ଯୋହନ୍ 1
1
ଇଶ୍ଵରାର୍ ହଇସି ମାନାଇ ରୁପ୍ ଦ୍ରି ଆସିରିଲା
1ହୁର୍ବେ ବାକ୍ୟ ରିଲି, ସେ ବାକ୍ୟ ଇଶ୍ଵରାର୍ ସ୍ଙ୍ଗେରିଲି, ଆର୍ ସେ ବାକ୍ୟ ନିଜେ ଇଶ୍ୱର୍ ରିଲା। 2ସେ ହୁର୍ତିବି ତିଆର୍ ଅଉତା ହୁର୍ବେ ହ୍ଣି ଇଶ୍ଵରାର୍ ସ୍ଙ୍ଗ୍ ରିଲା। 3ସେ ଜ୍ଗତାର୍ ସ୍ବୁ ତିଆର୍ କ୍ଲାଆଚେ, ଆରେକ୍ ଜୁଇସ୍ବୁ ତିଆର୍ ଅଇଲିଆଚେ, ତାର୍ ବିନା ଜ୍ଗତାର୍ ଗଟେକ୍ ହେଁ ଜିନିଷ୍ ତିଆର୍ ଅଇନ୍କେରେ। 4ତାର୍ ତ୍ଇ ଜୀବନ୍ ରିଲି ଆର୍ ସେ ସ୍ବୁ ଲକ୍ମ୍ନ୍କାର୍ ଗିନେ ଉଜାଳ୍। 5ସେ ଉଜାଳ୍ ଅନ୍ଦାର୍ ବିତ୍ରେ ସ୍ବୁବ୍ଳ୍ ରେମ୍ଲି, ଅନ୍ଦାର୍ କ୍ବେହେଁ ସେ ଉଜାଳ୍କେ ଡାହୁ ନାହାରେ। 6ଇଶ୍ଵରାର୍ ଲ୍ଗେ ହ୍ଣି ହ୍ଟାଇଲା ଏକ୍ଲା ନ୍ର୍ ମାନାଇ ଆଇଲା। ତାର୍ ନାଉଁ ଯୋହନ୍। 7ଯୋହନ୍ ଜ୍ନ୍କ୍ରି ଉଜାଳ୍ ବିଷୟେ ପର୍ଚାର୍ କ୍ରେଦ୍, ଆର୍ ତାର୍ ଗିନେ ହୁର୍ତିବିର୍ ଲକ୍ମ୍ନ୍ ଜ୍ନ୍କ୍ରି ଇ ସୁବ୍କ୍ବର୍ ଶୁଣିକ୍ରି ବିଶ୍ବାସ୍ କ୍ର୍ତି, ସେତାର୍ଗିନେ ସେ ପର୍ଚାର୍ କ୍ରୁକେ ଆସିରିଲା। 8ଯୋହନ୍ ନିଜେ ସେ ଉଜାଳ୍ ନ୍ରିଲା, ମ୍ତର୍ ସେ ଉଜାଳ୍ ବିଷୟେ ପର୍ଚାର୍ କ୍ରୁକେ ଆସିରିଲା। 9ଜୁଇ ସ୍ତ୍ ଉଜାଳ୍ ହୁର୍ତିବିକେ ଆସିକ୍ରି ସ୍ବୁ ଲକ୍ମ୍ନ୍କେ ଉଜାଳ୍ ଦେଇଦ୍, ସେ ଉଜାଳ୍ ହୁର୍ତିବି ଲ୍ଗେ ଆସ୍ତିରିଲା। 10ସେ ହୁର୍ତିବି ଲ୍ଗେରିଲା ଆର୍ ହୁର୍ତିବି ତାର୍ ଗିନେ ତିଆର୍ ଅଇଲିଆଚେ, ତ୍ବେ ହୁର୍ତିବିର୍ ଲକ୍ମ୍ନ୍ ତାକେ ଚିନୁ ନ୍ହାର୍ଲାଇ। 11ସେ ତାର୍ ନିଜାର୍ ରାଇଜ୍କେ ଆଇଲା, ମ୍ତର୍ ତାର୍ ନିଜାର୍ ଲକ୍ମ୍ନ୍ ତାକେ ଚିନୁ ନ୍ହାର୍ଲାଇ। 