Mataio 10
10
Iesu areve aposetolo la haikaea ovōpe
(Mareko 3:13–19; Luka 6:12–16)
1Iesu areve satiriaraita karu twelve la arero tai isa koti, are siahu erero miarōpe harisu maeasiaviri foromai la larivatai vei, aea eka hariaharia aea maeapatoita eka hariaharia ita la lei lareva leiti vei. 2Lea aposetolo karu twelve ve rare rare meha: omopa Simona, Petero rare aravōpe lea vita, aea areve marehari Anderea, aea Iakobo Sebede aeata areve marehari Ioane, 3Filipi aea Batolomeo; Tomasi aea takis fareovaita vita Mataio; Iakobo Alefeo aea Tadeo; 4Simona Selote karu, aea Iudasi Isakariota karu, kivaia lei Iesu la paeai vei miarōpe lea vita.
Iesu aposetolo karu la tivi miarōpe
(Mareko 6:7–13; Luka 9:1–6)
5Lea twelve karu la Iesu sa itapi, erero satiriōri mō ōpe, Toruipi haria ve otiharo voa levi teraia aea Samaria karikara haroharo voa ta levi teraia. 6A—, Israela toruipi voa veverapaita mamoe tai teraia. 7E teraita lea mea itoro o mō aria, Kauri ve basileia haekao loi.#Luk 10:4–12 8Eka karu la lei lareva leitia, opai karu la lei itoia, pokea eka karu la lei ovava leitia, harisu larivataia. E etau la tava auke ita ovi, e etau la tava auke ita au miaraia. 9Moni rovaea varo seika varo eve kava oroa voa levi vuapaia; 10aea sariva oroa levi ovi teraia, aeata iri puta orakoria aeata tamaka aeata mora kaika ta reha; ipi karu tivi karu sa haikaeaita larietau miaraita, mai haura reha.#1 Kor 9:14; 1 Tim 5:18
11E karikara rovaea aea karikara seika voa oropaita lea mea, e lōvoa peita karu lareva vei lalasi leitia, aea lōvoa pavaia pepe e ata maea leitia soa voa. 12E uvi voa oropai vei leita lea mea, foforoe o moia. 13Soka lea uvi karu ero maeafukapai oria, eve tairu o ere voa mei miavaia. Lea uvi karu ero maeafukapai auke oria, e eve tairu o la ata ovaia. 14Ero maeafukapai auke lei aea eve o la mapai auke leitita lea karu, e lea uvi varo karikara varo ve maria voa foreraita lea mea, eve mora voa pasaeaita tetere la pailalei sisapaia.#Apos 13:51 15Okofa ara ero o la moi, seseōvi tava miaraita lea sare voa Sodoma aea Gomora kaiae ve tava pasoa ovai roi, a—, lea karikara kaiae ve tava pasou rovaea ovai roi.#Mat 11:24; Gen 19:24–28
16Mapaia, ara ero mamoe la furuka ave merava ve aru voa itapaipeta fefeare; e ikaroa fefeare haiore leitia, aea sua fefeare haimafu leitia.#Luk 10:3 17A—, karu vei kiva lei vovo roroava, ipi ere ero fasi kōto oti voa lariōvai roi, aea ere ereve sunako uvi voa ero teavi sari roi.#Mak 13:9–11; Luk 12:11–12; 21:12–15 18Aea ere gavana karu aea king karu ita ve omopa voa ero lariōvai roi arave rare vei, ipi e erero aea toruipi hariaharia ita la Ovoro Lareva la pisirikao muiai vei. 19Ere ero fasi kōto leiti vei lariōvi teraita soasoa voa, e moi o vei haiiri heafo everori levi seseōvaia; ipi e sa moi o lea ora kofa voa ero miarai roi. 20Ipi omoi karu e kasirau, a—, eve Oa ve Arahoha sa eve iri voa lei moi roi.
21Paua areve marehari la paeai vei miarai roi, aea oa ta areve atute la lōfeare leiti roi, aea atutemori la itotea ereve oalou la paeai roi.#Mak 13:12; Luk 21:16 22Karu foromai arave rare vei ero kaifa leiti roi. A—, haiiri rofo lei pōvi pepe soa kaleitita lea karu la lei makuri leiti roi.#Mat 24:9, 13; Mak 13:13; Luk 21:17 23Ere karikara farakeka aea voa ero hasiavai vei aitetei roroai oria, hōi karikara voa oroaia. Ipi okofa ara ero o la moi, E Israela ve karikara karikara voa foreri foreri kaleiti auke leita lea soa voa Karu ve Atute forerai roi.
