Luka 23

Yesu aba Pilat

(MAT 27:1-2,11-14; MAR 15:1-5; YOH 18:28-38)

1Yaŋ asilyoŋ pakə, akanən aba Pilat. 2Atəŋgənək əkiyaŋ dolgoy akan dawnəh na: Mərəhək ɗəfəŋ əsilgit ɗiy naka dələv nam dəɓoŋgoŋgəni, tay ətek ɗiy dawfaɗ nzalaka sən Kaysara, tay ənah na ndən sən kiyən na Kristu yi məlĩ yi. 3Pilat assohõnək dawnəh na: Istə məlĩ net mə Yudeɗ sa? Yesu aɓsən na: Is kədawnahən. 4Pilat aɓsit deyeɗe net məsdəlveŋge dit ɗiy pakə: Nərah mbərayən aza ɗəfəŋ ɓa. 5Yaŋ ampanən tilit dawnəh na: Tay əɓoŋgit ɗiy də əɗɗa əyak aka dələv baymani, atəŋ a Galile hã gap aŋka.

Yesu aba Herodə

6Adan Pilat aprəm vaska, assohõn na ɗəf van mə Galile yi sa? 7Adan aprəm na səka dələv na Herodə ade, aslənək aba Herodə, vi pay nani Herodə tay a Yerusalem. 8Adan Herodə awla Yesu, annekenək zən diyɗa, vi anziyək man aka dulagəni, vi adaprəm məs adawpeleŋ akani, tay əɗɗum dulagən daɗɗa sekene. 9Assohõnək əssõh diyɗa, ya tay an Yesu azlan sən ɓa. 10Deyeɗe net məsdəlveŋge dit mərbaŋ-mahenziŋ tahəŋ ziwziw adaka. Əkiyaŋ dolgoy zit soksok akani. 11Herodə dit məzəlpaŋ nan azelenənka, amasaŋgək akani. Agul sən lukut məzəwiɗe, amndagan aza Pilat. 12Pay dəpaski Herodə akkpaŋgək bayna Pilat, vi lahəŋ əsler tay a waleŋgit ɓa.

Tay ətawaŋ wən aka Yesu namta

(MAT 27:15-26; MAR 15:6-15; YOH 18:39—19:16)

13Pilat akkeletik deyeɗe net məsdəlveŋge, ɗiy gugriɗe gəm ɗiy pakə. 14Aɓsit na: Ɗəfəŋka, kəki suwənək va məzuɓoŋgit ɗiyi, ya naw yaŋ nəssohõnək abokum, nərah mbərayən azan net zəgeɗ məs kədawkiyaŋ dolgoy akanəŋ ɓa. 15Herodə pak dərah mbərayən azan ɓa vini amilgən azamə. Ya yaŋ zəga tay agəɗ gala nawbayən akan ɓa. 16Vini wanərga kappani. [ 17Vi aza va əzləra na Pak agap pak, Pilat wapəl sit mə fərsəna taka.] 18Aŋzlaŋgək vaŋvəl aka ma taka dawnəh na: Azan ɗəfəŋka appan səm Barabbas. 19Məzgan ɗəf nan a fərsəna na aka wən na gogoyo dəgəɗ a walaŋgəla-metiŋ, gəm əbay gəbay yi. 20Pilat apel sitik əmpa vi aŋgəl kappan Yesu. 21Ya azlaŋgək vaŋvəl dawnəh na: Akkpa' aka məzliwrihe. Akkpa' aka məzliwrihe. 22Pilat anah sitik mahoko'ən: Mambray mi agəɗ di? Nərah mbərayən azan gala nawbayən ɓa. Wanərga kana, wanəppani. 23Ya anzlaŋgək vaŋvəl zit soksoku, aɓɗaŋ na nakkpa'i aka məzliwrihe. Geŋgere net adayək kiyən. 24Pilat atafək əɗɗa sit an assohoŋgu. 25Appanək ɗəf məs assohoŋ məs məzgan a fərsəna aka wən na gogoyo dəgəɗə gəm əbay gəbay naka, apsitik Yesu dəɗɗanəngən an aŋglaŋ.

Tay əkkpa'nən Yesu aka məzliwrihe

(MAT 27:32-34; MAR 15:21-32; YOH 19:17-27)

26Aka adawkanən Yesu, armanənək Simoŋ mə Sirene, dazzan sura, akkrək sənən məzliwrihe akan dəzbangən Yesu.

27Ɗiy diyɗa azbanənka gəm gil məzuhəmaŋ də wəska morkoyo ambrani. 28Yesu kpaŋgən haran aketi, amna: Gil na Yerusalem, kədawhəmaŋ viyu ɓa. Məhəmgən kikum dit kirtukum dərəŋ. 29Vi pay yaŋ əzzan məs adawnahaŋ na: Əzaɓ azet ndarzlayɗe gəm akət en duwaŋ ɗah ɓa, dit bideɗ məs məweɗti ɗah ɓa. 30#HOS 10:8; HNH 6:16Asna wanahaŋ sitin mossorgoɗe gugriɗ na: Məɓəsl akamə! Sitin mossorgeɗe tam na: Məɗamamə! 31Vi an məgəɗ səni wəlaŋga məddəkan vas na, mbar adaɗɗa aka an məklakan di?

