Matiu 24

I Jisu sa Korotonia na Jegarana na Ruma Zelepade

(Maka 13.1-2; Luke 21.5-6)

1Ego tonai sa taloa pa kakabarena zelepade si Jisu, sa qai lao tana sira na ona sepele, ko qai vadogoronia isa sa na roitina na ruma zelepade. 2Poni sa sa parangaria i Jisu sira, <<Qai vagabaragou agou sa pira. Ba ma poja sosotonigou ara sagou: ira doru patu qu batiria pira sa maike kole vavaitopare lalaodia, ba kode mai taqovara beto,>> sauniria.

Ira na Tapata mai Gosororia ira na Sepele

(Maka 13.3-13; Luke 21.7-19)

3Ego totonai sa korapa toqona pa batu kubo pa Olive si Jisu, sa qai mavo lao mekadi tana sira na ona sepele, ko pira qarigu, <<Mu ule vanigei. Ai totoso mai podo sira doru sakasava quguniria ao inara? Beto na sa sa mina tabata vei na vinagigilana na mua bola lame beto na vinabetona na totoso?>> qarigunia.

4Poni sa oeria i Jisu sira, pira sauniria, <<Mu kopu vatale gu ko maike toni vapirugou. 5Ura kubo sira na tinoni kode mai lame pa isongoqu ara, ko pira marigu, <Ara sa na Karisito!> marigu, ko mai toni vapiruria sira na soku tinoni. 6Kode muna nongoroniria sira na vaipera beto na vavakatodi na vaipera, ba munake matagutu. Kode mai pidoko lame tugu sa na sakasava inara, ba nake isa sa na vinabebetona. 7Kai puku tinoni mina turu talea kai goto puku tinoni, beto kai binangara mina turu talea kai goto binangara. Beto na songe beto na nunu mai raja doru eqa. 8Doru sakasa pira sa vei na popodalaina na vivitigi teku koburu.

9Na totoso isa sa kode muna taaru tamana sagou ko mai toni laonigou tadira na tinoni ko muna tavakilasa beto mai vamategou. Pana ginuana qu tutisiu ara sa kode maike tavaraguanigou ira na tinoni karovodi sagou. 10Kubo tinoni sa na dia rarange mina vukele ko mai taloa rijodia taqu, beto ko mai vaigabala vikere beto maike vaitavaragua sira. 11Beto kubo tinoni kokorotai sesekedi sa mai votu lame ko kode mai toni vapiruria sira soku tinoni. 12Kode inara mina koi vei gigiri vei sa na reregena na toa ikikerena ko na toa vairoqu tadira na tinoni sa mina lomoso betona. 13Ba isa gu sa vangaju kamua na bebetona sa mina taalo. 14Ko na nongoro jongana api, isa na veveina na binangara tana Tamasa, sa mina tatarae pa kasia gusu doruna ko ira doru tinoni karovodi mai nongoria. Pa liguna tu isa sa mina lame sa na vinabebetona na totoso,>> sau si Jisu.

Na Sakasava Ikerena Jola

(Maka 13.14-23; Luke 21.20-24)

15<<Kode muna batia sa na Sakasava Ikerena Jola isa vei sa tei pojai tu i Daniela na tinoni kokorotai. Ko na Sakasava Ikerena Jola#24.15 Na Sakasava Ikerena Jola api sa kai tamasa beku seseke veveina sa pojai i Daniela pa Daniela 9.27; 11.31; 12.11. isa sa mina turu pa ia madina pa ruma zelepade (Agou qu tiroa na paranga api sa mu vakoinonoa na ginuana). 16Totonai mina vei isa sa ira qai suvere pa Jiudia sa mai uku sagereria tu sira na kubo ketakoi. 17Isa sa korapa suvere pa narena nona ruma sa mike mule gore qaqiriria na ona sakasava pa leo ruma. 18Isa na tinoni sa korapa pa ona inuma sa mike mule tekua na ona poko.

19Na totoso takulanga tadira na rereko qai bogata beto ko tadira qari isongo melalu sira na rane ira! 20Mu vavara tepai na Tamasa, ko nake pa totoso lomoso babi na rane Minere sa mu uku agou. 21Ura na tapata pa totoso isa sa mina lavata jolaniria na tapata qai jola totonai vei sa podalai na kasia gusu ko sa lame kamu kopira. Ko pa liguna sa kepore sa kai tapata mina ikerena jola vei api. 22Ba sa tei vapapakia tu na Tamasa sa na anyedi na rane totonai. Goto bike vei sa kepore kai tinoni bi boka toa. Ba koko vei gu sa roroquria na ona tinoni taviledi sa na Tamasa sa soni vei sa mina vapapakia sa na anyedi na rane pa totoso tapata isa.

23Vei pira bi paranga veinigo kai tinoni totonai, <Do, poni sa na Karisito!> babi, <Inana sisa!> biu, ba kita vasotoa. 24Ura kode mai vovotu lame sira na karisito sesekedi beto na tinoni kokorotai sesekedi ko mai roitiniria na roiti vaivagabara poreveveidi beto mai vavoturia na dia vinagigila, ko vei mai boka sa mai toni vapiruria tugu vei sira na tinoni taviledi tana Tamasa. 25Mu vainongoro! Sa oqoro kamua na totoso isa sa qa korapa pojanigou ara sapi.