12ମ୍ତର୍ ଜ୍ତେକ୍ ଲକ୍ମ୍ନ୍ ତାକେ ମ୍ନ୍କ୍ଲାଇ ଆର୍ ତାର୍ ଉହ୍ରେ ବିଶ୍ବାସ୍ କ୍ଲାଇ, ସେସ୍ବୁ ଲକ୍ମ୍ନ୍କେ ସେ ଇଶ୍ଵରାର୍ ହଇସି ଅମ୍କେ ଅଦିକାର୍ ଦିଲା। 13ସେମ୍ନ୍ ଉବାଆୟା ମ୍ନ୍କାର୍ ତ୍ଇହ୍ଣି, କି ଇ ଗଟେକ୍ ଲକାର୍ ମ୍ନ୍ ହ୍ର୍ ନାଇ କି, ଲକ୍ମ୍ନ୍କାର୍ ଇଚାୟ୍ ଜ୍ର୍ନ୍ ଅଇଲା ହଇସି ହର୍ ନାଇ। ମ୍ତର୍ ଇଶ୍ୱର୍ ଲ୍ଗେହ୍ଣି ଜ୍ର୍ନ୍ କ୍ଲାଆଚେ। 14ଆର୍ ସେ ବାକ୍ୟ ଗଟେକ୍ ମାନାଇ ରୁପ୍ ଅଇକ୍ରି ତାର୍ ସ୍ତ୍ ଆର୍ ଦୟା ସ୍ଙ୍ଗ୍ ଅମାର୍ ଲ୍ଗେ ବାସାକ୍ଲା, ତାର୍ ଗିନେ ଅମିମ୍ନ୍ ଇଶ୍ଵରାର୍ ମଇମା ଦ୍କ୍ଲୁ। ଇ ମଇମା ସ୍ର୍ଗେ ରିଲା ତାର୍ ଉବାସିର୍ ଗଟେକ୍ ହ୍କା ହଇସି ହାଇଲା ଆଚେ। 15ଯୋହନ୍ ଲକ୍ମ୍ନ୍କେ ତାର୍ ବିଷୟେ ବ୍ଡ୍ ଟଣ୍ତ୍କ୍ରି ପର୍ଚାର୍ କ୍ରୁକେ ଦ୍ର୍ଲା, “ମୁଇ ଜୁଇ ମାନାଇର୍ ବିଷୟେ କ୍ଉତିରିଲେ, ଏ ଅମ୍ଲା ସେ ମାନାଇ। ସେ ମର୍ହ୍ଚେ ଆସୁଲା, ସେ ମର୍ତ୍ଇହ୍ଣି ବେସିବ୍ଡ୍, ଯେ କି ମର୍ ଜ୍ର୍ନ୍ ନ୍ଉତା ଆଗେହ୍ଣି ଆଚେ।” 16ସେ ଅମୁକ୍ମ୍ନ୍କେ ବେସି ଲାଡ୍ କ୍ରୁଲା ଲାଗି ଅମିମ୍ନ୍ ଦୟା ହାଇଲୁ ଆର୍ ଆଶିର୍ବାଦ୍ ଉହ୍ରେ ଆଶିର୍ବାଦ୍ ହାଇଲୁ ଆଚୁ। 17କାଇତାକ୍ ବିଦିବିଦାନ୍ ମୋଶା ବବିଶତ୍ କ୍ତା କ୍ଉତାଲକ୍ ଆନ୍ଲା, ମ୍ତର୍ ଇଶ୍ଵରାର୍ ସ୍ତ୍ ଆର୍ ଦୟା ଯୀଶୁ ଖ୍ରୀଷ୍ଟ ଜ୍ଗତେ ଆନ୍ଲା। 18ଇଶ୍ଵର୍କେ କେ କ୍ବେ ନ୍ଦେକି ଆଚେ, ମ୍ତର୍ ତାର୍ସ୍ଙ୍ଗ୍ ରିଲା ତାର୍ ଗଟେକ୍ ହ୍କା ଲାଡାର୍ ହଇସି ତାକ୍ ଜାଣାଇଲା ଆଚେ।
ଡୁବେନ୍ ଦେତା ଯୋହନାର୍ ପର୍ଚାର୍
