Matiu 11

1Totonai sa beto vavanauria sira ka manogarua ona sepele si Jisu, poni sa sa taloa ketakoi ko sa riu vaivagigalai beto sa tarae pa gugugusu pa ia ketakoi.

Ira Na Tinoni Pogoso Nongoro Ti Jone

(Luke 7.18-35)

2Ego sa korapa suvere pa ruma vaipiu si Jone Paputaiso sa sa nongoronia isa sira na roiti sa roitiniria na Karisito, ko sa garunu laoniria isa tana sira kaki ona sepele, 3ko pira qarigunia, <<Ai vei, ao tugu sa isa qe korapa veverania agei na tinoni kode mina lame qeu? Ba ai vei, kai goto tu sa mene verania agei?>> qarigu.

4Poni sa oeria i Jisu sira, <<Mu mule lao ko mu ule vania i Jone sira vei qu nongororia beto qu batiria. 5Na tinoni leleqadi qai babata, ira na qao qai rerege, ira sa vairia na popoqu qai tataloso valioso, na tinoni qai kiqili qai nonongoro, na tinoni matedi qai toa mule, beto na nongoro jongana tana Tamasa sa sa tatarae tadira na tinoni golabadi. 6Mai tamana sira qaike nongoro nyunyalanisiu ara!>> sau si Jisu.

7Ego ko pa ligudi qai taloa riu sira na sepele tai Jone pira, sa sa pojai i Jisu tadira na minete tinoni sa na veveina i Jone, pira sauniria, <<Tonai qu lao sagou tai Jone pa qega, sa na sa sa mu lao dogoria qugu? Kai tinoni sa malei vei na equru buburu sa tajou vakakanoko lao lamenia na gava? 8Ba na sa beka qu nyogua lao batia? Kai tinoni isisongo sa popoko vatatale? Dai, na tinoni qai popoko vatale vei inara sa pa ruma bangara tu qai susuvere! 9Ko na sa sosoto sa qu nyogua lao dogoria agou? Kai tinoni kokorotai? E, ba ma pojanigou ara: isa sa sa poreveveina jolaniria ira na tinoni kokorotai. 10Ura i Jone gu sa isa sa pojai na veveina na Kukuti Tabuna, pira sau,

<Vainongoro! Ara qa garunu momoe laonia

sa na qua tinoni pogoso nongoro,

ko mina vatana momoea sa na soana tamu,>#Malakai 1.2. sau.

11Ara ma poja sosotonigou sagou: sa kepore kai tinoni podona sa poreveveina jolania si Jone. Ba na tinoni sa kepore veveina jola pa binangara pa noka sa sa poreveveina jolania si Jone. 12Sa podalai totonai sa kole tarae i Jone Paputaiso ko sa kamu kopira sa na binangara pa noka sa qai rapatia ko ira na tinoni tuara ikeredi qai saputu ragata tekua. 13Ira doru tinoni kokorotai beto na Vavanau ti Mosese sa qai ulule votunia tinganai qai lame kamua na totoso ti Jone.

14Vei muna nyogua vasosotoa sa, i Jone gu api sa i Elaija, isa sa korapa lalameona qarigunia ira. 15Na tinoni sa pore na talingina sa mi vainongoro vatale!

16Na sa mana vavapadaniria ara sira na sasae tinoni pira? Ira na tinoni kopira sa qai vei gu ira na koburu qai totoqodia pa ia mamaketina ko qai kole vavaikuku karovo, pira qai kuku vei,

17<Qe kekera vanigou na kera vaialava,

ba agou quke peka tu!

Qe kera roroma sagei,

ba agou quke lukana takulanga tu!> qaqarigu.

18Totonai sa lame si Jone sa sa boboka mamadi ko sake teteku beto sake bubuku vaini sisa. Poni qai paranga sira na tinoni, <Sa kolea na tomate ikikerena sa na bangara ina!> qarigunia. 19Tonai sa lame mule na Tuna na Tinoni ko sa teteku beto sa buku, poni sa pira qarigunia, <Doro! Sa ngoja mota beto na tinoni bubukuna, na baere tadira na tinoni teteku takisi beto ira na tinoni seladi sina!> qaqarigunia. Ba na tavagigala tana Tamasa sa sa tabata votu pa vuana na toa tadira na tinoni qai vasosotoa,>> sau si Jisu.

Na Gugugusu Qaike Vasosoto

(Luke 10.13-15)

20Ego ko sa podalai tokeria i Jisu sira na gugusu ketakoi sa roitiniria na kubo roiti vaivagabaradi isa, ura qaike gabala loaria na dia sela. Pira sauniria, 21<<Mu takulangagamiu tu sagou pa Korazini. Mu takulangagamiu tu agou pa Betiseda! Vei bai taroiti tadira na tinoni karovodi pa Turosi beto pa Sidoni sira na roiti vaivagabaradi qai taroiti tamugou kopira, sa pa moa tu bai gabala loa paleria na dia sela ko bai bibiluniria na kavu beto bai vasae poko taririkatadi sira! 22Ba ma poja vatatalenigou ara sagou: na rane vaituti sa mina jolania na vaituti mai gosoria ira pa Turosi beto pa Sidoni sa na vaituti tana Tamasa muna gosoria agou.

23Goto agou pa Kepaniami! Ai vei qu roroqua agou sa kode muna taovulu saemiu pa noka? Dai, kode muna tagona vagore gu pa ia susuverena tadira na tinoni matedi! Ura bai taroiti tadira pa Sodomo sira na roiti vaivagabaradi qai taroiti tamugou kopira, sa bi korapa turu jolaona kamua tu pa rane pa ngeni sa na gugusu isa. 24Ma poja vatalenigou gu ara sagou: na rane vaituti sa mina jolania na vaituti mai gosoria ira pa Sodomo sa na vaituti tana Tamasa muna gosoria agou,>> sau si Jisu.

Lame Taqu ko Mu Minere

(Luke 10.21-22)

25Ego pa totoso isa sa paranga vei pira si Jisu, <<Tamaqu, ao na Bangarana na oka beto na peso. Qa paranga jongana lao tamu sara, ura na sakasava aipira sa qu vapaeria ao tadira na tinoni gigigalaidi beto na bobokadi beto qu vadoroniria sira qaike gigalai. 26E, Tamaqu, ura isa tugu sa vei sa na nyorogua tamu.

27Na Tamaqu sa tei ianisiu tu ara doru sakasava, ko kepore sa kai tinoni bi gigilai na Tuna goto na Tamana gu, beto kepore sa kai tinoni bi gigilai na Tamana goto na Tuna gu beto ira gu sa vileria na Tuna ko sa vakabere vaniria na veveina na Tamasa.

28Mei, lame taqu sagou doru qu pavu beto qu pogoso mamata, ko ara ma vamineregou. 29Mu paku pogosia na qua pajavala beto mu vainongoro lame taqu, ura ara sa qake tuara beto qa vaiketai pa bulo, ko mu teku vania na minere na miu toa. 30Ura na pajavala taqu sa munyala na paku pogosona, beto na pogoso taqu sa kopele,>> sau si Jisu.

Attualmente Selezionati:

Matiu 11: LGA

Evidenziazioni

Copia