Yohanna 5

Yesu tay əmbəlgən ɗəf zə məmtən

1Dərɓaga asna, pay əzləra net mə Yudeɗi, Yesu peŋ a Yerusalem. 2A Yerusalem adak vani, bobok tay məɗɗa məs adawyaŋ də ma Ibri na Betzata tay go'o də maddamba net timiŋgiɗi, mətərwəsl kiyən dit genzekɗe sle'i. 3Məs gbəgbaɗe tahəŋ məvoŋgit ammbet kporu: Daŋgarɗe vədalɗe gəm zə məmtənɗe. [Tay əgenin iŋkile daɓlaŋ, 4vi pay maɓɓani maslay na Daya awpirken addəv bobok van kaɓlet iŋkile veti. Məsgbəgba' məs dətoŋ daabəŋ aret iŋkile net pak dərɓaga wəɓla neti, ndən əmbla səka gbəgba' nan zev awandi pakə.] 5Ɗəf maɓɓan tay adak dəgəɗ əzva kaklaw hoku kiyən dədopoɗo də gbəgba' nani. 6Adan Yesu awla tay ɗuffo, asənək azəvək diyɗa də gbəgba' nani, aɓsən na: Mok aka kəmbəlgən sa? 7Məsgbəgba' nak azlan sən na: Daya ɗəf tay nawslaŋgu addəv bobok pay iŋkile adaɓlaŋ ɓa. Pay nədawgay əmmbata, ɗəf maɓɓan əsereh daabəŋ kiywa. 8Yesu aɓsən na: Asili, agəm ɓərzləma noko doko. 9Ɗəf nak ambələk go'ləŋgə, agəmək ɓərzləma nani, ambatka.

Ya pay nani pay naffeti. 10Vini mə Yudeɗ anah sənən ɗəf məs dəmbəl nak na: Dəpaŋ pay naffeti, tive tay abok nawslan ɓərzləma nok ɓa. 11Azlan sitike: Ɗəf məs dəmbəlguwa, ndən dənah su na agəm ɓərzləma noko, doko. 12Yaŋ assohõnəni: Naway as van dənah suk na agəm zəga nawvoŋ noko, dokoŋ di? 13Ya ɗəf məs dəmbəl nak dəsən na naway di ɓa, vi Yesu azarək sə təki məs ɗiy diyɗa assoŋ adak naka.

14Dərɓaga aska Yesu arəhək addəv Gəla na Maŋgəlva, aɓsən na: Yaŋ, kakaŋ kəmbəlka, kədaɗɗa ɗah mambray əmpa ɓa, vi an dəday ki as adawrəhuk ɓa. 15Ɗəf nak mbat ənah sit mə Yudeɗ na, Yesu dəmbəlgəni. 16Vini mə Yudeɗ aggbo'ən wən nan aka Yesu, vi aɗɗa pay naffete. 17Yaŋ Yesu azlan sit na: Hã kakaŋka Afu tay əɗɗa wəza, naw pak in tat əɗɗa wəza.

18Sən aski mə Yudeɗ akayaŋ tive nawbayən dayki lahəŋka, vi adawraygən pay naffeti kaka ɓa, vi adawnah əmpa na Maŋgəlva yi Afəni, adawsla kizən də Maŋgəlva.

Gagdak na Wətən Maŋgəlva

19Ndəni Yesu azlani, aɓsit na: Gesiŋ gesiŋ nədawnah sukum, Wətən agəɗ na zəga sən kiyən taka dayday an dula zəga an məs Afən adaɗɗa ɓa ɓa. Vi zəga an məs Afən agəɗ pakə, ndəni Wətən adaɗɗa tamə. 20Vi Afən aŋgluwək Wətəni, tay ərban sən an adaɗɗa pakə. Warbet sin zəgeɗ daykiyit es də memetiŋge. Vi nokum kəggətaŋgəni. 21Va Afən adawsilgit ɗiy məmtiti, adakkpeŋget medereti, vaski Wətən tam adakkpeŋget ɗiy en məs aŋgəl medereti. 22Vi Afən atawwən aka ɗəf ɓa, apsənək ətawwən pak sən Wətəni, 23vi ɗiy pak dəgagdakanəngən Wətən va adawgagdakanən Afəni. Ɗəf məs awgagdakan Wətən ɓa, awgagdakan Afən məs dəslən ɓa.

