ဒေါ ဂုဝ် 5
5
ဇာရာင် ဒူအီ စုး အူ ဆိန့် ဘာန် အာဒါမ် ဇမ် ဘာန် အာနုဝ်
1အာနီ မုး ဇာရာင် ဂေ လှုက်လှာန် အာဒါမ်။ ဒေါ ဖာန် ဘ့လေး ဇဝ်ဖြာ ဂေ ဒူအီ၊ အန် ဘူင် ဒူအီ တဲး ဂေ ပီ ဇဝ်ဖြာ။ 2အန် ဇဝ် ဘူင် ဒူအီ တဲး န့ မိုဝ်း ဘော အီမာယ် ဘော အီဘိုန့်။ ဟဲ့ ဟွတ့် ဘူင်၊ ဇဝ်ဖြာ မိူဝ် မွင့်ကာရာ ဒွါ ဒီ ဂါယ်။ အန် တဝ်း၊ ဂါယ် မုး ဒူအီ။
3အာဒါမ် တွိုန်၊ အာဆာက် အန် ဟဲ့ နုဝ့် အူ မာယဝ်း ဒီ အူယ် ဂိုဝ် ဆီနမ်။ ဒေါ အန် တီ အန် ဝီ မိုဝ်း ဂွန် အီမာယ် အူ ဝီ အီ ပီ အန်။ အာရိုပ် ဂွန် တီ ပီ ဂုန့် အန်။ အန် ဘော တဲး ဂွန် အန် တီ စိူဝ် အာဆေတ်။ 4ဝါယ် အန် တီ အာဒါမ် တွိုန် ကွယ် ပေါ ဒါ မာယဝ်း ဆီနမ်။ အန် ဝီ မိုဝ်း ဘော ဂွန် အီမာယ် ဘော ဂွန် အီဘိုန့်။ 5အာဆာက် အန် ဘော နုဝ့် ဒိမ် မာယဝ်း ဒီ အူယ် ဂိုဝ် ဆီနမ်၊ အန် ဘော ယမ်။
6အာဆေတ် တွိုန်၊ အာဆာက် အန် ဘော နုဝ့် အူ မာယဝ်း ဒီ ဖန် ဆီနမ်။ ဒေါ အန် တီ အန် ဘော မိုဝ်း ဂွန် အူ ဝီ အီ စိူဝ် အာအေန်။ 7ဝါယ် အန် တီ အန် ဝီ ကွယ် ပေါ ဒါ မာယဝ်း ဒီ ဘူ ဆီနမ်။ အန် ဝီ မိုဝ်း ဘော ဂွန် အီမာယ် ဘော ဂွန် အီဘိုန့်။ 8အာဆာက် အာဆေတ် ဘော နုဝ့် ဒိမ် မာယဝ်း ဒီ ဂိုဝ် ဒီ အာ ဆီနမ်။ ဟဲ့ ဟွတ့်၊ အန် ဘော ယမ်။
9အာအေန် တွိုန်၊ အာဆာက် အန် ဘော နုဝ့် ဒိမ် ဂိုဝ် ဆီနမ်၊ အန် မိုဝ်း ဂွန် အီ စိူဝ် အာခေနန်။ 10ဝါယ် အန် တီ အာအေန် ဝီ ကွယ် ပေါ ဒါ မာယဝ်း ဒီ ဂိုဝ် ဒီ ဖန် ဆီနမ်။ အန် ဝီ မိုဝ်း ဘော ဂွန် အီမာယ် ဂေ ဂွန် အီဘိုန့်။ 11အာဆာက် အာအေန် ဘော နုဝ့် ဒိမ် မာယဝ်း ဒီ ဖန် ဆီနမ်။ ဟဲ့ ဟွတ့်၊ အန် ဘော ယမ်။
12အာခေနန် တွိုန်၊ အာဆာက် အန် ဘော နုဝ့် ဘူ ဂိုဝ် ဆီနမ်၊ အန် ဝီ မိုဝ်း ဂွန် အီ စိူဝ် အာမာဟာလာလေန်။ 13ဝါယ် အန် တီ အာခေနန် ဝီ ကွယ် ပေါ ဒါ မာယဝ်း ဒီ ဖွုန် ဂိုဝ် ဆီနမ်။ အန် ဘော ဝီ မိုဝ်း ဘော ဂွန် အီမာယ် ဂေ ဂွန် အီဘိုန့်။ 14အာဆာက် အန် ဘော နုဝ့် ဒိမ် မာယဝ်း ဒီ ဂိုဝ် ဆီနမ်။ ဟဲ့ ဟွတ့် အန် ဘော ယမ်။
15အာမာဟာလာလေန် တွိုန်၊ အာဆာက် အန် ဘော နုဝ့် ဒဝ် ဂိုဝ် ဒီ ဖန် ဆီနမ်၊ အန် ဝီ မိုဝ်း ဂွန် အီ စိူဝ် အာယာရေတ်။ 16ဝါယ် အန် တီ အန် ဝီ ကွယ် ဒါ မာယဝ်း ဒီ အူယ် ဂိုဝ် ဆီနမ်။ အန် ဝီ မိုဝ်း ဂွန် အီမာယ် ဂေ ဂွန် အီဘိုန့်။ 17အာဆာက် အန် ဘော နုဝ့် ဒါ မာယဝ်း ဒီ ဒိမ် ဂိုဝ် ဒီ ဖန် ဆီနမ်၊ အန် ဘော ယမ်။
