Mateo 22
22
I bari biyab
1Oun o Yezous rakras pale save laba ap lende, kay i khatedo čačepen dren hi. Oun yob penas: 2“Te dell o Devel i menshen gole, te venn le pash leste, hi kova yaake har pash i baro rayeste, kay kras peskro čaveske i bari biyab. 3Ap ko tsiro, kay i biyab his, bičras lo peskre boudepangren pash i menshende, te denn le len pash i biyab gole. Oun yon kaman gar te vell. 4Oun pale bičras lo vavar boudepangren pash kolende, te penenn le ap lende: Shounenn, me krom i rhapen t'menge, oun marom thoulle groumya. Oun vavar lačo rhapen oun pipen hi lauter koy. Avenn ap i biyab! 5Oun kolla shounan gar ap lende oun djan penge. Ko yek djas ap peskro kotar phoub, ko vavar ap o mangepen. 6Oun pale vavar tapran kol boudepangren, praasan len, oun maran len.
7O baro rayes tapras i bari rholi, oun yob bičras peskre lourden, te marenn le kol marepangren, oun te rhačrenn le lengro foro. 8Palle penas lo ap peskre boudepangren: Kanna hi i biyab. Oun kol menshe, kay me ap o rhapen gole dom, hi gar moldo, te venn le ap i biyab. 9Djan kanna ap i dromma, kay boud menshe hi! Oun penenn lauterenge, kay t'mer kote hatsenna, te venn le ap i biyab! 10Oun kol boudepangre djan ap kol tsele dromma, oun anan lauteren khetne, i čilačen oun i lačen. Oun yaake boud menshe van ap i biyab, te vas o kheer pherdo.
11Oun o baro ray vas an o kheer, te dikell lo kolen, kay kote hi. Koy dikas lo kote i morshes, kay kek biyabeskro ripen ap leste hi. 12Oun yob penas ap leste: Miro maal, tout hi kek biyabeskro ripen ap toute, te nay djah tou ap i biyab. Hoy kreh tou kate? Oun kova nashte penas leske či. 13Penas o baro ray ap peskre boudepangre: Pandenn les ap i pire oun ap i vasta, oun vitsrenn les vin an i kali rat! Oun kote rovenn le oun dandrenn i danda i doukatar khetne.”
14Palle penas o Yezous ap kolende, kay troul leste tardo hi: “Boud menshen dell o Devel gole. Kolla kokres, kay pash leste venna, moukell lo dren te djal.”
Denn o Debles kova pale, hoy leskro hi!
15Oun pal kova van i Farisarya khetne, oun rakran mank pende, har yon nay taprenn o Yezouses an leskre laba. 16Oun yon bičran pengre morshen pash leste. Lentsa djan ninna vavar morsha. Kolla his o Herodeskre mala. Oun yon penan ap leste: “Sikepaskro, mer djinah, tou peneh o čačepen, oun sikreh mishto i menshende o Debleskro drom. Tou rakreh kekeske pal o mouy, ninna te hi len boud penepaske. 17Pen menge kanna: Hi mishto pal maro čačepen, te das mer o themeskre love o baro rayeste an o foro Rom?”
18O Yezous hayvas lengro čilačepen oun penas ap lende: “T'mer rakrenn douy čipyentsa. Hoske kamenn t'mer man an mire laba te taprell? 19Denn man i roupeni bema!”
Oun yon dan les yek bema.
20Koy poučas lo lendar: “Koneskro shero oun lab hi ap kay bema?”
21Penan le: “O shero oun o lab o baro rayestar an o foro Rom!”
Penas lo ap lende: “Yaake denn leste, hoy leskro hi! Oun denn o Debleste, hoy leskro hi!”
22Oun har yon kol laba lestar shounan, kran le bare yaka. Oun yon moukan les, oun djan penge.
Krell o Devel i moulen djido?
