Wəza net Maslənɗe 3
3
Məmbəlgəni maŋgalɓaya
1Pay maɓɓani Piyer də Yohanna tay əpeŋgeŋ addəv Gəla na Maŋgəlva vi kakkam na pay vuroku. 2Ɗəf tay adak muwan maŋgalɓaya, adawkiyaŋ əɗiyən pay pak a maddamba na Gəla na Maŋgəlva məs adawyaŋ na maddamba moggoni, vi dəŋgəlgən zəga avet ɗiy dədawtoŋgoŋ addəv Gəla na Maŋgəlva. 3Adan awle mãy Piyer də Yohanna ədda ətoŋgoŋ addəv Gəla na Maŋgəlva, aŋgələk zəga aveti. 4Piyer də Yohanna aziyənək heret akani, Piyer aɓsən na: Awləm ɗa. 5Maŋgalɓaya awlek lewlewi, azan na wapsənən zəga. 6Piyer aɓsən na: təbəz babara mãy meleŋge tay avaw ɓa, an navaw na, ndən nədapsuko, də iya na Yesu Kristu mə Nazaret asil adawə. 7Yaŋ arma van dəzəŋ, ndən le'gəni, tələn də hara tələn arahək gbogboŋ ləŋgə. 8Ndən hõs ziw, ədawa, yaŋ atoŋ dənɗaŋ addəv Gəla na Maŋgəlva, də ədawa, də əpepɗeke gəm əgagdakan Maŋgəlva. 9Ɗiy pak awlanənək də ədawa gəm əgagdakan Maŋgəlva. 10Asənənək na ndəni məzəŋgla məzusan a maddamba moggon na Gəla na Maŋgəlva naka, aggətaŋka, attapaŋgək aka an dəgəɗ akani.
Əpel na Piyer addəv Gəla na Maŋgəlva
11Ɗəf nak dəŋgəm əzar səza Piyer də Yohanna ɓa, ɗiy pak anzoŋguk gidigidi əzza azeti ammba balak məs adawyaŋ na balak na Salmoŋ, aggətaŋgək sawɓa. 12Adan Piyer awla vaska, apelik abet ɗiyi: Munokum mə Israyel, vimi kədaggətaŋ aka an dəgəɗəŋ di? Vimi kədawləmən vakəmna mənamtə də gbogboŋ namə awaniɓa də geslne' nam sən Maŋgəlva mədawgəni di? 13#ƏGI 3:15Maŋgəlva na Abraham, na Isak, na Yakob, Maŋgəlva net efiŋgiɗim agagdakanək gawla nan Yesu məs nokum kəppanəni, kəɓoŋgoŋ dawsənən aba Pilat, də aŋgəl nappan zlaŋ. 14#MAT 27:15-23; MAR 15:6-14; LUK 23:13-23; YOH 19:12-15Nokum kəzganənək ɗəf an salala məs təstəsə, yaŋ kəssohoŋ mbəlembəle sən ɗəf məbay gəbaya. 15Məs dətəŋ zeŋgile kəbayaŋgəŋka Maŋgəlva asilgənək səka əmta, miziweɗe nan mənani. 16Dəka ətaf iya nani, iya vanəs asɓan ɗəfəŋ məs kədawlaŋgə, kəsənaŋgəŋka, ətaf məs dəde səza Yesu apsənək pepet na gəɓa zən va lahəŋ ama horokum pakgukum.
17Kakaŋ na, milmiŋgiɗwa, nəsənək na, dəka kəsənən ɓay kəɗɗaŋ va net deyeɗe nokum'e. 18Vaski Maŋgəlva aɗɗa an məs arban far də met məskəleŋɗe na, Kristu nan wazəm sahã. 19Məɗi marava kana məkkpaŋgə, vi mambrayɗe nokum dəvvuyoŋgəni. 20Ka pay nalhəɗan mokrokum dədegin səza Daya gəm dəslən sukumgən məs məwelin farə, ana Yesu Kristu. 21Ndəni məs disiŋ adawtaf hã gap pay nawzaɓan zəga pak məs Maŋgəlva apel də met məskəleŋɗe salala nan lahəŋka. 22#ƏMS 18:15,18Moyis anahək na: Daya Maŋgəlva nokum waslən sukum, məskəleŋ va in sə weleŋgit milmiŋgiɗkum. Kəprəməngən mani aka an məs adawnah sukum pakə. 23#ƏMS 18:19Ɗəf an məs dəprəm ma məskəleŋgəs ɓa pak, kawzani səret ɗiyi. 24Məskəleŋɗe pak təŋ səza Samiyel dit en dəgəmnən gəlan apeleŋke, arbanənək pay an məs məsam kakaŋka. 25#VAA 22:18Nokum, mənokumtə kirtit məskəleŋɗe gəm kirtin wənmiyna an Maŋgəlva aziwgin dit efiŋgiɗkum gala anah sən Abraham na: Də mazlalwok ɗiy naka dələv pak adawrahaŋ əzaɓa. 26Sukumi daabəŋ Maŋgəlva asilgin gawla nani, aslən vi kawzaɓokum də ətak ma naway di sərokum pak səka əɗɗum mbərayəŋ.
Attualmente Selezionati:
Wəza net Maslənɗe 3: GB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
All right reserved
