Luk 9
9
Tha Jisas 'e arasia na aposol nia ki
(Matiu 10:5-15; Mak 6:7-13)
1Tha Jisas 'e 'ai mai uria na taafulu ma roo Aposol nia ki 'i sana. Ma nia ka falea na suukwa'ia ma gwaunga'i ura fa'a'akwaalana na mata'ia ki ma tarilana ano'edo ta'a ki 'i fada. 2Nia ka arasida kau ura fa'atalolana na 'inotoa tha God, ma ura fa'a'akwaalana imole mata'i ki. 3Ma nia ka ba'e 'una 'eri fada, “'E a'i musi ngalia ta si doo uria laelaa kamalu'a. Musi ngalia ta kuba'u ma ta wa'i, ma ta si fanga, ma ta si malefo, ma ta roo si maku mena 'ana ura 'afisilana. 4Ma ta ma'e tooa bana na kera thathagoni kamalu'a, muki too 'i luma 'eri laalae ka fula 'ana si manga na muki lae. 5Ma laalae ta kula bana ne a'i kesi thathagoni kamalu'a, muka lae 'amalu'a fasia, ma muka kwa'etafasia geegeo fasia 'aemulu'a ura faata'ilana 'i sada na tha God kai keto kera, sulia kera lalakwa rongoa ba'elana tha God.”
6Ma disaepol 'eki keka lae, ma keka tatha 'ana kula ki sui ura ba'elaa sulia Fa'arongoa le'a sulia tha God, bia keka fa'a'akwaa imole ki 'ana kula ki sui.
Tha Herod 'e rongoa u'unua sulia tha Jisas
(Matiu 14:1-12; Mak 6:14-29)
7Ma 'ana si manga 'eri la'u bo'o, tha Herod Antipas na wane 'inoto 'i Galili, 'e rongoa u'unua sulia doo ki na tha Jisas 'e ilia. Ma manatana ka isifuufuli, sulia tei imole ki kera sore'a tha Jon Thababtis na 'e maruki la'u mai, 8ma tei imole ki la'u keka sosa 'ada tha profet Ilaeja na 'e oli la'u mai, ma tei imole ki la'u keka sosa 'ada nia ta profet 'i na'o 'uu mai na 'e tata'e la'u fasi maea. 9Sui ma tha Herod ka ba'e 'una 'eri, “Ma tha Jon nau ku falea na wane 'ana omea ki keka sigi muusia na'a gwauna! Ma wane 'ufita la'u na kera ba'e sulia ne'e?” Ma 'e thafali 'ana si manga 'eri, tha Herod ka thathamia 'asia na'a rikilana tha Jisas.
Tha Jisas 'e tharea na lima to'oni wane ki
(Matiu 14:13-21; Mak 6:30-44; Jon 6:1-14)
10Ma si manga na Aposol tha Jisas ki kera oli na mai, keka ngata sulia doo na kera ilia ki sana tha Jisas. Sui, tha Jisas bia bare'e disaepol nia ki, talito'odalu'a bana keka lae ura ma'etoaa 'i Bethsaida. 11Sui ta, 'ana si manga na imole ki kera rongoa tha Jisas 'e tatha, keka lae la'u bo'o 'i buira. Ma tha Jisas ka konida maka ngata sulia 'inotoa tha God fada, ma ka fa'a'akwaa imole kera mata'i ki.
12Ma 'i tha'ulefi, si manga thato karangia kai suu na'a, na disaepol nia ki keka lae mai 'i sana, ma keka ba'e 'una 'eri, “'oki olitania na'a konia ne'e, fasi keka lae 'ada 'ana ura ma'etoaa kakali fasi keka rofea 'ada ta si fanga bia ta si kula ura biingalaa, sulia kula ne'e 'e a'i ta si doo 'iei.”
13Sui tha Jisas ka ba'e 'una 'eri fada, “Mulu falea ta si fanga fada fasi keka 'ania.”
Ma keka lu'u nia 'una 'eri, “Kamali'a lima fa berete ma na roo gwa ii'a bo'o na mili too 'ania. 'O thathamia miki lae ma miki usia mai tei fanga fana konia ba'ita ne'e?” 14Fulingana lima to'oni wane ki na kera too 'i kula 'eri.#9:14 Kesi te'emania bo'o kini ki bia wela ki na kera fanga la'u bo'o laa na konia 'eri.
Tha Jisas ka ba'e 'una 'eri fana disaepol nia ki, “Mulu fa'arongo kera ura keki 'ono 'i tha'egano 'ana figu'i wane ki 'ana lima taafulu wane ki.”
