Luki 24

Jejuu khi ɩɩr

(Mat 28:1–10; Mar 16:1–8; Jã 20:1–10)

1Dɩ wire makonyɔɔ caca wi, khɛraale kɔɔ jaal kaara duuro phiphiphi na niinikɛ n hʋnanɩ daʋ ka, kɛ wɩ kɔɔ gbɛbɩnɩ. 2Dɩ wɩ yɩrɛ bokaar dɩɩ kpuro a khokhɩa ka nʋɔra. 3Dɩ ɔbɔɔkɛ wɩ lonɩ wa kɔɔ yɩ Jeju Kɔ̃tɩnɩ foraˈ. 4Dɩ mɔ̃kɛ awɩ kpɩɛr nyanyaanɩ, hɩnɛ kona yenyɔɔkɛ tɔnɩ kẽkenaakɛ n caranɛnɩ kɔɔ the warɛ. 5Dɩ mɔ̃ maar fʋlɛ wɩnɩ ka wɩ gʋɛrɛ ƴɩɛ thɩɩra, dɩ konaale bule wi: Mɔ̃gɩdo dɩ na‐n ƴaal ʋrɛɛkɛ dʋɔnnɩ yidaar khee thɩ̃thɩɩn? 6Aa ha kaˈ, a ɩɩrɛ a the khirera. Sɩ nɩ jɛna mɔ̃kɛra a kɔɔ mɩɩ nɩnɩ ɔbɔɔkɛ a kɔɔ hanɩ Galile ayɩ:#Mat 16:21; 17:22–23; 20:18–19; Mar 8:31; 9:31; 10:33–34; Lu 9:22; 18:31–33 7Dɔ wɩ liirna mɛr tibili Bikuun, wɩ ha sopugodara wɩ gba mɩ wɩ kpa kʋkʋ thɩrʋra; sɩ ma ɩɩrɛ na the khirera wire yẽther wirera.

8Dɩ khɛraale jɩna Jejuu thɩmɩɩlera a kɔɔ mɩɩ wɩnɩ, 9a faa kaa sa kɛr bir kɔ̃ a mɩɩ kpãkpãadara yʋɔr bɩɛl, na ɩkhasɔ fɛʋ gelela fɛʋ. 10Wɩrɛ kɔɔ mɩanɩ ga thɩ̃ɩle thɔ̃thɔna, Marɩɩkɛ thɛnɩ Magɩdala gɩ, na Jan, na Marɩɩkɛ dʋɔnnɩ Jakɩɩ nɩ, na wɩ̃ khɛrsɔɔkɛ wɩ‐n kɔɔ hananɩ kha. 11Sɩ thɔ̃thɔna na kɔɔ pɛ khɛraa thɩmɩɩle haaraˈ, a gba gɩ dɩɩ do war nɔ jɩ thɩmɩɩr. 12Dɩ Pɩɛr ɩɩrɛ a ca jal kaara. Dɩ ɔbɔɔkɛ a kpuni hɩɩn, aa yɩ thɩ̃ɛ saagado kẽkẽ gborõbi haar gɩ dɩbara gaaga, dɩ a faarɛ sa bir da‐n kɔ̃ na nɔ kpaarɛ gɩrɛraakɛra kɔɔ dananɩ.

Kpãkpãadara yenyɔɔkɛ n kɔɔ jalanɩ Emayʋsɩ

(Mar 16:12–13)

