Yohanna 21
21
Əgrakən: ərba məs Daya arban zən əmpa a Galile
(21:1-25)
Yesu tay ərban zən azet gewleɗ buhul
1Dərɓaga aska Yesu arbanək zən əmpa azet gewleɗ a pehe na Tiberiyas. Vaŋ arban zəni: 2Simoŋ Piyer, Tomas məs adawyaŋ na meseŋge, Natanayel na Kana'an na Galile, kirtin Zebede gəm sula səret gewleɗ nan meɓɓet tahəŋ matakə. 3#LUK 5:5Simoŋ Piyer aɓsit na: Wanəmbat ərma kilfi. Aɓsənən na, nam pak waməl də isi. Ndəɗaŋ vit apeŋgeŋ addəv bəlay. Ya dəfəɗ nan dəpaska, zəga tay armaŋ ɓa. 4Adan bapummo agəɗə, Yesu aziwik ama busgum, ya gewleɗ dəsənən na Yesu yi ɓa. 5Yaŋ Yesu aɓsit na: Kirni mənokum tat də zəga nawzəm siɗikke ɓa sa? Azlan sənən na: Awwo. 6#LUK 5:6Aɓsit na məzgan zəva dəka dəzəŋ na bəlay wakərəhaŋ. Ndəɗaŋ firik əzgan kana, ya dəɓap əkdəhnən ɓa sən kilif tahəŋ diyɗa.
7Yaŋ gawla məs Yesu aŋgəl nak aɓsən Simoŋ Piyer kan na: Daya yi. Adan Simoŋ Piyer aprəm vaska, ndən lukut azan heri, vi zən mekeleŋgi, azlah aret iŋkile. 8Gewleɗ meɓɓet azzoŋguk də bəlay muzliya, vi kakdəh zəva məknəhən dit kilif naka adan faraɗaŋ sə mabuzgum ɓa, wagəɗ zəga na metər səkatə. 9Adan apurkoŋ afuŋgu, awlaŋgək slay offo ta' də kilif akani gəm mepteke. 10Yesu aɓsit na: Məki kilif məs kərmaŋ kakaŋ van siɗikke. 11Simoŋ Piyer peŋ kan addəv bəlay, akdəh zəva afuŋ, məknəhən dit kilfeŋge gugriɗ gugriɗ səkat də kaklaw sle kiyit hoku. Də assoŋ gbaskəska, zəva dəŋgar ɓa. 12Yesu aɓsit na: Məde məzəm waya. Tay dəda kiyən səret gewleɗ nan əssohon na: Nawa kənan di ɓa? Vi asənənək na Daya yi. 13Yesu payə, agəm mepteke, apsiti vas agəɗ dit kilfi'e. 14Təl mohokon yas Yesu arban zən azet gewleɗ nan səza asil sə waleŋgit ɗiy mimtiti.
Yesu də Piyer
15Dərɓaga azəmaŋ kana, Yesu aɓsən Simoŋ Piyer na: Simoŋ wətən Yohanna, kəŋgluwək dayki ɗiy eŋ sa? Aɓsən na: Daya kəsənəka nəŋglukuko. Yesu aɓsən na ateɗ kirtit timiŋgiɗ nawa. 16Yaŋ anah sən təl masula'ən, aɓsən na: Simoŋ wətən Yohanna, kəŋgluwək sa? Azlanəka: Kəsənəka nəŋglukuko. Yesu aɓsən na: Assok məzutaɗa net timeŋgiɗ nawa. 17Anah sən təl mohoko'ən əmpa, aɓsən na: Simoŋ wətən Yohanna, kəŋgluwək sa? Piyer asanək man ɓəɓiɓəɓi, vi anah sən təl mohoko'ən na: Kəŋgluwək sa? Azlan sənək na: Daya zəga pak nok kəsənəka, nok kəsənək na nəŋglukuko. Yesu aɓsən na: Ateɗ timeŋgiɗ nawa. 18Gesiŋ gesiŋ nedawnah suko: Aka kəsok gawla, is kədaynan dadakko, is əddok a təki kəŋgələ. Pay kədawgala, wakəppar voko, ɗəf maɓɓan naynan suk dadakko, wakuk a təki məs kəŋgəl kəta ɓa. 19Anah vasna vi karban na də əmta awani Piyer adawgagdakan Maŋgəlva di. Səza apel vaska aɓsən na azbawa.
Yesu də gawla məs aŋgələ
20 #
YOH 13:25
Piyer kpaŋgən harani, awla gawla məs Yesu aŋgəl nak əzzan dərɓagani, ndəni dəsan a maŋgava Yesu aka adawzəmaŋgə, assohõn na: Naway nawzəm kiyuk di naka? 21Adan Piyer awla, aɓsən Yesu na: Daya, na ɗəf aŋ mbari di? 22Yesu aɓsən na: An nəŋgələk dəsangən məza əmta ɓa hã pay gap əmilye naw na, mi nok di? Nok azbawa. 23Wən nan atrayək a waleŋgit məzutafaŋ na: Gawlas amtə na ɓa. Ya Yesu dənah sən na amtə na ɓa ɓa. Ya aɓsən na: An nəŋgələk dəsangən hã gap əmilye naw na, mi nok di?
24Gawla vanəski dəpel aket zəgeɗiski, dəvere, məsənək na əpel nan gesiŋgi.
25Yesu agəɗək wəzeɗe meɓɓet diyɗa. Va məverti taka taka na, in əɗɗumun na, mamba dələv wagəs natef ɗerewelɗe məverit veti.
Attualmente Selezionati:
Yohanna 21: GB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
All right reserved
