोन: यह्च़ा पाप थालोहू, झांह शुबी मेस कि झांह लेह रंङ साते कांह टोहकठे छा मोह्ड़े मुशकिल अपतो।” 15दुह मीहे इलजे यहुदी नेता तिंङ कुंई कि अच़ि गेह ठीक लहते, दुह यीशु शुह। 16दी बजह च़ि यहुदी नेतारे यीशु बि परेशान लहज़ी लेहतिर, छना कुचे दोई झांह ठ्रोह कम अरामो ध्याड़ा रिंङ लाहते। 17दिरंङ यीशु ज़ि दोतंङ कुंई, गिऊ बाह हमेशा कम लहज़ा दिऊ थल्जी गिह्बी ला कम लंहि जूंस, 18छना कुचे यीशु ज़ि दिह गप्पा कुहते दिह बजह च़ि यहुदी नेतारे दोबि सच़िमी ऊई ला महसे कोशिश लहज़ी लेहतिर, छना कुचे यीशु ज़ि अरामो ध्याड़ो कानून मा मनेक्च़ते, पर परमेश्वरा बि एनोह बाह कुचे ऐनाबि परमेश्वरो बराबर चेहच़ाते।
कटुऊ अधिकार
19दिरंङ यीशु ज़ि दोतंङ साते कुंई, गेह केतंङ साते हेले कुट्रातग, गेह घेंङौ दोरच़ी छले लेह मरच़ि, सिर्फ दुह ए अंऊ पिता परमेश्वरा बि लेही खंड्रातग, छना कुचे अंऊ-अंऊ कम दोई लहज़ा दोतिंङ गेह ला ध्वांए लहज़ातोग। 20झांह लेह पिता परमेश्वर गेरंङ साते दाह लहज़ा, दंङ अंऊ-अंऊ कम दोई एनेह ला दुह भत्ते गिह्बी कंड्रा; दंङ दोई दिहबे ला मोह्ड़े कम गिह्बी कंबतो, ताकि केहरे खांई हेरान शुबी जूंस। 21छना पिता परमेश्वर सीए मीहतिंङ षीङे ला, ध्वांए गेह ला अतिंङ जुंज़ातग दोतिंङ षीङमी लहज़ातग। 22-23धोंण ए मशत, पिता परमेश्वर अतुला न्याय माह लहज़ा, छना ठ्रोह भत्ते मीहरे पिता परमेश्वर बि आदर रंड्रातोर ध्वांए दोच़ी गिह्बी ला आदर रांई, पिता परमेश्वरे गिह्बी न्याय लहज़िमी भत्ते अधिकार रांहषी ततो। अगर अच़िया गिह्बी आदर माह रंड्रातोर ता दोई पिता परमेश्वर बि ला आदर माह रंड्रा, अच़ि गिह्बी चरच़तो।
24गेह केतंङ साते हेले कुट्रातग, अंऊ गिऊ शिक्षा रेड्रा ते गिह्बी च़रच़ा दोऊ टोहकठे विशवास लहज़ातोर, अनंत जीवन दोऊ शुह; दंङ दोबि सज़ा महा रमोर पर दोरे अनंत कालो सीमी दोरच़ी बचेके इलोर दंङ तुई ए खरकोई जीवनारिंङ अच़ा इलोर। 25गेह केतंङ साते हेले कुट्रातग दुह टेम अपि लेहकी तोह, दंङ हेंतेग ए तोह, अंऊर सिए दोरे गिऊ सग थापोर, दंङ अच़ि रेड्रोर दुह भत्तेरे हमेशाओ थल्जी श्रींङमोर।
26छना कुचे अंऊ रीतिरंङ पिता परमेश्वरे ऐनाह जीवन तहच़ा, ध्वांए दोई गिह्बी ला दिह अधिकार रांहषी ततो कि गेह घेंङा ए जीवन तोईग; 27छना कुचे गेह मीहू योह शुगाह, पिता परमेश्वरे गिह्बी भत्ते मीहतु न्याय लहज़िमी अधिकार रांहषी ततो। 28दिरंङ हेरान था शुई; छना कुचे दुह ध्याड़ा अपि लेहकी तोह कि, भत्ते मीहरे अरी सीए इलजी तोतोर, दोऊ सग रेड्रा दोरे श्रींङे शुहचे अहच़ा योर। 29अंऊ मीहरे रुठे जीवन बिताएच़ातोर, दोरे अनंतो जीवन खोकसिमी थल्जी श्रींङे योर दंङ दोरे अरी मांजी रिंङ एनोह जीवन बिताएच़ातोर दोरे दोषी शुहबिमी थल्जी श्रींङमोर।
यीशु पाहठी गवाही