15Disaepol nia ki keka ilia si doo 'eri ma to'a 'eki sui keka 'ono na'a 'i tha'egano. 16Ma tha Jisas ka ngalia lima fa berete 'eki, ma roo gwa ii'a 'eki, ma ka lio 'ala'a 'i thalo, ma ka tangoa tha God. Sui ka niia fa berete 'eki, ma gwa ii'a 'eki, ma ka falea fana bare'e disaepol nia ki fasi keka tolingia fana figua 'eri. 17Ma kera te'efau keka fanga, ma keka aabusu te'efau. Ma bare'e disaepol nia ki keka konia na oretana fanga 'eri 'i laa na taafulu ma roo naanado ki laalae ka fungu bo'o.
Tha Pita bia tha Jisas
(Matiu 16:13-19; Mak 8:27-29)
18Te'e si manga tha Jisas kai fo'a 'ana si kula banita'i, ma bare'e disaepol nia ki keka lae mai sana, ma nia ka soeto'oda ka 'una 'eri, “Imole ki kera sosa 'ada nau ni tei?”
19Kera lu'ua keka 'una 'eri, “Tei wane kera sore'a 'ada 'oe tha Jon Thababtis, tei to'a sore'a 'ada 'oe tha Ilaeja sui tei wane ki la'u keka sore'a 'ada ta wane 'ana profet baa ki 'i na'o mai na 'e maruki la'u mai.”
20Ma tha Jisas ka soeto'oda ka 'una 'eri, “Ma ni kamalu'a, mulu sore'a 'amalu'a nau ni tei?”
Tha Pita 'e lu'ua ka 'una 'eri, “'oe na Kraest, wane filia tha God.”
Tha Jisas 'e ba'e sulia na maelana
(Matiu 16:20-28; Mak 8:30; 9:1)
21Sui tha Jisas ka ba'e fifii fada fasi a'i kesi fa'arongoa la'u ta imole 'ana si doo 'eri. 22Ma nia ka ba'e la'u bo'o 'una 'eri, “kaluwane imole, kai fulato'ona bona'a 'afeta'ia ba'ita 'oro ki, bia wane gwaunga'i ki, ma wane ni fo'a ki, ma wane ni to'odoo ki 'ana biibirangaa keki lalakwata'i nia. Ma keki thaumaeli nia, sui 'ana uula fa thato, tha God kai fa'atata'ea la'u bana ura marukia.”
23Ma tha Jisas ka sore'a la'u 'i sadalu'a, “Mada sa ta imole 'e thathami lae mai 'i buriku, nia kai luka 'ana manatalaa suli nia 'i tala'ana ma kai ngalia 'airarafolo nia 'ana fa thato ki sui bana ma ka lae mai 'i buriku. 24Sulia tei bana na 'e thathami ogoni 'ana na marukia nia fasi nau, nia kai tala fasia marukia mamana. Sui tei bana na 'e falea marukia nia ura nau, nia kai fulato'ona marukia mamana. 25Sui taa ni bo'o na 'e le'a mada sa ta wane ka too 'ana doo ki sui laa na fanu na iano laula'u, sui si fulato'ona bo'o marukia mamana. 26Ma mada sa ta imole ka se'enoni 'ani nau bia ba'elaku, na kaluwane imole kai se'enoni la'u bo'o 'ani nia 'ana si manga nia kai fula mai 'ana 'inotoa nia, ma 'inotoa Maka ma 'ensolo abu ki la'u bo'o. 27Ku sore'a 'i samulu'a, tei wane takwe se'eki a'i kesi todaa maea sui fata'i keki rikia 'inotoa tha God.”
