KEJADIAN 2
2
1Begei ajehloh siap bicipte langit ru bumi ru dikdij ma de mong ku ikateh. 2Ku arik ketujoh, Jenang Kiberihat kerana ya Kiseryap Ikerjak. 3Jenang Kiberkat arik ketujoh ru Kibeh arik ajeh arik de istimewe, kerana ku arik ajehloh Jenang Kiberihat telas dikdij Ikerjak ya siap. 4Begei ajehloh icerite ku mase Jenang Yahweh Kicipte langit ru bumi ru ma de mong ku ikateh.
Taman ku Eden
Ku mase Jenang Yahweh Kicipte langit ru bumi ru ma de mong ku ikateh, 5pekseg mong ma-ma cengwai atao ceknet ku bumi, kerana Jenang Yahweh pekseg Kicerleh manik ru pekseg mong mai de ha usehe tik ajeh. 6Tapi mong hap de kihol ju kerop bumi ru kikeraj dikdij tik ajeh.
7Ku mase ajehloh Jenang Yahweh Kicipte numom sengoi ya debu ju tik, lalu Kitehol Ilehem de kiog sinui nu lubang moh kek. Jadi, sengoi ajeh pen kisui.
8Telas ajeh nij Jenang Yahweh Kicipte taman ku Eden, ku englag timur, lalu Kidek sengoi de ya Kicipte ajeh ku pajeh. 9Jenang Yahweh Kicerwai ju tik dikdij jenis keneng jehuk de bor, de kiperhol pelek-pelek de bor ha caknak. Ku semakdek taman ajeh mong nutarek keneng jehuk de kiog sinui de lei ditehjeh, ru nutarek kilek nij de kibeh manusia naipanei ma de bor ru de jehat.
10Mong nanek batag arik de kigel ju Eden ru kikeraj taman ajeh. Ju kenjeh kicerlah ru kijadi empat cabag teu. 11Batag arik de petame imuh Pison, de kigel ku kelileg tik Hawila de mong mas. 12Mas ju kenjeh mas tulen. Ku pajeh juga mong damar de wangi ru batu-batu permate. 13Batag arik de kedue imuh Gihon, de kigel ku kelileg tik Kus. 14Batag arik de ketige imuh Tigris, de kigel ku englag timur Asyur. Batag arik keempat imuh Efrat.
15Jenang Yahweh Kidek sengoi ajeh ku Taman Eden supaye kiusehe ru kibela taman ajeh. 16Jenang Yahweh Kiog perintah nu sengoi ajeh, “Hek buleh hacak pelek ju dikdij keneng jehuk ku taman adeh, 17kecuali pelek ju keneng jehuk de kibeh manusia naipanei ma de bor ru de jehat. Hek pek buleh hacak pelek ju keneng jehuk ajeh. Ku arik hacak pelek ajeh, hek doh pasti hadat.”
18Telas ajeh Jenang Yahweh Kiurok, “Pek bor sengoi kigei kihalei. Eng doh Ngbeh numom penulog de sesuei ha kek.” 19Jenang Yahweh Kien dikdij jenis binatag ku darat ru cep ku langit de ya Kicipte ju tik nu sengoi ajeh. Jenang Kaha-panei begeiharok sengoi ajeh doh kiog muh nu binatag ru cep. Ma pen de bipangel ya sengoi ajeh nu jap-jap binatag ru cep, ajehloh kijadi imuh. 20Begei ajehloh sengoi ajeh kiog muh nu dikdij binatag ru cep, tapi pek mong nanek pen ju engkap binatag ajeh de dapat kijadi ipenulog de sesuei.
21Jadi, Jenang Yahweh Kibeh sengoi ajeh kibet selat. Mase ya kibet, Jenang Yahweh Kiperhol nanek jeag ceres ju sengoi ajeh lalu Kitutop dil ajeh ya sej. 22Ju jeag ceres ajeh, Jenang Yahweh Kicipte numom kerdor, lalu Kien kerdor ajeh nu sengoi ajeh. 23Lalu sengoi ajeh kiurok,
“Adehloh sengoi de sama begei eng,
jeag ju jeag eng,
sej ju sej eng!
Eng ngsebot kek ‘kerdor’
kerana kek bicot ju keral.”
24Ajehloh isebab numom keral kidek iamek-apak ru kibenanek ru ikenah, ru ubai rimnar baijadi nanek.
25Keral ru kerdor ajeh baigei beres tapi pek baiselsel.
Attualmente Selezionati:
KEJADIAN 2: AEH
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
