Jwon 8
8
Mbor Tima Si Ka'ut Hu Mak
1Unai Yeso wa ta Anggash i Yitat i Mbar. 2Tamwen hwak hum kyel ta Wur i DeeƁwe. Shak ɗufal si yes kyel ames, te amun yis kofsus ti. 3Unai som i kofti si anggut hu Farisiyawa si yes ti mbor nin tima si ka'ut hu marei nin sin arak i zuruk, si kinut ta saa yusti.
4Ɗak si lak Yeso si ni, “A Makofiti, si ka' mbor moti yit arak i zuruk. 5Anggut i Mosis ni ɓa ka hwyai musut i arof mii ti afyai, ka fwar ya. Ha ha ni amiya?”
6Si mas mai lui ɓa si mbahus, ɓurti ɓa si wisi si langtus ta kyel i ɓur.
Unai Yeso ni mwa' worong ti worong ta fisha ti foti ra asus. 7Myan ima si cu wei ti masti Yeso lulal, unai luk fit nyus, “Shak maɗufal ima mas mafwashi kwa, u tong hwisut ti afung.” 8Unai Yeso hum muni mwa' worong ti worong ta fisha. 9Myan ima si hali andi, si hon kyeli ti andek-andek, mutong tasi mbayaiyi, si hon Yeso ta kyeli hu mbori yit yus mangra fo.
10Unai Yeso luk fit lulut ni, “A mbor, si mii leya? Ɗeng lefush ɓur hai kwa haa?”
11Ti nyus, “A Deembai, ɗeng lefun ɓur hai kwa.” Unai Yeso ni, “Yin hwak i lefush ɓur hai kwa. Shish yush wa, mwashi yes wei kan shi hum masti mafwashi kwa.”
A Yeso Mii Kweneng i Naya
12Unai Yeso hum findel ti ɗufal ni, “Ayin a kweneng i nayai. Shak maɗufal ima makoltifai asun ni ma wa ɗa'ati at ta maɓing wi kwa, ma wa wis ti kweneng i mupwet.”
13Unai Farisiyawa si lak Yeso si ni, “Ha lak ti findel si hai sa hai, findel amai mati mwawei kwa.” 14Yeso humuskyel ti findel ta ni, “Na i lak findel si haisun hai, i lak ti a mwawei, ɓurti i shang kyel ima i lang ta, hu kyel ima i ma wa ta. Hun hu shang mai aɗengi na hai yunti kwa. 15Hu tot ti ɓur a ti ɗingi i ɗufal. Yin i tot ti ɓur si ɗeng hai kwa. 16Na yin wa tot ti ɓur, tot ti ɓur amen a mwawei, ɓurti i ma ahweni kwa. Deen ima rohun, ma akul hu yin. 17Ta anggut amu si worong ta nyai, na ɗufal apil si lak findel ii ma andeki kof a mwawei. 18Yin i lak ti findel si haisun hai, Deen ima rohun ayis mii mapili.”
19Unai si lulus si ni, “Dya hi mii leya?” Unai Yeso humuskyel ti findel ta ni, “Hu shangun kwa, hu shang Deen kwa. Naɗin hu shangun, naɗin hu shang Deen hwak.”
20Yeso lak findel mai myan ima yis kofti shangi ta nggas ti kyel ima si kyanan ti mal i Wur i DeeƁwe ta. Shak ta andi, ɗeng ka'us kwa, ɓurti myan ames tuu ru kwa.
21Unai Yeso hum laksus ni, “I ma yun wa, hu wa farsun, hu wa mot ta wii i mafwashani amu. Kyel ima i ma wata, hu wa mba ti wa wet.”
22Mai kin som Ju si lul nyai, “Ma wa for ti haisus ya ani? Ayis kin ma nyai, kyel ima i wa ta hu wa mba ti wa wet haa?” 23Unai cu wei ti nyai, “Hun hu mii na fisha, yin i lang ii ta fit. Hun hu mii naya moti, yin i mii naya moti kwa. 24Ayis kin i nyu hu wa mot ta mafwashani amu wi. Na hu fa mwawei nyai ayin ima i ni i mii yin yi kwa, hu wa mot ta mafwashani amu wii gɓwum.”
25Unai si lul ta Yeso si ni, “A ha aweya?” Yeso humuskyel ti findel ta ni, “Ayin i mii ima i laku tii tasi bya'. 26I mati ɗamam hyang ima i wa laki si hun hai, i lefu ɓur hai. Shak ta andi, i lak ti aɗeng ima i hali ta kyel i yis ima rohun, aɗeng ima i hali ta kyel ames i wa lak ti naya.”
27Si shangi nyai ma findel a si Dees hai kwa.
28Yeso nyus, “Myan ima hu ha' Al i Maɗufal fit, a myani hu wa shangi nyai ayin yi. Hu wa shangi nyai i maas ɗama ti mbaitat i haisun kwa, i lak ti aɗeng ima Dee kofun ti je. 29Yis ima rohun ma akul hu yin, hon nun ahwen kwa, ɓurti ngang i masti aɗeng ima ɗatus si ɓwi hai.” 30Myan ima Yeso yis lak ti ɗaman mii, ɗufal hyang si fa mwawei si yis hai.