Tha Jisas 'e faatania raralana ma sukwa'ilana
(Matiu 17:1-8; Mak 9:2-8)
28Fulingana kwalu fa thato sui na'a buira tha Jisas 'e sore'a si doo 'eki, nia ka talaia tha Pita, tha Jon ma tha Demesi, keka ta'e 'i gwauna te'e fa tolo ura fo'alaa. 29Ma si manga tha Jisas kai fo'a 'ana, ma kaakalia maana ma babalina rikilana ka taatala, ma to'oni nia ka kwaakwao'a ma ka sinasina 'asia na'a. 30Ma roo wane, tha Mosis bia tha Ilaeja keka takwe biia tha Jisas, ma keka ngata bii nia. 31Kera fula faata'i mai laa na laala'a 'e ba'ita fasia 'i thalo, ma keka ba'e biia tha Jisas sulia na maelana ma laelana#9:31 Laelana: Eksadas fasia na fanu na 'i ano. fasia na fanu na 'i ano uria 'i thalo, na nia kai fa'amamanea 'i Jerusalem. 32Tha Pita ma roo wane kwaimani nia ki, maada ka kulu'a 'ana biingalaa ma keka reri 'ada. Sui 'ana si manga kera thara'i na'a, keka rikia na sinasinalana tha Jisas ma na roo wane ki na keero'a takwe bii nia. 33Ma 'ana si manga na roo wane 'eki keero'a thasi ura laelaa fasia tha Jisas, tha Pita ka ba'e 'una 'eri fana, “Wane ba'ita 'ae, 'e le'a 'asiana'a na kulu kuki too na 'akalu'a 'i se'eki. Alua miki kasia ulu 'o'oba, ta doo femu, ta doo fana tha Mosis, ma ta doo fana tha Ilaeja.” (Nia 'e a'i si ma'alutania la'u bana si ba'ea na nia 'e sore'a.)
34Ma si manga tha Pita kai ngata 'uu bana, si datha 'e fula ma ka nunufida. Ma ulu disaepol 'eki, keka ma'u 'ana si manga si datha 'eri 'e lae mai ka dau faafida. 35Ma te'e si linge'e ba'ea ka kuruu mai fasia laa na si datha 'eri ka 'una 'eri, “Kaluwane nau ne'e, na fiifilia nau 'uu bo'o. Muka rongo sulia ba'elana!”
36Ma 'i buira si linge'e ba'ea 'eri, keka lio keka rikia bada talito'ona tha Jisas. Ma keka eno faafia, ma 'ana si manga 'eri kesi fa'arongoa ta imole 'ana doo 'eki na kera rikia.
Tha Jisas 'e taria ano'edo ta'a fasia te'e wela
(Matiu 17:14-18; Mak 9:14-27)
37'Ana fa bongi 'i buira, tha Jisas bia ulu disaepol nia 'eki, keka sifo na mai fasia gwauna fa tolo 'eri, ma imole 'oro ki keka todaa tha Jisas. 38Ma te'e wane fasia na konia 'eri 'e 'ai ka 'una 'eri, “Wane to'odoo 'ae, nau ku gani 'oe, 'oki taria kau ano'edo ta'a ne'e fasia wela nau, sulia nia na te'e fa wela muuta'ia nau bona'a. 39Manga ano'edo ta'a 'e thaungi nia, nia ka 'ai ba'ita ma doo 'eri ka logeta'i nia, ma fokona ka ngingisula te'efau. 'E thaungi nia 'asia na'a 'ana si manga 'oro ma si ekwa fa'ekwa bo'o 'ani nia, adea kai labata'i nia. 40Nau ku gania bare'e disaepol 'oe ki fasi keka taria fasia, ma ka 'afeta'i 'i fada ura ililana.”
41Tha Jisas ka ba'e 'una 'eri, “Ma kwalafaa musi fiito'o bo'o ne'e ma muka lae garo. Fita fa bongi fata'i na kwai too bi kamalu'a, ma kwa doo'anitaa 'ana fiitalalaa kamalu'a?.” Sui nia ka ba'e 'una 'eri ura wane 'eri, “Ngalia mai wela 'oe se'eki.”
42'Ana si manga na wela 'eri 'e fula karangia tha Jisas, na ano'edo ta'a 'eri ka 'uu 'ania wela 'eri 'i tha'egano, ma ka logeta'i nia. Ma tha Jisas ka ngatafia ano'edo ta'a 'eri ma ka lae fasia wela 'eri, ma ka fa'amarukia wela 'eri, sui ka olifania wela 'eri sana maka nia. 43Ma figua 'eri, keka kwele 'asiana'a 'ana suukwa'ia tha God.
Tha Jisas 'e ngata la'u sulia maelana
(Matiu 17:22-23; Mak 9:30-32)
Ma si manga imole 'eki keki kwele 'uu bada 'ana doo ki sui na tha Jisas 'e ilia ki, nia ka ba'e 'una 'eri fana bare'e disaepol nia ki, 44“Fafurongo le'a mai 'ana si bae'a na kwai fa'arongo kamalu'a, uria kaluwane imole Tootoo keki falea 'i 'abana imole ki.” 45Sui taa, na disaepol nia ki kesi ma'alutania si ba'ea 'eri nia 'e sore'a. Tha God 'e tha'ufunia fasida fasi kesi thaito'omana, ma keka ma'u la'u bada ura soelaa sulia ma'alutana si ba'ea 'eri.
