Matiu 7

Muke Pituria Na Goto Tinoni

(Luke 6.37-38, 41-42)

1<<Agou muke pitua na goto tinoni, ko agou ba muke tapitu mekamiu. 2Ura isa tugu na soana qu pitunia na goto tinoni sa isa tugu na soana muna tapitunia sagou. Beto isa tugu na pada qu padaniria ira na goto tinoni, sa isa tugu sa muna tapadania sagou. 3Ai sa vei ko qu juno dogoria tu ao sa na opopu pa matana na tasimu, ba na lomoto kokobu pa matamu sa quke pavu galania? 4Ai sa vei ko pira tu qugunia ao sa na tasimu, <Mei ko ma kasi pale na opopu pa matamu,> qugu? Ba dotu! Na lomoto kokobu pa matamu! 5Ao na tinoni sesekemu na vavabatamu sao! Momoe sa mu kasi palea mai tu na lomoto kokobu pa matamu, beto sa kode muna babata vatale sao ko muna boka kasi pale ao sa na opopu pa matana na tasimu.

6Muke gona vaniria na sakasava madidi sira na sie,#7.6 Na sie beto na borogo sa na veveidi ira na tinoni qaike tavaraguania na paranga tana Tamasa. Ira na tinoni veveidi sa kode mai vavaledenia gu sa na paranga tana Tamasa tonai mai nongoria. ura kode mai gabala mule garatagou gu. Beto ko muke gona vaniria na miu patu poreveveidi sira na borogo, ura kode mai tete anyanyuniria gu pa peso,>> sau si Jisu.

Mu Tepa, Mu Nyaqo beto Mu Kikia

(Luke 11.9-13)

7<<Agou mu tepa ko mu tekua, mu nyaqo ko mu batia, mu kikia ko mi tarevanga vanigou. 8Ura na tinoni sa tepa sa sa tekua, na tinoni sa nyaqo sa sa batia, beto na tinoni sa kikia sa sa tarevanga vania.

9I sei na tinoni agou, sa totonai sa tepagana meme na tuna, poni na patu doa tu sa vania? 10Ba bi tepagana igana sisa, poni na dole tu sa vania? 11Ko vei agou na tinoni ikikeremiu gu ba qu bokamiu ianiria na sakasava jongadi sira na tumiu, poni sa na Tamamiu pa noka sa sa jonganga jolanigou agou ko isa mina ianiria na sakasava jongana joladi sira qai tepania isa! 12Ko doruna qu nyoroguania ko mai roiti lamenia tamugou ira na tinoni, sa ira tugu sa mu roiti laoniria agou tadira na tinoni. Ura api gu sa na Vavanau ti Mosese beto na vaivagigalai tadira na tinoni kokorotai,>> sau si Jisu.

Mu Tomea na Atakamana Ngijupuna

(Luke 13.24)

13<<Mu tome laoa na atakamana ngijupuna agou, ura na atakamana totomena lao vei pa vinakilasa sa sa revata beto na soana laona sa sa kakabere ko ira na soku tinoni qai tome laoa. 14Goto na atakamana totomena lao pa toa sa sa ngijupu beto na soana laona sa sa karajutu, ko ira ka vivisa gu qai batia sisa,>> sau si Jisu.

Na Gou beto Na Vuana

(Luke 6.43-44)

15<<Mu balauniria ira na tinoni kokorotai sesekedi. Qai lame tamugou popoko vei na sipi siranadi, ba na gagale vulupu pirudi sira. 16Pa vuadi kode muna doro gigalaniria sira. Ai vei na tinoni qai lokete vungu qurepi pa gasoro lilivo eoro? Babi qai lokete vua piqi pa buburu vavaioka? 17Sa vaitoto vei isa sa: na gou jongana sa sa vuaniria na vua jongadi, goto na gou ikerena sa vuaniria na vua ikeredi.

18Na gou jongana sake boka vuaniria na vua ikeredi, beto na gou ikerena sake boka vuaniria na vua jongadi. 19Na gou sake vuania na vua jongana sa sa tario pale ko sa tagona lao pale pa iku. 20Ko sa vei sa pa vuadi muna gigalaniria sira,>> sau si Jisu.

Ira Sake Gigilaria Na Bangara

(Luke 13.25-27)

21<<Nake ira doru qai kukukunisiu, <Bangara, Bangara,> sa mai tomea na binangara pa noka, goto ira gu qai roitinia na nyorogua tana Tamaqu pa noka. 22Ira kubo tinoni sa pira marigunisiu ara pa rane vaituti isa, <Bangara, Bangara, pa isongomu ao qe ulule votunia agei sa paranga, pa isongomu ao qe ijiju paleniria na tomate ikikeredi, beto pa isongomu ao qe roitiniria agei sa soku roiti vaivagabaradi!> marigu. 23Ba pira kode mana ule votu veini vaniria ara sira, <Qake isongo gigilagou ara sagou. Mu taloa taqu sagou na gagale tinoni ikikeremiu!> managuniria,>> sau si Jisu.

Karu Goto Tinoni Qai Nongoria Na Paranga

(Luke 6.47-49)

24<<Ego ko isa sa nongororia na qua paranga aipira ko sa tutiria, sa sa vei na tinoni tavagigalana sa vaturua na ona ruma pa kuta patu. 25Ko sa gore sa na qolapeso, sa nyoro sa na pie, beto sa iru sa na gava, ko sa rajai sa na ruma isa, ba sake boka tanobata sa na ruma, ura sa turu vamauru pa kuta patu sisa. 26Goto isa na tinoni sa nongororia na qua paranga aipira ba sake tutiria, sa sa vei na tinoni duduvilina sa vaturua na ona ruma pa nanagasana. 27Ko sa gore sa na qolapeso, sa nyoro sa na pie, beto sa iru sa na gava, poni sa tanobata sa na ruma isa, ko sa dugala tajejegarania sisa,>> sau si Jisu.

I Jisu sa Vaivagigalai Pa Neqi

28Ego ko totonai sa beto vaivagigalainiria na paranga aipira si Jisu, sa qai gabara vivitiginia ira na minete tinoni sa na vaivagigalai tana, 29ura isa sa kole vaivagigalai vei na tinoni sa isongia na neqi beto sake vevei ira qai vaivagigalainia na Vavanau.

Attualmente Selezionati:

Matiu 7: LGA

Evidenziazioni

Copia