Luka 18

Ikataniso lya mke afwililo na mtaghanyi

1Nao Jesu kawaghorera wairimi wake ikataniso lyewaonyeza kamba yanawafweni kulomba kila ngelo na siwafwe ngolo. 2Kawauza, “Kele muzi ghumoju koluo na mtaghanyi semwoghagha Mlungu hata semuhawa mundungi ishima, 3na alyenyi kele ghulya muzi, koluo na muke mumoju afwililo ni mlume wake, eluo kemghendela kemlomba amtaghanye na ulya eluo kemsirimisa. 4Naye kwa ngelo nyingi ulya mtaghanyi kalegha kumwarura; ela kudua kaghora ngoloni kwake, ‘Hata ngera sani simwoghagha Mlungu hata simtalagha mundungi, 5kwa kukala uyu muke afwililo ni mlume wanisirimisa, nijemtaghanya eri sejenisilisa ndighi kwa kunijila.’”

6Nao Bwana kawauza, “Sikileni selyi mtaghanyi wa laghelaghe eghoragha. 7Ndamu Mlungu sedimagha kuwatetela wasaghulo wake awa wemlililagha kiro na msenya? Ado umukamukagha kuwawarura? 8Nemi namuza, ujewatetela shoshoa ng'weri. Ije ngelo Mwana wa Mdamu ekujagha, ujedoka idumusi kele urumengu?”

Ikataniso lya Mfarisayo na mfunyi kodi

9Nao Jesu kawaghorera ikataniso ilyi nalyose walye wekudumuse wenyi kamba ni wahachi wekewamenya wazima. 10“Wandu waili weghendile Hekaluni kulomba, mumoju oluo Mfarisayo na mumoju oluo mfunyi kodi. 11Ulya Mfarisayo kakala kimusi mwenyi kalomba hung'u, ‘Ee Mlungu nakufunyila asanta kwa kukala imi sifwanane na wandu wazima: wavekuri, wandu siweo wahachi, wazingi na hata sa uyu mfunyi kodi. 12Nanafungagha kulya mandu maili kwa jumwa na nanafunyagha ifungu imojori lya ikumi lya mali yangu yose.’ 13Ela mfunyi kodi kakala kimusi kulele kwenyi, hata sadimile kunula meso ghake noko mlunguni, ela kakukwita lagaya yake, keghamba, ‘Ee Mlungu nifwile waya nimi ne mkaung'a.’ 14Nemi namuza, uyu mundu wanagalile nyumba kwake ahawo hachi kumwisa ulya mumoju; kwani kila mundu ekujosagha ujisogho, ela uyu ekuselezagha ujosogho.”

Jesu kuwabarikia wanake wachache

(Matayo 19:13-15; Marko 10:13-16)

15Nawo weluo wekemletela Jesu hata wanake wachache eri awaikilile mikonu, Wairimi waghenda waona wakawakemela. 16Ela Jesu kawapang'a kwake keghamba, “Sigheni wanake weje kwangu, simwawaime, kwani Uzuri ghwa Mlungu ni kwa wandu sawa. 17Nemi namuza kamba, uwo wose sewatagha Uzuri ghwa Mlungu sa mwanake sengilagha awenyi.”

Mundu mzuri

(Matayo 19:16-30; Marko 10:17-31)

18Nao kilongozi mumoju kamkotela Jesu, “Mwalimu waloli, nideagha ije nipate umana ghwa kale na kale?” 19Jesu kamtumbulila, “Kudani uniitagha waloli? Sikwesi mundungi waloli sala Mlungu. 20Wanaiweni milomu: ‘Swazinge, swaulaghe, swaiwe, swamzighirire mumbenyu ndimi na umuhawe ishima tatio na meo?’” 21Naye katumbulila, “Agha ghose naghawata kufuma unake ghwangu.” 22Naye Jesu aghenda asikila hung'u kamuza, “Wasowekelo ni kindu kimojori. Tagha vindu vose uwo navo uwasarire wakiwa, nawe ujekala na mali mlunguni, na ima uje uniirime.” 23Ela aghenda asikila agha kawasilo, kwani oluo na mali nyingi.

24Nao Jesu aona selyi afurusa, kaghora, “Kwanakulile sani kwa awa weo na mali kungila Uzuri ghwa Mlungu. 25Kwani kwanawanguwe kwa ngamila kungila kele ilanga lya sinzano kuchumba kwa mzuri kungila kele Uzuri ghwa Mlungu.” 26Nao walye wandu wamsikile wakaghora, “Ndamu nani edimagha kukila?” 27Jesu kawauza, “Agha sighedimikagha kwa mdamu, kwa Mlungu ghadimika.”

28Nao Petro kamuza, “Zighana! Tanasighile nyumba zetu tikakuirima.” 29Jesu kawauza, “Fulo namuza, sikwesi mundungi esighagha nyumba, ango mkwake, ango wana wakwawe wa walume ango wavali wake ango wana kwa undu ghwa Uzuri ghwa Mlungu, 30sepatagha mengi ngelo iyi, na kele urumengu ghukujagha umana ghwa kale na kale.”

Jesu kughora indu lya katatu ighulu ya kifwa chake

(Matayo 20:17-19; Marko 10:32-34)

31Jesu kawafunya wairimi ikumi na waili mbali, kawauza, “Zighaneni tendeghenda Jerusalemu, na malagho ghose ghawandikilo Mwana wa Mdamu ni wana tondolo ghejekatiso. 32Kwani ujefunyo kwa mbari nzima, naye ujesholelo na kufwisho waya na kuchilo mate. 33Nawo wejemchapa na kumulagha. Na ijua lya katatu ujezuka.” 34Ela wairimi wake siwatambukilo ni agha eluo keghora; kwani ghevisilo kwawe, na siwamanyile agha eluo keghora.

Jesu kuboesa kifondo eluo kelomba

(Matayo 20:29-34; Marko 10:46-52)

35Nao Jesu afika avui na Jeriko, kadoka mundu mumoju kifondo akala kitembo mbalimbali ya ngila kelomba. 36Naye asikila makoghano ghekeita kakotela, “Kuo na kimuni?” 37Wakamuza, “Ni Jesu wa Nazareti eitagha.” 38Nao kaghora na lwaka lubwaa keghamba, “Jesu Mwana wa Daudi, unifwile waya!” 39Nao wandu wekayaye wakamkemela, wakamuza anyamale. Ela iye kakema na lwaka lubwaa, “Mwana wa Daudi unifwile waya!” 40Nao Jesu kamanga kaghora aleto kwake. Naye aghenda eja avui, Jesu kamkotela. 41“Wanashaile nikudeileni?” Naye katumbulila, “Bwana, nanashaile nipate kuona sena.” 42Nao Jesu kamuza, “Haya ona! Idumusi lyako lyakuboesa.” 43Nao iyo ngelo yenyi kapata kuona na kumwirima, kemlika Mlungu. Nawo wandu wose waghenda waona, wakamlika Mlungu.

Attualmente Selezionati:

Luka 18: SAGALLANT

Evidenziazioni

Copia