19“ତୁଇ କେ?” ବ୍ଲି ହ୍ଚାରୁକେ ଯିରୁଶାଲମ୍ ସ୍ହରାର୍ ଯିହୁଦି ନେତାମ୍ନ୍ କ୍ତେକ୍ ଜାଜକ୍ ମ୍ନ୍କେ ଆର୍ ଲେବୀ ମ୍ନ୍କେ ଯୋହନାର୍ ଲ୍ଗେ ହ୍ଟାଇଲାଇ, 20ତ୍ବେ ଯୋହନ୍ କାଇରି ଲୁକାଇ ନ୍କେରି କ୍ରି କଇଲା, “ମୁଇ ଖ୍ରୀଷ୍ଟ ନାଇ।” 21ସେତାକ୍ ସେମ୍ନ୍ ତାକେ ହ୍ଚାର୍ଲାଇ, “ତ୍ବେ ତୁଇ କେ? ତୁଇ କାଇରି ଏଲିୟ କି?” ଯୋହନ୍ କଇଲା, “ମୁଇ ଏଲିୟ ନାଇ।” ଆରେକ୍ ସେମ୍ନ୍ ତାକେ ହ୍ଚାର୍ଲାଇ, “ଅମିମ୍ନ୍ ଜୁଇ ବବିଶତ୍ କ୍ତା କ୍ଉତା ଲକ୍କେ ଜାଗିଆଚୁ ତୁଇ କି ସେ ମାନାଇ।” ଯୋହନ୍ କଇଲା, “ନାଇ।” 22ସେତାକ୍ ସେମ୍ନ୍ ତାକେ ହ୍ଚାର୍ଲାଇ, “ତ୍ବେ ତୁଇ କେ ସେରି ତୁଇ ଅମୁକେ ଜାଣାଉ? କାଇତାକ୍ ବ୍ଲେକ୍ ଅମିମ୍ନ୍ ଜୁଇସ୍ବୁ ଲକ୍ମ୍ନ୍ ହ୍ଟାଇ ଆତ୍ତି ଅମିମ୍ନ୍ ଜାଇକ୍ରି ସେମ୍ନ୍କେ କ୍ମ୍କେ ହ୍ଳେଦ୍। ତ୍ବେ ତୁଇ ତର୍ ବିଷୟେ କାଇରି କ୍ମ୍ଲିସ୍?” 23ଯୋହନ୍ କଇଲା, “ଯିଶାଇୟ ବବିଶତ୍ କ୍ତା କ୍ଉତାଲକ୍ କଇରିଲା ହର୍ ମୁଇ ଗଟେକ୍ ଶୁନ୍ସାନ୍ ଜାଗାଲ୍ଗେ ବ୍ଡ୍ ଟଣ୍ତ୍କ୍ରି ମାପ୍ରୁର୍ ଗିନେ ବାଟ୍ ଜ୍ତୁନ୍ କ୍ରୁକେ କ୍ଉତିରିଲା ମାନାଇ।” 24ଆରେକ୍, ଫାରୂଶୀମ୍ନ୍ ହ୍ଟାଇ ରିଲାର୍ କ୍ତେକ୍ ଲକ୍ମ୍ନ୍ ଯୋହନ୍କେ ହ୍ଚାର୍ଲାଇ। 25“ଯଦି ତୁଇ ଖ୍ରୀଷ୍ଟ ନାଇ, ଏଲିୟ ନାଇ କି ସେ ବବିଶତ୍ କ୍ତା କ୍ଉତାଲକ୍ ନଇ, ତ୍ବେ କାଇତାକ୍ ତୁଇ ଲକ୍ମ୍ନ୍କେ ଡୁବେନ୍ ଦେମ୍ଲିସ୍?” 26ଯୋହନ୍ ସେମ୍ନ୍କେ କଇଲା, “ମୁଇ ହାଣିଏ ଡୁବେନ୍ ଦେମ୍ଲେ। ମ୍ତର୍ ତୁମାର୍ ବିତ୍ରେ ଅବେ ଗଟେକ୍ ମାନାଇ ଆଚେ ତୁମିମ୍ନ୍ ତାକ୍ ନ୍ଚିନାସ୍। 27ସେ ମର୍ହ୍ଚେ ବେଗି ଆସେଦ୍, ମୁଇ ତାର୍ ହାଣ୍ତାଇର୍ ଗ୍ଟି ଇଟାମ୍କେ ହେଁ ଜଗ୍ଯ ନଇ।” 28ଇ ସ୍ବୁ ଗଟ୍ଣା ଯର୍ଦନ୍ ଗାଡ୍ ସେହାଟି ରିଲା ବେଥ୍ନିଆ ସ୍ହରେ ଗଟିରିଲି, ଡୁବେନ୍ ଦେତା ଯୋହନ୍ ସେତି ଡୁବେନ୍ ଦେତିରିଲା।
