Phŭn Blŭng 12
12
Ơi Adai iâo Abram
1 Yêhôwa pơhiăp hr̂ŏm Abram: «Br̂ơi ih biă mơ̆ng lŏn-ia ih dŏ, biă mơ̆ng yŏng dơi ih, biă mơ̆ng khŭl-khap sang-nŏ ma ih, nao pơ lŏn-ia kâo ti pơƀôh br̂ơi ih.#An Hêb 11:8. 2Jr̂ŏng nŭn kâo ti ngă br̂ơi ih jr̂ŏng sô̆n-sat pr̂ŏng, kâo ti pha br̂ơi ih klơi nŭk-nua, wŏt kâo ti pô̆ đĭ ƀŏ ih čiăng r̂ăng i-bli, čiăng r̂ăng hmâo klơi nŭk-nua yua mơ̆ng ih mơ̆n. 3Lơi br̂ơi ih klơi nŭk-nua, kâo ti pha br̂ơi pô nŭn klơi nŭk-nua mơ̆n. Lơi pơmat ih, kâo ti hơtŏm pô nŭn mơ̆n. Bih khŭl-khap mơ̆ng lŏn kơnah ti hmâo klơi nŭk-nua yua mơ̆ng ih.»#12:2-3 Phŭn 15:1-21; 17:1-27; 18:10-15; 22:16-18 r̂ă r̂oi mơ̆ng klơi Ơi Adai pơhiăp uăn hr̂ŏm Abram mơ̆n. An Kal 3:8 mơ̆n.
4Nŭn Abram biă nao hla ti Yêhôwa pơđơi, dăp Lot nao hr̂ŏm ñu mơ̆n. Pah Abram biă mơ̆ng plơi Kharan ñu hmâo ayŭ 75 thŭn boih. 5Abram djă ba Sarai bơnai ñu, dăp Lot mon ñu, wŏt bih dr̂ăm-gơnăm gơñu hmâo, dăp mơnuih gơñu blơi mơ̆ng plơi Kharan nao hr̂ŏm gơñu mơ̆n. Môt gơñu bat nao pơ lŏn-ia Kanan. 6Tơl gơñu tr̂uh pơ Kanan boih, nŭn Abram bat mơ̆ng lŏn-ia nŭn, nao pơ ha ƀon hmâo phŭn kơyâo dŭt#12:6 Phŭn kơyâo dŭt ne Hêbrơ laĭ «Phŭn kơyâo Êlôn.» Môt sô̆n-sat Kanan yap kơyâo Êlôn nŭn myang hla ti Jơr̂ai juăt yap kơyâo bơnŭ hmâo yang. a iâo Môrê (“Môrê” nŭn čiăng laĭ “Gru”), kơyâo nŭn dŏ mơ̆ng plơi Sigem. (Pah anŭn sô̆n-sat Kanan dŏ tăm lŏn-ia nŭn.) 7Jr̂ŏng nŭn Yêhôwa pơƀôh br̂ơi Abram ƀôh ñu, nŭn Yêhôwa laĭ: «Kâo ti br̂ơi lŏn-ia ne pơ djuoi ih.»#An Kal 3:16. Nĭng nŭn yơh Abram mơ̆ng ngă pr̂a ngă yang Yêhôwa pơ ƀon nŭn, yua Yêhôwa pơƀôh br̂ơi ñu ƀôh. 8Jr̂ŏng nŭn ñu biă đuĕ mơ̆ng anŭn, nao pơ ƀon hmâo kŏ čĭ, ping gah ngŏ plơi Ƀêt-el. Tơl pơ anŭn, gơñu bơdŏng sang seng tŏng plah-wah plơi Ƀêt-el mơ̆ng plơi Ai. Plơi Ƀêt-el dŏ ping gah yô̆, plơi Ai dŏ ping gah ngŏ. Nŭn Abram ngă pr̂a ngă yang Yêhôwa pơ ƀon nŭn, jr̂ŏng nŭn ñu iâo đĭ ƀŏ Yêhôwa. 9Jr̂ŏng nŭn Abram bat mơ̆ng ha ƀon nao pơ ha ƀon, khă tơl tr̂uh pơ ƀon Nêkĕp.
Abram dua ñu Sarai nao dŏ pơ Êjĭp
10Pah anŭn hmâo klơi ĭ lơpa mơ̆ng lŏn-ia Kanan, nŭn Abram tr̂ŭn nao dŏ dăng pơ čal Êjĭp, yua klơi ĭ lơpa mơ̆ng lŏn-ia nŭn pr̂ŏng jat. 11Pah ñu ti mŭt nao pơ čal Êjĭp, nŭn ñu pơhiăp hr̂ŏm bơnai ñu Sarai: «Kâo thâo kr̂ăn ih hr̂ăl. 12Tơl môt sô̆n-sat Êjĭp ƀôh ih, nŭn gơñu ti laĭ, ih bơnai kâo. Nŭn gơñu ti pơdjai lôi kâo, plai ih dŏng gơñu ti čr̂oh dŏ dĭp. 13Nĭng nŭn yơh, br̂ơi ih r̂ă br̂ơi gơñu ho, laĭ ih adơi kâo, čiăng gơñu ngă hiam hr̂ŏm kâo yua mơ̆ng ih, nŭn gơñu ti čr̂oh klơi hơdĭp kâo, r̂ai mơ̆ng ih mơ̆n.»#An Phŭn 20:2; 26:7. 14Tơl Abram mŭt nao tăm čal Êjĭp, nŭn môt sô̆n-sat Êjĭp ƀôh bơnai ñu hr̂ăl jat. 15Tơl môt khua ngă buă tŏ tui Pharon ƀôh Sarai, gơñu pơ-i pơ Pharon, jr̂ŏng nŭn r̂ăng tô̆ ñu ba nao čr̂oh pơ sang Pharon. 16Plai Abram dŏng, pơtao ngă hiam hr̂ŏm ñu, yua mơ̆ng Sarai, nŭn yơh Abram mơ̆ng hmâo phung triw phung be, phung mo, lie kơno, hlŭn đahkơi hlŭn đahmơi, lie ña, dăp ôt he mơ̆n.
17Nŭn Yêhôwa ngă br̂ơi Pharon, dăp bih mơnuih dŏ tăm sang ñu, wă-nuă kơnap-tap kơtang-kơtĭt, yua mơ̆ng Sarai bơnai Abram. 18Nŭn Pharon iâo r̂ai Abram, ñu laĭ: «Yĕt ih ngă hla ne hr̂ŏm kâo? Yua yĕt ih bĭ laĭ br̂ơi kâo, ñu ne bơnai ih? 19Yĕt ih laĭ ñu adơi ih, čiăng kâo tô̆ ñu ngă bơnai hla ne lĕ? Hĕ, bơnai ih ne, tô̆ ñu ba đuĕ wŏ!» 20Jr̂ŏng nŭn Pharon pơtă môt ngă buă ñu, čiăng gơñu pơđơi Abram dua kơi bơnai ñu biă đuĕ, wŏt bih-tih nŏ yĕt-yĕt ñu hmâo he mơ̆n.
Attualmente Selezionati:
Phŭn Blŭng 12: JKB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2024, Wycliffe Bible Translators, Inc.
