དང་པ་ཀོ་རིན་ཐི། 7
7
གཉེན་ག་ཀོར་གེ།
1ཉི་ཨོམ་ ན་ཤི་ ན་ཧ་ཡི་གུ་ནང་ཀ་འབྲི་ཁཱན་ག་ ལན་བིན༌ཅ། དེན་མེ་ གཉེན་མ་ཕི་ལཱན་ཆོ་ནེ་ལ་ ལེག་པུ་གི༌ལ། 2དག་པ་ཀབ་ཉི་ ལུས་འབྲེལ་མ་ཙང་མ་ མང་པུ་ཆོ་ཝ་ཨ་དེན་གེ་ ཕེ་ཝག་ཙ་ཐམས་ཅན་ག་ རོག་ཏེན་ག་ མེ་ཝག་ཙ་ཐུར་རེ་རེ་དང་ མེ་ཝག་ཙ་ཐམས་ཅན་ག་ རོག་ཏེན་ག་ ཕེ་ཝག་ཙ་ཐུར་རེ་རེ་ ཨོ་ཕེ་ཁེ༌ལེ།
3རོ་ཀ་མེ་ཝག་ཙ་གི་ ཚཱས་ཁཱན་ཁེ་པ་ ཕེ་ཝག་ཙ་གི་བི་ལེ་ཁེ༌ལེ། ཉི་ཨུ་ཉུ་པུརུས་ཀིན་ཨ་ཉི་ རོ་ཀ་ཕེ་ཝག་ཙ་གི་ ཚཱས་ཁཱན་ཁེ་པ་ མེ་ཝག་ཙ་གི་བུ་ བི་ལེ་ཁེ༌ལེ། 4མེ་ཝག་ཙ་གི་ རོག་ཏེན་ག་ལུས་པུ་ རོ་ཀ་ཕེ་ཝག་ཙ་ག་ དབང་ཚད་ཕརའ་ཁེ་ཙུག༌ཅ། ཨུ་ཉུ་པུརུས་ཀིན་ཨ་ཉི་ ཕེ་ཝག་ཙ་གི་ རོག་ཏེན་ག་ལུས་པུ་ རོ་ཀ་མེ་ཝག་ཙ་ག་ དབང་ཚད་ཕརའ་ཁེ་ཙུག༌ཅ།
5ཨོ་ཉི་ཨ་དེན་གེ་ ཕེ་ཝག་ཙ་དང་ མེ་ཝག་ཙ་ག་བར་ཀ་ ཐུར་གི་ཐུར་ཀབ་ཉི་ མ་ན་ཝ་ཨ་ལེ་མང་ཕ། དག་པ་ཀབ་ཉི་ སྨོན་ལམ་ཏབ་ཉི་ཆོ་ལེ་དག་ཉི་ རོག་ཉིག་ཙིང་ག་བར་ཀ་ ཏུན་ཆ་དྲིག་པ་ཆོ་ནེ་ལ་ ཨོ་ཉ་དུས་ཙུན་ག་དེན་གེ་ ཏ་ཀ་མཱན༌ཅ། རང་ཏེན་གི་ ཐེས་པེ་མར་བ་ཨ་དེན་གེ་ སེ་ཏཱན་གི་ བར་ཆད་མ་ཕ་ལེ་དེན་གེ་ རོག་ཉིག་ཙིང་ ལོག་ཉི་རང་ཏབ་ཐུར་ ཛོ་མེ་ཁེ༌ལེ། 6ཨོ་ཐ་ཆཱས་ཁེ་པ་ ན་ཤི་ཨ་ལེ་རང་ཁེ་ལེ་ཨ་ཉི་ བཀའ་བིན་ཅ་མང་གི། དག་པ་ཀབ་ཉི་ ཨོ་ཐེན་ཨ་ལེ་ཆོག་པེ་དག་ཉི་ ཡེག་ཅ་གི༌ལ། 7མ་པ་ཏ་ ཐམས་ཅན་རང་ ཇང་ད་བུ་ཆོ་ཝ་གི་ནེ་ལ་ དྲིག་པེ་ཆོ་ཝ་དག་ཉི་ ཇི་གི་མིན༌ཅ། དག་པ་ཀབ་ཉི་ སོ་ངོ་ཐམས་ཅན་གི་ དཀོན་མཆོག་གེ་ རང་རང་ས་ སེ་རབ་ཉོང་པ༌ཅ། ཐུར་གི་ ཨོ་ཐ་སེ་རབ་ ཉོང༌ཅ། ཉི་ཨོམ་ཐུར་གི་ བཱརའ་སེ་རབ་ཉོང༌ཅ།