ଇଶ୍ଵରାର୍ ମେଣ୍ଢାହିଲା
29ତାର୍ ହ୍ଚେ ଯୀଶୁ ତାର୍ ଲ୍ଗେ ଆସ୍ତି ରିଲାର୍ ଯୋହନ୍ ଦ୍କି କଇଲା, “ଦ୍କା ଏ ହ୍କା ଇଶ୍ଵରାର୍ ମେଣ୍ଢାହିଲା, ଯେ କି ହୁର୍ତିବିର୍ ପାପ୍ସ୍ବୁ ବୟ୍କ୍ରି ନେଇଦ୍। 30ମୁଇ ଜାର୍ ବିଷୟେ କଇରିଲେ, ସେ ମର୍ହ୍ଚେ ଆସୁଲା, ସେ ଇଲକ୍, ସେ ମର୍ତ୍ଇହ୍ଣି ବେସିବ୍ଡ୍ ଆର୍ ସେ ମର୍ ଜ୍ର୍ନ୍ ଅଉତା ଆଗେହ୍ଣି ଆଚେ। 31ତାକେ ମୁଇ ହେଁ ଆଗେ ଖ୍ରୀଷ୍ଟ ବ୍ଲି ଜାଣି ନ୍ରିଲେ, ମ୍ତର୍ ସେ ଜ୍ନ୍କ୍ରି ଇସ୍ରାଏଲ୍ ଲକ୍ମ୍ନ୍କାର୍ ଆଗେ ଜାଣା ହ୍ଳେଦ୍, ସେତାର୍ଗିନେ ମୁଇ ହାଣିଏ ଡୁବେନ୍ ଦେମ୍କେ ଆସିଆଚି।” 32ଡୁବେନ୍ ଦେତା ଯୋହନ୍ କଇଲା, “ପବିତର୍ ଆତ୍ମା ହାରୁଆ ହର୍ ଅଇ ଆକାଶେ ହ୍ଣି ଆସି ଯୀଶୁର୍ ଉହ୍ରେ ବ୍ସ୍ତାର୍ ମୁଇ ଦ୍କ୍ଲେ। 33ମୁଇ ହେଁ ତାକେ ସେ ମାନାଇ ବ୍ଲି ଜାଣି ନ୍ରିଲେ। ମ୍ତର୍ ଡୁବେନ୍ ଦେମ୍କେ ଜୁଇ ଇଶ୍ୱର୍ ମକେ ହ୍ଟାଇଲା, ସେ ମକେ କଇରିଲା, ‘ଜୁଇ ମାନାଇର୍ ଉହ୍ରେ ପବିତର୍ ଆତ୍ମା ଆସିକ୍ରି ବ୍ସ୍ତାର୍ ତୁଇ ଦ୍କ୍ସି, ସେ ହ୍କା ପବିତର୍ ଆତ୍ମାଇ ଡୁବେନ୍ ଦେତା ମାନାଇ।’ 34ଆର୍ ମୁଇ ଇ ଗଟ୍ଣା ଦ୍କ୍ଲେ ଆଚି ତ୍ବାର୍ ଗିନେ ମୁଇ ତୁମୁକେ କ୍ମ୍ଲେ, ଯେ ସେ ହ୍କା ଇଶ୍ଵରାର୍ ହଇସି।”
35ତାର୍ ଆରେଗଟ୍ ଦିନ୍ ଯୋହନ୍ ତାର୍ ଜଳେକ୍ ଚେଲାମ୍ନ୍କାର୍ ସ୍ଙ୍ଗ୍ ସେତି ଟିଆ ଅଇରିଲା। 36ଆର୍ ସେବାଟ୍ ଯୀଶୁ ଇଣ୍ତି ଜାତିରିଲାର୍ ବ୍ଲ୍କ୍ରି ଦ୍କି କଇଲା, “ଦ୍କା ଏ ହ୍କା ଇଶ୍ଵରାର୍ ମେଣ୍ଢାହିଲା।” 