GENESIS 7
7
1Ma tha Jihova ka soree isatha Noa, Lae mai, kamulua toa eki sui boo na i maafera oe, muki kotho i la aka; uria ni oe neri na nau ku riki oe na abula lamu e kokoto inaofaku ana unii wane nei. 2Ana do maruki eki na keka faalu oki ṉalia mai too fiu do ifamu, do wane bia do kini nia: ma ana do maruki eki na kesi faalu, too ro do, do wane bia do kini nia. 3Ana thaaro na i mamaṉaa ki lau boo, too fiu do, do wane bia do kini: fasi kwalafada keki maruki i maana fanua na i iano sui bana. 4Uria na fiu fa boṉi ni u mai, ma nau kwai bii falea mai dani na kai aruṉia fanua sulia fai tafulu fa thato ma fai tafulu fa rodo; ma do maruki eki sui boo na nau ku thauwanida, kwai usuda keki e’i naa faisia maana fanua na i iano. 5Ma tha Noa ka ade sulia si do eki sui bana na tha Jihova e ṉata fifi sulia isana.
6Ma ono taleṉee fa ṉali e sui atha Noa si maṉa na kafo eki ka olo fafia fanua ne i iano. 7Ma tha Noa e kotho, bia kaluwane nia ki, ma kwaina, ma ulu kini‐fuṉao nia ki, uri la aka eri, sulaania kafo eki ne olo fafia fanua. 8Ana do maruki na kera faalu, ma do maruki na kesi faalu, ma thaaro ki, ma do eki sui bana na kera aṉo fafia fanua ne i iano, 9Too ro do iada keka kotho mai satha Noa uri la aka eri, do wane bia do kini, sulia si ade la na tha God e ṉata fifi sulia isatha Noa. 10Ma lalae mai, buriana fiu fa boṉi, kafo eki ne olo mai ka to fafia fanua ne i iano. 11Ana ona taleṉee fa ṉali ana to lana tha Noa, ana ruana fa madami, ma taṉafula ma fiuna fa boṉi ana madami eri, afa boṉi eri boo ruka‐mauri eki sui boo na i matakwa ka busu mai, ma keka ifinia maana olofolo na i thalo lo ki. 12Ma dani ka aruṉia fanua ne i iano sulia fai tafulu fa thato ma fai tafulu fa rodo. 13Afa boṉi eri boo kera kotho mai, tha Noa neri, ma tha Semo, ma tha Hamu, ma tha Jefeta, ulu kaluwane tha Noa ki, ma kwaina tha Noa, ma ulu kini‐fuṉao nia ki bida, uri la aka. 14Ni kera, bia do maruki eki sui bana na kera eeta kwailiu, ma aini katele na kera eeta kwailiu, ma do eki sui bana na kera aṉo fafia fanua ne i iano na kera eeta kwailiu, ma thaaro eki na kera eeta kwailiu, na thaaro eki kukubada ka eeta lau bada. 15Ma keka kotho mai satha Noa uri la aka, too ro do, too ro do iada, do eki sui bana na si maṉo ni marukia ni seeda. 16Ma do eki na kera kotho mai, keka kotho mai do wane ma do kini ana do maruki eki sui bana, sulia ṉatafifi lana tha God isana: ma tha Jihova ka fono faisi nia. 17Ma olo lana kafo eki kai to sulia fai tafulu fa boṉi fafia fanua ne i iano; ma kafo eki ka baita alaa, ka kwaua aka eri, ka to iaa faisia fanua ne i iano. 18Ma kafo eki ka sukwai, ka oro alaa faamau fafia fanua ne i iano; ma aka eri ka thaothao ifafona maana kafo eki. 19Ma kafo eki ka sukwai ka tatha fafia fanua ne i iano; ma gwa tolo lo ki sui bana, ne fane iaa ifara thalo lo ka sui boo, ka thu. 20Sui kafo eki ka sukwai alaa sulia tee tafulu kadee aba lau ma lima kadee aba; ma gwa tolo lo ki ka thuthu. 21Ma do maruki eki sui boo na kera isu fafia fanua ne i iano keka mae naa, na thaaro ki, ma aini katele ki, ma do i masuu ki mai, ma do aṉoaṉo na kera aṉo fafia fanua ne i iano, ma imole ki sui bana: 22Do eki sui bana na si maṉo ni marukia e maṉo mai sulia gwalusuda, na ṉa do maruki eki sui boo na kera ni la fanua raraṉea, kera sui kera mae bonaa. 23Ma do maruki eki sui boo na kera toto i maana theegano, kera faafunuida ka a’i naa, ṉa imole ki neri, bia aini katele ki, ma do na kera aṉo, ma thaaro i mamatalea ki; kera funu, keka a’i naa faisia fanua ne i iano: ma talifilia tha Noa ka to bana, bia do eki na kera to bi nia i la aka. 24Ma kafo eki ka sukwai fafia fanua ne i iano sulia tee taleṉee fa boṉi ma lima tafulu fa boṉi.
Attualmente Selezionati:
GENESIS 7: MLU1949
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
British and Foreign Bible Society 1949, 1951
