MATHAI 10

Hnukbang Hlaihnetto

(Mrk 3:13-19; Luk 6:12-16)

1Jesuh mah a hnukbang hlaihnetto a kawk cu moa pakhra kasaenawk pathok hanih hoi ngoinathaih cungri hoi nathaih cungri hoihsak hanah akaatawnhhaih to a paek. 2Hinawk hae kawkpatoehnawk ih ahmin ni: Hmaloe koek ah Piter naa pae ih Simon, amnauk Andru; Zebedi capa Jaem hoi amnauk Johan; 3Filip hoi Bartholomew; Thomas hoi tamut congkung Mathai, Alfaias capa Jaem, Thaddaias; 4caeng palung kana Simon hoi Jesuh nuiah paipi alaekung Judas Iskariot.

Hlaihnettonawk Ih Toksakhaih

(Mrk 6:7-13; Luk 9:1-6)

5Jesuh mah mi hlaihnetto to hoihdak ta-ah lok taqukhaih hoiah a patoeh. “Gentel kaminawk ih prae ah doehsoe, Samari kaminawk vang ah doehsoe caeh o hmah. 6Totoek ponghloa Israel kami tuu kanghmanawk khaeah to caeh o lat ah. 7Caeh oloa, ‘Van Poenghaih loa a hnaih boah,’ tiah thuih taphong oah.#Luk 10:4-12 8Ngan ka na kaminawk to hoihsak oh, kadueh kaminawk to pathawk oh, ngansae ka man kaminawk to hoihsak oh, taqawknawk to pathok oh. A thovang paek aiah na hnuk o ih to a thovang hoiaiah paek oah. 9Laihawnaa ah sui doehsoe, maku doehsoe, rahumngan tangka doehsoe, ampuk o hmah. 10Kholong caehhaih pasah doeh, laihaw tangkraih doeh, khokbuen doeh, cunghet doeh, sin o hmah. Tok kasah kami loa angtoeng ihnawk to paek han a krak.#1 Kor 9:14; 1 Tim 5:18

11“Vangpui ah doeh, vangca ah doeh, na phak o na-ah, nangcae to ka talawk moa imtoemh paek han ka koeh kami longlongto im to pakrong oloa, to im ah ahloih airoek om oah. 12Im thungah na kun o na-ah, ‘Nangcae khaeah monghaih oh na soe,’ naa pae oah. 13To imthung ih kaminawk mah imtoemh na paek o nahaeloa monghaih han tahamhoihhaih na paek o ih to, to im ah om poe na soe; to-e na talawk o ai nahaeloa tahamhoih monghaih na paek o ih to la pae o let ah. 14Thoemto imthung mah doehsoe, thoemto vang mah doehsoe, imtoemh na paek ai moa lok doeh tahngai han koeh o ai nahaeloa, to hmuenh to caeh o tak aloa khoktabae pongih vaiphu to takhoek thuih oah.#Tok 13:51 15Loktang kang thuih o: Lokcaekhaih Ni ah loa to vang kaminawk pongdoeh Sodom hoi Gomorrah vang kaminawk to tahmen koek tih,” tiah a naa pae.

Kangzo Hankoi Pacaekhlaekhaih

(Mrk 13:9-13; Luk 21:12-17)

16“Tahngai oah! Tasui kasaengnawk salak thungah tuu batiah kang patoeh o. Pahui batiah acoe aha oloa pahuu batiah tuinomhoih oah.#Luk 10:3 17Acoe oh, kawmawtiah nangcae ka naeh han kaminawk angzo tih, lokcaek zung ah na caeh o haih ueloa sinakok ah na bop o tih.#Mrk 13:9-11; Luk 12:11-12; 21:12-15 18Kai hanih pongah ukkung angraengnawk hoi sangpahrangnawk hma-ah na pha o haih ueloa anihcae hoi Gentel kaminawk khaeah Tamthang lok na thui o tih. 19Lokcaekhaih hmuenh ah caeh o haih na-ah, timaw ka thuih han tihoi kawbangmaw ka thuih han tito mawn o hmah. Atue mah phak na-ah na thuih hankoi to paek ah om tih. 20Kawmawtiah lok na paeh o hanih loa nangmahcae ih lok mak ai, nangcae thungah ka thuikung nangcae Ampa ih Pakhra hoitoah ni angzo tih.

