ÂTHAONA 8
8
Tipaua chhâna
1Châhrasala Khazohpa ta Nôah nata balyh liata a hnohta a ypa hmohrohneipa to nata sahroh zydua cha a thei thlâh ha ta. Chatanachata Khazohpa ta alei chô liata thlih pathlisa ta, tizy cha a sy pathao ei ta. 2Ti athupa hnawhzy nata avâ opyzy khawpa châ ta, avâ cha a vaw hia ha ta. 3Tizy alei chô tawhta a sy ta, a sy via lymâ ta, noh 150 chhâna liata cha tizy cha amâ sy khai haw. 4Chatanachata balyh cha thla sarina, noh hrawh hleisarina noh liata, Ararâ tlâhpi chô liata a chahâ ta. 5Tizy cha thla hrawhna taihta a sy lymâ ta. Thla hrawhna, noh khana liata, tlâh lakizy a lâ pathao ta.
6Noh sypalih chhâna liata Nôah ta balyh opy a taopa cha pahy ta. 7Raawh pazawsa ta, alei tawhta tizy â sy khai hlâlei cha, a zaw heih, vaw kua heih tah ngâ thlah ha ta. 8Alei chô tawhta tizy â sy khai nata sy khai lei pahno nawpa ta vachhuh pazawsa heih ta. 9Alei chô zydua ti ta a vao thlâh ha chypa vâta, vachhuh cha a phei a choh nawpa rai hmô leipa ta, Nôah yna balyh lâ vaw kua ta, Nôah ta a ku pazawhpa ta vachhuh cha la ta, a hnohta balyh chhôh lâ â ngiakhei haw. 10Noh sari chhôh hâ via heih ta, vachhuh cha balyh tawhta pazawsa heih ta. 11Vachhuh cha zâlâ ta Nôah lâ a vaw di ta, ôli hna lyu thiehpa a hmao ta a vaw pu ta. Chatanachata Nôah cha alei chô tawhta tizy â sy haw tahpa pahno ta. 12Noh sari hropa hâ via heih ta, vachhuh cha pazawsa heih ta, ano lâ vaw kua khao vei.
13Nôah hrona kô za charu nata kô khana, thla khana, noh khana noh liata, tizy cha alei tawhta a kua khai haw. Nôah ta balyh khuna hlai ta, mohmia pasaih ta, alei cha a hi hapa ta hmô ta. 14Thla nona, noh kih nata noh sarina noh liata, alei cha hi khai ha ta. 15Khazohpa ta Nôah hnohta, 16“Balyh tawhta pua la, na lapinô, na sawchapawzy nata na sawchapaw lapinôzy chhao na hnohta pua mawh ei sy. 17Na hnohta a ypa hmohrohneipa zydua, hrona a hneipa maih, pavawzy, sazy nata alyhpasa chi to alei chô liata bie ei sala, chi pathlapa ta, alei chô liata ama pôh thei nawpa ta, na hnohta puakhei khai mah y,” tah ta. 18Chatanachata Nôah cha pua ta, a sawchapawzy nata a lapinô nata a sawchapaw lapinôzy chhao a hnohta pua hra ei ta. 19Sa to, alyhpasa to, pavaw chi to nata alei chô liata â pielyu theipa maih, a chi chi ta balyh tawhta pua lymâ ei ta.
Nôah hnohta Khazohpa biehrai
20Nôah ta Abeipa lâta maisâh tao ta, sa pathaihpa nata pavaw pathaihpa chi to hry tawhta sa nata pavawzy la ta, maisâh liata raopa hlânazy hlâ ta. 21Abeipa ta ropahâhpa cha a thei nahta, Abeipa ta a palôh ta, “Alei he chyhsapa vâta chhiesa heih khao aw va na, chyhsapa palôrupa phaozie cha a hawti no tawhta moleipa châ tlôh ta. Tahmâ ta ei hriepa hawhna heta, hmohrohneipa to hrie heih khao aw va na.
22“Alei y chhôh zydua cha,
Tu daihti nata hria daihti zy,
Chasipaw nata nopi zy,
Sao nata chhiah zy,
Chhô nata zâ zy,
Lei aw vei,” tah ta.
Attualmente Selezionati:
ÂTHAONA 8: MARVBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The Bible Society of India
© 2023, Used by permission. All rights reserved.
