Popodalaina 29
29
I Jekopi Sa Kamu Pa Padani Arami
1Ego ko sa ovulia na nenena si Jekopiko sa taloa riu veiona pa ia tadira tinoni pa kale sagere tapo. 2Ketakoi sa batia sa kai oqili pie takorina pa ia isa beto ka ue godo sipi qai korapa tugu toqo opodia tata pa oqili pie ura pa oqili pie tugu isa sa qai teku vaniria na pie sa na sipi. Ego na patu lavata sa sa kole pa mangana na oqili pie. 3Totonai qai vavaikamu doru gogodo sipi ketakoi sa, ira na sepati qai vatitolo rijoa sa na patu pa mangana na oqili pie beto qai vabukuria sa na sipi. Beto poni sa qai vakole mulea sa na patu pa mangana na baongo oqili pie.
4Sa nanasaria na sepati si Jekopi, pira sau, <<Boko tavitiqu, Pai tinonimiu sagou?>> sauniria.
Poni qai oe lao sira, Koi! <<Agei na tinoni Harani gu,>> qarigu.
5Sa pira sauniria, <<Ko qu gigilaimiu tu agou si Labani na mabusu tai Naho?>> sau.
Poni pira qarigu sira, <<E! Qe gigilaimei,>> qarigu.
6Poni pira sauniria mutu i Jekopi, <<Ko ai vei sa korapa gu suvere vataleona?>> sau.
Poni pira qarigu, <<E! Sa korapa gu suvere vataleona.>> <<Inana tugu ko i Resolo na tuna rereko isa, sa toni lameniria na sipi,>> qarigunia.
7Poni pira sauniria, <<Dotu!>> <<Korapa pa nulu tu sa na tapo ko nake totoso mai tavaikamu na gogodo sipi. Ko mu vabukuria beto mu toni mule laoniria nyaqo buburu gagani,>> sauniria.
8Ba qai oe lao tu sira, Koi! <<Meneke boka,>> <<mai vaikamu beto mai tu na gogodo sipi beto mina tavatitolo rijo mai tu na patu pa manga baongo oqili pie beto sa mene vabukuria sa na sipi,>> qarigunia.
9Totonai sa korapa parangaria isa poni, sa kamu tugu si Resolo toniria na sipi tana tamana ura na tinoni kopu sipi si Resolo. 10Totonai i Jekopi sa batia si Resolo na tuna rereko i Labani isa na luluna na tinana beto sa batia na sipi tai Labani, poni sa i Jekopi sa lao tata ko sa vatitolo varijoa sa na patu pa mangana na oqili pie ko sa vabukuria sa na sipi tai Labani na luluna na tinana. 11Beto sa aoa i Jekopi si Resolo beto sa ovulia na ovovelena ko sa vagorea sa kai lukana lavata si Jekopi. 12Ego beto i Jekopi sa vavakato vania si Resolo sa isa sa na tavitina na tamana beto na tuna marene i Ribeka sisa saunia. Poni sa abutu riu vavakato vania na tamana si Resolo.
13Ego isa tugu sa nongoria i Labani sa na vavakatona i Jekopi na tuna marene na luluna poni sa abutu lao ko mi gosoria sau. Ko sa borua, sa aoa beto sa toni laonia pa ona ruma sisa. Beto sa vavakatonia i Jekopi tai Labani sa doru sakasa aipira. 14Beto pira saunia i Labani sisa, <<Ao sa na pupudaqu ara beto na masaqu ara,>> saunia. Ego beto sa suvere kai popu doruna tai Labani si Jekopi.
I Jekopi sa alavaria Sira Lia I Resolo
15Ego pira saunia i Labani si Jekopi, <<Na vabuguqu ara sao, ba sake jonga sa muna kole roiti goboro vanisiu ara. Ko mu ule vanisiu ka visa na tabaramu ao,>> saunia.