30“गेह घेंङौ दोरच़ी छले लेह मरच़ि; गेह मीहतु न्याय ध्वांए लहज़ातग छना पिता परमेश्वर गिह्बी दोतु न्याय लहज़िमी थल्जी कुट्रा, दंङ गिऊ न्याय सच्चा तोह; छना कुचे गेह घेंङौ हिटी मशत, पर घेंङौ च़रच़ा दोऊ हिटी जुंज़ातग।
31अगर गेह घेंङौ ए गवाही रमोग ता गिऊ गवाही सच्चा माह। 32इच्च़ा अई तोह अंऊ पिता परमेश्वर तोह, दोई ला गिऊ पाहठी गवाही रंड्रा, दंङ गेह ञेंहच़ातग कि गिऊ अंऊ गवाही दोई रंड्रा दुह सच्चा शुह। 33केहच़ी यूहन्ना बपतिस्मा रंड्रा ओ कछंङ उजाब रंड्रा चरच़ातंई दंङ दोई सच्चाई ऊ गवाही रेंई। 34पर गेह घेंङौ पाहठी मीहतु गवाही माह जुंज़ातग। पर गेह केतिंङ दुह गवाही ऊ पाहठी कुहतग अंऊ यूहन्ना ज़ि रेंई, कि केहच़ी उद्धार खोक्पोंई। 35यूहन्ना इच्च़ा संजुवा ठ्रोह तोहई दंङ केतिंङ थोड़े अरे टैम दोऊ छंङीरिंङ बंङज़ी रुठे अति।
36गिऊ दोर्तिंङ यूहन्ना ओ गवाही बे महस मोह्ड़े गवाही तोह। दुह कम अंऊ पिता परमेश्वरे गिह्बी पुरा लहच़िमी थल्जी रांहषी ततो, दोई ए गिऊ पाहठी गवाही रंड्रा। अंऊ कम गेह लहज़ातग दोऊ पाहठी दोई गवाही रंड्रा कि पिता परमेश्वरे गेह च़रसी शुगाह। 37दंङ पिता परमेश्वर अच़ि गेह च़रसी शुगाह, दोइए गिऊ गवाही रेंई! केहच़ी माह दोऊ सग थशातंई, दंङ माह दोऊ केनातु तुईज़ी तंङातंई। 38दंङ दोऊ बचन सेहम रिंङ मा तहच़ातंई, छना कुचे केहच़ी गिऊ टोहकठे विशवास माह लहज़ातनी अतिंङ परमेश्वरे च़रसी शुह। 39केहरे पवित्रशास्त्रारिंङ पड़ेक्च़ातंई, छना कुचे समझेक्च़ातंई कि दोर्तिंङ अनंत जीवन केतिंङ खोकसा; दंङ दीह दुह ए शुह अच़ि गिऊ गवाही रंड्रा; 40पर केहरे अनंत जीवन खोखकसिमी थल्जी गिऊ कछंङ अपि माह जुंज़ातंई।
41गेह मीहतु दोरच़ी षटणो उम्मीद माह तच़ातग। 42पर गेह केतिंङ ञेंहच़ातग कि केहरे केनातु सेहमे परमेश्वरारंङ साते दा माह लहज़ातंई। 43गेह घेंङौ पिता परमेश्वरो अधिकारा रंङ साते अंज़े शुगाह दंङ केहच़ी गिह्बी ग्रहण माह लहज़ातंई; अगर अरीया एनोह अधिकाररंङ साते अपतो, ता दोबि ग्रहण लेह केओन। 44केहरे गिऊ टोहकठे विशवास ले मरपोंई, छना कुचे केहच़ी इदिऊ अईदिऊ षटणा जुंज़ातंई, दंङ केहरे इच्च़ा परमेश्वरो दोरच़ी षटणा खोखकसिमी कोशिश माह लहज़ातंई।
45दी था समझेक्तेंई, कि गेह पिता परमेश्वरो तुईज़ी केहतु टोहकठे दोष लगाएपोग, केहतु टोहकठे दोष लगाएच़ा ता मूसा ओ कानून तोह, अतु टोहकठे केहच़ी उम्मीद लहज़ातन। 46अगर केहच़ी मूसा ओ टोहकठे विशवास लंहीयां ता गिऊ टोहकठे ला विशवास लहज़ी तोहई, दिऊ थल्जी कि दोई गिऊ पाहठी च़ेहसी शुह। 47पर अगर केहच़ी मूसा ओ च़ेहसी गप्पो टोहकठे विशवास माह लहज़ातंई, ता केहच़ी पक्का ए गिऊ टोहकठे विशवास माह लोहनी कि गेह छि कुट्रातग।”
Attualmente Selezionati:
यहून्नो 5: LBFNT
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