32Akaŋgək məɗɗaŋ mambray sula dəndəne'e vi kawzeti. 33Adan agapaŋ a təki adawyaŋ na bəbər kiya, akkpa'ənək adaka gəm məɗɗaŋ mambray taka dəka dəzəŋ, taka dəka zlaɓay. 34#GLƊ 22:19Yesu amna: Əbba, avvuyon siti, vi dəsənnən məs adaɗɗaŋ ɓa. Awɗeketinik lukutɗe nan a walaŋ zit də əɗɗa vẽhpəlwa. 35#GLƊ 22:8Ɗiy tahəŋ ziwziw adak ula. Ɗiy gugriɗ kpaŋgənən ka zəga nawmasa, aɓɗaŋ na: Akõhgit ɗiy meɓɓeti, dəkõhgən kiyən tamə an ndəni Kristu məs Maŋgəlva awel kana. 36#GLƊ 69:22Məzəlpaŋ amasaŋgək akani'e, azaraŋ azani, atəlsənən moɗokroy, 37aɓɗaŋ na: An istə məlĩ net mə Yudeɗ na, akõhgən kiyko. 38Əver tay a disiŋ kiyən na: Aŋki məlĩ net mə Yudeɗi.

39Taka səmmbet məɗɗaŋ mambray məkkpa'it aranək dawnəh na: Kristu kənan ɓa sa? Akõhgən kiyko gəm mənamə. 40Ya an maɓɓan ahayãnəka, amna: Nok kawgeslne sən Maŋgəlva ɓa sa? Vi nok pak addəv tatwãh məstaka kənani. 41Nam ɓa təsi, vi an dərəhəm aslək də wəza namə, ya nan mbərayən tay agəɗ ɓa. 42Yaŋ amna: Yesu aɗɗum akawa pay kədawtoŋ addəv məlĩ noko. 43Yesu azlan sənək na: Gesiŋ nədawnah suko, dəpaŋgənəŋ wakəsok də in a təɗa.

Əmta na Yesu

(MAT 27:45-56; MAR 15:33-41; YOH 19:28-30)

44 # ƏGI 26:31-33 Dəpas wagəɗ tətaŋpay səka, guzli titir agəɗə aka dələv də wən nan hã gap təbəz hoku na moskoyo. 45Pay asərətka, məzlzlara duɗakan təki addəv Gəla na Maŋgəlva aŋgarək səddakən. 46#GLƊ 31:6Yesu aŋgəslək vaŋvəl dayadaya, amna: Əbba, in tat əppan əmpəs naw avoko. Səza anah vaska, ndən zamə. 47Adan daya net məzəlpaŋ səkat awla zəga an dəgəɗə, agagdakanək Maŋgəlva dawnəh na: Sessel ɗəfəŋ ɗəf təstəsi. 48Ɗiy məs dəkkalaŋ vi kawla an dədaɗɗaska, adan awlanən zəga an dəgəɗə, amndoŋguk darga mekreti. 49#LUK 8:2,3Masənkeɗ nan dit gil məs dədazbanən hã sə Galile pak tahəŋ ziwziw faraɗa ulanən an məs dədaɗɗa.

Tay ətoŋgənən Yesu addəv magamasə

(MAT 27:57-61; MAR 15:42-47; YOH 19:38-42)

50Ɗəf tay iya nan na Yosef, taka naret ɗiy məsɓeti, ɗəf moggoni, təstəsi. 51Dəsler dənɗaŋ addəv an aynaŋ naɗɗa ɓa, addəv wəza net ɓa. Ɗəf na Arimate yi, walaŋgəla-metiŋ net mə Yudeɗi, məzuga məlĩ na Maŋgəlva. 52Ambatək aza Pilat, assohõnək kigəbay Yesu. 53Apriginike. Atərək də gabaga, avoŋgənək addəv magamas an məkkuhun addəv milɓe məs məvoŋgəni ɗəf adak tagay ɓa. 54Pay nawzaɓan zə ɗəfi, pay naffet go'oy.

55Gil en dəzbanən dəzzoŋ hã sə Galile ambataŋgək də Yosef, awlanənək magamasə, awlanənək va məvoŋgən kigəbayni. 56#ƏGI 20:10; ƏMS 5:14Ndəɗaŋ buryok, akayaŋ mẽl temtem mes məŋginit neneke gəm tursan.

Yaŋ affeteŋ pay naffet va mahenziŋ anahə.

Attualmente Selezionati:

Luka 23: GB

Evidenziazioni

Copia