ÂTHAONA 10
10
Nôah pathla phopizy
(1 Ttr 1.5-23)
1Hezy he Nôah sawchapawpa Semâ, Hamâ nata Zaphethâ pathlazy ama châ: Tipaua khai tawhta sawchapawzy sa chyu ei ta. 2Zaphethâ sawchapawzy cha Kôme, Mâkaw, Mâdai, Zavâ, Tubâ, Mese nata Tirâ zy ama châ. 3Kôme sawchapawzy cha Askenâ, Ripha nata Tôkamâ zy ama châ. 4Zavâ sawchapawzy cha Elisâ, Tâsi, Kiti nata Dôdâni zy ama châ. 5He sahlaozy tawhna heta ama reih, ama pho nata ama chi yzie lymâ hawhta ama râh chyu liata pahrâpa liahpahlô phopizy ama vaw pua.
6Hamâ sawchapawzy cha Kusi, Mizrai,#10.6 “Mizrai” tahpa cha, Hebrai reih ta Izi moh a châ (1 Ttr 1.8). Puti nata Kâna zy ama châ. 7Kusi sawchapawzy cha Sibâ, Havilâ, Sâbatâ, Râmâ nata Satekâ zy ama châ. Râmâ sawchapawzy cha Sebâ nata Dedâ zy ama châ. 8Kusi ta Nimraw sa ta, ano cha alei chô liata chyhsa thatlô riahphapa a y tuapa a châ. 9Abeipa hmiakô liata sakathaipa mohpathâhpa châ ta, chavâta “Abeipa hmiakô liata sakathaipa mohpathâhpa Nimraw hawhta,” tahpa ta rei tyhpa a châ. 10Ano râh athaona cha Sinâ râh liata Babylaw, Ere, Akadâ nata Kalne khihzy ama châ. 11Cha râh tawhta pua ta Asuria râh liata a ngia ta, Ninivâ, Rehôbô nata Kalâ khih zy a padua. 12Ninivâ nata Kalâ khih likawh liata Rese khih chhao padua ta, cha khih cha khih rônah ngaitapa a châ. 13Mizrai ta Ludi, Anami, Lehâbi, Nâtuhi, 14Pârusi, Philistinâ mozy pathlatuhpa Kâluhi nata Kâftawri mozy sa ta.
15Kâna ta sawchapaw uhtheipa Sidaw nata a pazipa Hethâ sa ta, 16Zebu mo, Amawri mo, Kikâsi mo, 17Hivi mo, Araki mo, Sini mo, 18Avâdi mo, Zemâri mo nata Hâmathi mozy pathlatuhpa a châ. Cha khai tawhta Kâna mo cha paipatla ei ta. 19Kâna mo râhri cha Sidaw khih tawhta Kerâ lâ sie lymâpa ta Kâza khih taih sie ta, cha tawhta Sawdawmâ, Kawmawrâ, Adamâ, nata Zebô khihzy lâta sie lymâ ta, Lâsâ khih taih a sie. 20Chazy cha Hamâ pathlazy, ama chi, ama reih, ama râh nata ama phopi yzie lymâ hawhta pachhaihpazy ama châ.
21Zaphethâ uhtapa Semâ ta sawchapawzy sa ta, Semâ cha Ebe mo zydua pathlatuhpa a châ. 22Semâ sawchapawzy cha Elâmi, Asuria, Apasâ, Ludi nata Aramia#10.22 Aramia phopi cha Semâ pathla châ ei ta, Izarei maw lâta a ypa ama châ. Babylaw, Suria, Syria, Idumia, Edômâ tahpa zy ta pahnopa ama châ hra. zy châ ei ta, 23Aramia sawchapawzy cha Uzi, Hulâ, Kethe nata Mâsi zy ama châ. 24Apasâ ta Selâh sa ta, Selâh ta Ebe a sa. 25Ebe ta sawchapaw pano sa ta, pakhapa moh cha Pele châ ta, alei liata phopizy he ano daihti liata pachhaihpa ama châ.#10.25 “Pelekâ” tahpa cha, “pachhaih” tahna a châ. A unawhpa moh cha Zawkatâ a châ. 26Zawkatâ ta Almôdâ, Selepha, Hâzamâve, Zerâ, 27Hadôrâ, Uzalâ, Dikalâ, 28Ôbâ, Abimelâ, Sebâ, 29Ôphi, Havilâ nata Zôbabi zy sa ta, cha zydua cha Zawkatâ pathlazy ama châ. 30Ama pahrâna cha Mesâ tawhta Sephârâ lâta sie lymâ ta, nochhi tlâh taih a châ. 31Chazy cha Semâ pathlazy, ama chi, ama reih, ama râh nata ama phopi yzie lymâ hawhta pachhaihpazy ama châ. 32Chazy cha ama thyutôna nata ama râh yzie ta pachhaihpa Nôah sawchapaw pathlazy ama châ. Tipaua khai tawhta, âmo tawhta a puapa phopizy cha alei chô zydua liata ama paipatla.
Attualmente Selezionati:
ÂTHAONA 10: MARVBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The Bible Society of India
© 2023, Used by permission. All rights reserved.
