Va'Atəŋ 9
9
Va Maŋgəlva aynan man sən Nuwe
1 #
VAA 1:28
Maŋgəlva aɗɗak əzaɓ nan aka Nuwe dit kirtini, aɓsit na: Muwan kiykum, mənzlərə, məknəh dəlvafuŋ. 2Zəgeɗ memeyẽɗ naka dəlvafuŋ dit biŋgeɗ na disiŋ pakə, zəgeɗ məzəɓlaŋ naka dəlvafuŋ dit kilfeŋge na pehe pak wageslne'eŋgi, wakkereŋ sukuməni, nipsukumik ammba vokum. 3Zəga məzudaw madaran pak, dəsan sukum ka wəzəm nokum va nəpsukum gaslamba məkdəkani, nipsukumik dəwən neti. 4#MƏS 7:26,27; 17:10-14; 19:26; ƏMS 12:16,23; 15:23Hara kan na, kədawzəmaŋ slu də zeŋgilen ɓa, va wənəh na mbel nani. 5Səssel wanəssohẽt mbel dəssoŋ zeŋgilekuməŋka, wanəssohẽt ama zəga darawən məs dəbay ɗəf titire, vaski yi'e ama ɗəf titir məs dəbay ɗəf va ndəni, wanəssohõn zeŋgile ɗəf titire.
6 #
ƏGI 20:13; VAA 1:26 «Məs dəzi mbel na ɗəfa,
ɗəfi yi dədawzi mbel nani'e;
vi Maŋgəlva aɗɗak ɗəf
va ndən səɗeki.
7 #
VAA 1:28
Nokum na, mənzlərə, məknəh dəlvafuŋ kuɗiskuɗisi, muwan kiykum akani.»
8Maŋgəlva anah sən Nuwe dit kirtin na: 9«Wənmiyna naw wasan də munokum, gəm dit kirtukum dərɓogokum 10dit zəgeɗ mederet en dəssoŋ də mənokum pakə: biŋgeɗi, wasliɗe, zəgeɗ naka dələv məs dəssoŋ də mənokum, an dəgil səddəv bəlay də mənokum, dit zəgeɗ nawra dayday pakə. 11Wənmiyna naw wassan də mənokum: nəzan na zəga madaran dit iŋkile na buwən məvekeveke ɗah əmpa ɓa, buwən agəɗ na aka dəlvafuŋ vekeveke nawraygən zəga əmpa ɓa.» 12Maŋgəlva amna: «Zəga nawsən wənmiyna naw yaŋ nəɗi awalaŋgu də munokum gəm zəgeɗ mederet en dəssoŋ də mənokum, də sayit an nabe ka faɗə. 13Nəɗiyək məzzəɗa naw addəv slaybuwən ka dəsangən zəga nawsən wənmiyna naw aka walaŋgu də dəlvafuŋ. 14Pay nədarban slaybuwən aka dəlvafuŋ, an mulayi məzzəɗa addəv slaybuwna, 15wanəɗɗum aka wənmiyna naw də mənokum, dit zəgeɗ mederet zeŋvit mawetdi pakə; buwən məvekeveke agəɗ na ɗah əmpa nawzan zəga madaran ɓa. 16Məzzəɗa wasan addəv slaybuwna, wanula vi kaɗɗumon wənmiyna naw an faɗə, məs dəssan awalaŋ Maŋgəlva dit zəgeɗ mederet naka dəlvafuŋ pakə.» 17Maŋgəlva apsən Nuwe na: «Zəga nawsən wənmiyna yi aka walaŋgu də zəga madaran naka dəlvafuŋ pakə.»
Kirtin Nuwe hoku
18May Sem, kam də Yafet əŋgə, kirtin Nuwe en dəgilyoŋ səddəv bəlay; Kam na, ndəni afən Kana'an. 19Eskin kirtit kirtin Nuwe hoku, səzeti ɗiy atəŋgaŋ uwanən kiyit aka dəlvafuŋ.
20Nuwe yi, məzinse maddaabəŋ naka dəlvafuŋ. Ampək megezlembirkeɗi 21asək mbazla neti, mbazla van abayəka, hã mbəgən gabban mekeleŋ addəv gizlirke nani. 22Kam, afən Kana'an awlak gabba afən mekeleŋ, ambat anah sit milmiŋgiɗin en suleŋ appaka. 23May Sem də Yafet, agəmənək lukut na afiti, azlzlarnən akkivet sulegiti, addereŋ mededer, asərətnən gabba afiti. Ndəɗaŋ kpaŋ sədak məza ula gabba afit ɓa. 24Adan mbazla asəki səkani, Nuwe fəɗahə, asənək an wətən sawã agəɗə. 25Yaŋ anah na:
«Kana'an dəray kuɗupu!
Dəsan azet milmiŋgiɗin
balam nammbet belemɗe neti!»
26Yaŋ anah siske na:
«Soko sən Yawe, Maŋgəlva na Sem,
Kana'an dəsan balam na Sem!
27Maŋgəlva dəɓaygən Yafet,
dəsangən addivit gizlirkeɗe na Sem,
Kana'an dəsan balam nani!»
28Dərɓaga buwən məvekeveke, Nuwe anziyək egge əzva səkat hoku də kaklaw sle'i. 29Wəzva na Nuwe gərak pak tay, səkat vaytak də kaklaw sle', amtə.
Attualmente Selezionati:
Va'Atəŋ 9: GBD
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
All right reserved
