Logo YouVersion
Icona Cerca

Matyiu 27

27
1O mu diyaki ubwa, prist iněně jěhěpi na batodu ba bato ba hakindi ehoka ya Jisus nyang‘ abu e ka weyě Mâ. 2O bâ‐ba běki Mâ katango ba valanaki Mâ, ka bâ‐ba vě Mâ Gâven Pontius Pailat.
3Jâ ndi ja Judas e kândâkiyi Mâ, o mâ‐a yěněkidi na A kwendi, ja yěně ngěbě, ka mâ‐a timbana pě mabo ma dâlě malalo o prist iněně na batodu ba jadi, na, 4Mbi hango bobe o umba‐mbi kândâkidi makiya ma ha ’bě kobango. Ka bâ‐ba vâ, na, Elombo e nd‘ ovaně o hwě ho jadi? Yeně nd‘ eâvě. 5A ngombwakidi dâlě o těmpěl, ka mâ‐a puma; a kěkindi, ka mâ‐a vala ka kělidě nyolo ’aju. 6Ka prist iněně ja nângâ dâlě, ka bâ‐ba vâ, na, E ’bě bwamu na i vamakwě o ngumba, ’kabojana i ndi ’hambe ja makiya. 7Ka bâ‐ba ha ’hoka, ka bâ‐ba hamba ehiki ya uměyi e tongakě bangi. 8Ovaně nd‘ o ’hiki těyeně e tubakudwě, na, Ehiki ya makiya, na boa buhwa těkabo. 9Jâ ndi ja ya Jěrimaia usaki e kalakidi ya hama, na, Ka bâ‐ba nângâ mabo ma dâlě malalo, ihambe ja nyang‘ ’aju e weyakidi, ua bana ba Israěl a tubakidi ’hambe; 10ka bâ‐ba vě jâ o pělě ya ’hiki ya uměyi, ka Upangiyi a lenakidě n‘ umba.
11Ka Jisus a těmě o boho boa Gâven: ka Gâven a uwa Mâ, na, Âvě nd‘ Upolo mua Jiu? Ka Jisus a vâ, na, O vâki yâ. 12O Mâ‐a bakakudwě na prist iněně na batodu au yavwanaka ’lombo. 13Jâ ndi ja Pailat ja vâ na Mâ, na, Wa yokaka belombo tě beitě ibeabu be pakwakě opěl‘ Âvě? 14Au timbwanaka mâ ndaga na ya pâkâ; jâ ndi ja Gâven ja mamana nangudi. 15Nandi o isango tědině Gâven a ma hulakidi mběmbě o ebimba e jadi mbwedi pâkâ eabu e ma vahaka. 16O ’gombe těně ba diyaki na mbwedi ya kuma e tubakwě na Barabas. 17O bâ‐ba diyakidi yolaněngo ta, ka Pailat a vâ na bâ, na, A lě nja uanyu a vahakě na mbi hulakidě inyěni? Barabas, ipě Jisus, a tubakwě na Kraist? 18Ikabojana a yowakiděndi na ivina ndi jabu i věněki Mâ. 19O mâ‐a diyakidi o ’diya ya yěkě, ka mwad‘ ’aju a bandidě mâ, na, O diyake na ’lombo ’âvě e ka hayě moto tě uyamu ně, ’kabojana mbi ma yěněndi etuniya o ndâtâ eamě e ma yâtâ Mâ o buhwa. 20Ndi prist iněně na batodu ba sombiyakiděndi bebimba na ba jombake Barabas, na bâ‐ba weya Jisus. 21Ka Gâven ya timbwana, ka mâ‐a vâ, na, Ua babale ekaba o vahaka lě ni na mbi hulakidě ’nyěni nja? Ka bâ‐ba vâ, na, Barabas. 22Ka Pailat a vâ na bâ, na, Nandi, mbi ka ha lě Jisus a tubakwě na Kraist na‐e? Bâ běhěpi mâ, na, A weyakwě o krâs. 23Ka Gâven a vâ, na, Nande lě, A ma ha lě nja bobe? Ndi ba yamaki pě nangudi wa, na, A weyakwě o krâs. 24O Pailat o yěni na a yâle elombo, o maihana edungu e kwakindi, ka mâ‐a nângâ miba, ka mâ‐a tuka makadu maju o boho boa ’bumbu, na, Mbi ’bě na makwa ma makiya ma moto tě uyamu ekaně: yeně nd‘ eanyu. 