Popodalaina 43
43
Na Rerege Gore Vinarua Pa Ijipi
1Ego na songe sa sa korapa neqi pa doruna na ia. 2Totonai qai teku vabetoria sa doru na kiko qai tekuria pa Ijipi, sa pira sauniria na tamadi sira, <<Mu mule gore ko mu vai vanigita mule ka visa tetekuna,>> sauniria.
3Ba sa parangia tu i Jiuda sisa, pira sau, <<Na tinoni isa sa paranga vaneneqi gei sagei, Pira saunigei, <Vei munake tonia sa na tasimiu sa munake batia na isumataqu ara sagou>. 4Ko vei muna garunu vatutinigei sa na tasimei sa, mene gore vai vanigo sa na tetekuna. 5Goto vei munake garunu vatutinigei sisa, meneke gore ura na tinoni isa sa pira saunigei, <vei minake tutigou sa na tasimiu sa muneke bati ligua na isumataqu saunigei>,>> qarigunia.
6Poni sa nanasa si Izireli, pira sau, Ai sa vei ko qu ule vania tu sa na tinoni isa koleona kai tasimei qugunia ko qu vanisiu na tapata sara? sau.
7Poni qai oea ira sisa, pira qarigu, <<Na tinoni isa sa nanasa vivitiginia sa na veveimei agei beto na mei tatamana. Pira sau, <Na tamamiu sa korapa toaona?> <Koleona mule kai tasimiu?> saunigei. Ko agei qe oeria gu sa na sa sa nanasanigei isa. Ai vei mene gigilai agei sa isa kode pira minagu, <Muna toni lagerenia na tasimiu minagunigei>,>> qarigunia.
8Beto sa pira saunia i Jiuda si Izireli na tamana, <<Mu garunu vatutinisiu ara sa na koburu ko agei me qaqiri ko me riu kopira, ko agei beto ao beto ira na tuda ta toa ko take mate. 9Ara mekaqu mana tapogosonia beto ao muna boka jutunisiu gu sa na toa tana koburu. Ko vei maneke toni mulenia tamu beto munake batia lani pa moemu sa, ara mana tajutunia sisa pa moemu ao kamua na kamua. 10Ko inara gu sa vei, goto vei beke vavabongi agei sa, be tei boka riu tu kopira beto ko be tei rua vidulu tu,>> sau sisa.
11Poni sa pira sauniria i Izireli na tamadi sira, <<Ego vei mina vei tugu isa sa, pira mu roiti vei: Mu kuraniria pa baiki sa kaki vuvua pa mumuqu beto mu pogoso gore vania na tinoni isa, na juki miu vaivana tana sa- iapeki oela beto iapeki muji, kaki oela umumanga jonga beto na moa, kaki vua ngari beto na alimoni. 12Mu tamo ruai sa na poata siliva qu aruria perangana ura na poata siliva qai kole pa mangana na miu baiki sa muna kaqama muleniria pa limamiu. Palu qai kura kaleniria gu sinara. 13Beto mu tonia sa na tasimiu inana ko mu qairi ko mu mule gore tana tinoni isa. 14Beto na Tamasa neqina jola mi vanigou na jongana totonai muna turu pa moena na tinoni isa ko mina vamalumu vanigou ko mai tuti mulegou sa na tugamiu i Simioni beto na tasimiu i Benisimani. Goto ara sa, vei maneke isongoria sa, maneke isongoria tugu,>> sau sisa.
15Ko qai teku pogosoria ira na tuna sa na vaivana beto na poata siliva tamo rua beto qai tonia si Benisimani ko qai qaqiri ko qai gore pa Ijipi ko qai lao turu pa moena i Josepa.
16Totonai sa batia i Josepa si Benisimani sa kamu tavitiria ira sa, sa pira saunia sa na tinoni kopu pa nona ruma, <<Mu toni laoniria na tinoni pira pa ruma beto mu kubolia kai papausu ko mu vatanai na tetekuna ura kode korapa rane mai teteku tavitisiu ara sira na tinoni aipira,>> saunia.
17Ko na tinoni kopu sa roitinia sisa vei sa pojania i Josepa ko sa toni laoniria pa ruma tai Josepa sa na tinoni aipira.
