Popodalaina 31
31
I Jekopi Sa ukunia Si Labani
1Ego sa nongoria i Jekopi sa na paparangadi ira na tuna marene i Labani, pira qarigu, Koi! <<Sa teku beto pale i Jekopi sa doru sakasava tana tamada ko pana sakasa gu tana tamada sa roiti votuniria isa sa doru ona isisongo,>> qarigu. 2Ego beto sa batia tugu vei i Jekopi sa na beina na isumatana i Labani sa sake vevei perangana.
3Poni pira saunia i Iahova si Jekopi, <<Mu mule lao pa ia tadira na tamamu beto na tavitimu, kode ara mana vavaburogo,>> saunia.
4Poni i Jekopi sa garunu laoniria na paranga sira Resolo i Lia ko sa kuku valameria pa ia ketakoi sa korapa kopuniria nona gogodo sipi. 5Beto pira sauniria, Qa batia ara sa na beina na isumatana na tamamiu, ko kopira sake vevei lame taqu sa vevei perangana ba na Tamasa tana tamaqu sa sa korapa suvere tavitisiu sara. 6Qu gigilaimiu agou karu sa qa roiti viviva vania na tamamiu sara, 7ba na tamamiu sa sesekesiu ara ko sa kole vavarijoa ka manogaputa totoso na tabaraqu. Ba na Tamasa sake vamalumia ko bi koti vikeresiu sara. 8Totonai sa paranga, Na kikirikotidi sa na tabaramu ao sau sa doru sipi sa qai vapodoria na kikirikotidi tugu. Totonai na gagasidi sa na tabaramu ao sau sa doru sipi sa qai vapodoria sa na gagasdi tugu. 9Ko na Tamasa sa teku variunia nona papausu sa na tamamiu agou ko sa vanisiu ara.
10<<Totonai qai vavaivapodo na papausu, qa enga sae qa batiria pana qua putagita sa na qoti marene qai korapa paparia na qoti gagasidi, na kikirikotidi beto na tototudi. 11Beto pira saunisiu sa na Tamasa pana putagita, <Jekopi>, sau. Poni pira qaunia, <Api sara,> qau. 12Poni pira saunisiu, Mu enga sae ko mu batira sa doru qoti marene qai korapa paparia na papausu sa na gagasadi, na kikirikotidi beto na tototudi, ura qa tei batiria tu ara sa doru sakasa sa roitiniria i Labani tamu. 13Ara sa na Tamasa pa Beteli, ketakoi qu vuvani oela ao kai patu babara beto ketakoi qu maulu lamenia kai maulu taqu. Kopira tugu mu qaqiri ko mu taloa sa pa ia api ko mu mule lao pa ia ketakoi qu podo,>> sau sisa.
14Poni pira qarigu sira Resolo i Lia, <<Kepore mutugu sa na iamei pana isisongo pana tatamana tana tamamei sagei karu. 15Sa roiti veinigei tu na tinoni karovomei sagei karu ko sa vavai palenigei, beto sa gani beto pudala pale sa na poata tamigei karu. 16Ko doru isisongo tana tamamei sa teku variunia na Tamasa sa tamigei karu beto tadira na tumei. Ko kopira mu roitinia gu ao sisa vei sa pojanigo na Tamasa>>, qarigunia.
17Beto sa sa qaqiri si Jekopi ko sa vakoiria pa kameli sira na tuna beto ira na maqotana, 18beto ko toni lao vamomoeria sa nona papausu, tavitiria doruna na sakasa sa kopu vaululuniria pa Padani Arami ko mi mule lao tai Aisake na tamana pa ia pa Kenani sau.
19Ego totonai sa riu ngabuturia na vurungudi nona sipi si Labani sa, sa iko tekuria i Resolo sira na tamasa tai Labani na tamana. 20Beto i Jekopi sa sa vagonai si Labani na tinoni Arami ko sake pojania sa sa korapa uku riuona sisa. 21Ego ko mi uku riu tavitiria doru sakasava sa isongoria sau sisa ko sa qaqiri beto sa karovia na ovuku pa Eupareti beto sa bata sae vei pa kale ia kukubona pa Qiliadi.