24Gesiŋ gesiŋ nədawnah sukum: Ɗəf məs dəprəm əpel naw pak, dətaf ɗəf məs dəslənwa, arahək zeŋgile an faɗə, ade na aba ətawwən ɓa. Atoŋguk ki əmta, agapək aza zeŋgile. 25Gesiŋ gesiŋ nədawnah sukum: Pay tay əzzani, agəɗək kakaŋ səkay, pay ɗiy mimtit adaprəmən wəla Wətən Maŋgəlva, ɗiy en dəprəməni, wassoŋ medereti. 26Va Afən asan suwer zeŋgile, vaski yi'e apsən Wətən dəsangən suwer zeŋgile. 27Apsənək gagdak sən Wətən dətawgən wəna vi Wətən Ɗəfi. 28Kədaggətaŋ sən as ɓa, vi pay tay əzzani, ɗiy səddəv magamas pak waprəmən wəlani, 29#DAN 12:2məs dəɗɗaŋ moggoni wasilyoŋ də zeŋgile, məs dəɗɗaŋ mbərayni, wasilyoŋ vi kawtawwən aketi.

Əka wən ammba Yesu

30Zəga tay nədawɓap əɗɗa sən kiyu ɓa. Va an nədaprəma, vas nədawtawən. Ətawwən naw təstəsi vi əŋgla naw nədawkayan ɓa əŋgla na ɗəf an dəslənwi yi. 31An nəpelik aka zuwa, əpel naw van asana gesiŋ ɓa. 32Ya ɗəf maɓɓan dədawpel akawa, nəsənək na əpel məs adawpel akaw van gesiŋgi. 33#YOH 1:19-27; 3:27-30Nokum kəslənaŋgək aza Yohanna, apelik aka gesiŋgi. 34Naw səza ɗəf nədawrəh an nawpel akan ɓa, nədawpel as na vi nokum kəkõhoŋgəni. 35Yohanna tay va lalam məsɗani, məzukekeɓe, ya nokum, kəŋglaŋgə ənneken zukum ənziya siɗikke ara əkeɗeɗe nani. 36Ya naw məzuwe naw tay dayki an na Yohanna: Wəzaɗe məs Afu avayəŋ vi nəɗɗegəni, wəzeɗe məs nəgəɗ veti, ndəɗaŋ vet dədawpeleŋ akaw na Afən dəslənwa. 37Afən məs dəslənwa ndən vani miziwe nawa. Ya nokum kəprəmən ɗah wəlan ɓa, kulanən va asan ɓa. 38Əpel nan tay addəvkum ɓa, adan kətafən ɗəf an məs aslən ɓa. 39Munokum tat əkoson Əpel na Maŋgəlva, vi munokum tat əɗɗum nawrəh zeŋgile an faɗə, ya Əpel na Maŋgəlva vanəski məzuwe nawa. 40Ya kawŋgereŋ əzza azaw kawrəh zeŋgile ɓa.

41Səzet ɗiy nədawrəh gagdak ɓa. 42Nəsənkumko, əŋgla na Maŋgəlva tay a mokrokum ɓa. 43Naw nədek də iya na Afuwa, kətafwən ɓa. Ya an ɗəf maɓɓan adek də iya nan sən kiyən, nan na wakətafəni. 44Mbarmbar kədawɓapaŋ ətaf mənokum mərahaŋ gagdak ka zukum, məza kawkayanən gagdak dəde səza Maŋgəlva kaka ɓaŋ di? 45Kədaɗɗumoŋ na intə nawka dolgoy akokum aba Afən ɓa. Moyis məs kəɗinən əɗɗum nokum akanəŋki məkədolgoy akokum. 46Vi va kətafənək Moyis, kəta wakətafwəni, vi aka wən nawi averi. 47Ya adan kətafən an aver ɓa, mbarmbari kətafnən əpel naw kəta di?

Attualmente Selezionati:

Yohanna 5: GB

Evidenziazioni

Copia