25Jâ ndi ja bato běhěpi ja vâ, na, Makiya maju ma diyake na hwě na bana bahu. 26Jâ ndi jaju ja huludě bâ Barabas: o mâ‐a běkidi Jisus bomango, ka mâ‐a vě Mâ ka kâmudwě o krâs.
27Ka sâjě ja Gâven ja nângâ Jisus o ikenga iněně, ka bâ‐ba yolě njamba ’abu yěhěpi o Mâ‐a jadi. 28Ka bâ‐ba duwa Mâ ngâi jaju, ka bâ‐ba bâtidě Mâ ngâi j‘ ingâla. 29O bâ‐ba longakidi korowa ya mayâ, ka bâ‐ba tědě yâ o molo muaju, n‘ utumbe o ikadu jaju iyomi: ka bâ‐ba huma mabângâ o boho boaju, ba věhěkě Mâ, na, Mbolo, Upolo mua Jiu! 30Ba tuwakiya Mâ malě, ka bâ‐ba nângâ utumbe, ba ka bweyaka Mâ o molo. 31O bâ‐ba běki Mâ věhěngo, ka bâ‐ba věngidě Mâ ngâi, ka bâ‐ba bâtidě Mâ ngâi jaju mětě, ka bâ‐ba vala ka kamidě Mâ o krâs.
32O bâ‐ba pumakidi o bwebwe, ka bâ‐ba duwa moto ua Sairini dina na Saimân: mâ nd‘ uabu a pambalakidě na a bapakě krâs ’aju.
33O bâ‐ba pâkidi o iboko vi tubakwě na Gâlgâtha, vi vânâkwě, na, Iboko via mbombo, 34ka bâ‐ba vě Mâ vinegar e mâtâkě, hâbwěngo na bwayě: Mâ yâ vekango, au bâbâkâ o mâtâ. 35Ka bâ‐ba kâmidě Mâ o krâs, ka bâ‐ba kaba ngâi jaju, ba hodwaka kwayi: na ovaně nd‘ o e kalakudwě na usâki e ka timwě, na, Ba kabanakiyendi ibâtâ jamě bâ mětě na bâ mětě, ba hodwaka kwayi o pěl‘ ’a koto ’amě. 36Bâ ’mě diyediye, ba pepwaka Mâ. 37Ka bâ‐ba panidě ebuke ’aju lěndwěngo oba ya molo muaju na, EKANĚ NDI JISUS UPOLO MUA JIU. 38Jâ ndi ja myibi mebale ja kâmudwě na Ju, umbâkâ o ’nâ eyomi, umbâkâ o ’nâ ya ’měngwě. 39Ba ma tombaka baka, ba ma kilaki Mâ, ba vugumakidě meolo meabu, 40na, Âvě o ka buludě těmpěl, na nâvě wa longa yâ na hwi ’lalo, yongakě nyol‘ ’âvě. Oningě na o ndi Mwana Anyambě, hubaka oviya krâs. 41Yâ nyanga tě te ya prist iněně i vâkidi, ba věhěkě Mâ, na balěndi na batodu, 42na, A ma yongaki bapâkwě; nd‘ A bě na ngudi e yongakě Mâ mětě. Oningě na A ndi Upolo mua Israěl, A hubake oviya krâs, nandi vâkâna ho kamidi Mâ. 43A ma pitakiděndi Anyambě; ndi a věngěkidě Mâ nandi, ipě a ka vahate Mâ: ’kabojana A vâki, na, Mbi ndi Mwana Anyambě. 44Myibi tepě me kâmâkudwě na Ju, ba timbakidi Mâ ndaga tě.