26Ko vei pira bai ule veini vanigou ira na tinoni, <Poni! Korapa suvereona gu pa qega sisa!> barigu, sa kita votu lao. Babi <Ina! Korapa gu suvere pa leo ruma sisa!> barigu, sa kita vasotoria. 27Ura na bola lame tana Tuna na Tinoni sa kode mina vei gu na kapi sa malara podalai pa kale sagere tapo ko sa kamu pa kale suvu tapo. 28Ketakoi sa kole na kokobu tinoni matena sa kode mai vaikamu ketakoi sa na nyae,>>#24.28 Na nyae babi kai manugu sa vei na jako ko sa boboka gagani nyabo babi na tini kokobu tinoni. sau si Jisu.

Na Bola Lame tana Tuna na Tinoni

(Maka 13.24-27; Luke 21.25-28)

29<<Mina jola sa na tapata pa rane ira,

sa kode mina rodomo sa na tapo,

na popu minake kabere,

na seru pa noka mai vukele,

beto doru sakasava pa noka mai tajou vakanoko beto.#Aisea 13.10; 34.4.

30Beto mina tabata votu lame pa vavagalo eqa sa na vinagigilana na Tuna na Tinoni. Beto sa mai lukana tadungana beto sira doru tinoni pa kasia gusu totonai mai batia na lamena na Tuna na Tinoni pa lei pa noka, mina lame tavitia na neqi lavatana beto na kabere lavatana. 31Mina taivu vavaqoro viva sa na kuvili, beto mina garunu laoniria isa sira na ona mateana pa doru eqa pa kasia ababana, ko mai toni vaikamuniria na ona tinoni taviledi pa doru uququdi na kasia gusu.

32Mu doria na gou piqi ko mu tekua kai vinakabere. Totonai mina ijoko ko mina podalai equru ko mina bu vatale, poni sa qu gigilai sa tei takelai tu sa na gou isa ko sa tata gu sa nona totoso vua. 33Kode inara tugu muna vei sagou na totoso isa. Tonai muna batiria agou sira doru sakasava pira, sa kode muna gigilaimiu gu sa sa tata sa na totoso, ko sa tata vivitigi gu sa na Tuna na Tinoni. 34Ara ma poja sosotonigou sa agou: doru sakasava pira sa kode mai gore votu totonai mai oqoro mate beto na sasae tinoni kopira. 35Na oka beto na peso sa mai maragutu, ba ira na qua paranga sa maike isongo maragutu,>> sau si Jisu.

Na Rane na Totoso qaike Tagigila

(Maka 13.32-37; Luke 17.26-30, 34-36)

36<<Goto na veveina na rane beto na totoso isa sa sa kepore kai tinoni bi gigilai. Ira na mateana pa noka babi na Tuna ba sake gigilai, goto mekana gu na Tamana sa gigilai. 37Na bola lame tana Tuna na Tinoni sa kode mina kai muqisi podeke vei tugu pa totoso tai Noa. 38Ira na rane totonai sa oqoro dururu na abana, sa ira na tinoni sa qai kole gaganigadia, qai kole bukugadia, beto ira na marene na rereko sa qai vavaialavadia, tinganai ko sa kamu sa na ranena sa tome pa leo aka i Noa. 39Ba qaike isongo vagigila podekia tugu ira sa na sa sa korapa taroiti, tinganai ko sa gore na nyoro ko sa pogoso variu beto paleria. Kode inara tugu mina lame vasiboro vei sa na lame tana Tuna na Tinoni. 40Na totoso isa sa karu tinoni mai korapa roiti pa inuma, sa kame sa mina tateku variu goto kame sa mina taloa pale. 41Karu rereko sa mai korapa kija vaavururia na dia kiko vuiti, sa kame sa mina tateku variu goto kame sa mina taloa pale.

42Ko sa vei sa mu suvere gegele, ura quke gigilai agou sa na rane mina lame na miu Bangara. 43Qu gigila vataleamiu agou sa vei bi tei gigila momoeona tu na tinoni poreona ruma sa ai totoso mina kamu na tinoni ikiko, sa kode mina suvere gegele ko minake boka pururu tomeia na tinoni ikikona sa nona ruma. 44Ko sa vei sa agou mu kole suvere vanaqiti doru totoso, ura na Tuna na Tinoni sa mina lame na totoso quke rove veinia mina lame,>> sau si Jisu.

Na Nabulu Tarangena beto na Nabulu nake Tarangena

(Luke 12.41-48)

45<<Ego kopira ma vavakato vanigou na veveina na nabulu tarangena. Na nabulu tarangena sa isa tugu kame sa vaivivai na bangara ko sa kopu vataleniria ko sa ianiria na gagani sira pa tatamana tana bangara pa totoso sa nguti vakoleniria na bangara. 46Mina tamana sa na nabulu isa totonai mina mule na ona bangara sa mina batia sa korapa tugu roitinia isa sa na roiti sa taiania ko mina roitinia. 47Ma poja sosotonigou ara sagou: kode mina vaiviva lavatia sosoto na ona bangara sisa, ko mina kopu vania doru ona isisongo. 48Ba vei bike nabulu jongana sisa ko bi roroqua isa sa kode minake oqani mule lame sa nona bangara biu, 49ko bi podalai mamajaria sira na nabulu tatavitina beto bi somana teteku beto bubuku tavitiria sira na tinoni bubukudi. 50Ego beto mina mule kamu sa na bangara tana nabulu api na rane beto na totoso mina korapa suvere muma ko minake gigilai isa. 51Na bangara mina lomoto kokobu pale sisa, beto mina vakole tavitiniria ira na tinoni sesekedi. Ketakoi sa mai lukana uui beto mina ngingisi tu na livodi sira na tinoni,>> sau si Jisu.

Attualmente Selezionati:

Matiu 24: LGA

Evidenziazioni

Copia