18အာယာရေတ် တွိုန်၊ အာဆာက် အန် ဘော နုဝ့် အူ မာယဝ်း ဒီ ဒဝ် ဂိုဝ် ဒီ အာ ဆီနမ်၊ အန် ဝီ မိုဝ်း ဂွန် အီ စိူဝ် အာဟေန်။ 19ဝါယ် အန် တီ အန် ဝီ ကွယ် ပေါ ဒါ မာယဝ်း ဆီနမ်၊ အန် ဝီ မိုဝ်း ဂွန် အီမာယ် ဂေ ဂွန် အီဘိုန့်။ 20အာဆာက် အန် ဘော နုဝ့် ဒိမ် မာယဝ်း ဒီ ဒဝ် ဂိုဝ် ဒီ အာ ဆီနမ်၊ ဟဲ့ ဟွတ့် အန် ဘော ယမ်။
21အာဟေန် တွိုန်၊ အာဆာက် အန် ဘော နုဝ့် ဒဝ် ဂိုဝ် ဒီ ဖန် ဆီနမ်၊ အန် ဝီ မိုဝ်း ဂွန် အီ စိူဝ် အာမေထူဆာလာ။ 22အာဟေန် ယီ ကွယ် ရိုမ် ဒူပ် ဇဝ်ဖြာ။ ဝါယ် အန် တီ အန် ကွယ် ပေါ အူယ် မာယဝ်း ဆီနမ်၊ ဝီ မိုဝ်း ဂွန် အီမာယ် ဂေ ဂွန် အီဘိုန့်။ 23အာဆာက် အန် ဘော နုဝ့် အူယ် မာယဝ်း ဒီ ဒဝ် ဂိုဝ် ဒီ ဖန် ဆီနမ်၊ 24အန် ကွယ် ရိုမ် ဒူပ် ဇဝ်ဖြာ။ ဟဲ့ ဟွတ့်၊ အန် အာဝ် ဟူ ကွယ်။ ဇဝ်ဖြာ ဟဲ့ ဒိုဝ်း အာဟေန် တဲး အန် ဟုဝ့် ဒူင် ကွယ် အန်။
25အာမေထူဆာလာ တွိုန်၊ အာဆာက် အန် ဘော နုဝ့် အူ မာယဝ်း ဒီ ဒါ ဂိုဝ် ဒီ ဘူ ဆီနမ်၊ အန် ဝီ မိုဝ်း ဂွန် အီ စိူဝ် အာလာမ်။ 26ပန် တီ အန် ဝီ ကွယ် ပေါ ဘူ မာယဝ်း ဒီ ဒါ ဂိုဝ် ဒီ အာ ဆီနမ်၊ အန် ဝီ မိုဝ်း ဂွန် အီမာယ် ဂေ ဂွန် အီဘိုန့်။ 27အာဆာက် အန် ဘော နုဝ့် ဒိမ် မာယဝ်း ဒီ ဒဝ် ဂိုဝ် ဒီ ဒိမ် ဆီနမ်။ ဟဲ့ ဟွတ့် အန် ဘော ယမ်။
28အာလာမ် တွိုန်၊ အာဆာက် အန် ဘော နုဝ့် အူ မာယဝ်း ဒီ ဒါ ဂိုဝ် ဒီ အာ ဆီနမ်၊ အန် ဝီ မိုဝ်း ဂွန် အီမာယ်။ 29အန် တဲး ဂွန် တီ စိူဝ် အာနုဝ်။ လွင် ဒါင် စိူဝ် တီ၊ န့ မုး၊ “ဂွန် တီ ဒီ တဲး အေ ဒီလှဝ်၊ ကွဲ့ တဲး အေ လုဝ် ရန့် ကာဆဝ် ကာဒါယ် ပဲ့ ဟဲ့ ဒွိုမ် ဒိူင် ဇဝ်ဖြာ။” 30ဝါယ် ဟဲ့ မိုဝ်း အန် အာနုဝ် တီ၊ အန် ဝီ ကွယ် ပေါ ဖန် မာယဝ်း ဒီ ဒိမ် ဂိုဝ် ဒီ ဖန် ဆီနမ်၊ ဝီ မိုဝ်း ဂွန် အီမာယ် ဂေ ဂွန် အီဘိုန့်။ 31အာဆာက် အန် ဘော နုဝ့် ဘူ မာယဝ်း ဒီ ဘူ ဂိုဝ် ဒီ ဘူ ဆီနမ်၊ အန် ဘော ယမ်။
32အာနုဝ် တွိုန်၊ အာဆာက် အန် ဘော နုဝ့် ဖန် မာယဝ်း ဆီနမ်၊ အန် ဘော မိုဝ်း ဂွန် အီ စိူဝ် အာဆေမ်၊ အာဟာမ် ဘော အာယာဖေတ်။
Attualmente Selezionati:
ဒေါ ဂုဝ် 5: pce
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2023, Wycliffe Bible Translators, Inc. All rights reserved.
