Matiu 3
3
Na Taraena i Jone Paputaiso
(Maka 1.1-8; Luke 3.1-18; Jone 1.19-28)
1Ego ko pana rane ira sa sa votu lame si Jone Paputaiso, ko sa podalai tarae pa qega pa Jiudia, 2pira sau, <<Mu gabala agou! Ura mi toga sau sa na binangara pa noka,>> sau sisa. 3I Jone tugu alepi sa sa korotonia i Aisea na tinoni kokorotai, tonai pira sau,
<<Kai ovovele sa vevela pa qega,
pira sau:
<Vatanai na soana tana Bangara!
Vaemeseria na soana mina reregeria isa,>#Aisea 40.3. sau,>> sau si Aisea.
4Ego ko i Jone na ona poko sa na vurungudi gu na kameli, na ona doko sa na kopo vulitini manugu mamade nenedi gu, beto na ona tetekuna sa na kupo beto na muji pirudi gu. 5Ko qai vovotu lao tana sira pa Jerusalema, ira doru pa Jiudia beto ko ira doru pa vailivutaina pa pie Jodani. 6Ko qai vavaja votuniria na dia sela beto i Jone sa paputaisoria pa pie Jodani.
7Ba totonai sa batiria i Jone sa na motadi ira na Parese na Sadusisi sa qai lame ko mi paputaisoria isa qarigu, poni sa pira sauniria isa sira, <<Boko tuni dole ikikeremiu! I sei sa pojanigou sa kode muna boka ukunia agou sa na vinakilasa sa korapa jojoro lame? 8Mu roiti votuniria sira na vua qai ulenia na toa gabalana. 9Kita mu rove sianania sa na tamamei agei si Ebarahami kita mugu. Ma pojanigou gu ara sa na Tamasa sa boka gu pelukuniria na tuna i Ebarahami sira na patu pira! 10Na rio sa sa tei tana koleona tu pa bageredi na gou. Ko doru gou qaike vuania na vua jongana sa mai taduka vagore ko mai tagona lao pale pa iku.
11Ara sa qa paputaisonigou na kolo ko na vagigilana na toa gabalana, ba isa tu sa tuti ligu lamesiu ara sa sa poreveveina jolanisiu ara, ko ara ba nake padaqu mana pogoso vania na sadolo sisa. Isa tu sa mina paputaisonigou na Gagala Tabuna beto na iku. 12Na sevolo vavaipikatai sa sa tei arunia tu pa limana ko mi pikata paleniria sau sira na kopo ikika pa ia iru vaipipikatainiria ira na kiko, ko mi boko vaikamuniria pa ia vavakoleni kiko sira na kiko jongadi beto mi vurungu paleniria pa iku ilili kare sira na nyanyaodi na kiko sau,>> sau si Jone.
I Jisu Sa Tapaputaiso
(Maka 1.9-11; Luke 3.21-22)
13Ego sa kamu koko pa Qalili si Jisu ko sa gore pa pie Jodani ko mi tapaputaiso tai Jone sau. 14Ba i Jone sa podeke vanosoa sisa, pira saunia, <<Ara tu sa na selaqu ko muna paputaisosiu ao, ba ai sa vei sa ao tu qu lame taqu?>> sau.
15Ba sa oe laoa i Jisu sisa, <<Loai ko mi vei kopira, ura pa soana vei api tana vagore votua gita sa doru tuvisi,>> sau sisa. Poni sa vasotoa i Jone sisa.
16Ko isa tugu sa tapaputaiso ko sa iolo loai na pie si Jisu, poni sa api sa tarevanga vania isa sa na oka, ko sa batia isa sa na Gagalana Tamasa sa igoro gore lagere vei kai kuru ko sa lagere togai sisa. 17Beto api sa kai ovovele sa koko lagere vei pa noka, pira sau, <<Api sa na Tuqu qa roroqua ara; isa qa qera vivitiginia ara,>> sau.
Attualmente Selezionati:
Matiu 3: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