8ཉི་ཨོམ་ ཇི་གི་གཉེན་མ་ཕི་ཁཱན་བ་དང་ མོ་རེན་མ་བ་ཀ་དེན་གེ་ཡེག་ཅ་ ན་ཧ་བ་བུ་ ཇང་པུརུས་ཀིན་ཨ་ཉི་ གཉེན་མ་ཕི་ལཱན་ཆོ་ཝ་དྲག༌པེ། 9དག་པ་ཀབ་ཉི་ རོག་ཏེ་བ་ཀི་ ཐེས་པེ་མར་ནེ་ལ་ གཉེན་ཕི་ཝ་དྲག༌པེ། འདོད་ཆགས་ཨ་ཉི་ཞུམ་པ་གེ་ཏ་ གཉེན་ཕི་ཝ་དྲག༌པེ།
10ཉི་ཨོམ་ གཉེན་ཕི་ཁཱན་བ་ཀ་དེན་གེ་ ཇི་གི་བཀའ་བིན་ཅ་ ཉི་ཨོ་ཐ་བཀའ་ཁེ་པ་ ཇང་གེ་མང་གི་ཝ་ གཙོ་བོ་གེ་གི༌ལ། མེ་ཝག་ཙ་གི་ རོ་ཀ་ཕེ་ཝག་ཙ་གེ་ ཁ་བེརེ་བེ་མང་ཕ། 11དག་པ་ཀབ་ཉི་ རོ་ཀི་ ཁ་བེརེ་བ་ད་བུ་ཨ་ནེ་ལ་ རོག་ལོག་ཉི་ ཧ་ལ་རང་གཉེན་མ་ཕི་ལཱན་ ཆོ་ལེ་ཁེ༌ལེ། ཨུ་ཉུ་མ་ནེ་ལ་ ལོག་ཉི་རང་ རོ་ཀ་ཕེ་ཝག་ཙ་ཀབ་ཉི་ ཆ་མེ་ཁེ༌ལེ། ཉི་ཕེ་ཝག་ཙ་གི་བུ་ རོ་ཀ་མེ་ཝག་ཙ་ཀབ་ཉི་ ཁ་བེརེ་བེ་མང་ཕ།
12ཉི་བཱརའ་བ་ཀ་ཏཱན་ ཇི་གི་ཨོ་ཐ་ཆཱས་ཡེག༌ཅ། (གཙོ་བོ་གི་གསུངས་མ་མང་གི།) ཡི་ཤུ་པ་ཟ་ཐུར་ག་ དད་པ་མ་ཨ་ཁཱན་ མེ་ཝག་ཙ་ཏེ་ཆོ་ནེ་ལ་ མེ་ཝག་ཙ་གི་ རོག་ཀབ་ཉི་རང་ཆོ་ལེ་ག་ སེམས་ཨ་ནེ་ལ་ རོ་ཀི་རོག་ཀབ་ཉི་ ཁ་བེརེ་བེ་མང་ཕ། 13ཨུ་ཉུ་པུརུས་ཀིན་ཨ་ཉི་ ཡི་ཤུ་པ་ཟ་མིན་ཐུར་ག་ དད་པ་མ་ཨ་ཁཱན་ ཕེ་ཝག་ཙ་ཆོ་ནེ་ལ་ ཕེ་ཝག་ཙ་གི་ རོག་ཀབ་ཉི་རང་ཆོ་ལེ་ག་ སེམས་ཨ་ནེ་ལ་ རོ་ཀི་རོག་ཀབ་ཉི་ ཁ་བེརེ་བེ་མང་ཕ། 14ཧང་ཡ་དག་ནེ་ལ་ དད་པ་མ་ཨ་ཁཱན་ ཕེ་ཝག་ཙ་ཁེ་པ་ དད་པ་ཨ་ཁཱན་ རོ་ཀ་མེ་ཝག་ཙ་ག་ཐུང་ཀེ་ཨ་ཉི་ ཙང་མ་རི་ཝ༌ཅ། ཉི་དད་པ་མ་ཨ་ཁཱན་ མེ་ཝག་ཙ་བུ་ དད་པ་ཨ་ཁཱན་ རོ་ཀ་ཕེ་ཝག་ཙ་ག་ཐུང་ཀེ་ཨ་ཉི་ ཙང་མ་རི་ཝ༌ཅ། ཨུ་ཉུ་མ་ནེ་ཏ་ རོག་ཏེ་བ་ཀ་ཝག་ཙ་བ་ མ་ཙང་མ་རི་ལེ་ཆོ༌ཝ། དག་པ་ཀབ་ཉི་ རོག་ཏེ་བ་ དཀོན་མཆོག་ག་ཐུགས་ཀ་ཚུད་པ་རི་ཝ༌ཅ། 15དག་པ་ཀབ་ཉི་ དད་པ་མ་ཨ་ཁཱན་ ཕེ་ཝག་ཙ་གི་ཨ་ནེ་བུ་ མེ་ཝག་ཙ་གི་ཨ་ནེ་བུ་ ཏབ་ཐུར་ཆོ་ལེ་མར་བ་དག་ཉི་ ཡེག་ཉི་རང་ཆོ་ནེ་ལ་ རོག་ཏེ་བ་ ཁ་བེརེ་ཉི་དི་ལེ་བི། ཨུ་ཉུ་ད་བུ་ཇུང་ནེ་ལ་ དད་པ་ཨ་ཁཱན་ཕེ་ཝག་ཙ་དང་ དད་པ་ཨ་ཁཱན་མེ་ཝག་ཙ་གི་ ཁ་མ་བེརེ་བཱན་རང་ ཆོ་ལེ་ཁེ་ལེ་ཨ་ཉི་མཱན༌ཅ། ཧང་ཡ་དག་ནེ་ལ་ དཀོན་མཆོག་གི་ ཨའི་ཤོ་ སྐྱིད་པུ་ཨ་ཉི་ཆོ་ལེ་དེན་གེ་ ར་ཝ་གི༌ལ། 16མེ་ཝག་ཙ་བ་ ན་ཤི་ ན་ཧ་ཕེ་ཝག་ཙ་ག་ སྐྱབས་ཨ་ལེ་རིག་པེ་མར་བ་དག་ཉི་ ཧང་ཏེན་སེན་ཅ་ཡ། ཕེ་ཝག་ཙ་བ་ ན་ཤི་ ན་ཧ་མེ་ཝག་ཙ་ག་ སྐྱབས་ཨ་ལེ་རིག་པེ་མར་བ་དག་ཉི་ ཧང་ཏེན་སེན་ཅ་ཡ།
17ཨི་བི་གི་རང་གི་ནེ་བུ་ དཀོན་མཆོག་གི་ རོག་ར་ལེ་གང་ཀ་ གཙོ་བོ་གི་ རོ་ཀ་གནང་མ་དང་ཏུ་ཉི་ ཨ་ཉི་རང་ཆོ་ལེ་ཁེ༌ལེ། ཆོས་ཚོགས་ ཐམས་ཅན་ག་དེན་གེ་ ཨུ་ཐུ་ཤོ་ ཇ་ག་ཁྲིམས་ལུགས་གི༌ལ། 18དད་པ་ཨ་ཁཱན་ མ་རི་ལེ་གོ་མ་རང་ ཤ་ཅཱད་ཁཱན་ སོ་ངོ་ཏེ་ཆོ་ནེ་ལ་ ཨོ་ཉ་སོ་ངོ་གི་ ཤ་ཅཱད་ཁཱན་ག་མེར་དི་ མ་ཝ་ཅོད་པེ་མང་ཕ། ཉི་ཤ་མ་ཅཱད་ཁཱན་ སོ་ངོ་ཁེ་པ་ དད་པ་ཨ་ཁཱན་རི་ནེ་ལ་ ཨོ་ཉ་སོ་ངོ་གི་ ཤ་ཅཱད་པེ་མ་ཁེ༌ལ། 19ཤ་ཅཱད་ནེ་བུ་ མ་ཅཱད་ནེ་བུ་ ཁག་ཆི་ལུ་མང་གི། དག་པ་ཀབ་ཉི་ དཀོན་མཆོག་ག་ བཀའ་འགྲུབ་ཕེ་ག་ཤོ་ ཁག་ཆི་ལུ་གི༌ལ།
