Popodalaina 13
13
Ira Ebarami i Loti Qai Vaipikatai
1Ko i Ebarami sa koko pa Ijipi ko sa mule sae pa Negev ko sa tonia isa sa na maqotana beto doru sakasava qi isongoria beto ko i Loti sa tutia sisa. 2Qi tinoni isisongona si Ebarami ko qi isongoria isa sira na mamanugu mamade nene papausu beto na siliva beto na qolo.
3Sa koko pa Negev sa, sa lao kai ia ka ia tinganai ko sa kamu pa Beteli, pa ia pa vaikorapaina pa Beteli beto pa Ai ketakoi qi vaturu aqaqo mai perangana 4beto ketakoi qi roitinia mai kai ia vavakukuvuna. Ketakoi sa sa kuku vatarasaea i Ebarami sa na isongona i Iahova.
5Ego i Loti isa sa kole tututia lekogo i Ebarami, ba qi isongoria tugu vei na gogodo sipi, na bulumakau beto na aqaqo. 6Ba na ia sa sake padaria totonai qai mekarai suvere ura qai soku jola sa na isisongo tadira karu ko qaike boka mekarai suvere vaikamu. 7Beto qai vavaigua lao gu sira na tinoni kopu ma manugu papausu tadira Ebarami i Loti. Beto ko ira na bubutu tinoni Kenani beto na Perizai ba qai korapa tugu suvere sa ketakoi pa totoso isa.
8Ko i Ebarahami sa parangia i Loti, pira saunia, <<Tuqu! Take vavaigua gita karu babi ira noda tinoni kopu mamanugu papausu ura nake goto sa gita karu. 9Ko na ia doruna sa qu batiamua gu ke. Ko ta suvere pikata tu. Vei muna lao vei pa kale meri ao sa, mana lao vei pa kale matua sara ba vei pa kale matua tu munagu sao, sa mana lao vei pa kale meri sara,>> saunia.
10Sa enga sae si Loti, sa batia isa sa na are doruna pa Jodani sa sa lolomoso vatale, vevei na inuma tai Iahova, vevei na ia pa Ijipi lao vei pa Zoa. (Api sa tonai sa oqoro piaria pa Sodomu beto pa Qomora i Iahova.) 11Ko i Loti sa vile mekana sa na are doruna pa Jodani beto ko sa taloa riu lao vei pa kale sagere tapo. Ko qai pikata sira karu. 12I Ebarami sa suvere pa ia pa Kenani, goto i Loti sa suvere pa vaikorapaidi na gugusu lalavata pa arare lavata ko sa vaturua nona aqaqo tata pa Sodomu. 13Ego ira na marene pa Sodomu sa qai kole gu roiti vaikikerai beto roiti valululasa isa vei sake qerania i Iahova.
14Ego pa liguna qi taloa riu si Loti koko tai Ebarami, sa paranga si Iahova tana, <<Mu enga sae koko ketakoi qu korapa turu beto mu doro lao pa kale saena, pa kale gorena, pa kale sagere tapo, beto pa kale suvu tapo. 15Doru na ia qu batia sa mana vanigo ao ara beto ira na tutimu ao kamua na kamua 16Na tutimu ao sa mana roiti veiniria na kavuruna na peso ara ko na tinoni mina boka anyea na kavuruna na peso sa, mina boka anyea sa na tutimu ao. 17Ko lao, mu lekogo dogoria sa na kakasana beto na revatana na ia doruna, ura qa vanigo ara ao,>> saunia.
18Ko sa varijoria nona aqaqo si Ebarami ko sa lao suvere tata pa boko gogou lalavata tai Mamiri pa Heboroni, ketakoi sa roitinia isa sa kai ia vavakukuvuna lao tai Iahova.
Attualmente Selezionati:
Popodalaina 13: LGA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Islands Bible Ministries. All rights reserved.
