Matiu 28
28
I Jisu sa Toa Mule pa Mate
(Maka 16.1-8; Luke 24.1-12; Jone 20.1-10)
1Ego pa liguna na rane Minere ko na vuvugei jonga rane momoe pa vuiki, sa i Mere na rereko pa gugusu Magadalene beto kai goto Mere mule sa qai lao ko mai doria na bevi qarigu.
2Poni sa sa raja sa kai nunu lavata, ura kai mateana tana Bangara pa noka sa sa gore lagere beto ko sa bokili varijo palea sa na patu sa tapateinia na bevi, beto sa kesa kole toqona pa narena. 3Ko na dogorona na tinoni isa sa sa vei na malarana na kapi, beto nona poko ba qai keka keala lelei. 4Ira na tinoni kopu ba qai matagutu vivitiginia sisa, ko qai gona kole neneqere vei na tinoni mai mate qarigu.
5Beto sa pira sauniria na mateana sira karu rereko, <<Muke matagutu! Qa gigilaiqua ara sa qu korapa nyaqoa agou si Jisu isa sa tavamate pa korosi. 6Kepore lani sisa, ura sa tei toa mule tu sisa isa mina vei sau sa tei poja vakolea tu perangana. Mei, lame ko mu doria sa ketakoi sa kole isa perangana. 7Beto sa muna siqarai lao pojaniria sira ka visa ona sepele, <Sa tei toa mule tu pa mate sisa, ko kopira sa tei lao momoe tu pa Qalili sisa. Ketakoi tu sa muna batinia agou!> munaguniria. Mu roroqua sisa qa koni pojanigou api,>> sau sa na mateana.
8Ko qai taloa sisiqarai pa bevi sira karu. Qai matagutudia tugu, ba qai qera vivitigi tugu, ko qai abutu riu ko qai lao pojaniria sira na ona sepele qarigu, 9sa sa lame tugu gosoro qeqeraniria si Jisu, <<Jongana!>> sau. Poni qai lao tana sira karu ko qai todongo aru tamana pa karu nenena, ko qai vatarasaea sisa. 10Beto sa parangaria i Jisu sira karu, <<Muke matagutu! Mu lao pojaniria sira na tasiqu ko mai lao pa Qalili. Ko ketakoi tu sa kode mai batisiu ira sara,>> sau sisa.
Na Vavakato tadira na Tinoni Kopu pa Bevi
11Ego ko totonai qai korapa rerege mule riudia sira na rereko, sa kaki ira na solodia qai kopu pa bevi sa qai lao pa Jerusalema, ko qai lao vavakatoniria tadira na kuta iama sira doru ginugua qai podo aipira. 12Poni qai vaikamu sira na kuta iama na iviva mamata ko qai vatoqoa sa kai roroqu ko qai vani vasokuniria na poata sira na solodia qai kopu pa bevi, 13beto pira qai naqu veiniria, <<Pira munagu sagou, <Qe kole puta agei na bongi sa qai kamu iko tekua ira na ona sepele sa na tinina,> munagu. 14Vei mina nongoria na qavuna sa na ginugua api, sa agei kode mene paranga valolomosia sisa ko agou muneke gosoro tapata,>> qarigu. 15Ko qai aru vakarovia ira na solodia qai kopu pa bevi sa na poata, beto qai tutia tugu sisa vei muna roiti vei qariguniria ira na kuta iama. Ko na vavakato isa sa sa tavarerege tadira na tinoni Jiu tinganai sa kamua pa rane pa ngeni api.
Sa Votu Tadira na ona Sepele si Jisu
(Maka 16.14-18; Luke 24.36-49; Jone 20.19-23; Roiti 1.6-8)
16Ego ko qai taloa lao pa Qalili sira na ona sepele pa kubo ketakoi sa poja vakoleniria i Jisu mai vera sauniria. 17Ko totonai qai batia ira si Jisu sa qai vatarasaea ira sisa, ba kaki qai ruarabeke tugu. 18Beto sa rerege tata laoria i Jisu sira, ko sa parangaria, <<Qa tei taiania tu ara sa doru neqi pa noka beto pa peso. 19Ko sa vei sa mu lao ko mu vasepele vanisiu sira doru puku tinoni, muna paputaisoria pa isongona na Tamana, na Tuna, beto na Gagala Tabuna. 20Beto ko muna vaivagigalainiria ko mai vataberia sira doru sakasava qa garununigou ara. Beto ko ara sa mana vavaburogou doru totoso, tinganai mina kamua na vinabetona na totoso,>> sau si Jisu.
Attualmente Selezionati:
Matiu 28: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
