Maka 9

1Beto pira sauniria i Jisu sira, <<Ma poja sosotonigou ara sagou: kaki agou qai korapa turu pira sa maike tei mate tu tinganai mai batia na binangara tana Tamasa mina lame tavitia na neqi,>> sau sisa.

Sa Bei sa na Tinina i Jisu

(Matiu 17.1-13; Luke 9.28-36)

2Ego sa jola ka vonomo rane, sa sa tekuria i Jisu sira Pita i Jekopi beto i Jone ko sa toni saeniria pa kai kubo ululuna ko qai suvere mekadi ketakoi. Ko pa moedi ira ketakoi sa bei sa na tinina i Jisu. 3Na ona poko sa keka kikilanga jolaniria doru sakasava qai vakeka veiniria ira na tinoni pa peso. 4Beto qai bola votu kamuria sira Elaija i Mosese ko qai kole paparangia si Jisu.

5Ko totonai sa paranga lao ti Jisu si Pita, pira saunia, <<Rabi, sa jongana jola sa qe korapa lani sagei! Ko me roitinia tu ropi kue aqaqo, kame tamu, kame ti Mosese, beto kame tai Elaija, uve?>> sau sisa. 6Ura qai matagutu vivitigi sira kue ko sake gigilai na sa sa pojai si Pita.

7Beto sa bola amuria kai lei beto totonai qai nongoria sa kai ovovele koko veina pa korapa lei, pira sau, <<Api sa na Tuqu, isa qa roroqu vivitigia ara. Mu nongoria sisa!>> sau.

8Poni qai siboro sira ko qai doro vailivutai ba kepore mule sa kai tinoni bai batia, goto mekana gu i Jisu sa korapa suvere tavitiria.

9Ko tonai qai loai na kubo ko qai korapa oqa votu gogoredia, sa sa naquria i Jisu sira kue sepele ko maike vavakatonia sisa vei qai batia, tinganai mina turu mule mai tu pa mate sa na Tuna na Tinoni sauniria. 10Ko qai kopu kole kopunia gu mekadi ira sa api, ba qai kole vaigua mekadi sa na sa beka na ginuana sa na turu mule pa mate saunia isa qarigu.

11Beto qai nanasia sisa, pira qarigu, <<Ai sa vei ko qai pojai ira qai vaivagigalainia na Vavanau sa i Elaija mai tu sa mina lame momoe?>> qarigu.

12Poni sa oe laoria i Jisu sira, pira sauniria, <<Sosoto tugu i Elaija sa mina lame momoe tu ko mina vatana vatuvisi liguria sira doru sakasava. Ba ai sa vei ko sa pojai tu na Kukuti Tabuna sa mina gosororia soku vitigi beto mina tadogoro vakepore sa na Tuna na Tinoni? 13Ba ara ma pojanigou, sa tei lame tu si Elaija, ba qai tutini dia roroqu vei qai nyoroguania ira sisa, vei tugu sa tei pojai tu na Kukuti Tabuna,>> sau sisa.

I Jisu sa Salania kai Koburu Marene sa Kolea na Tomate Ikikerena

(Matiu 17.14-21; Luke 9.37-43a)

14Ego tonai qai mule gore kamuria sira nona sepele sira Jisu beto ira kue sepele sa toniria, sa qai batia sa kai minete tinoni lavata korapa suvere ketakoi beto ira qai vaivagigalainia na Vavanau sa qai korapa vaigua lao tadira na sepele. 15Isa tugu qai batia i Jisu sira doru tinoni, sa qai gabara beto qai abutu lao gogoso qeqerania sisa.

16Beto sa sa nanasaria i Jisu sira na ona sepele, pira sau, <<Na sa sa qu kole vaiguania agou tadira?>> sau sisa.

17Poni sa paranga sa kai tinoni pa vaikamu tinoni isa, pira sau, <<Tinoni vaivagigalai, na tuqu marene ara sa qa toni lamenia tamu, ura sa kolea na gagala ikikerena ko sake boka paranga. 18Pai tu mina korapa sisa ba tonai mina vakamunia poni sa irunia tu pa peso ko sa dadao tu na mangana, sa garata beto sa totogeoso betona na tinina. Ko qa teparia ara sira na mua sepele ko mai iju votu palenia sa na gagala ikikerena qauniria, ba qaike bokai tu,>> sau sisa.

