ÂTHAONA 7
7
Tipaua
1Chatawhcha Abeipa ta Nôah hnohta, “Nâma nata na chhôhkha zydua balyh liata a ngia teh u. He chhâ liata nâma deita he ei hmiakô liata chyhsa siapa a y chhôhpa na châ. 2Alei chô liata ama chi â zao thei nawpa ta, sa pathaihpa chi to hry tawhta a chapawpa nata a chanôpa bao sari chyu a ngiakhei la, sa pathaih leipa hry tawhta a chapawpa nata a chanôpa bao kha chyu a ngiakhei hra la, 3avâ liata pavaw chi to hry tawhta a chapawpa nata a chanôpa bao sari chyu a ngiakhei mah y. 4Noh sari khai tawhta alei chô liata noh sypalih nata zâ sypalih chhôh avâ pasuasa aw na ta, chatanachata hmohrohneipa ei taopa zydua alei chô tawhta ei pahleipadia khai ha aw,” tah ta. 5Nôah cha Abeipa ta bie a piepa zydua tao ta.
6Alei chô liata tipaua a vaw tlô nota, Nôah cha kô 600 uhtheipa a châ. 7#Mat 24.38,39; Lka 17.27Tipaua a vaw tlô awpa vâta Nôah cha a lapinô, a sawchapawzy nata ama lapinôzy chhaota balyh chhôh lâ a ngia ta. 8Sa pathaihpa chi to, sa pathaih leipa chi to, pavaw chi to nata alyhpasa chi to cha, a chapawpa nata a chanôpa a bao bao ta Khazohpa biepiepa hawhta, 9Nôah hnohta balyh chhôh lâ a ngia ei ta. 10Noh sari khai tawhta alei chô liata tipaua vaw tlô ta. 11#2 Pit 3.6Nôah hrona kô 600 a tloh kô, thla nona, noh hrawh hleisari noh, cha noh ta,
Ti a thu ngaitapa hnawh zydua kaw pali ta,
Avâ opy zydua â pahy khai haw.
12Noh sypalih nata zâ sypalih chhôh alei chô liata avâ suah ta. 13Cha noh lia tlai ta Nôah nata a lapinô, a sawchapaw pathôh Semâ, Hamâ nata Zaphethâ nata ama lapinôzy cha balyh chhôh lâ a ngia ei ta. 14Ama hnohta râhsa chi to, osa chi to, alei liata alyhpasa chi to, pavaw chi to, mathlaw hneipa chi to balyh lâ a ngia hra ei ta. 15Hrona hu a hneipa hmohrohneipa maihta a bao bao ta Nôah lâ a vy ei ta balyh lâ amâ ngia lymâ. 16Khazohpa ta bie a piepa hawhta, sa to tawhta a chapawpa nata a chanôpazy cha balyh chhôh lâ a ngia khai ei ta. Cha khai tawhta Abeipa ta Nôah cha khawhlôh ha ta.
17Noh sypalih chhôh alei chô liata tipaua tlô ta. Ti cha lai via lymâ ta, balyh cha alei tawhta chalopa ta ti chô liata a pho ta. 18Ti cha a sâh lymâ ta, alei chô liata thata lai ta, balyh cha ti chô liata a pho lymâ ta. 19Alei chô liata ti cha thata lai ta, avâ ry liata su to liata tlâh sâhpa zydua a vao khai haw. 20Tlâh sâhpazy cha ti laipa ta dy hrawh hleipangawh tlai ta a vao ha ei. 21Alei chô liata husona a hneipa to zydua thi khai ei ta, pavawzy, sahrohzy, râhsazy, alei chô liata hmotaopa to nata chyhsa zydua chhao ama thi khai haw. 22Alei chô liata pahrâpa, hnapasu liata husona hneipa maih ama thi khai haw. 23Alei chô liata hrona a hneipa zydua pamua khaipa châ ei ta, chyhsazy, sazy, âlyhpasazy nata avâ liata pavawzy alei chô tawhta pamua khaipa ama châ. Nôah nata a hnohta balyh liata a ypazy deita amâ boh. 24Chatanachata alei cha noh 150 chhôh tipaua ta vao ta.
Attualmente Selezionati:
ÂTHAONA 7: MARVBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The Bible Society of India
© 2023, Used by permission. All rights reserved.
