Popodalaina 44
44
Kai Kapa Siliva Pana Kai Baiki
1Ego i Josepa sa garunia sa na tinoni kopu pa nona ruma, pira saunia, <<Mu vapugeleniria na tetekuna sa na baiki tadira na tinoni inara isa vei mai boka pogosia, beto na dia poata siliva sa mu okoto kura muleniria tugu vei pa dia leo manga baiki. 2Beto sa, mu kurania sa na kapa taqu isa na kapa siliva ina pa leo manga baiki tana tinoni isa pa ligu bebeto, vei tugu nona poata siliva sa vainia na kiko,>> sau. Poni sa roitinia tugu isa sa na manugu sa garununia i Josepa.
3Totonai sa kabere vuvugei, poni sa qai loa variuria tavitiria na dia dongiki sira na tinoni ira.
4Ego qai votu loai ira sa na gugusu lavata ba totonai qai oqoro taloa vasou sa, pira saunia i Josepa sa na ona tinoni kopu, <<Qaqiri ko kopira tugu mu adu tutiria sa na tinoni pori, beto totonai muna kamuria sa pira munaguniria, <Ai sa vei ko qu beinia tu na ikerena sa na jongana? 5Ko isa tugu na kapa sa bubukunia na tinoni lavata taqu beto sa dodogoro votuniria na sakasava golomodi sisa. Na roiti ikikerena sa qu roitinia agou inara munaguniria>,>> saunia.
6Ko totonai sa riu kamuria, poni sa sa pojaniria tugu sa na paranga tai Josepa aipira. 7Ba pira qarigu tu sira, <<Ai sa vei ko sa paranga vei tu inara sa na tinoni lavata? Bi maragovi tu mene roitinia agei na mua nabulu sa na sakasava vevei inara. 8Na poata siliva tu qe batiria pa leo mei manga baiki ba qe pogoso mule vanigo tu ao koko pa ia pa Kenani tu Ko ai vei beto mene boka iko siliva babi na qolo mutu pa ruma tana tinoni lavata tamu? 9Ba vei kame agei na mua nabulu sa bi tapoa sa tekua sa, mina mate tugu sisa beto agei doru mule sa mene ona pinausu gu na tinoni lavata,>> qarigu.
10Poni pira sau sisa, <<Ego jongana ropi, kopira ta roiti vei isa qu pojai agou. Isa na tinoni sa tapoa sa tekua sa mina pinausu taqu goto agou doru sa munake tajutunia sa na tapata isa,>> sauniria.
11Ko qai okoto sisiqarai vagorea pa peso sa na dia baiki beto qai okoto ruvata revangaria sa na dia baiki. 12Beto sa podalai nyaqo sa na tinoni kopu podalai tana isa pa moa ko sa kamu tana isa pa ligu bebeto, poni sa sa tabata pa leo baiki tai Benisimani sa na kapa. 13Poni qai ririkataria sa na dia poko beto qai okoto susurana pa dia kameli sa na dia sakasava ko qai mule pa gugusu lavata.
14Ego i Jiuda beto ira na tugana beto na tasina sa qai tome pa ruma ti Josepa ko i Josepa sa korapa tugu ketakoi ko qai gona oponiria pa peso pa moena isa. 15Poni sa pira sauniria i Josepa, <<Na sa sa qu roitinia agou? Quke gigilai agou sa na tinoni vevei ara api sa mana boka dogoro votuniria gu sa na sakasava golomodi?>> sauniria.
16Poni pira sau si Jiuda, <<Na sa mule menegu agei tana qua tinoni lavata?>> <<Na sa mene boka pojai agei? Na sa mule mene roitinia ko mene boka talegasamei sagei? Ko kopira na Tamasa sa poai sa na sela tamigei. Ko kopira sa agei sa na pinausu gu tamu ao na qua tinoni lavata- agei doru tavitia tugu isa na tinoni sa tapoa sa tekua na kapa,>> sau sisa.