Tei na 'e ba'ita ka tatha
(Matiu 18:1-5; Mak 9:33-37)
46Na olisuusu'ulaa ka tata'e ma'alutana na bare'e disaepol tha Jisas sulia tei 'ada na kai gwaunga'i faafida te'efau. 47Sui tha Jisas 'e thaito'omana bana manatalada ka ngalia te'e kali wela, ma ka fa'atakwea 'i ma'alutada, 48ma ka ba'e 'una 'eri 'i fada, “Tei bana na 'e thathagonia ta kali wela 'une'e 'ana thataku, 'e thathagoni nau. Ma tei bana na ka thathagoni nau, 'e thathagonia la'u bo'o Maka nau na 'e arasi nau mai. Sulia tei bana na 'e fa'afa'ekwa nia ma'alutamalu'a, nia na wane na 'e ba'ita ka gwaunga'i faafi kamalu'a te'efau.”
Tei na si firu bii kulu, nia 'e nii bi kulu
(Mak 9:38-40)
49Sui tha Jon ka ba'e 'una 'eri, “Wane 'inoto 'ae, kamali'a mili rikia te'e wane 'e taria na ano'edo ta'a ki 'ana thatamu, ma mika ili uria lufilana, sulia nia a'i la'u ta wane 'akalu'a.”
50Tha Jisas ka ba'e 'una 'eri 'i fada, “'e a'i musi lufia la'u, sulia ni tei bana a'i si firu bii 'oe, nia wane bii 'oe neri.”
Na wane ki 'i Samaria kera lalakwa 'ana tha Jisas
51Si manga 'e fula karangia na'a ura tha Jisas kai ta'e na'a 'i thalo, nia ka manata fifii 'ana laelaa 'i Jerusalem. 52Ma nia ka falea tei wane ki keka lae kau 'i na'o 'ani nia. Kera lae, ma keka fula 'ana te'e ma'etoaa 'ana balifanua 'i Samaria fasi keka kwaithathai 'ana doo ki sui ma'akwali nia. 53Sui ta, imole ki 'i kula'eri kesi thathamia bo'o thathagonilana, sulia nia kai tatha la'u bana uria 'i Jerusalem. 54Ma si manga na roo disaepol nia ki, tha Demesi bia tha Jon, keero'a rikia doo 'eki, keero'a keka ba'e 'una 'eri fana, “Lord 'ae, 'e 'ufita? 'O thathamia mika gani ura era fasia 'i thalo fasi ka fa'afunida?”
55Sui tha Jisas 'e abula ma ka soreda. 56Sui keka lae nada ura ta ma'etoaa 'ee'eta.
Na laelaa buira tha Jisas
(Matiu 8:19-22)
57Si manga kera lae na'a sulia tala, te'e wane ka ba'e 'una 'eri fana tha Jisas, “Nau kwai lae 'aku bii 'oe, 'i fai mena 'ana 'oki lae uria.”
58Tha Jisas ka ba'e 'una 'eri fana, “Kuita kwasi ki kera too 'ana kula kera ki ura biingalaa, ma tha'aro ki mena keka too 'ana nu'i kera ki, sui taa, na Kaluwane imole 'e a'i si too 'ana ta si kula ura biingalaa.”
59Ma tha Jisas ka ba'e 'una 'eri fana ta wane la'u, “'o lae mai buriku.”
Ma wane 'eri ka ba'e 'una 'eri, “Lord, 'o alamata'i nau kwai lae fasi ura kwai betaa fasi maka nau.”
60Ma tha Jisas 'e lu'ua ka 'una 'eri, “Alamatania imole mae ki keka alua 'ada wane mae kera ki. 'Oe 'o lae, ma 'oki fa'ataloa 'amu'a na 'inotoa tha God.”
61Ma ta wane la'u ka ba'e 'una 'eri, “Lord, nau kwai lae 'i burimu. Sui, nau kwai lae ura kwai alulu fasi 'ana inalaku ki.”
62Tha Jisas ka ba'e 'una 'eri fana, “Tei bana na 'e ra'u 'ana na kwato na buluka ki keki 'abaa ma ka lio buri 'e a'i si tala'ana 'inotoa tha God.”
Attualmente Selezionati:
Luk 9: MLU
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, SITAG