Fe i Ibirai
31Unai Yeso lak som Ju ima si fa mwawei wa kyel ames si, ni, “Na hu cu wei ti ɗamam ima i kofu ti, hun a fe i ro amen i mwawei. 32Hu wa shang ti mwawei, mwawei ma wa fasu mute i haisu.”
33Unai si humuskyel ti findel si ni, “Nin a gung i Ibirai, ai ti ni te ii yarai i ɗeng kwa. Ami kin ha nyai ni wa wis ti mute i haisinin ya?”
34Unai Yeso humuskyel ti findel ni, “I ma laksu mwawei, shak ma masti mafwashi a yere i mafwashi. 35Yere mati kyel i mute ta wur vit kwa, al i wur mati kyel i mute ta wur vit. 36Ɓurti andi, na Ali fu mute i cati ii ra, hu wa wis ti mute i cati ii ra fweng. 37I shangi hun a fe i Ibirai. Shak ta andi, hu far ti fisel ima ɓa hu forun, ɓurti hu mat findel amen kwa. 38I ma laksu aɗeng ima i ɗingi ta kyel i Deen, hun hu masti aɗeng ima hu hali ta kyel i Dyou.”
39Unai si humuskyel ti findel ta si ni, “Ibirai a deeminin.” Unai Yeso humuskyel ti findel ta ni, “Naɗin a hun a fe i Ibirai, naɗin hu nin wa masti ɗamam ima yis Ibirai masi. 40Fota angga' ima mata, hu muni gɓwuk ɓa hu forun, maɗufal ima i laku mwawei ima i hali ta kyel i DeeƁwe, Ibirai mas musut i ɗamam mii kwa. 41Ɓurti andi hu masti aɗeng ima Deemu ma masi.”
Unai som Ju si ni, “Nin a fe i se kwa. A DeeƁwe kek je mii Deeminin.”
42Yeso nyus, “Naɗin DeeƁwe a dyou, naɗin hu ɓwetun, ɓurti i lang ii ta kyel i DeeƁwe, yin mai nanati mwashi. I yes a ɓurti haisun kwa, a DeeƁwe rohun. 43Ami kin hu shang aɗeng i ma i laki kwa ya? A ɓurti hu hal ti aɗeng ima i laki kwa. 44Hu mii ta kyel i deemu Shatan, hu ɓyaat masti aɗeng ima ma ɓweti. A ma for ti ɗufal tasi bya', ka' mwawei kwa, ɓurti mati mwawei ta wii yusti kwa. Shak myan ima yis lak ti fyarat ma kofti a angga'i mute ames, ɓurti yis a ma fyarat, dee i fyarat. 45Unai ɓurti i lak ti mwawei, hu nggyu i fati mwawei yes kyel amen. 46Awe amu wisun ti mafwashi ya? Na i lak ti mwawei, ami kin hu fa mwawei yes kyel amen kwa ya? 47Yis ima mii DeeƁwe hal findel i DeeƁwe. Aɗengi ma kin hu hali kwa, a ɓurti hu mii DeeƁwe kwa.”
Yeso Ɓin Ibirai
48Ju si humuskyel ti findel si ni, “Ni lak a kiga' kwaa, ima ni a ha a maɗufal i Samarya,#8:48 Ɗama fwat som Ju hu som i Samarya kwa. Kof sima se' ti a Yeso ndai. ima mati rin mafwashi kwaa?”
49Yeso humuskyel ti findel ta ni, “I ti rin mafwashi kwa. I ha' ti a Deen ta fit, hun hu komsun ya. 50I fati haisun ngye kwa. Aɗeng ma fari, a yis a ma tot ti ɓur. 51I laksu mwawei, shak maɗufal ima mas ro ti findel amen ma wa mot kwa fweng.”
52Unai som Ju si nyus, “A mwashi ni shangi hati rin mafwashi. Ibirai hu som i shit si mwat, unai ha ha ni, ‘Shak maɗufal ima mas ro ti findel amen ma wa mot kwa fweng.’ 53Ha ma ɗingi ha ɓin deeminin Ibirai ani? Yis mot, som i shit hwak si mot. Ha ma ɗingi ha aweya?”
54Yeso humuskyel ti findel ta ni, “Na i ha' haisun ta fit, ha' ti haisun ta fit mii fo i ɗama kwa. Maɗufal ima ma ha'sun fit a Deen, ima hu nyai, ‘A DeeƁwe amu.’ 55Hun hu shangus kwa, yin i shangus. Naɗin i ni i shangus kwa, naɗin i te ii ma fyarat fota hun. U mai i shangus i masti aɗeng ima lak. 56Dyou Ibirai jakak fwet nyai naɗin u wis ɗing ti myan amen, yis ɗingi, unai jakak.”
57Unai som Ju si lak Yeso si ni “Ti ha kol will hure hara kwa, ɗak ha nyai ha ɗing Ibirai haa?”
58Yeso nyus, “I ma laksu mwawei, kaciwa' ti si al Ibirai, ai yin na.”
59Myan ima Yeso lak findel mai, unai si haar afyai ɓa si hwyaiyus ti. Unai Yeso fotus, ɗak langus ya ta Wur i DeeƁwe.
Attualmente Selezionati:
Jwon 8: AlisIRonNT
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Wycliffe Bible Translators, Inc. and © The Nigeria Bible Translation Trust 2018