23Ap ko dives van i Sadducarya pash leste. Yon hi kolla, kay penenna: O Devel krell i moulen gar djido.
24Yon penan ap leste: “Sikepaskro, o Mose penas: Te merell i romedino morsh, oun les his kek čave, palle hounte romedinerell peskro phraal koy romyat, te vell peskro phraleske i ternepen boldo.
25Koy his pash mende efta phrala. Oun o phourester, kay romedino his, meras. Les his kek čave. Doleske las peskro phraal koy romyat. 26Oun ko douyto meras, oun les his kek čave. Oun ko triinto romedineras lat oun meras. Oun les his kek čave. Oun yaake djas kova bis ap o eftato. Yek pal o vavar romedineran lat oun meran. Oun lauteren his kek čave. 27Oun har i tsele phrala moulo his, meras koy romni ninna. 28Kanna poučah toutar: Ap ko tsiro, kay krell o Devel i moulen djido, koneskri romni hi li? Hake efta his lah romedino.”
29Penas o Yezous ap lende: “T'mer prindjrenn gar o Debleskro lab oun o Debleskri zoor vitar gar. Doleske hayvan t'mer či. 30Kol moulen, kay o Devel djido krella, kolla romedinerenn bouder gar, oun venna gar romedino. Yon hi har i bolepangre an o bolepen.
31An o Debleskro lab hi činlo, te venn i moule djido. Kote penell o Devel: 32Me hom o Abrahameskro Devel oun o Isaakeskro Devel oun o Yakobeskro Devel.#22:32 dik: 2. Mose 3:6
Oun me penau t'menge: Yob hi gar o Devel kolenge, kay moulo hi. Na-a, yob hi o Devel i djidenge.”
33Kolla boud menshe, kay troul o Yezouseste tardo his, kolenge ačas o rakepen krik, har yon kova lestar shounan.
Hoy o Devel kamella
34O Yezous rakras yaake, te nashte penan leske i Sadducarya či bouder. Har i Farisarya kova shounan, van le khetne. 35Oun yek lendar, i biboldengro čačepaskro, kamas te taprell lo les an leskre laba oun poučas lestar: 36“Sikepaskro, kol tsele labendar, kay penenna, hoy o Devel mendar kamella, havo lab hi o bareder lendar?”
37Penas o Yezous ap leste: “Tou kamess tiro Debles o tselo djiyestar an tiro tselo djipen, an lauter, hoy tou djineh.#22:37 dik: 5. Mose 6:4-5 38Kova hi o bareder lauterestar, hoy o Devel toutar kamella.
39Ninna kamell lo toutar, te vess yaake lačes ap koleste, kay pash toute hi, har hal lačes ap toute kokres.#22:39 dik: 3. Mose 19:18
40Kova, hoy o Mose oun i tsele Debleskre rakepangre menge penan, hoy o Devel mendar kamella, kova hi an kolla douy bare Debleskre laba penlo.”
O Davideskro čavo
41I Farisarya his gomme khetne pash o Yezouseste. Oun yob poučas lendar: 42“Hoy penenn t'mer pral ko baro rayeste, kolestar o Devel penas, te vell yob? Koneskro čavo hi lo?”
Penan le: “O Davideskro čavo.”
43Penas o Yezous: “Te hi kova čačo, har nay penas o David ap leste: Mo ray? Kava lab čivas o Debleskro Dourho an o Davideste, 44har yob penas: O Devel penas ap miro rayeste: Besh tout ap miri čači rig, te čivap kolen tel tire pire, kay hi rhoyedo ap toute.#22:44 dik: Debleskri gili 110:1
45Kate penas o David ap leste: Mo ray.
Har vell lo nay leskro čavo?”
46Oun kek lendar nashte penas o Yezouseske yek lab koy pre. Oun pal ko dives trashan le, te poučenn le lestar boudeder.
Attualmente Selezionati:
Mateo 22: Sint-Man2024
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