I Labani sa adu tututia si Jekopi
22Ego na rane vinaue tu beto sa nongoria i Labani sa tei uku riuona tu si Jekopi. 23Ko sa toniria na tavitina qai korapa suvere tavitia beto ka vitu rane sa adu tututia si Jekopi ko sa riu kamunia pa kukubo pa Qiliadi. 24Poni sa votu tai Labani na tinoni Arami pa ona putagita na bongi sa na Tamasa ko pira saunia, <<Babana ko mu vakesania kai paranga ikerena babi jongana si Jekopi,>> sau sisa.
25Totonai sa lame kamua i Labani si Jekopi poni sa i Jekopi sa sa tei vaturua nona aqaqo tu pa kukubo pa Qiliadi, ko i Labani beto ira na tavitina ba qai vaturudia aqaqo tugu ketakoi. 26Beto pira saunia i Labani si Jekopi, <<Na sa qu roitinia sao? Qu vagonasiu, beto qu toni uku veiniria na pinausu pa totoso vaipera sira na tuqu rereko ara. 27Ai sa vei ko qu uku riu golomo ko qu ikosiu ara sao? Ai sa vei quke pojanisiu, ko ba garunu variunigou pa qeqera, pa kekera beto pa vaqorodi na tabarini beto na mike? 28Vei ba ao loloaria gu na boko qua mabusu beto karu tuqu rereko ba quke veinisiu tu. Na roiti tuturu sa qu roitinia ao. 29Sa kolesiu gu na neqi sara ko mana boka koti vikeregou sagou, ba pa bongi na Tamasa tana tamamiu sa pira saunisiu, Babana ko mu vakesania kai paranga jongana babi ikerana si Jekopi sau. 30Ba kopira ko qu tei riumua tu ura qu nyorogua vivitigi ko bu mule lao tadira na tavitina na tamamu qugu ke. Ba ai sa vei ko qu ikoria tu na qua tamasa ara?>> saunia.
31Sa oe si Jekopi, pira saunia si Labani, <<Ura qa matagutu ura kita mu teku ragata variunisiu sira karu tumu rereko qau. 32Goto vei muna batia sisa sa tekua na mua tamasa poni sa minake toa tugu sisa. Pa moedi tugu ira na tavitida aipira sa, mu nyaqoa mekamu ko bi koleona sa kaki sakasa tamu taqu lani,, poni sa mu tekua gu,>> sau. Ego i Jekopi sake gigilai sa i Resolo gu sa ikoria sa na tamasa ira.
33Ego ko sa tomea i Labani sa na aqaqo tai Jekopi beto na aqaqo tai Lia beto na aqaqo tadira karu nabulu rereko, ba kepotu sa kai sa sa batia. Pa liguna sa votu pa aqaqo tai Lia sa, sa tomea mule sa na aqaqo tai Resolo. 34Ego perangana tu sa tekuria i Resolo sira na tamasa tai Labani ko perangana tu sa kuraniria pa leo totoqona na ona kameli ko sa kole toqo takoria i Resolo sa na tamasa. Ko i Labani sa nyaqo betoa doru eqa pa aqaqo ba sake batia kai sa.
35Ego pira saunia i Resolo sa na tamana, <<Muke tagigirinisiu ara qua tinoni lavata vei qake boka turu pa moemu ao ura sa korapa vaisiu na mo rereko,>> saunia. Ko sa kole nyaqo doru eqa ba sake batiria sa na tamasa.
36Poni sa tagigiri si Jekopi ko sa talea si Labani. Ko pira saunia i Jekopi si Labani, <<Na sa sa na tapata taqu?>> <<Na sa sa na sela qa roitinia ara ko qu nyaqo mamangini tutinisiu ara?>> 37Ura qu tei nyaqo beto paleria tu ao sa doru sakasava taqu ko na sa sa qu batia isa vei na dia sakasa na tatamana tamu? Mu vakole gorea lani kopira pa moedi ira na tavitiqu ara beto na tavitimu ao ko ira mai pitua sa i sei sa sela sa gita karu.
