Jwon 7

Shunus i Yeso Si Fa Mwawei Kwa

1Takfai ti mai, Yeso at ta wii Galili, ɗak ɓwet ɓa u lang ta wii i Judya kwa, ɓurti Ju i kyeli si far ti fisel i forsus ya. 2Ma got i Bukak#7:2 Bukak Kof a got i haar ti cwa ta yah ndai, a ta myani si tyayan ta wi i myan ndyong. i som Ju kat anggasi ndai. 3Unai shunus i Yeso si nyus, “Ɗat naɗin ha hon kyel mai ha wa Judya, ɓurti ɓa fe i ro amai hwak si ɗing ɗamam i shok na fo ima ha masii. 4Shak maɗufal ima ma ɓweti si shangus ɓwet masti ɗamam i mufot kwa. Na ha masti ɗamam mii kofa haisa ɓa naya ti shanga.” 5Shunus i Yeso hwak si fa mwawei kwa.

6Yeso nyus, “Myan amen tuu ru kwa tawe, na kyel amu shak myan a kiga'. 7Hun naya ti tu wa munggwya kwa, ayin ti nggwetun, ɓurti i laksut mafwashani ima ti masi. 8Hun wa gotti kek. Yin i wa gotti mwashi kwa, ɓurti myan amen tuu mas kwa tawe.” 9Takfai tima Yeso lakus findel mai, unai te ta Galili.

10Takfai tima shunus si wa gotti, Yeso hwak wa i mufot, kaciwa' kofti haisus ta saa ti ɗufal. 11Mwashi na kyel i gotti, som Ju sima farsus ta kyeli sin luli nyai, “Maɗufal ani ma leya?”

12Ta kyel i gotti shini si findel si yis hai sin rumung ta ɗiyai ames, shini sin nyai, “A maɗufal manderei.” Shini sin nyai, “Wayou, ma dang ti a ɗufal.” 13Shak ta andi, ɗeng wis njeng na mulut i findel si Yeso hai ta saa ti ɗufal kwa, ɓurti si myanat ti mbayai i Ju fo.

Yeso Kof Shangi ta Kyel i Gotti

14Myan ima gotti matkaar ta saa, unai Yeso lang ta Wur i DeeƁwe fur kofti shangi ta. 15Unai mbayai i Ju si shok na fwai ti nyai, “Maɗufal mai wis musut i shangi mai i ta le kaciwa' si kofus ti ya?”

16Unai Yeso humuskyel ti findel ta ni, “Ɗamam ima i kofti shangi ii hai a amen kwa, ii yis ima rohun.” 17Shak maɗufal ima masti ɗamam ima DeeƁwe ma ɓweti, ma wa far ti shangi ahun kofi ti amen yes i ta kyel DeeƁwe ahun i ta kyel amen. 18Maɗufal ima ma kofti shangi si haisus hai a ma far ti asum. Maɗufal ima ma kofti shangi si maɗufal ima rohus a ma mwawei, hu mati fyarat nin si yis hai kwa. 19“Ai Mosis fu angguti kwaa? Shak ta andi, ɗeng amu fwang angguti kwa. Ami kin hu far ti fisel ima ɓa hu forun ya?”

20Ɗufali si humuskyel ti findel si ni, “Hati rin mafwashi! A si we si far ti forsa ya?” 21Unai Yeso nyus, “I mas ɗama i shok na fo andek, shak asui hu shok na fwai ti tirim. 22Mosis fu mukwen (a yis furi kwa, a kaya amu i ɓele), hu masan ti al mukwen Mwen ti Lafos. 23Na hu mas al mukwen Mwen ti Lafos ɓa hu hya anggut i Mosis, ami kin hu futut ti yin ɓurti i fa maɗufal shak cala Mwen ti Lafos ya? 24Hon hun lefti ɓurti ɗamam ima hu ɗingi ti shit, lef hun ɓur i mwawei ndere.”

A Yeso Mii Kristii Haa?

25Unai shini ɗufali ta Yerushalima si lul nyai, “Ka ni a hon a maɗufal mai si fari ɓa si for hoo? 26U mai yus findel na saa ti ɗufal, si nyus ɗama kwa. Ahun a mbayai si ɓwet nyai a yis mii Kristi ya? 27U mai ka shang kyel ima maɗufal mai lang ta, myan ima Kristi yes, ɗeng ma wa shang ti kyel ima lang ta kwa.”

