Popodalaina 19
19
Pa Sodomu Beto Pa Qomora Qai Tapiara
1Ego na veveluna qai kamu pa sodomu sa karu mateana ko totonai i Loti sa sa korapa toqona pa atakamana na bara totomena na gugusu lavata. Totonai sa batiria, poni sa gasa turu ko sa lao gosororia beto sa titi opo gore pa peso. 2Beto pira sauniria, <<Koi! Karu qua bangara,>> <<Bu gabala lame mai tu pa ruma taqu. Mu boka loqaria na nenemiu, mu vajola bongi mai tu beto na vuvugei jonga mutu mu iolo riu,>> sau sisa.
Ba pira tu qarigu sira karu, <<Dai!>> <<Pa kakabarena tu na ia susuverena me puta,>> qarigu.
3Ba sa tepa totokaria tugu i Loti sira karu ko qai tutia lao pa nona ruma ko sa vatana vaniria na tetekuna, sa parugu bereti kepore isitina beto sa qai teteku. 4Tonai qai oqoro kole pa lovu poni doruna marene pa doru kokobu ia pa gugusu lavata pa Sodomu- ikete lavata sa qai idi vailivutainia sa na ruma. 5Beto qai kukua si Loti, pira qarigunia, Pai sira na marene qai kamu tamu pa bongi api? Mu vavotu vanigei ko me puta tavitiria, qarigu.
6Poni i Loti sa votu kamuria pa peguru beto sa pateia sa na atakamana pa liguna 7beto pira sau, <<Koi muke vei, ka visa qua baere. Muke roitinia na sakasa ikikerena api. 8Dotu, pira karu tuqu maqota ara qai oqoro laoa kai marene. Ma toni votu vanigou ko agou gu qu gigilai ai muna roiti veiniria. Goto ira gu na tinoni pira sa muke kotiria ura qai kole pa kopu taqu,>> sauniria.
9Ba pira tu qarigu sira, <<Balau! Muke suqutugei,>> qarigu. Beto qai paranga, <<Na tinoni le alepi sa na kamuna gu lani vei na tinoni karovona ba kopira sa nyogua lalaenigita gita! Ao tu sa mene vakilasa vatatalego agei jolaniria ira inara,>> qarigunia. Qai kole tototepia si Loti beto qai sasuru lao ko mai piaria sa na atakamana qarigu.
10Ba ira karu tinoni pa leo ruma sa qai kaqama votunia na limadi ko qai bako tomenia si Loti beto qai pateia sa na atakamana.
11Beto ko qai tapala valeqa paleniria sira na tinoni, ikete lavata qai turu pa atakamana ko qaike batia sa na atakamana.
12Beto karu tinoni qai paranga lao tai Loti, pira qarigu, <<Kaki mule tamu qai korapa lani- na roamu marene, na tumu marene, na tumu rereko babi kaki mule pa leona na gugusu lavata qu isongoria ao? Mu toni votuniria pa ia api, 13ura korapa me piaria agei sa na ia api qeu. Na tinajutu sa kamu ti Iahova qai tajutunia ira na tinoni lani sa, sa jola pa pada ko sa garunugei ko mene piaria sau,>> qarigunia.
14Ko sa votu lao si Loti ko sa parangaria sira na roana marene qai tavatuvisi ko mai alavaria na tuna rereko, Pira sauniria, <<Sisiqarai ko mu votu riu pa ia api, ura tata gu beto mina piaria i Iahova sa na gugusu lavata api,>> sau. Ba ira na roana marene sa palu sa paranga vavaivaavuona gu sau qarigu.
15Totonai sa sae na vovola rane poni, qai paranga vaneneqia na mateana si Loti, pira qarigu, <<Sisiqarai! Mu tonia na maqotamu beto karu tumu rereko qai korapa lani, kita vei ko mu tasaqu pale totonai mina tavakilasa na gugusu lavata,>> qarigunia.
16Totonai sa mamavo isa poni sa qai lao tu karu tinoni ko qai saputu tekua sa na limana beto na limana na maqotana beto na limadi ira karu tuna rereko beto ko qai toni votu vasareria pa peguruna na gugusu lavata ura i Iahova sa roroquria. 17Isa tugu qai vavoturia pa peguru poni, kame ira sa pira sau, Mu uku vasarea na miu toa! Munake doro mule, beto munake tuturumua pa doru eqa araredi pori! Goto mu uku sae pa kukubo kita vei ko mu tasaqu pale riu beto, sauniria.