20ནའི་ ཧང་ད་བུ་ཨ་ཉི་ཆོ་ལེ་གང་ཀ་ དཀོན་མཆོག་གི་ ར་ཝ་གི་ལ་སྨོ་ ཨུ་ཉུ་ད་བུ་ཨ་ཉི་རང་ ཆོ་ལེ་ཁེ༌ལེ། 21ནའི་ ཟ་པ་ཨ་ཉི་ཆོ་ལེ་གང་ཀ་ དཀོན་མཆོག་གི་ར་ཝ་སྨོ། ཨུ་ཉུ་བུ་ ཏ་ཀ་ཧང་རང་མཱན༌ཅ། དག་པ་ཀབ་ཉི་ ཟ་པ་གེ་ཤོ་ལེ་ག་ གོ་སྐབས་ཉོང་ནེ་ལ་ ཤོ་ལེ་གོད་པེ་ཁེ༌ལེ། 22ཟ་པ་ཨ་ཉི་ཆོ་ལེ་གང་ཀ་ གཙོ་བོ་གི་ར་ཝ་གི་ནེ་ལ་ གཙོ་བོ་གི་ རོག་ཏེ་བ་ཀ་ ཁིརིས་གེ་ཨ་ཉི་ ཚེ་ཐར་གནང་མ༌ཅ། ཉི་ཨུ་ཉུ་པུརུས་ཀིན་ཨ་ཉི་ གཙོ་བོ་གི་ར་ལེ་གང་ཀ་ ཟ་པ་ཨ་ཉི་མ་ཆོ་ཁཱན་བ་བུ་ ཁིརིས་ག་ ཟ་པ་རི་ཝ་གི༌ལ། 23ན་ཧ་བ་ཤོ་ ངེ་ལོང་ཏབ་ཉི་ ངོ་ཝ་ཨ་དེན་གེ་ སོ་ངོ་ག་ཟ་པ་མ་རི། 24ཨོ་ཉི་ཨ་དེན་གེ་ ཇ་ག་ཡུང་ཟི་བ་ ན་ཧ་བ་ ཧང་ད་བུ་ཨ་ཉི་ཆོ་ལེ་གང་ཀ་ དཀོན་མཆོག་གི་ ར་ཝ་གི་ལ་སྨོ་ ཨོ་ཉ་ནང་ཀ་རང་ དཀོན་མཆོག་ཀབ་ཉི་ ཆོས་གྲོགས་ཨ་ཉི་ ཆོ་ལེ་ཁེ༌ལེ།
25ཉི་ཨོམ་ གཉེན་མ་ཕི་ཁཱན་བ་ཀ་དེན་གེ་ ཇི་གི་གཙོ་བོ་ག་མཚན་ག་ བཀའ་བི་ལེ་ག་ ཧང་རང་མཱན༌ཅ། དག་པ་ཀབ་ཉི་ གཙོ་བོ་ག་ ཐུགས་རྗེ་ག་ཐུང་ཀེ་ཨ་ཉི་ དམ་ཚིག་ཙུང་ཁཱན་ ཙི་ཝ་ཨ་དེན་གེ་ ཇི་གི་མི་ཁཱན་ཁེ་པ་ ན་ཧ་ཡེག༌པེ། 26ཨོ་མ་ག་དུས་ཀ་ལུ་ག་གོད་ནེ་ལ་ ན་ཧ་བ་ ཧང་ད་བུ་ཅ་གི་ལ་སྨོ་ ཨུ་ཉུ་པུརུས་ཀིན་ཨ་ཉི་རང་ཆོ་ནེ་ལ་ དྲག་པེ་ལ་དག་ཉི་མིན༌ཅ། 27ན་ཧ་བ་གཉེན་ཕི་ཝ་ཆོ་ནེ་ལ་ ཁ་བེརེ་བེ་མ་གོད༌ཅོ། ན་ཧ་བ་ གཉེན་མ་ཕི་ཝ་ཆོ་ནེ་ལ་ མེ་ཝག་ཙ་ལ་མེ་མ་གོད༌ཅོ། 28དག་པ་ཀབ་ཉི་ ན་ཤི་གཉེན་ཕི་ནེ་ལ་ སྡིག་པ་ཨན་ཅ་མང་གི། ཉི་མེ་ཝག་ཙ་ཡོན་མ་གི་ གཉེན་ཕི་ནེ་བུ་ ཨུ་ཉུ་ཤོ་ སྡིག་པ་མང་གི། དག་པ་ཀབ་ཉི་ གཉེན་ཕི་ཝ་ད་བུ་ཨ་ནེ་ལ་ ཏབ་མ་ཉམ་པ་མང་པུ་ཤོ༌ལེ། ཉི་ཇི་གི་ན་ཧ་བ་ ཨོ་ཉ་གེ་སྐྱབས་ཨ་ལེ་གོད༌ཅ།
