Popodalaina 27
27
I Aisake Sa Manania si Jekopi
1Totonai sa baragoso ko qai rodomo sa na matana ko sake babata si Aisake sa, sa kukua si Isoa na tuna marene pa moa ko pira saunia, <<Tuqu,>> sau.
Poni pira sau si Isoa, <<Api sara,>> saunia.
2Poni pira sau si Aisake, <<Ara kopira sa qa baragoso beto qake gigilai na totoso mana mate. 3Ko mu tekua na mua bokala, na tupi beto mu riu ropa vanisiu kaki mamanugu pa mumuqu. 4Ko mu vatunu vanisiu na tetekuna sa teku jongasiu ara beto mu pogoso kamu vanisiu ko ma tekua ko ma mananigo tonai qa oqoro mate,>> saunia.
5Ego i Ribeka sa korapa gu nonongorona sa totonai i Aisake sa kole parangia i Isoa na tuna. Ko pa liguna sa riu ropa pa mumuqu si Isoa beto mina pogoso mule kamunia sau, poni sa 6sa parangia i Ribeka si Jekopi na tuna, pira saunia, <<Ei! Qa mavo nongoro poai sa na tamamu pira saunia si Isoa, 7Mu riu pogoso vakamu vanisiu kaki mamanugu beto mu vatunu vanisiu na tetekuna sa teku jongasiu ko ma tekua ko ma mananigo pa moena i Iahova tonai qa oqoro mate>> saunia. 8Ego Ko tuqu, Mu nongoria na ovovelequ ara isa vei mana garununigo ara: 9Mu lao pa gogodo qoti ko mu teku vanisiu karu tuni qoti kokoregadi, ko ma roitiniria na tetekuna jongana vania na tamamu isa vei sa nyoguania isa. 10Beto mu pogoso lao vania na tamamu ko mi tekua ko mi mananigo tonai sa oqoro mate isa, saunia.
11Poni pira tu sau si Jekopi lao tai Ribeka na tinana, <<Koi! Ba i Isoa sa sa pupulu na tinina goto ara sa lilioso na tiniqu. 12Kita mi ulisiu na tamaqu. Ko ara mina dogoro veinisiu kai tinoni sesekequ ko mana teku tarinisiu na leleve tu nake mana,>> sau sisa.
13Ba pira saunia na tinana sisa, <<Tuqu, na leleve tamu sa mi raja taqu. Goto ao mu nongoria gu na ovovelequ ara. Ko mu lao teku vanisiu sa isa qa garununigo ara,>> saunia.
14Ko i Jekopi sa lao ko sa tekua ko sa pogoso lame vania na tinana ko na tinana sa roitinia sa na tetekuna jongana sa nyoroguania na tamana. 15Beto sa tekua i Ribeka sa na poko jojongana tai Isoa na tuna pa moa, isa sa kopunia na tinana pa ruma, ko sa vasaenia si Jekopi isa na tuna pa ligu. 16Beto sa udeniria na vuliti qoti sa karu limana beto na kobu ruana kepore pupuluna. 17Beto sa kaqamania pa limana i Jekopi sa na tetekuna jongana beto na bereti sa vatanai.
18Ko sa lao tana tamana si Jekopi beto pira sau, <<Tamaqu,>> saunia.
Poni pira sau si Aisake, Aive qugu tuqu, i sei sao? saunia.
19Poni pira saunia na tamana si Jekopi, <<Ara Isoa na tumu moa sapi. Qa tei vatanai tu sa isa vei qu garununisiu. Mu tatakole ko mu tekua sa na tetekuna beto mu mananisiu,>> sau.
20Poni pira saunia i Aisake sa na tuna, <<Koi Ai vei ko quke ruavo batia?>> sau.
Poni pira sau si Jekopi, <<i Iahova na Tamasa tugu tamu tugu sa veinisiu ke,>> saunia.
21Beto pira saunia i Aisake si Jekopi, <<Mu rijo lame tata ko ma uligo tuqu. Ao tuqu Isoa tugu sapi ba dai?>> saunia.
22Poni sa rijo tata lao tai Aisake na tamana si Jekopi ko sa ulia sisa beto pira sau, <<Koi! Na ovovele sa na ovovelena tugu i Jekopi ba ira na lima sa na limana tu i Isoa,>> sau sisa. 23Ego ko sake gigalia sisa ura ira na limana sa qai pupulu vei na limana i Isoa na tugana ba sa manania sisa. 24Beto pira sau si Aisake, <<Ao na tuqu i Isoa tugu sapi?>> saunia.
Poni pira sau si Jekopi, E! <<Ara tugu sapi,>> saunia.
25Poni pira sau si Aisake, Ego, <<Mu vanisiu ko ma tekua sa na tetekuna tuqu ko ma mananigo,>> saunia.
Ko i Jekopi sa vania na tetekuna ko sa teteku beto sa vania tugu vei kaki vaini ko sa buku. 26Beto poni i Aisake na tamana sa pira saunia sisa, Mu rijo tata lame lani ko mu aosiu tuqu, sau.
27Ko sa rijo tata lao si Jekopi ko sa aoa. Totonai sa umangia i Aisake sa na umangana nona poko poni sa sa manania sisa, pira sau,
<<Um! Na umangana na tuqu marene
Sa vei na umangana na kobu ia
Isa sa manania i Iahova.