18Ego qai matagutu sira na tinoni aipira totonai qai toni laoniria pa ruma tai Josepa. Ko pira qarigu, <<Isatugu pa laena na poata siliva qai kole pa leo oda baiki pa totoso momoe sa qai teku lamenigita lani. Ko sa nyorogua rapatagita beto vakilasagita beto mi tekunigita nona pinausu beto mi tekuria na oda dongiki sau basava,>> qarigu.
19Ko qai lao kamua sa na tinoni kopu tai Josepa ko qai parangia pa totomena na ruma tana. 20Pira qarigunia, <<Koi iviva,>> be parangigo mai. <<Pa totoso momoe sa qe lagere vai kiko lani sagei. 21Ba kai ia ketakoi qe puta, poni sa qe ruvataria na mei baiki qeu sa, agei doru sa qe okoto batiria pa mangana na mei baiki sa na mei poata siliva isa qe vavainiria. Ko qe pogoso muleniria pa limamei aipira. 22Na poata siliva mene vai liguni kiko sa qe posoria pa limamei aipira. Qeke gigilai i sei sa vakoleria sa na poata siliva pa leodi na mei baiki,>> qarigu.
23Poni sa pira sauniria, <<Koi jongana gu sina.>> <<Muke matagutu. Na miu Tamasa, na Tamasa tadira na tamamiu sa vakoleria pa leo baiki tamugou sa na poata inara, goto ara na poata siliva tamugou sa qa tekuria tu,>> sau. Beto ko sa vavotu vaniria si Simioni.
24Sa toni tomeniria na tinoni kopu pa leona na ruma tai Josepa sira na tinoni pira, sa vatana vaniria na pie ketakoi mai loqaria na nenedi beto sa vaniria na gagani sa na dongiki tadira. 25Qai vatanai sa na dia vaivana verania mina kamu i Josepa na korapa rane ura qai tei nongoronia tu sa kode mai teteku tavitia isa sira pa nona ruma qarigu.
26Totonai sa kamu pa ruma si Josepa sa, qai valaoa sa na dia vaivana qai pogoso tomeniria pa ruma beto qai titi opo gore pa peso pa moena isa. 27Sa nanasaria ai qai veveigadia, beto poni sa pira sauniria, <<Ai sa korapa veveigana sa na tamamiu babaragoso qu vavakato vanisiu? Ai vei sa korapa toaona?>> sauniria.
28Poni qai oe lao sira, pira qarigu, <<Na mua nabulu na tamamei sa sa korapa toaona beto sa korapa suvere vataleona gu,>> qarigunia. Beto ko qai titi opo gore ko qai valavatia.
29Totonai sa dogoro laolame ko sa batia si Benisimani na tasina isa kai tinadi gu ira karu poni sa sa nanasa, <<Isa na tasimiu pa ligu bebeto qu pojanisiu sapi?>> sauniria. Beto pira saunia, <<Na Tamasa mi mananigo tuqu,>> sau. 30Beto sa koi vei kanoko na bulona si Josepa totonai sa batia na tasina ko, sa sisiqarai votu nyaqoa kai eqa ko mi lukana sau. Ko sa tome pa ona lose mekana ko sa lukana ketakoi.
31Pa liguna sa puqa vapidilia sa na isumatana sa sa votu lame beto sa kole aru tamana mulenia mekana sa sa paranga, pira sau, <<Mu iai na tetekuna,>> sau.
32Ko qai ia vania na tetekuna sisa mekana kai ia, ira na boko tamatasi sa kai ia qai toqo mekadi, beto ira na tinoni Ijipi qai teteku tavitia isa sa kai ia qai toqo mekadi, ura ira na tinoni Ijipi sa qaike boka teteku tavitiria sira na tinoni Hiburu ura na ikerena jola tadira na tinoni Ijipi sa sa vei isa. 33Beto ira na tugana na tasina sa qai vatoqoniria pa moena isa tuti pa aorodi podalai pa moa ko sa kamu tana isa pa ligu ko qai okoto vaidogoro lao lame mekadi beto qai gabara. 34Totonai qai taiania sa na tetekuna sa tavatana pa tevolo tai Josepa sa, na iana i Benisimani sa ka lima totoso sa mota jola jolaniria ira doru qai teteku. Ko qai teteku beto buku qeqera tavitia isa sira.
Attualmente Selezionati:
Popodalaina 43: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