38<<Ka rabeteputa aoro aipira sa qa suvere tavitigo ara sao. Ba kepotu sa kai qoti babi na sipi tamu bai tajue goboro, beto ara qake isongo gania kai qoti pa papausu tamu. 39Qake pogoso bolania tamu sira na manugu qai tavapapaleka vamate: Qa tavapogosonia mekaqu ara sa na beidi. Qu nyaqonisiu ara ao sa na vaina na sakasava qai taiko na bongi beto na sakasava qai taiko na rane. 40Pira qa vei sara: Na mangini sa ganisiu na rane, na lomoso sa ganisiu na bongi beto na qua puta sa uku loa palenisiu. 41Pira qa vei sara ka rabeteputa aoro qa suvere ara pa tatamana tamu. Qa roiti vanigo ka manoga made aoro na vaidi karu tumu rereko beto ka vonomo aoro qa kopuniria na mua papausu beto ka manogaputa totoso qu kole vavarijoa sa na tabara taqu. 42Ko vei bike na Tamasa tana tamaqu, na Tamasa tai Ebarahami beto na Tamasa vaivamatagutuna tai Aisake bi suvere tavitisiu sa, kopira bu garunu vamule gagale palesiu ara sao. Ba na Tamasa sa bationa na tapata taqu beto na pavuna na limaqu ko sa vei sa sa pitugo pa bongi sao,>> saunia.
43Poni sa oe si Labani, pira saunia si Jekopi, <<Ira na rereko sa na tuqu rereko ara, ira na koburu sa na koburu taqu, beto ira na papausu sa na papausu taqu. Doruna qu batiria sa taqu. Ba na sa sa mana boka roitinia pa ngeni alepi veveidi ira karu tuqu rereko aipira, babi veveidi na koburu qai vaporeria? 44Ko mu lame ko tavatoqoa sa kai vinaego, ao beto ara, ko isa sa na ulule pa vaikorapaida gita karu,>> sau sisa.
45Ko sa tekua i Jekopi sa kai patu lavata beto sa vaturu veinia kai babara. 46Beto pira sauniria i Jekopi sira na tavitina, <<Mu butiria kaki patu,>> sau. Ko qai teku patu ko qai boko vaitopareniria beto sa qai teteku tugu pa kekerena na boko patu isa. 47Ego i Labani sa vakukunia Jeqa Sahaduta sa na boko patu isa, goto i Jekopi sa vakukunia Qalidi.
48Beto pira sau si Labani, <<Na boko patu api sa na ulule pa vaikorapaida gita karu pa ngeni alepi,>> sau. Ko sa vei sa sa tavakukunia Qalidi. 49Ego ko sa tavakukunia tugu vei Mizipa sisa ura pira sau, <<I Iahova mi doro kopunigita sa gita karu ura kode tana okoto suvere oda. 50Vei muna nganguluria na tuqu rereko ara babu tekuria mule kaki rereko vatamo lao tadira karu tuqu ara inara, poni sa kepore sa kai tinoni sa suvere tavitigita ba mu roroqua sa na Tamasa sa na ulule pa vaikorapaida gita karu,>> sau.
51Beto pira saunia mule i Labani si Jekopi, <<Alepi sa na boko patu beto alepi sa na babara qa vaturua ara pa vaikorapaida gita karu. 52Na boko patu alepi sa na ulule, beto na babara api sa na ulule tugu, ko ara maneke jolania sa na boko patu api ko mana karovo lao roiti vivikere tamu beto ao munake jolania sa na boko patu api beto na babara api ko muna karovo lame roiti vivikere taqu. 53Na Tamasa tai Ebarahami beto na Tamasa tai Naho, beto na Tamasa tana tamadi ira karu sa mi pitugita gita karu,>> saunia. Ko sa maulu pa isongona na Tamasa vaivamatagutuna ti Aisake na tamana si Jekopi. 54Sa vavakukuvunia kai vavakukuvu pa kukubo si Jekopi beto sa soruria sa na tavitina ko mai teteku sau. Pa liguna qai beto teteku sa, qai vajola bongi tugu pa kukubo ketakoi.
55Ego sa turu vuvugei jonga si Labani ko sa ao loloaria sira nona mabusu beto karu tuna rereko beto sa mananiria. Beto poni sa taloa si Labani ko sa mule pa ona gusu.
Attualmente Selezionati:
Popodalaina 31: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