28Na Tamasa mi vanigo na odikina na oka
Beto na masuruna na peso
Ko mi soku na kiko beto na vaini kokoregadi.
29Ira na okokoto tinoni mai nabulunigo
Beto ira na okokoto gugugusu sa mai titi opo gore tamu.
Mu bangaraniria sira na tugamu na tasimu,
Beto ira na marene qai podo pa kai tinamiu mai titi opo gore tamu.
Ira mai levenigo ao sa mai taleve
Beto ira mai mananigo sa mai tamana tugu,>> saunia.
30Pa liguna sa beto manania i Aisake si Jekopi ko i Jekopi sa koni votu loai tugu si Aisake na tamana, poni sa sa bola kamu tugu koni beto ropa si Isoa na tugana. 31Ko isa sa vatunua tugu sa na tetekuna jongana ko sa pogoso lame vania na tamana. Beto pira saunia, <<Tamaqu, mu tatakole ko mu tekua na tetekuna qa riu ropai beto mu mananisiu sara,>> sau.
32Poni pira tu sau si Aisake, <<I sei sao?>> saunia.
Poni pira sau sisa, <<Ara sa na tumu marene pa moa i Isoa,>> saunia.
33Poni sa matagutu neneqerenia si Aisake ko pira sau, <<Goto i sei tu sa riu ropa mamanugu ko sa tei poso kamu vanisiu tu ara sa na tetekuna ko ara qa tei tekua tu tonai qu oqoro bola kamu ao? Ko qa tei manania tu ara sisa ko isa tugu sa mina tamana?>> saunia.
34Totonai sa nongoria i Isoa na parangana na tamana, sa vagorea kai lukana lavata ko sa kokora vivitigi beto pira saunia sa na tamana, <<Tamaqu, ara ba mu mananisiu tugu qau,>> sau.
35Ba pira saunia na tamana sisa, <<Na tasimu marene sa kamu roiti seseke ko sa tei tekua tu sa na mana tamu,>> sau.
36Poni pira sau si Isoa, <<Soni vei ko qai vaisongonia i Jekopi sisa? Sa iko ligusiu karu totoso kopira: Momoe sa tei tekua mai tu sa na neqi podo moa taqu beto kopira api sa sa tekua mutugu sa na mana taqu, saunia. Beto pira saunia sa na tamana, Ai vei, quke kopu golomo vanisiu kai mana ara?>> sau.
37Poni sa oea i Aisake si Isoa, pira saunia, <<Qa tei udukia tu ara sisa ko mina bangara nigo sao beto qa tei udukuria tu ara sira tavitina ko mai nabulunia, beto qa tei vatana vakole vania tu ara sa na kiko beto na vaini kokoregana. Ko tamu sa, na sa beka mana boka vanigo tuqu?>> saunia.
38Sa pira saunia i Isoa sa na tamana, <<Tamaqu! Ai vei kame tugu sa na mana qu isongia ao? Ara ba mu mananisiu tugu Tamaqu,>> sau beto sa ovulia na ovovelena beto sa vagorea sa kai lukana lavata si Isoa.
39Sa pira sau si Aisake na tamana,
<<Ketakoi muna suvere ao sa
Minake masuru na peso
Beto minake gorea na odikina na oka.
40Muna toa pa benisi sao
Beto muna nabulunia na tasimu.
Ba totonai munake tavaraguania sisa,
Sa muna teku visu pale ao sa na mamata sa vapakunigo,>> sau.
I Jekopi Sa Uku Riu Tai Labani
41Ego ko i Isoa sa kuonia si Jekopi pa laena na tamana sa tei vania tu na ona i Jekopi sa na mana. Ko pira sau pa bulona si Isoa, <<Qai tata lame gu sira na rane tonai mana lukana loloa ara sa na tamaqu beto sa mana vaipale gu ara si Jekopi na tasiqu,>> sau.
42Totonai qai ule vania i Ribeka sa na sakasa sa pojai i Isoa isa na tuna moa, poni sa sa kuku vakamua si Jekopi na tuna pa ligu ko pira saunia, <<Tuqu, i Isoa na tugamu sa korapa vamanoto mulenia mekana na roroquna mina vaigo sao. 43Ego Ko kopira tuqu! Mu nongoria na ovovelequ ara. Mu qaqiri ko mu uku riu tai Lebani na luluqu ara pa Harani. 44Mu suvere tavitia isa mai iapeki totoso ko tinganai mina gabala sa na kokora tana tugamu. 45Totonai tu mina gabala vapele sa na kokora tana tugamu beto mina roqumumania sa na sakasa qu roiti laonia tana poni sa mana vaigarunu sara ko mai vanongorigo ko muna mule kamu. Ura sake jongana sa pa kai muqisi rane tugu sa ara mana lukanagou sagou karu tuqu,>> sau.
46Beto pira saunia i Ribeka si Aisake, <<Kei! Ara sa qake isongo tavaraguania sa na susuvere tadira na rereko Hitai aipira. Ko vei mina tekua mule kai rereko Hitai vevei aipira pa ia lani minagu si Jekopi, poni sa na sa mule laona sa mana kole toa lalaoqua sara,>> sau.
Attualmente Selezionati:
Popodalaina 27: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