37ଇକ୍ତା ଶୁଣିକ୍ରି ସେ ଜଳେକ୍ ଚେଲା ଯୀଶୁର୍ ହ୍ଚେ ହ୍ଚେ ଗ୍ଲାଇ। 38ଯୀଶୁ ଉଲ୍ଟି କ୍ରି ସେମ୍ନ୍କେ ଦ୍କ୍ଲା ଆର୍ ହ୍ଚାର୍ଲା, “ତୁମିମ୍ନ୍ କାଇରି କ୍ଜୁଲାସ୍?” ସେମ୍ନ୍ କଇଲାଇ, “ରାବ୍ବୀ ବଲେକ୍ ‘ଗୁରୁ’ ତୁଇ କୁଇତି ବାସା କ୍ରୁଲିସ୍?” 39ଯୀଶୁ କଇଲା, “ମର୍ସ୍ଙ୍ଗ୍ ଆଶା ତ୍ବେ ତୁମି ଦ୍କୁହାରାସ୍” ସେଡେବ୍ଳ୍ ସଂଜବେଳା ଚାର୍ଟା ଅଇରିଲି। ସେ ଚେଲାମ୍ନ୍ ଯୀଶୁର୍ ସ୍ଙ୍ଗ୍ ଆର୍ ଯୀଶୁର୍ ରେତାଟାଣ୍ ଦ୍କ୍ଲାଇ। ସେ ରାତି ସେମ୍ନ୍ ଯୀଶୁର୍ ସ୍ଙ୍ଗ୍ ରିଲାଇ। 40ଜୁଇ ଜଳେକ୍ ଚେଲା ଯୋହନାର୍ କ୍ତାଶୁଣି ଯୀଶୁର୍ ହ୍ଚେ ହ୍ଚେ ଜାଇରିଲାଇ, ସେ ଜଳେକ୍ ଚେଲାମ୍ନ୍କାର୍ ବିତ୍ରେ ଏକ୍ଲା ଶିମୋନ୍ ପିତରାର୍ ବାଇସି ଆନ୍ଦ୍ରିୟ ରିଲା। 41ଆନ୍ଦ୍ରିୟ ତାର୍ ବାଇସି ଶିମୋନ୍କେ ଦ୍କ୍ଲା ଆର୍ ତାକେ କଇଲା, “ଅମିମ୍ନ୍ ମସିହା ବଲେକ୍ ଖ୍ରୀଷ୍ଟକେ ଦ୍କ୍ଲୁଆଚୁ।” 42ଆନ୍ଦ୍ରିୟ ଶିମୋନ୍କେ ଯୀଶୁର୍ ଲ୍ଗେ କୁଦିକ୍ରି ନିଲା। ଯୀଶୁ ଶିମୋନ୍କେ ବ୍ଲ୍କ୍ରି ଦ୍କି କଇଲା, “ତୁଇ ଯୋହନାର୍ ହଇସି ଶିମୋନ୍, ମ୍ତର୍ ତୁଇ କେଫା ନାଉଁଏ ଡାକ୍ହୁଟ୍ସି।” ଇ କେଫା ନାଉର୍ ଅର୍ତ ଅଇଲି ପିତର୍ ବଲେକ୍ ଟେଳା।
43ତାର୍ ଆରେଗଟ୍ ଦିନ୍ ଯୀଶୁ ଗାଲିଲୀ ଜିଲାକେ ଜ୍ମ୍କେ ବାର୍ଲା, ଆର୍ ସେ ଜାତାବାଟେ ଫିଲିପ୍ପ ନାଉର୍ ଏକ୍ଲାକେ ବେଟ୍ ହାଇଲା ଆର୍ କଇଲା, “ମର୍ହ୍ଚେ ଆଉ।” 44ଫିଲିପ୍ପ, ଆନ୍ଦ୍ରିୟ ଆର୍ ପିତରାର୍ ଗାମ୍ ବେଥ୍ସାଇଦା ରିଲି। 