18Ba sa paranga tu si Loti lao tadira, pira sau, <<Mavo tu, qua bangara. 19Qu tavaraguania sa na mua nabulu, beto qu vatadogoronisiu na mua roroqu lavata ko qu vasarea na toa taqu. Kode manake boka uku sae pa kukubo kita vei ko na tapata alepi mi sae kamusiu ko ma mate. 20Do! Poni sa kai gugusu ikete sa tata ketakoi mana boka uku lao ara. Mu vamalumusiu ko ketakoi ma uku lao. Sa ikete sa oko ba ketakoi kode mina sare na qua toa,>> sauniria.
21Poni pira saunia na mateana, <<Jongana ropi. Qa vaegoa ara sa vei qu pojai ao api. Ko maneke piaria ara sa na gugusu ikete qu pojai. 22Ko mu sisiqarai uku lao ketakoi, ura maneke boka roitinia kai sa sara tinganai muna kamu mai tu ao ketakoi,>> saunia. Ko sa vei sa na isongona na gugusu isa sa qai vaisongonia Zoa.
23Totonai sa iolo votu sae pa arena abana sa na tapo poni sa sa kamu pa Zoa si Loti. 24Ego beto sa vaokoro tarininiria na patu kikilava vuvurungudi i Iahova sa pa Sodomu beto pa Qomora, ko na koko lagere veidi tai Iahova pa noka sa aipira. 25Ko sa piara paleria i Iahova sa na gugusu aipira beto na arare doruna beto ira doru qai suvere pa gugugusu lavata beto na gogou qai toa pa peso. 26Goto na maqotana i Loti sa sa balinga mule ko sa peluku patu solona.
27Na vuvugei jonga i Ebarahami sa dorava ko sa mule sae pa ia ketakoi sa kole turu paparangia i Iahova. 28Ego ko sa doro gore vei sa pa Sodomu beto pa Qomora, beto pa doruna na ia pa arare sa, sa batia sa iolo votu sae sa na tulana na peso isa sa vei na kunini tula sa koko pa kai iku lavata.
29Ko totonai sa piararia na Tamasa sa na gugugusu lavata pa arare sa, sa roroqu kamua isa si Ebarahami ko sa teku vaukua isa si Loti pana tapata sa piararia na gugugusu lavata ketakoi qi suvere i Loti.
I Loti Beto Ira Karu Tuna Rereko
30Ego i Loti beto karu tuna rereko sa qai taloa pa Zoa ko qai sae suvere pa kai bevi pa kukubo ura sa matagutu suvere pa Zoa sisa. 31Kai rane na tuna rereko pa moa sa pojania sa na tasina rereko, pira sau, <<Ago! Na tamada sa sa baragoso, beto kepore sa kai marene pa eqa lani vei mina kole tavitigita vei isa na tutina tugu doru eqa pa abana. 32Aria ko ta vabukunia na vaini sa na tamada beto ta kole tavitia ko mi kole sa na tutida lame vei tana tamada,>> saunia.
33Na bongi isa sa qai vabukunia na vaini sa na tamadi beto ko sa lao tome sisa pa moa ko sa kole tavitia ba na tamadi sake isongo vagigilai sa na tomena beto na votu riuna isa.
34Sa rane neqa poni sa paranga na tuna rereko pa moa lao tana tasina, pira sau, <<Pa bongi qa kole tavitia ara na tamada. Ko kode bongi tana vabukunia mule na vaini beto ao muna tome kole tavitia mule ko mi kole sa na tutida lame vei tana tamada,>> saunia. 35Ko qai vabukunia mule na vaini sa na tamadi na bongi isa, beto na tuna rereko pa ligu sa tome kole tavitia. Sake isongo vagigilai mule isa sa na tomena beto na votu riuna na tuna rereko pa ligu.
36Ko sa vabogata betoria i Loti sa karu tuna rereko. 37Na tuna rereko pa moa sa vapodoa sa kai tuna marene, sa vaisongonia i Moabi ko isa sa na tamadi ira na bubutu tinoni Moabai pa ngeni alepi. 38Na tuna rereko pa ligu ba sa vapodoa tugu kai tuna marene, sa vaisongonia i Beni- Ami ko isa sa na tamadi ira na bubutu tinoni Amonai pa ngeni alepi.
Attualmente Selezionati:
Popodalaina 19: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