19Poni sa oe laoria i Jisu sira, pira sau, <<Agou na sasae tinoni kopira sa kepore sosoto na miu rarange! Ai tu koi vei sovaina vei sa mana kole suvere tavitigou ara sagou! Ai tu koi vei sovaina vei sa mana kole junonigou ara sagou? Mu toni lamenia taqu sa na koburu isa,>> sau sisa.

20Ko qai toni laonia tana sa na koburu marene isa. Ko isa tugu sa doro lao sa na gagala ikerena api ko sa batia si Jisu, poni sa sasuria sa na koburu marene, ko sa vavukelia ko sa titolo bobokilai tu pa peso, beto sa dadao tu na mangana.

21Beto sa nanasia i Jisu sa na tamana na koburu, pira sau, <<Ai totoso sa sa podalai veinia isa inara?>> sau.

Poni sa oe lao sa na tamana, <<Sa podalainia na melaluna tu. 22Ko kubo totoso sa gona laonia tu pa niku beto pa kolo ko mi vamatea sau. Ko vei bu boka ao poni sa mu roroqugei ko mu tokanigei,>> sau sisa.

23Poni sa oe lao si Jisu, pira sau, <<Vei bu boka qugu tu ao! Doru sakasava sa sa bokai gu na tinoni sa vasosoto,>> sau sisa.

24Isa tugu sau i Jisu poni sa sa vevela votu sa na tamana na koburu api, pira sau, <<Qa vasosoto sara, mu tokanisiu ketakoi sake neqi na qua vinasosoto!>> sau sisa.

25Ego ko tonai sa batiria i Jisu qai abutu vaikamu lame sira na minete tinoni, sa sa tokea isa sa na gagala ikikerena, pira saunia, <<Ao na gagala kikiqilimu na popokamu qa parangigo ara sao ko mu votu riu tana koburu marene api beto ko muneke kamu kole ligua,>> sau sisa.

26Poni sa kuku uui sa na gagala ikerena ko sa raja vaneneqeria sa na koburu marene api beto sa sa votu taloa tana. Ko sa doro vei na tinoni matena sa na koburu marene api. Ko ira soku tinoni sa qai paranga vei pira, <<Koi, sa tei mate tu sina,>> qarigu. 27Ba sa arua i Jisu sa na limana na koburu ko sa bako vatatakolea poni sa turuona sa na koburu.

28Ego ko totonai sa tome pa leo ruma si Jisu, sa qai mavo nanasa golomia ira nona sepele sisa, pira qarigunia, <<Ai sa vei ko qeke boka tu iju palea agei sa na gagala ikikerena?>> qarigu sira.

29Poni sa oe lao si Jisu, pira sau, <<Na sakasava vevei ina sa sake taroiti goboro goto pa vavara gu beto sa boka votu,>> sau si Jisu.

Sa Poja Beia i Jisu sa na Veveina na ona Mate

(Matiu 17.22-23; Luke 9.43b-45)

30Ego ko sa taloa ketakoi si Jisu beto ira na ona sepele ko qai jola vei tu pa Qalili, ura sake nyoroguania i Jisu sa bai gigilai ira na tinoni sa ketakoi sa suvere isa sau. 31Ko sa kole vagigalairia isa sira nona sepele, pira sauniria, <<Na Tuna na Tinoni sa kode mina tavalao pa limadi ira na tinoni ko mai vamatea, ba pa liguna kue rane mina tavamate sa kode mina turu mule sisa,>> sauniria. 32Qai rurania ira sa na ginuana na paranga api, ba qai pangagadia ko qaike tuma nanasia ira sisa.

I Sei sa na Lavatana beto na Poreveveina Jola?

(Matiu 18.1-5; Luke 9.46-48)

33Ego tonai qai kamu pa Kepaniami ko qai tome pa ruma poni sa sa nanasaria i Jisu sira na ona sepele, pira sau, <<Na sa sa qu kole vaiperani paranga agou pa soana lamena?>> sau sisa. 34Ba qai okoto ke vagala beto sira, ura pa soana lamena sa qai kole vaiperani paranga ira sa na veveina: <<I sei sa na poreveveina jola?>> qarigu.

35Poni sa toqo ko sa kuku vaikamuniria i Jisu sira ka manogarua ona sepele beto pira sauniria, <<Na tinoni sa nyogua tavaululu sa mi kole vakaurai tadira doru ko mi nabuluniria sira doru,>> sau.