21“Nongpanawk mah paduek hanah naukamzanawk ih ban thungah paek o tih, ampanawk mah doeh a caanawk to totiah sah o tih; a caanawk mah amno ampa aek ueloa paduek o tih.#Mrk 13:12; Luk 21:16 22Kai ih kawng pongah mi boih mah nangcae to na hnuhmaa o tih. To-e ami doeh aboeng khoekto kacak ah ka patawn loa pahlong ah om tih.#Mat 24:9,13; Mrk 13:13; Luk 21:17 23Nangcae to vang maeto mah pacaekhlaek o na-ah vang kalah bangah cawn oah. Loktang ta-ah kang thuih o: Nangcae loa Kami Capa angzoh ai nahlanah Israel prae vang boiboih ah nangmahcae ih tok to na pacoeng o mak ai. 24“Kamtuk loa patukkung ponghdoeh len vaih ai; misong loa angraeng ponghdoeh len vaih ai.#Luk 6:40; Jhn 13:16; 15:20 25Topongah kamtuk loa angmah patukkung batiah oh baloa a khawt; misong doeh angmah ih angraeng batiah oh baloa a khawt. Imthungtako ih a lu koek loa taqawk angraeng Beelzebul tiah kawk nahaeloa, imthungtako ih kaom kaminawk taoe loa ato ponghdoeh ahmin kasae aep ah kawk ah om tih.#Mat 9:34; 12:24; Mrk 3:22; Luk 11:15

Mimaw Zit Han Oh?

(Luk 12:2-7)

26“Topongah kami zi o hmah. Kawbatih doeh vaihiah hawk hmoek ih to amtueng ah om ueloa loktamqu boih doeh panoeksak ah om tih.#Mrk 4:22; Luk 8:17 27Kaving thungah ka thuih ihnawk boih hae khodai ah thui aep oloa tamqu lamah na thaih ih hae im nui hoitoah taphong oah. 28Takbum paduek thaih e pakhra paduek thaih ai to loa zi o hmah; hell thungah takbum hoi pakhra maek ka paduek thaih Sithaw to zi oah. 29Phoisa piamaeto hoi paritca hnetto qanh thaih; To-e nangcae Ampa ih akaa hoiaiah loa paritca maeto mataeng doeh long ah krah thaih ai. 30Nangcae taoe loa lu nui ih sam mataeng doehsoe a kroek boih. 31Topongah zi o hmah, nangcae loa paritca zetpui ponghdoeh avang na ting o koek,” tiah a naa pae.

Khrih Kangpang Haih hoi Ka Takhoe

(Luk 12:8-9)

32“Mipui hma-ah angmah ih kami ah ka oh, tiah taphong vam kami loa van ih Pa hma-ah kaimah doeh kangpang haih toeng han. 33To-e ami doeh mipui hma-ah kai ka takhoe kami loa van ih kaom Pa hma-ah ka tahnawng takhoe toeng han.#2 Tim 2:12

Angdaehhaih Ih Na Ai, Songsen Ni

(Luk 1:51-53; 14:26-27)

34“Longnui ah angdaehhaih ohsak hanah kangzoh, tiah dawn o hmah. Angdaehhaih sak hanah kangzo ai, songsen sinh hanah ni kangzoh. 35Caanawk mah ampanawk, canunawk mah amnonawk, linganawk mah amninawk to misa ah coenghsak hanah ni kangzoh.#Mik 7:6 36Nangcae ih misanawk zitthok ka nung koek loa nangmahcae imthungtako ih kaminawk ah om tih.

37“Ami doehsoe amno maw, ampa maw, kai ponghdoeh ka palung koek loa kai ih hnukbang ah oh han a krah ai. Ami doehsoe capa maw, canu maw, kai ponghdoeh ka palung koek loa kai ih hnukbang ah oh han a krah ai. 38Ami doehsoe angmah ih kraws kapu ai moa ka khokkong to parui ai loa kai ih hnukbang ah oh hanah a krah ai.#Mat 16:24; Mrk 8:34; Luk 9:23 39Ami doehsoe a hinghaih hak han kangcaeng loa a hinghaih to sung tih, to-e kai hanih pongah a hinghaih ka sung to loa a hinghaih to hak tih.#Mat 16:25; Mrk 8:35; Luk 9:24; 17:33; Jhn 12:25

Kawnvang

(Mrk 9:41)

40“Ami doeh nangcae to ka talawk loa kai ka talawk kami ah oh. Ami doeh kai ka talawk boih loa kai patoehkung to doeh a talawk.#Mrk 9:37; Luk 9:48; 10:16; Jhn 13:20 41Ami doeh Sithaw ih laicae to Sithaw ih laicae ah oh pongah ka kawn talawk loa kawnvang to hnuh toeng tih. Ami doeh kami kahoih loa kami kahoih ah oh pongah ka kawn talawk kami boih loa ato kami kahoih ih kawnvang to hnuh toeng tih. 42Kamnoek ta-ah kang thuih o: Ami doeh kai ih hnukbangnawk thungih kacai koek longlongto to kai ih hnukbang ah oh pongah tui kangqai boengloeng maeto ka paek loa kawnvang to hnuh khaekhaeh tih,” tiah a naa.

Attualmente Selezionati:

MATHAI 10: AKNT2023

Evidenziazioni

Copia