Luka 20
20
1Lare monou U ipekimakei’inave ane omoro marea laru ai, Iva voa a’a aruru omoro kuruemakei’inave ane, omoro amua a’a, kikiria a’a ane, mai‐oro ane, U ai anenave,
2Oro erau voa kurunave, Ni akine, I oi iva ana Ni ei awku li’ina? Ei iva koama?-?niku’e?
3U erau voa kuruenave, Nai awku voa vevenaima; kavani voa ikune:
4Ioane enu bapatiso pani muku mere ana, a’a mere ana?
5Oro erau voa ekinamakei’inave, Enei kuruane, Pani muku mere; U kuruma, Uku oiana noro pirimaroakoakape?
6Enei kuruane, A’a mere; a’a uriria rawre apakiakana: uku oro ipa‐elauakeina kapoi Ioane laikorava a’a kei’inave.
7Oro kurunave, kurua bapatiso onu uku oro a‐ipali’inavea.
8Iesu erau voa kuruenave, I iva anu uku Nai ei awku li’ina Nai awku a‐nakinakea.
9A’a aruru aipo voa kurueai U awkamakei’inave. A’a monou aura kininave, iaki a’a aura oiviriai u evere’enave, pani va’au u aki‐enanave pani va’au e ai.
10Uru meria pani ai aivara monou aura ai u okaivirinave, aura oiviria a’a iri uru awkuane‐iai: aura oiviria a’a vaki‐awmi’inave, eve kape laoinave ane.
11Aivara mo u okaivirinave: u awku oro vaki?-?awmi’inave, kukunu‐mai awkanave ane, eve kape laoinave ane.
12Aivara mo, rere kaiane vaki eire, u okaivirinave: ei vaki awku oro awkoro‐awkanave, laoinave ane.
13Aura anu amua erau voa veve’enave, Nai oiama?-?limau? Na naumuki mere nai okaiviriakana: oro avioiakana naea.
14Aura oiviria a’a inamu‐oiaka’ane, oro erau voa ekinanave, Airavaki eire: enei a’anamaki, omoro‐pei enei roikiane‐iai.
15Aura mere oro laoinave, a’anave ane. Aura anu amua oiama‐elaumau?
16U aneakana, ei aura oiviria a’a u e‐avakana, a’a e aura ekuakana. Oro ou voa viriaka’ane, oro erau voa kurunave, Ai!
17U inamu‐ekimakei’inave erau voa kuruenave, Ei kikiria voa anu miki oiana, Kurua rawre marea la‐oka a’a inaka‐li’inave, U kovaivivi rawre evere’eakeia’ane euna?
18A’a kavakava kurua rawre upa mere ara’ana u awkoro‐awkavakeiakana; a a’a kavakava upa mere kurua rawre ara’ana, u oiniakeiakana.
19Kikiria a’a, omoro amua a’a ane, U piriai oro umu‐li’inave; uku a’a aruru oro kore kei’inave: oro ipali’inave ei aipo voa U kuruaka uku oro eiai.
20Pani miki eiai oro aioiaka‐pokoiaka’ane, oro a’a ekaivirinave, oro auoiakana oro opara anana a’a kei’inave, oro Una opara inamu‐oiane‐iai, U piriane‐iai, kavana anu paku ai arekava’ane‐iai ane.
21Oro erau voa veve’enave, Amua e, enei ipali’ina Ni voa miki kuruna, ipawkina ane, a’a anu paku e Ni a‐avioinakea, Eloi inu opara Ni ipawkina kapoi:
22Opara anana ana uku kavani Kaisara awkuai, opara kaika ana?
23Omo ewaea U inamu‐oinave, erau voa kuruenave ane,
24Seleni ipaikine, ei moni inu avaea, kikiria ane, kono ana? Oro kurunave, Kaisara anu.
25U erau voa kuruenave, Kaisara anu awku Kaisara awkura; Eloi inu awku Eloi awkura.
26Uku Una voa eiai voa e kevakeva oro kuruai ali’inavea a’a aruru unu paku ai, oro varua’anave Una voa eiai, eiekavakei’inave ane.
27Namai lare Sadukea a’a varomo U ai anenave, ei kaupu a’a anu ipawkia voa eire; a’a imua mere la’?-?avapeo. Oro erau voa veve’enave,
28Amua e, Mose ei vupu kikirinave enei eiai, A’a anu aroa a’a imuane, u a’e miaka, ukua‐mere eria ane, una aroa a’a una a’e kepea miakana, orere ukua‐mere miakana ane una aroa a’a eiai.
29Aroa a’a 7 kei’inave: airavaki a’e miaka, u imunave ukua‐mere eria ave’enave ane.
30Una aroa a’a rere vaki a’e kepea miaka, u awku ukua‐mere eria imunave.
31Aroa a’a rere kaiane vaki a’e kepea miaka; orau aroa a’a 7 liaka: ukua‐mere eria oro imunave.
32Neko mere ai a’e kepea awku imunave.
33Imua mere la’ava pani ai ei a’e kepea kono a’e ana? uku vaki 7 u miaka.
34Iesu erau voa kuruenave, Ei pani va’au unu a’a a’e mi’ina, oro vako ekuakeina ane:
35A a’a ima evere’eiakeiakana mako auiai kurua pani va’au laru ai, imua mere la’avai ane, oro a’e miapea, oro vako ekuakeiapea.
36Oro moawku imuai liapea; uku oro aivara‐avaea ipi’ipiakeina; oro Eloi inu ukua‐mere uku oro imua mere la’ava anu ukua mere keina.
37Imua a’a imua mere la’ana Mose ipawkinave ou voa laru ai uku iri kokoro ruawkimakei’inave, u Iehova erau voa oroina, Aberahamo onu Eloi, Isako onu Eloi ane, Iakobo onu Eloi ane.
38Uku U imua a’a anu Eloi peo, a U rokoa a’a anu Eloi keina: uku a’a uriria rokona Una lai laru ai.
39Kikiria a’a varomo erau voa kurunave, Amua e, voa miki Ni kuruane euna.
40Voa mo veve’eai oro kore kei’inave.
41U erau voa veve’einave, Oro eka’amakuru’i Keriso Davida anu mere keina?
42Salamo buka anu voa Davida verukua erau voa kuruna, Iehova na Amua kurunave, Na eve miki mekai Ni pa’ane,
43Anea’anea Ni mani Ni are enu pakara Nai evere’eiane.
44Davida Amua oroinave, eka’amali’i U una mere keina?
45A’a aruru uriria paku ai Una aivara U erau voa kuruenave,
46Noro naivirine kikiria a’a eiai, a’a kape va’au are rokoai oro umuli’ina, kepoia voa awku kanikara ai oro umuli’ina, pakara mukua omoro marea laru ai, purai mako ai ane, oro umuli’ina;
47A’e kepea anu marea oro avapuli’ina, uku veia eiai avuavu uaro voa oro nawki‐awkana: mua kavani ovara oro miakana.
Attualmente Selezionati:
Luka 20: IAR1920
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the British and Foreign Bible Society in 1920.