16Ego ko koleona karu tuna rereko si Labani; na isongona isa pa moa si Lia beto na isongona isa pa ligu si Resolo. 17Na matana i Lia sa qai leduru goto i Resolo sa isongia na tini momorutuna beto na tini babata jonga. 18Ba i Jekopi sa nyoroguania isa si Resolo ko pira sau, <<Ara mana roiti vanigo ka vitu aoro ko muna vanisiu i Resolo, na tumu rereko pa ligu,>> sau sisa.
19Sa pira sau si Labani, Koi! <<Sa vavagua jola mana vanigo ara sisa jolania vei ba vaniria kaki goto marene. Ko mu suvere taqu lani,>> saunia. 20Ko i Jekopi sa roiti ka vitu aoro na vaina i Resolo, ba qai jola vei ka vivisa rane gu tana ura sa roroqua isa si Resolo.
21Beto pira saunia Jekopi si Labani, <<Mu valame vanisiu na maqotaqu. Ura sa okoto gu sa na totoso taqu ko kopira ma lao tome nagoa sisa,>> saunia.
22Ko i Labani sa kuku vakamuria sa doru na tinoni pa gusu ko sa roitinia kai vavolo. 23Ba totonai sa gore na vevelu, poni sasa tekua isa si Lia ko sa toni lao vania isa si Jekopi ko mi lao tome nagoa saunia. 24Beto i Labani sa vania i Lia si Zilipa nona nabulu rereko ko mina tokania isa sau.
25Ko sa sae na vuvugei ko mi doro sau si Jekopi, sa i Lia gu sa sa korapa suvere tavitia sisa. Poni sa pira saunia i Jekopi si Laban, <<Na sa qu roitinia taqu sao? I Resolo tu sa qa roiti vanigo ara ao ko muna tabaranisiu qugu. Ai sa vei ko qu sesekesiu?>> sau.
26Poni pira saunia i Labani, <<Dai nake tutina tamigei pa ia lani sa mene vaiia momoenia sa isa na rereko pa ligu beto mene vaiiania sisa pa moa. 27Ko mu vaokotia mai ao sa na kai vuiki roiti vaialava tana kame api, beto poni sa kode tana vanigo mule sa kame le api isa na laena na roiti muna roiti vanisiu ara kai vitu aoro mutu,>> sau.
28Ego ko sa roiti vei tugu si Jekopi. Sa vaokotia isa sa na kai vuiki roiti vaialava tai Lia, beto poni i Labani sa vania ko kai maqotana mule si Resolo na tuna rereko. 29Beto i Labani sa vania tugu vei i Resolo na tuna rereko si Biliha na ona nabulu rereko ko mina tokania isa sau. 30Ko i Jekopi sa kole tavitia tugu vei si Resolo ko sa roroqu vivitigia si Resolo jolania i Lia. Ko sa roiti vania kai vitu aoro mule si Labani.
Ira Na Tuna I Jekopi
31Totonai sa batia i Iahova sake tatavaragua si Lia sa, sa revangia i Iahova sa na iapana i Lia goto i Resolo sa sa egoro. 32Ego sa bogata si Lia ko sa vapodoa sa kai tuna marene ko sa vakukunia i Rubeni sisa, ura pira sau, <<Pa laena i Iahova sa bationa sa na tapata taqu ko kopira na marenequ mina roroqusiu sara,>> sau.
33Ego ko sa bogata soga mule si Lia, ko sa vapodoa kai tuna marene poni pira sau, <<Sa nongoria i Iahova sa qake tatavaragua sara, sa vei sa sa vanisiu mule sa alepi,>> sau. Ko sa vaisongonia i Simioni isa sisa.
34Ego ko sa bogata soga mutu si Lia, ko sa vapodoa kai tuna marene sa pira sau, <<Kopira tu sa na marenequ sa mina togasa vamauru taqu ura qa vapore vania ka ue marene,>> sau. Ko sa vei sa vaisongonia i Levi.
35Ko sa bogata ligu mutugu sisa, ko sa vapodoa mutugu kai marene poni sa pira sau, <<Kopira mana vatarasaea ara si Iahova,>> sau. Ko sa vaisongonia i Jiuda. Beto sa noso teku koburu si Lia.
Attualmente Selezionati:
Popodalaina 29: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
