Ruti 2
2
I Ruti Sa Gosoria I Boazi
1Ego pa kalena tai Naomi sa koleona sa kai turana na marenena, na tinoni isa sa kai tinoni purana pa bubutu ti Elimeleki, ko na isongona isa si Boazi.
2Ego kai rane i Ruti na rereko Moabi sa tepa tai Naomi, pira sau, <<Ai vei bu vamalumusiu ko ba lao pa ia umuma ko ba somana buti teku bali taloloa paledi tana tinoni bi dogoro vagosorosiu qau,>> saunia.
Poni pira sau si Naomi, <<Mu lao, tuqu maqota,>> saunia.
3Ko sa taloa ko sa lao pa ia umuma ko mi buti tuti bali taloloa paledi pa ligudi ira qai kokobu teku bali sau, poni sa sa toga kale vavajonga pale tu isa sa na kobu ia umuma tai Boazi isa kai tinoni pa bubutu ti Elimeleki.
4Ko i Boazi tugu sa sa bola koko pa Betilihema, ko sa paranga gogosororia sira qai kokobu teku bali, pira sau, <<I Iahova mi vavaburogou,>> sau.
Poni sa pira qarigu sira, <<I Iahova mi mananigo ao,>> qarigunia.
5Beto sa nanasia i Boazi sa nona nabulu sa kopuniria ira na tinoni kokobu bali, <<Na maqota tai sei sina?>> saunia.
6Poni sa paranga sa nona nabulu sa kopuniria ira na tinoni kokobu bali, pira sau, <<Na maqota Moabi isa sa tutia mule i Naomi koko pa Moabi sina. 7Sa tepa ko bi tutiria ira na tinoni kokobu bali ko bi somana buti vaikamuona bali taloloa paledi sau. Ko na vuvugei jonga tu sa podalai roiti tinganai sa kamua tu kopira, ko sa korapa gu minere mai iapeki totoso pa kauru aqaqo sina,>> sau sisa.
8Poni sa paranga lao tai Ruti si Boazi, pira sau, <<Tuqu maqota, mu vainongoro. Munake lalao buti teku bali sa pana kai goto inuma. Munake taloa lani, goto mu togasa gu tadira na rereko roiti taqu aipira. 9Mu dodoro kopunia sa ketakoi qai korapa kokobu vakoleria na bali ira na tinoni roiti, ko mu tuti pa ligudi ira na rereko. Qa tei suquturia tugu vei sira na marene qai roiti taqu ko maike kotigo. Totonai muna kidepe poni sa muna lao buku pana bogu pie qai tei vutugu vapugeleria tu ira na marene,>> saunia.
10Poni sa sa sori tutungu ko sa opo kamu tu pa peso si Ruti beto pira sau, <<Koi qu tavaraguanisiu ko qu doro gigalasiu tu ara- ba ara ko kai tinoni karovoqu tu,>> sau.
11Poni sa oe si Boazi, pira saunia, <<E, qa tei nongoronia tu ara sa doru sakasava qu roiti laonia ao tana roamu toto vei sa mate na marenemu. Qu loa paleria na tinamu na tamamu beto na mua gusu podona, ko qu kamu suvere tavitiria ira na tinoni quke gigilaria pa visa pira. 12Ko i Iahova mi bei vanigo sa doru sakasava jojongadi qu roitiniria ao. Mi vaisisongo vapurago i Iahova Tamasa tadira pa Izireli sao ura pa kauru babanana isa qu kamu ongumua sao,>> sau.
13Poni sa paranga si Ruti, <<Qa batia qu tavaraguanisiu, bangara, ura ara qake vei kame ira na nabulu rereko tamu sara bu qu vamanotosiu beto qu paranga vakopelia na buloqu,>> saunia.
14Ego na totoso teteku sa pira sau si Boazi tai Ruti, <<Ina tekua kai kipa bereti ko mu totogolonia pana vaini,>> saunia.
Ko sa toqo tavitiria i Ruti sira na tinoni kokobu bali beto sa sa tekua i Boazi sa kaki bali parugudi ko sa kaqamania. Ko sa teteku si Ruti tinganai sa pote vatale ko sa kole tari tu sa na ona tetekuna. 15Ego totonai sa turu lao buti bali mule si Ruti poni sa pira sauniria i Boazi sira na ona nabulu marene, <<Munake vanosoa sisa vei mina teku bali pa boko bali taviledi, goto muna vamalumia gu ko mina tekuona. 16Beto ko mu unusuria sa kaki bali pa kokotu bali ko mu vakoleria tugu vei pa peso, ko isa mina boka buti tekuria beto munake tokea tugu vei,>> sauniria.
17Ko sa kole buti teku bali pa inuma si Ruti tinganai sa gore tu na vevelu. Beto sa sa iru tekuria sa na kiko pana batudi na bali beto sa vaikamuniria sa padana kai bita pugelena.#2.17 Na epa sa na padana manogarua kilo. Api sa na padana kai bita pugelena.
18Ego sa pogosoria mule pa gusu sa na bali sa tekuria ko sa vabatinia si Naomi na roana beto ko rau votunia ko sa vania tugu vei sa na gagani sa pote loaria. 19Poni sa nanasa si Naomi na roana, pira sau, <<Tuqu, pai qu buti bali pa ngeni? Pa inuma ti sei sa qu roiti? Na Tamasa mi manania sa na tinoni sa doro gigaligo ao,>> saunia.
Poni sa vavakatonia i Ruti tana roana sa na veveina na tinoni sa kole roiti vania, pira sau, <<Na isongona na tinoni qa roiti vania pa ngeni si Boazi,>> sau.
20Poni pira saunia na roana si Naomi, <<Na tinoni isa sa i Iahova mi manania, isa doru totoso sa kopunia nona taringunguti tadira na tinoni toadi beto ira qai tei mate tu,>> sau. Beto pira mule sau, <<I Boazi sa na tavitimei agei ko isa sa na kopu vakarovo tadagita karu,>> saunia.
21Poni sa pira sau si Ruti na rereko Moabi, <<Ko sa pojanisiu tugu vei ko mana togasa gu tadira nona tinoni roiti tinganai mina okoto tu sa na totoso abu bali saunisiu,>> saunia.
22Poni sa pira sau lao tai Ruti na roana si Naomi, <<Vavagua, Tuqu. Mu roiti tavitiria gu ira na rereko roiti tana, ura kita mai kotigo pa inuma tana goto tinoni,>> saunia.
23Ko i Ruti sa togasa gu tadira na rereko roiti tai Boazi ko sa kole bubuti bali tinganai sa okoto sa na totoso abu bali beto na vuiti. Ko sa suvere tavitia isa si Naomi na roana.
Attualmente Selezionati:
Ruti 2: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