29ཡུང་ཟི་བ་ ཇི་གི་ཡེག་པེ་དེན་ཐ་ཤོ་ དུས་ཙུན་གནམ་མེད་ས་མེད་ ཉུང་པུ་ཤ༌ཅ། ཨོ་ཐ་གེ་ག་ཏཱན་ མེ་ཝག་ཙ་ཆོ་ཁཱན་བ་ཀི་ མེ་ཝག་ཙ་མ་ཝ་ད་བུ་ཨ་ཉི་ ཆོ་ལེ་ཁེ༌ལེ། 30ཉི་གེབ་ཁཱན་བ་ཀི་ མ་གེ་ཕ་ད་བུ་ཨ་ཉི་དང་ ཤོ་ནང་ཕེ་ཁཱན་བ་ཀི་ ཤོ་ནང་མ་ཕེ་ཝ་ད་བུ་ཨ་ཉི་ ཉི་གེ་ ངོ་ཁཱན་བ་ཀི་བུ་ རོག་ཏེ་བ་ཀ་ རྒྱུ་མ་ཝ་ད་བུ་ཨ་ཉི་ ཆོ་ལེ་ཁེ༌ལེ། 31འཛམ་གླིང་ག་རྒྱུ་ཅ་ལ་ཐོབ་ཁཱན་བ་ ཨོ་ཉ་རྒྱུ་ཅ་ལ་ག་ བག་ཆགས་མ་ཨ་ལཱན་ ཆོ་ལེ་ཁེ༌ལེ། ཧང་ཡ་དག་ནེ་ལ་ ཨོ་ཐ་འཛམ་གླིང་ཁེ་པ་ ཨོ་མ་ཆོ་ཝ་པུརུས་ཀིན་ཨ་ཉི་ ཡུན་ཐ་རིང་མུ་མ་ཆོ༌ལ།
32ཇི་གི་ཨ་ནེ་ལ་ ན་ཧ་བ་ སྡུག་བསྔལ་མ་ཨ་ཝ་ཨ་ཉི་ ཆོ་ཝ་དྲག༌པེ། གཉེན་མ་ཕི་ཁཱན་སོ་ངོ་གི་ གཙོ་བོ་ག་ཕྱག་ལཱ་ག་ཀོར་གེ་ སྡུག་བསྔལ་ཨ༌ལེ། གཙོ་བོ་ ཧང་ཏེན་ཐུགས་བཞེས་ཝ་ ཅོད་པེ་ཡ་དག་ཉི་མི༌ལེ། 33དག་པ་ཀབ་ཉི་ གཉེན་ཕི་ཁཱན་ཕེ་ཝག་ཙ་གི་ འཛམ་གླིང་ག་ཅ་ལ་ཀོར་གེ་ སྡུག་བསྔལ་ཨ་ཉི་ རོ་ཀི་རོ་ཀ་མེ་ཝག་ཙ་ ཧང་ཏེན་ཨ་ཉི་ ཤོ་ནང་ཕེ་ཝ་ ཅོད་པེ་ཡ་དག་ཉི་མི༌ལེ། 34རོ་ཀ་སེམས་ཉིག་ཙིང་ཨོ་ཕེ། ཉི་གཉེན་མ་ཕི་ཁཱན་ མེ་ཝག་ཙ་དང་ ཟ་མིན་ཙང་མ་བ་ཀི་བུ་ གཙོ་བོ་ག་ཕྱག་ལཱ་ག་ཀོར་གེ་ སྡུག་བསྔལ་ཨ༌ལེ། ཉི་རོ་ཀི་ རོ་ཀ་ལུས་པུ་དང་ རྣམ་ཤེས་ཉིག་ཙིང་གི་རང་ གཙོ་བོ་ག་ ཕྱག་ཞུ་ལེ་གོད༌པེ། དག་པ་ཀབ་ཉི་ གཉེན་ཕི་ཁཱན་ མེ་ཝག་ཙ་གི་ འཛམ་གླིང་ག་ཅ་ལ་ཀོར་གེ་ སྡུག་བསྔལ་ཨ་ཉི་ རོ་ཀི་ རོ་ཀ་ཕེ་ཝག་ཙ་ ཧང་ཏེན་ཤོ་ནང་ཕེ་ཝ་ ཅོད་པེ་ཡ་དག་ཉི་མི༌ལེ། 35ན་ཧ་བ་ ཁག་པེ་དེན་གེ་མང་གི་ཝ་ ན་ཧ་ཕཱན་མེ་དེན་གེ་ ཇི་གི་ཨོ་ཐ་ཆཱས་ཡེག་ཅ་གི༌ལ། ན་ཧ་སེམས་ཉིག་ཙིང་མ་ཨ་ལཱན་ ལེག་པུ་ཨ་ཉི་ གཙོ་བོ་ག་ ཕྱག་ཞུ་ལེ་རེ་ཆེན་དག་པ་གི་གི༌ལ།