17Ba pira tu sau si Josepa, <<Bi maragovi tu mana roitinia ara sa na roiti api. Isa gu na tinoni sa tapoa sa tekua na kapa sa mina pinausu taqu. Goto agou doru sa muna mule sae, vabubulemiu tana tamamiu,>> sau sisa.
18Poni sa kanoko tata lao tana si Jiuda ko pira sau, <<Muke veinisiu qua tinoni lavata. Bu vamalumusiu ko ma parangigo mai ao na qua tinoni lavata. Muke kokoranisiu ara na mua nabulu ura ao sa vaitoto vei gu i Pero sao. 19Qua tinoni lavata! Perangana qu nanasagei sagei na mua nabulu, <Ai vei korapa suvereona na tamamiu beto koleona kai tasimiu marene?> qugunigei. 20Poni pira qeunigo sao qua tinoni lavata, <E! Korapa suvereona na tamamei babaragoso beto kai tuna marene isa sa podo totonai sa tei baragoso vivitigi tu isa. Na tugana sa tei mate tu ko mekana gu isa sa korapa suvere sa ira karu kai tinadi ko na tamana sa roroqu vivitigia sisa>,>> qeunigo.
21<<Poni pira qugunigei sagei na mua nabulu, <Mu toni lagerenia taqu ko ma batini mataqu sisa> qugunigei. 22Poni pira qeunigo sao qua tinoni lavata, <Na koburu sa tapata mina loai na tamana ura vei mina loai sisa sa kode mina mate gu sa na tamana>, qeu. 23Ba pira qugunigei tu sagei na mua nabulu, <Vei mineke tuti lageregou sa na tasimiu sa munake bola bati ligua na isumataqu ara,> qugu. 24Ko totonai qe mule sae kamua sa na mua nabulu na tamamei, poni sa qe vavakato vania sa doru na paranga qu pojai ao na qua tinoni lavata.>>
25Ego sa sovai, <<poni sa pira sau sa na tamamei, <Mu mule gore ko mu vai vanigita mule ka visa tetekuna,> saunigei. 26Ba pira qeunia, <Agei meneke boka gore. Vei mina tutigei tu na tasimei pa ligu sa mene gore. Ura agei meneke boka batia na isumatana na tinoni isa vei mineke tutigei na tasimei pa ligu>,>> qeunia.
27<<Poni pira saunigei sa na mua nabulu na tamamei, <Qu gigilaimiu agou sa karu tuqu marene sa sa vapodo vanisiu ara na maqotaqu>.>> 28Kame ira karu sa sa taloa taqu ko totonai pira qau, <<Vavagila kaki manugu pirudi qai tei garata pipiara pale tu sisa.>> Ko qake batia ara sisa kamua tugu pa ngeni alepi. 29Ko vei muna teku variunisiu mule sapi ko mina gosoro kalea na tapata sisa sa na mamata takulanga gu sa, kode mina vagorenisiu pa leo pou ara, saunigei.
30Ko sa vei sa, <<Vei mana mule sae tana mua nabulu na tamaqu sara ko na koburu minake tutigei sagei sa na toa tana tamana sa piulai vaikamu gu pana toa tana tuna gu api ke, 31ko totonai mina batia na tamamei kepore sa na koburu poni sa kode mina mate gu sisa. Ko na takulanga gu mene vagorenia pa leo pou agei na mua nabulu sa na mua nabulu na tamamei, 32Ura ara na mua nabulu qa tapogosonia tana tamaqu sa na koburu api.>> Pira qaunia Vei maneke toni mulenia sa na koburu alepi sa ara mana tajutu tarinia pa moemu ao na tamaqu kamua na kamua qaunia.
33<<Ko ai vei bi ara na mua nabulu ba beia sa na koburu ko ba suvere vei na pinausu tamu ao na qua tinoni lavata goto na koburu bi tuti mule saeria sira na tugana. 34Ai mana boka roiti vei mana mule kamua na tamaqu vei maneke toni mulenia sa na koburu? Dai! Qake nyorogua batia na takulanga mina gosoria na tamaqu,>> saunia.
Attualmente Selezionati:
Popodalaina 44: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