28Yeso yis saa ti kofti shangi ta Wur i DeeƁwe, unai lak ti njeng ni, “Hu shangun, hu shang kyel ima i lang ta. I yes a ti mbaitat i haisun kwa. Yis ima rohun ama mwawei, yisyi hu shangus kwa. 29Yin i shangus, ɓurti i lang ii ta kyel ames, a yis rohun.”

30Ti lak ti mai i findeli si masut ɓa si ka' Yeso, shak ta andiyi ɗeng ngge'us kwa, ɓurti myan ames tuu ndok kwa. 31Shak ta andi, ɗufal hyang ta saa ti suɓuti si fa mwawei wa kyel i Yeso, sin nyai, “Na myan ima Kristi yes, ma wa masti ɗamam i kofti i shok na fo ima si ɓin ima maɗufal mai ma masi ani?”

32Unai Farisiyawa si hal suɓut i ɗufal sin rumung ti ɗamam ani si Yeso hai. Unai mbayai i kocokaki hu Farisiyawa si ro som i ɗing ti Wur i DeeƁwe ɓa si wa si ka'us.

33Unai Yeso ni, “I ma akul hu hun i myan ndyong, unai i wa muhumkyel ta kyel i yis ima rohun. 34Hu wa farsun, hu wa wisun kwa. Kyel ima i ma wa ta hu wa mbati wa wet.”

35Unai som Ju si lak ɗiyai nyai, “Maɗufal mai ma ɓweti wa anggi kyeli ima kan ka wa wisus kwa ya? Ahun ma wa a kyel i Ju ima si ɓaas ta saa ti som i Giris, si mute ta ɓa u kofti som i Girik ya? 36Ami ma laki myan ima ni, ‘Hu wa farsun, hu wa wisun kwa ya,’ hu ‘Kyel ima i ma wa ta hu wa mbati wa wet’ ya?”

Lak ti i Rin Masapai

37Tasi dala hu ndii ti mwen i gotti, Yeso te mangra, lak ti la mbai ni, “Shak maɗufal ima hal myaf, u yes kyel amen u wo. 38Shak maɗufal ima fa mwawei yes kyel amen, fota angga' ima si worong ta findel i DeeƁwe nyai, ‘Ta mulwat i som ima si fa mwawei ɗaran i ham i mupwet si wa tital ta wii yusti.’ ” 39Yeso findel si Rin Masapai ima som ima si fa mwawei wa kyel ames si wa mati. Ɓurti ai DeeƁwe tu fa Rin Masapai kwa tawe, ɓurti tuu ha' Yeso fit kwa.

40Ti hal ti findel ima Yeso lak, shini ɗufali si ni, “A awei, a mai mii mashit.”

41Anggumi si ni, “Ayis mii Kristi.”

Shini hwak si lul si ni, “Atini Kristi u yes ta Galili ya? 42Ka ni ahun findel i DeeƁwe lak ni, Kristi ma wa mulang ii ta ɗar i Devid hu Betelehem, ashwa tima Devid te ta hoo?” 43Unai ɗufali si matkaar ɓurti Yesoi. 44Shini si kin hai ɓa si ka'us, shak ta andiyi ɗeng ngge'us kwa.

Munggwya i Fati Mwawei i Mbayai i Ju

45Myan ima som i ɗing ta Wur i DeeƁwe si hum kyel ta kyel i mbayai i kocokak hu Farisiyawa, si lulus nyai, “Ami kin hu yes tus na wii kwa ya?” 46Unai som i ɗing ti kyeli si ni, “Ɗeng tuu findel fota ngga' ima maɗufal mai masi kwa fweng.” 47Unai Farisiyawai si ni, “Wa' tuu dangu hun hwak. 48Ɗeng na saa ti som mbayai hu Farisiyawa fa mwawei wa kyel ames kwa. 49Ɗufal mii si shang ɗama si anggut i Mosis kwa, si ti ale' ta hai yusti.”

50Nikodimus, ima ma andek ta saa ti Farisiyawai, ma ai wa kyel i Yeso, lulus ni, 51“Ahun anggut amukan lyaf maɗufal ɓur kaciwa' ka hali ta fo yusti, ɓa ka shang aɗeng ima ma masi kwa ya?”

52Unai si humuskyel ti findel ta nyai, “Ha mii ta Galili hwak ani? Bene ha findel i DeeƁwe ha ɗingi, ha wa wisi nyai, mashit nin ma wa mulang ta Galili kwa.”

53Unai ɗufal si wis wurai ames.

Attualmente Selezionati:

Jwon 7: AlisIRonNT

Evidenziazioni

Copia