24Satiriaraita karu are arero satiriaraita lea papuvita ve arori voa kasirau, aeata fasaita sarufa karu areve papuvita ve arori voa kasirau.#Luk 6:40; Ion 13:16; 15:20 25Satiriaraita vita are arero satiriaraita papuvita ve mai feare usoso leitita, aea fasaita sarufa karu are areve papuvita ita usoso leitita, lea mai lareva. Ere uvi ve papuvita la Beelsebulo rare aravaita, a—, ere areve uvi karu la rare maealolo kofa lōfeare levi aravai roi ei?#Mat 9:34; 12:24; Mak 3:22; Luk 11:15
26Soka erero tore levi leitia; ipi aieri siseita etau foromai la aite pisirikao muiai roi, aea milafukaita etau foromai ta foreri ore leiti roi.#Mak 4:22; Luk 8:17 27Ara murumuru voa ero moita lea o, ovava voa omoia; aea e ōvauta voa kefa uri mapaita lea o la uvi kōu voa itoro aria. 28Maea la paeaita ore leitita, a—, ere ove la paea ore auke leitita lea karu la tore levi leitia. A—, ove ita maea ita la Gehena voa saroroapaita ore leitita lea Ualare la tore leitia. 29Ilipu‐titira orakoria ve tava toea farakeka, ei? A—, Oa sa haikaeai auke leitita, lea ori farakeka aea mea voa levi oai roi. 30E ta lōfeare, eve harotui foromai la mai muti roroka. 31Lea vei tore levi leitia; eve eite ilipu‐titira rauapo ve tava la sapatai.
32Araro karu ve soso voa vavavaita lea vita la ara arave kauri voa peita Oa ve soso voa ta vavavai roi. 33A—, araro karu ve soso voa avoa arita lea karu la ara arave kauri voa peita Oa ve soso voa ta avoa ari roi.#2 Tim 2:12
34E haiiri mōfeare levi seseōvaia, ara mearovaeka voa totoeaita mai la lei forerai vei koti. Ara tairu la ovi koti vei forerai kao, a—, marehaukaita soi reha. 35Ara karu areve oa la sukavuteai vei koti mea, aeata mori areve lou, aeata uevi areve ueri.#Mika 7:6 36Aea areve uvi karu kofa sa karu ve ote karu leiti roi.
37Areve oa ita lou ita la haikakare rovaea leitita, a—, araro haikakare seika leitita lea karu, ara vei usoso kasirau. Aea areve atute la aea areve mori la haikakare rovaea leitita, a—, araro haikakare seika leitita lea karu, ara vei usoso kasirau. 38Areve satauro la ovi taiovai auke lei, aea araro aitetai auke leitita lea karu are ara vei usoso kasirau.#Mat 16:24; Mak 8:34; Luk 9:23 39Areve makuri la kiva lei meita lea karu ve makuri la lei veverapai roi; a—, areve makuri ara vei lei veverapaita lea karu makuri kofa la ovai roi.#Mat 16:25; Mak 8:35; Luk 9:24; 17:33; Ion 12:25
40Ero maeafukapaita lea karu araro ta maeafukapai roi, aea araro maeafukapaita lea karu, araro itapaita lea Ualare ta maeafukapai roi.#Mak 9:37; Luk 9:48; 10:16; Ion 13:20 41Peroveta karu la maeafukapaita ipi are peroveta karu eavia, lea vita peroveta karu ve tava ta ovai roi. Aea haura karu la maeafukapaita ipi are haura karu eavia, lea vita haura karu ve tava ta ovai roi. 42Ma vevekoko kōkuveisa farakeka aea la mea karu seika la rapi miaraita ipi are satiriaraita karu eavia, okofa ara ero omoi, areve tava ta levi veverapai roi.
Attualmente Selezionati:
Mataio 10: TQO1983
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the Bible Society of Papua New Guinea in 1983.