36ཨི་བི་གི་རང་གི་ནེ་བུ་ རོ་ཀ་དེན་གེ་ཕུན་ཁཱན་ ཟ་མིན་ཀབ་ཉི་ ལེག་པུ་ཨ་ཉི་ཆོ་ལེ་ མར་བེ་ད་བུ་ཐོང་ནེ་ལ་ རོ་ཀི་ཨོ་ཉ་ཟ་མིན་ཀབ་ཉི་ གཉེན་ཕི་ལེ་ཁེ༌ལེ། ཨུ་ཉུ་ཤོ་ སྡིག་པ་མང་གི། 37དག་པ་ཀབ་ཉི་ རོ་ཀི་ཐ་ཆེ་རང་ གཉེན་མ་ཕི་ལ་དག་ཉི་ མི་ཝ་ཆོ་ནེ་ལ་ ཉི་ཚབ་ཚབ་མ་ཨ་ལཱན་ རོ་ཀི་ཐེས་ཉི་ཆོ་ལེ་རེ་ནེ་ལ་ ཨུ་ཉུ་བུ་ལེག་པུ་གི༌ལ། 38ཨོ་ཉི་ཨ་དེན་གེ་ ཨི་བི་གི་ གཉེན་ཕི་ཝ་ཐུར་ལེག་པུ་གི༌ལ། དག་པ་ཀབ་ཉི་ ཨི་བི་གི་ གཉེན་མ་ཕི་ལཱན་ཆོ་ཝ་ཐུར་ ཨུ་ཉུ་ཏ་ ལག་ཏང་ལེག་པུ་གི༌ལ།
39ཕེ་ཝག་ཙ་མ་ཤི་ཝ་སག་པུ་ མེ་ཝག་ཙ་ཤོ་ རོག་ཀབ་ཉི་རང་ ཆོ་ལེ་ཁེ༌ལེ། དག་པ་ཀབ་ཉི་ ཕེ་ཝག་ཙ་ ཤི་ཝ་ད་བུ་ཨ་ནེ་ལ་ རོ་ཀི་ཨི་བི་ཀབ་ཉི་ སེམས་ཨ་ཝ་ཐུར་ གཉེན་ཕི་ལེ་ཆོག༌པེ། ཨོ་ཉེ་རང་གི་ནེ་བུ་ ཨོ་ཉ་ཟ་ཁེ་པ་ གཙོ་བོ་ག་དད་པ་ཨ་ཁཱན་ ཨོ་ཕེ་ཁེ༌ལེ། 40ཇ་ག་སེམས་ཀི་ཨ་ནེ་ལ་ ཨོ་ཉ་མོ་རེན་མ་གི་ ཨོམ་ཆང་རང་ གཉེན་མ་ཕི་ལཱན་ཆོ་ནེ་ལ་ རོག་ལག་ཏང་ ཤོ་ནང་ཕེ་ཉི་ཆོ་ལེ་རེ༌བེ། ཇི་གི་ཨོ་ཐ་ཆཱས་ ཡེག་ཅ་ཨ་ཉི་ དཀོན་མཆོག་ག་ཐུགས་ཉིད་ ཇང་ཀབ་ཉི་བཞུགས་པ་ཅ་དག་ཉི་ ཇི་གི་མིན༌ཅ༎
Attualmente Selezionati:
དང་པ་ཀོ་རིན་ཐི། 7: TNTB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshangla New Testament
© 2023, The Bible Society of India
all rights reserved