45Nandi oviya joba meolo, ivititi vi diyakindi o he yěhěpi kwanga nala mawěla malalo. 46O ’gombe ya mawěla malalo ka Jisus a yama na joyi oba, na, Eloi, Eloi, lama sabakthenae? yeně ndi, na, Anyambě ’amě, Anyambě ’amě, e lě nd‘ eâvě e senji ’Mba? 47Bâka ba diyakid‘ omě těmetěme o bâ‐ba yoki nonaně, ba vâki, na, Ekaně a ndakiyandi Elaias. 48Elěngiaha tepě umbâkâ uabu a vala umbila, ka mâ‐a nângâ nyândâ, a ka londakě yâ vinegar, ka mâ‐a kahidě yâ utumbe, ka mâ‐a mâtidě Mâ. 49Bapâkwě ba vâki, na, Dikaka, ho t‘ o yeně ipě Elaias a ka viyandi ka yongě Mâ. 50O Jisus a yami pě na joyi oba, ka Mâ‐a dika ilina. 51Na, umbwakiyate, unamba uněně mua těmpěl u pěhěkiyendi bepěhi na hanganě oviya oba kwanga nala he: he e ka ninganaka, malale ma pěhěkiyě; 52malonga ma ka dubwanakiya, bekengo beitě bea bato bayamu be diyakidi wewe be pumbwaka, be ka pumaka oviya malonga, 53ipumbuwa jaju tombango, ka bâ‐ba vala o mboka ya hole, ka bâ‐ba yěněně na bato baitě. 54O Sěnturiân na ba diyaki na mâ ba pepwaka Jisus, ba yěnidi he e ninganakě, na belombo tě be hamakidi beně, ba bangakindi jângâ iněně, na, Mbambayě, ekaně A diyakindi Mwana Anyambě. 55Bajo baitě ba diyakind‘ omě (ba hilakě na masěyi) ba vitakidě Jisus oviya Galili, ba hakiya Mâ; 56bâkâ ndi ba Meri Magdalini na Meri nyangwě ya Jems na Josěs, na nyangwě ya bana ba Zěbadi.
57O kolo e pâdi, enami ya momo ya Arimathia, dina ja Josěf, e pâkindi omě, mâ mětě a diyaki tepě eyokwedi ya Jisus; 58Mâ ndi a kěkidi o Pailat a jadi, ka jomba ekengo ya Jisus. Jâ ndi ja Pailat ja sombiya na ekěngo e věkwě. 59O Josěf a nângâkidi ekengo, ka mâ‐a dinga yâ n‘ unamba mu‘ ivěla utano, 60ka mâ‐a nangidě yâ o malonga maju mětě ma kya imaju ma pudwakidi o ilale; ka mâ‐a vungulidě ilale iněně o ’biyâ mua malonga; ka mâ‐a vala. 61Meri Magdalini na Meri mepâkwě ba diyakind‘ omě diyango, hohonganěngo na njama.
62Buhwa bopâkwě bo vitakidě buhwa boa ikenjě, ka prist iněně na Farisi ba yolaně o Pailat a jadi, na, 63Pa, ho yongiděndi, na uyabani těmuně a vâkindi, o mâ‐a diyakidi mihâ, na, Hwi ’lalo tombango, vâkâna mbi pumbuwendi. 64Nandi vâkâ na njama e sulakwě kwanga nala hwi ’lalo, o banga beyokwedi beaju bea viya na bulu ka iba Mâ, na bâ‐ba vâ na bato, na, A pumbuwendi oviya bawewe, vâkâna iyaba ja madikanido i ka diyi bobe wa na ja bohoboho. 65Ka Pailat a vâ na bâ, na, O teni na bavengidi; kěkěni, wa sulěni nyanga ’anyu e ka yowě. 66Ka bâ‐ba vala, ka bâ‐ba sulě njama, ka bâ‐ba yembidě ilale, ka bâ‐ba tědě bavengi.

Attualmente Selezionati:

Matyiu 27: BNG1895

Evidenziazioni

Condividi

Copia

None

Vuoi avere le tue evidenziazioni salvate su tutti i tuoi dispositivi?Iscriviti o accedi