Luka 16

Mtumishi mlachu

1Nao Jesu kawauza wairimi wake, “Koluo na mzuri mumoju eluo na mtumishi wake ozighana mali yake, naye oghorerero selyi ulya mtumishi ehakilagha mali yake. 2Naye kampang'a kamuza ‘Nini ichi nisikilagha ighulu yako? Funya isabu lya selyi upatagha na kutumia mali yangu, kwani sukalagha sena mtumishi wangu ozighana mali yangu.’ 3Nao ulya mtumishi karirikanya ngoloni kwake, ‘Nideagha ije na bwana wangu wamalila kunifunya kazi ya utumishi? Ndighi zelima siwesi, na kulomba nifwighagha waya. 4Namanya selyi nideagha eri wandu wanihokere nyumba kwawe ilyi nafunyo kazi ya ughu utumishi.’ 5Nao kawapang'a wasile wa bwana wake mumoju mumoju, kamuza wa hambiri, ‘Uwo na sile muni kwa bwana wangu?’ 6Naye katumbulila; ‘Vipimo ighana va mavuta.’ Naye kamuza, ‘Usa karatasi yako ukale kitembo shoshoa na uwandike mirongo misanu.’ 7Nao kamuza muzima, ‘Na uwe ulailogho kimuni?’ Kaghora, ‘Vipimo ighana va ngano.’ Kamuza, ‘Usa karatasi yako uwandike mirongo minane.’

8“Nao ulya bwana kamlika ulya mtumishi wa laghelaghe kwa ulachu ghwake. Kwani wana wa urumengu ughu weo na ulachu kele malagho ghawe kuchumba wana wa mlangazi.”

9Nemi namuza, “Deeni wagheni na mali ya urumengu siyewo ya hachi, eri kasikila zadua wapate kumuhokera kele makalo gha kale na kale. 10Uwo wose ewo mdumusiliki kwa machache, ujekala mudumusiliki kwa mengi naghose, naye seo mudumusiliki kwa machache sekalagha mudumusiliki kwa mengi naghose. 11Ndamu ngera simweo wadumusiliki kele mali siyefweni ya urumengu, nani emudumusilagha kele mali ya fulo? 12Ikakala simweo wadumusiliki kwa mali ya mundu muzima, nani emuhawagha icho chio chenyu chenyi?

13“Sikwesi mtumishi ungi edimagha kutumikila wana bwana waili, kwani umumenyagha mumoju na kumshaya mumoju, ango ujewatana na mumoju na kumumenya mzima. Simudimagha kumtumikila Mlungu na mali.”

Maghori ghamoju gha Jesu

(Matayo 11:12-13; 5:31-32; Marko 10:11-12)

14Nao Wafarisayo, wandu weshaile pesa waghenda wasikila agha, wakamumenyesa Jesu. 15Ela kawauza, “Inyo mwanakuhawagha hachi inyo wenyi hambiri ya wandu, ela Mlungu wamanya ngolo zenyu. Kwani icho chionekagha chaloli hambiri ya wandu sichifweni hambiri ya Mlungu.

16“Sheria ya Musa na mawandiko gha wana tondolo veluo hata ngelo za Johana Mubatizi, nao kufumila aho, Ilagho lyaloli lya Uzuri ghwa Mlungu lyachilo, na kila mumoju ungilagha kwa ndighi. 17Ela kwanawanguwe mlunguni na isanga kuita noko, kuchumba, katonyi kamojori ka Sheria kulegha kukata.

18“Kila mundu emuleghagha mkwake na kulola mzima, wazinga, na ulya emuusagha muke aleghilo ni mlume wake, wazinga.

Mzuri na Lazaro

19“Nao koluo na mzuri, eruse nguo za shifishifi na bafuta ielile, naye woluo kedea karamu kila ijua. 20Na koluo na mkiwa mumoju aitogho Lazaro, eluo na vilonda vingi, na eluo keleto kele mjango ghwake. 21Naye karirigho ni kughutiso ni misusure yeluo ikepotoka mezeni kwa mzuri, nazo chuchu zikeja zikamusuba vilonda vake.

22“Ulya mkiwa kafwa na katuko ni malaika hata lagaeni kwa Abrahamu. Naye mzuri naese kafwa kaziko. 23Nao wazimuni, mzuri oluo kele masirimi, naye anula meso ghake, kamwona Abrahamu na Lazaro kele lagaya yake kulele. 24Nao kapang'a, ‘Aba Abrahamu nifwile waya umutume Lazaro angize chala kele meji eje eri asaruse lumi lwangu, kwani nendesirima na ulu lumuli lwa moto.’ 25Ela Abrahamu kamuza, ‘Mwanwangu, kumbuka kamba wanapatile ghaloli ghako ilyi oluo moyo na Lazaro ghawase, ela ndamu ondesaruso aha na uwe ondesirima. 26Na hung'u sani, ghati yetu nenyo kuo ivongo ibwaa, eri awa washaile kuita kufuma aha kuja kwenyu siwadime, na mundungi sadime kuwambuka kufuma kwenyu hata kwetu.’ 27Nao mzuri kaghora, ‘Ndamu nakulomba Aba, umutume kele nyumba ya aba, 28kwani nana wana wakwetu wasanu, eri awaonye siweje nawose aha andu kwa masirimi.’ 29Ela Abrahamu kamuza, ‘Weo na Musa na wana tondolo, wawasikile.’ 30Naye kamuza ‘Hata Aba Abrahamu, ela ilyi aghenda kwawe mundu kufuma kwa wafwa werihagha.’ 31Abrahamu kamuza, ‘Ikakala siwemsikilagha Musa na wana tondolo, hata kazuka mundu kufuma kwa wafwa siwemusikilagha.’”

Attualmente Selezionati:

Luka 16: SAGALLANT

Evidenziazioni

Copia