45ଫିଲିପ୍ପ ନିଥନିୟେଲକ୍କେ ବେଟ୍ ଅଇଲା ଆର୍ ତାକେ କଇଲା, “ଜୁଇ ମାନାଇର୍ ବିଷୟେ ମୋଶା ତାର୍ ବିଦିବିଦାନାର୍ ଶାସ୍ତରେ ଲେକିଆଚେ ବିନ୍ସ୍ବୁ ବବିଶତ୍ କ୍ତା କ୍ଉତା ଲକ୍ମ୍ନ୍ ହେଁ ଲେକି ଆତ୍ତି ଅମିମ୍ନ୍ ତାକେ ଦ୍କ୍ଲୁଆଚୁ, ସେ ଅମ୍ଲା ନାଜରିତ ଗାମାର୍ ଯୋଷେପାର୍ ହଇସି ଯୀଶୁ।” 46ନିଥନିୟେଲ୍ ତାକେ କଇଲା, “ନାଜରିତ ଗାମେ ହ୍ଣି କାଇରି ବ୍ଲ୍ ବିଷୟ୍ ବାର୍ଅମ୍ ହାରେ କି?” ଫିଲିପ୍ପ ତାକେ କଇଲା, “ଯୁ ତୁଇ ଦ୍କ୍ସି।” 47ଯୀଶୁ ନିଥନିୟେଲ୍କେ ତାର୍ ଲ୍ଗେ ଆସ୍ତି ରିଲାର୍ ଦ୍କ୍ଲା ଆର୍ ତାକେ କଇଲା, “ଏ ହ୍କା ଗଟେକ୍ ସ୍ତ୍ ଇସ୍ରାଏଲ୍ ଲକ୍ ବ୍ଲେକ୍ ତାର୍ ମ୍ନ୍ ବିତ୍ରେ ଅଳକ୍ ହେଁ ଅକାର୍ ନାଇ।” 48ନିଥନିୟେଲ୍ ଯୀଶୁକେ ହ୍ଚାର୍ଲା, “ମକେ ତୁଇ କ୍ନ୍କ୍ରି ଜାନ୍ଲିସ୍?” ଯୀଶୁ ତାକେ ଉତର୍ଦିଲା, “ଫିଲିପ୍ପ ତକେ କୁଦୁକେ ଆସିରିଲା ସେଡେବ୍ଳ୍ ତୁଇ ଡୁମ୍ବୁର୍ ଗ୍ଚ୍ତ୍ଳେ ରିଲାର୍ ମୁଇ ଦ୍କିରିଲେ।” 49ନିଥନିୟେଲ୍ ତାକେ ହ୍ଚାର୍ଲା, “ଏଗୁରୁ ତୁଇ ସ୍ତ୍କ୍ରି ଇଶ୍ଵରାର୍ ହଇସି, ଆର୍ ତୁଇ ହ୍କା ଇସ୍ରାଏଲ୍ର୍ ର୍ଜା।” 50ଯୀଶୁ ତାକେ ଉତର୍ଦିଲା, “ଡୁମ୍ବୁର୍ ଗ୍ଚ୍ତ୍ଳେ ମୁଇ ତକେ ଦ୍କିରିଲେ ବ୍ଲି କଇଲାକେ ତୁଇ ମ୍ର୍ ଲଗେ ବିଶ୍ବାସ୍ କ୍ରୁଲିସ୍? ଇତିହ୍ଣି ଆରେକ୍ ବ୍ଡ୍ ବ୍ଡ୍ ବିଷୟ୍ ସ୍ବୁ ତୁଇ ଦ୍କ୍ସି।” 51ଯୀଶୁ ଆରେକ୍ କଇଲା, “ସ୍ତ୍ ସ୍ତ୍ ମୁଇ ତୁମୁକେ କ୍ମ୍ଲେ, ସ୍ର୍ଗାର୍ ବାଟ୍ ଉଗାଳି ଅଉତାର୍ ଦ୍କାସ୍, ଆର୍ ଇଶ୍ଵରାର୍ ଦୂତ୍ମ୍ନ୍କେ ମାନାଇ ହିଲା ଉହ୍ରେ ଆସିକ୍ରି ବ୍ସ୍ତାର୍ ଦ୍କାସ୍।”
Attualmente Selezionati:
ଯୋହନ୍ 1: BDVNT
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
