Matiyu 2

Be ya è yi mò a chu be ngǝkpe ángá è bwa bandi Yeso

1Chashin, a bè mbwa ara Yeso a Betalami, a sǝnsen mo Yahudiya, adi ekpengga mo Tì Hiridu ángá, be ndedon ya ehwyà ya è yi mò a chu be ngǝkpe ángá, è vǝ chá notà bwa a Urishelima. 2Bè ká eka jan, “Ende a bè mbwa ara jan ga tì mo be ya a Yahuda ángá, no a che? Je di ngǝkpe mbwe chá notà e tú je jan be mbwa ara ye ángá, enona, je bwa evǝa je e fen ye.”

3Atan a Tì Hiridu è fo fwa ena ángá, tsuruku mbwe è bgen àywá tangge binbin mo be ya a Urishelima. 4Gè fǝ́ fǝn gú be Ekǝ́n echa ngge be etumo mo edon, nè ká be eka jan ne, zǝn a ge no ebam adi Afketa mo edon jan ba mbwa Kristi ángá, no a che? 5Bè janfwe ye, “A Betalami, a sǝnsen mo Yahudiya, adia ena a mò a efojan hon è bá ángá,

6“ ‘A bo Betalami,

a sǝnsen mo Yahuda,

o fwa mbo eten e no ti ara

nwofyan a tswa

engga mo be eten efifi a

sǝnsen mo Yahuda ra,

adia a tswa mbo tì akan a gwa a je,

nwene a no ya efyomo mo be nobǝ mam,

be ya a Esǝrela.’ ”

7Kǝnggwa Hiridu è fǝ́ be nobǝ hon ya è yi mò a chu mo be ngǝkpe hon ángá dwa engǝ̀tonton, nè fo seshi a zǝn be, ekpengga edefǝfǝ a ngǝkpe hon è kwafya mbwibwa a zǝn be ángá. 8Gè té be etsǝn ken a Betalami jan, “Nye e ken ká e seshi eka mo zǝn a nwen hon no anga, atan a nye ben ara ye, nye twabǝ bwa jan m myan myan, evǝa me e ken e fen ye èé me.”

9Atan a bè fo ara fwa mo tì hon ángá, bè nya kèn mo be. Ngǝkpe hon a bé di chá notà mo zǝn a bè no ángá, è no ken anga a zǝkpe chafya mo be, nè ken ndnya kanshi esoso chá kpe a zǝn a nwen hon è no ángá. 10Atan a bè di ngǝkpe hon ángá, tsuruku mo be è tén ten àywá. 11A bè kwashi a mu hon ángá, bè di nwen hon ngge ayi ye Meri, kǝnggwa bè nggwa ekpanvǝ mo be a sen, nè fen ye. Bè fkigwa be echo mo be, nè dwe ye edwe mo be zinariya, ngge byi yoben ngge be moyoben efki a bè fǝ́ anga muru. 12Adia Ehwya è twa ara be echa adi dá jan ne be e twabǝ e ken be a zǝn Hiridu efwe ra ángá, bè kpo efǝ efki, nè twabǝ ken chá eyasǝnsen mo be.

Abu Esufu è tse ken a sǝnsen mo Masa ngge be kpenmu mbwe ángá

13Chashin, a be ya è yi mò a chu mo be ngǝkpe hon è nya ara ángá, maleka akan mo Ehwya Etsodwe è mbwibwa a zǝn Esufu adi dá, nè jan, “Nyi etkyen, ti nwen hon ngge ayi ye, nye e tse e ken a sǝnsen mo Masa. Nya no a zǝn ken a ngga atan a ma jan o ángá, adia Hiridu a tku a nda nwen hon evǝa ge e gu nó.”

14No enona, Esufu è nyi tén etkyen etsǝ hon, nè ti nwen hon ngge ayi ye, bè gwa zǝn hon, ken a sǝnsen mo Masa, 15zǝn a gè no tangge be kpenmu mbwe kengga tén atan a Hiridu hon è fǝ ara ángá. Mò ena tú tén ebwedefǝm mo fwa mo Ehwya Etsodwe, è jan chá kpevǝ mo efojan hon ekpe ekpe jan, “M̀ fǝ́ nwen m ndedon dwa gwa a je mo sǝnsen mo Masa.”

16Atan a Hiridu è yi ara jan, be ya è yi mò a chu mo be ngǝkpe hon è nggade ara ye ángá, gè fku tsuruku àywá, nè du edgon jan be e gu binbin mo mbǝgya ndedon ya a je mo be è kengga ara fà ti shwa chá a se, a tswa Betalami ngge efa mo nó. Hiridu è bwe enò evǝa ge e ken tén abu ekpengga a gè fo a zǝn be ya è yi mò a chu mo be ngǝkpe hon, ya è kwafya di ngǝkpe hon ángá. 17Mò hon ena è bwe enò evǝa ge e tú ebwedefǝm mo mò a Eremiya, efojan mo Ehwya è jan,

18“Bè fo aken a Rama,

dwafǝ ekǝnm ngge dwavǝ ezam àywá,

Rahila kǝndwafǝ mo mbǝgya mbwe anga,

n se be e bwe e bon ye ekǝ̀n

adia mbǝgya mbwe è fǝ ara ángá.”

Esufu ngge kpenmu mbwe è twabǝ ken a sǝnsen mo Esǝrela

19Atan a Tì Hiridu è fǝ ara ángá, maleka mo Etsodwe è mbwibwa a zǝn Esufu adi dá a sǝnsen mo Masa, 20nè jan, “Nyi etkyen, ti nwen hon ngge ayi ye, nye e twabǝ e ken a sǝnsen mo Esǝrela, adia be ya éè tkyan anga be è gu nwen hon ángá, fǝ ara.”

21Enona, gè nyi etkyen nè ti nwen hon ngge ayi ye, bè twabǝ ken a sǝnsen mo Esǝrela. 22Tea atan a gè fo jan Akiliyu nwen Tì Hiridu è dwatì no efwe-echi mo ate ye a Yahudiya ángá, gè tsen etsentsen ge e ken a zǝn. Adia Ehwya è mbwibwa twa ara ye echa efwe adi dá, enona gè ken a efa mo Galili. 23Gè ken no a eten akan a bè fǝ́ anga Nazarati. Mò hon ena è bwe ken tén abu Ehwya è jan chá kpevǝ mo be efojan ekpe ekpe. Be efojan hon, è jan, “Ba fǝ́ ye ya a Nazarati.”

Attualmente Selezionati:

Matiyu 2: ICH

Evidenziazioni

Copia