36Beto sa aru vakatapia isa sa kai koburu ikete ko sa vaturua pa moedi ira doru, beto sa sa aru vakatapia beto pira sauniria, 37<<Na tinoni sa vakamu vatalea pa isongoqu ara sa kai koburu ikete vevei api, sa sa vakamu vatalesiu tugu sara. Ko isa na tinoni sa vakamu vatalesiu ara, sa nake ara gu mekaqu sa sa vakamusiu na tinoni isa, goto isa tugu vei sa garunusiu ara,>> sau si Jisu.

Isa sake Kanagita sa sa Tokanigita

(Luke 9.49-50)

38Ego sa paranga lao tana si Jone, pira sau, <<Tinoni vaivagigalai, qe batia agei sa kai tinoni sa ijiju pale tomate ikikeredi pa isongomu ao ko qe vanosoa, ura nake somanana tadagita sisa,>> sau si Jone.

39Ba sa paranga si Jisu, <<Muke vanosoa! Ura kepore kai tinoni sa roitinia kai roiti vaivagabarana pa isongoqu ara mina boka poja vivikeresiu sara pa liguna. 40Ura na tinoni sake kanagita sa sa kole vei tadagita sisa. 41Ma poja sosotonigou ara sagou: na tinoni sa vanigou kai kapa pie pa isongoqu ara ura sa gigilai isa sa agou na tinoni tana Karisito, poni na tinoni isa sa mina tekua tugu sa na ona pinia,>> sau si Jisu.

Na Totoke sa Vaselagita

(Matiu 18.6-9; Luke 17.1-2)

42<<Na tinoni sa vatatupea ko bi varoitinia na sela sa kai koburu ikete sa rangesiu ara sa sa jongana jola sa bi pilunia kai patu doa lavata na ruana ko bi lupi pale pa kolo. 43Beto vei bi vatatupego ko bi varoitinigo na sela sa kai kale limamu, sa mu lomoto vaqopu pale! Ura sa jongana jola sa na qoqopumu ao ba bu tekua sa na toa jola. Isa sa sa jongana jolania vei bu isongo betoria karu limamu ko bai tagona lao beto pa heli na iku sa ilili kare.#9.43 Na pikata 44, 46 pira sa qai kepore pa doru kukuti kokoleidi, goto qai takuti tutinia gu na pikata 48: <<ketakoi qai kole na uloso qaike boka mate ko mai ganiria, beto ko na iku vuvurunguna sake boka tailili vamate.>>

45Beto vei bi vatatupego ko bi varoitinigo na sela sa kai kale nenemu sa mu lomoto vaqopu pale gu! Ura sa jongana jola sa na qoqopumu ao ba bu tekua sa na toa jola. Isa sa sa jongana jolania vei bu isongo betoria karu kale nenemu ko bai tagona lao beto pa heli.#9.45 Na paranga sa tapeluku <<heli>> lani beto vei tugu pa pikata 43, 47, sa pa paranga Qiriki na <<Qehena>>. Pa Qehena sa na isongona na lolomo pa peguruna pa Jerusalema, ketakoi qai gogona pale nyanyao na ikika beto qai vatoani iku na rane na bongi ko na iku sa toa laona gu doru totoso. Pa Vinaego Koregana sa pa heli na ia qai lao ira qai gosoria na vinakilasa tana Tamasa

47Beto vei bi vatatupego ko bi varoitinigo na sela sa kai kale matamu, sa mu ujolo pale gu! Ura sa jongana jola sa bi kai matamu gu bu tome pa binangara tana Tamasa. Isa sa jongana jolania vei bu isongo betoria sa karu matamu ko bai tagona lao beto pa heli, 48ketakoi qai kole na uloso qaike boka mate beto ko na iku vuvurunguna sake boka tailili vamate.

49Ura doru tinoni sa mai tavaliaburu pa iku, kai muqisi podeke vei na vavakukuvu sa tavalioso pa solo. 50Na jongana sa na solo. Ba vei mina maragutu sa na lilingina, sa ai mule muna roiti vei beto muna boka valilingi beia? Mu isongia na solo pa miu toa ko mu mekarai suvere vaibaere vatale,>> sau si Jisu.

Attualmente Selezionati:

Maka 9: LGA

Evidenziazioni

Copia