13Dɩ hɩnɛ, ga wiilera kpãkpãadara yenyɔ wɛrra kɔɔ hale hʋɛra dɩ wa‐n jal dɩ bɩɛllaakɛ wɩ‐n wenɩ Emayʋsɩ. Kilə yʋɔr bɩɛlsɔ gɩ na Jerujalɛm. 14Dɩ wa‐n mɩɩ kha gɩrɛɛkɛ fɛʋ kɔɔ cʋɛnɩ. 15Ɔbɔɔke wɩ‐n khʋɛnɩ kha dɩ wa‐n bulena khasɔ, Jejuu thɛthɛ pɔr dɩ wɩ cʋr kha dɩ wa‐n jal. 16Sɩ gɩ hor thɩ̃ɛ kɔɔ yaarɛ wɩ dɩ wa jɩaˈ. 17Dɩ Jeju bule wi: Anye nɩ‐n bule khasɔ dɩ na‐n jalna? Dɩ wɩ jɩɩl na gbobire. 18Dɩ bɩɛl wɛrraakɛ wɩ‐n wenɩ Kileopasɩ birsee thakɛ: Fɛr bɩɛl dɩbara dʋɔn kpakpalɩkɛ hanɩ Jerujalɛm dɩɩra, kɛ na jɛnɩ gɩrɛɛkɛ kɔɔ dananɩ ga wisɔraakɛra gaa ya? 19Dɩ bule wi: Anye? Dɩ wɩ birsee: Gɩrɛɛkɛ kɔɔ dananɩ Jejuukɛ thɛnɩ Najarɛtɩ, kɛ kɔɔ dʋɔnnɩ Thãgbaa bobon a hana fãga thɩ̃ cʋʋrɛra na thɩmɩɩrra, Thãgbaa yɛra na tɩbɩla fɛʋʋ ƴɛra dakha, 20na mɔ̃kɛ bonɩ jidaar kɔ̃tɩna, na asɩ kɔ̃tɩ̃sɔ kɔɔ liirnaanɩ a pɩɛraa so kʋnanɛ, dɩ wɩ gbaa kpa kʋkʋ thɩrʋra. 21Sɩ sɩ kɔɔ pɛrɛ haar ɔr na dɔra ʋrɛɛkɛ na birseneni Ɩjɩrayɛl bɩsana; sɩ na gelesɔɔlerakɛ fɛʋ, hɩnɛ, wire yẽther ha nɩ̃ thɩ̃ɛsɔɔlera kɔɔ danɩ. 22Sobɔr gɩ, wɩ̃ khɛrsɔ asɩ thɩ̃thɩɩn kɔɔ mɩɩ sɛr dɩ nʋɔ kpaa sɩ. Wɩ kɔɔ jaal kaara duuro phiphiphi, 23sɩ mɔ̃kɛ wa kɔɔ yɩnɩ ɔɔ foraˈ, wɩ pɔr a mɩɩ sɩ mɔ̃kɛ Thãgbaa thɔ̃thɔ̃daar thusɔ kɔɔ the warnɩ a so war: A bire hana yire. 24Dɩ ʋkhasɔ asɩ thɩ̃thɩɩn kɔɔ jaal kaarara dakha, a yɩ thɩ̃ɛ dɩɩ ha oti mɔna khɛrasɔ kɔɔ mɩɩ sɩnɩ, sɩ ɔɔ thɛthɛ wer wa kɔɔ yɩaˈ.

25Dɩ le Jeju so war: Pha, kũu kpɛsɛ ˈleedarasɔ, gɩ‐n nɩ nɛr waa sobɔr dɩ na pɛr haar gɩrɛ fɛʋraakɛ Thãgbaa bobona kɔɔ sonɩ. 26Ga kɔɔ teena Kirisiti n gaar bʋɔ thale sɩ a lõ ɔɔ i dʋbɩra gaa? 27Agɩpɩ dɩ mɩɩ wɩ kɩrʋ Thãgbaa sɛbɛra fɛʋʋkɛ dɔnɩ gɩ baarɛ, a fʋna Mʋɩjɩɩ sɛbɛ a jalna gbana Thãgbaa bobonasɔɔ sɛbɛ fɛʋ. 28Dɩ ɔbɔɔkɛ wɩ‐n wɔrɔnɩ dɩɩle kãkɛ wɩ‐n kɔɔ jalnɩ, Jeju cʋʋrɛ dɩɩ ho yɔɔ a ƴaal a kpãsɛ a jal. 29Sɩ wɩ‐n kɔɔ yɩrnaanɛ dɩ wa‐n sʋʋraa: Birə cɔ, gɩdonɩ wire lʋʋn pɩ, dɩ dɩɩ ˈli tɩɩn. Dɩ a lʋʋn wɩ cɔ kha. 30Dɩ ɔbɔɔkɛ a kɔɔ toonɩ dɩko kho paar na wɛr, a gbaar buru a bɩɛl Thãgba pɛr. Agɩpɩ dɩ kuur a ha wɩ. 31Le awɩ yi khɛr dɩ wɩ jɩɩ, sɩ dapaara a yɩrrɛ phɩɩ awɩ ƴɛra. 32Dɩ wa‐n mɩɩ kha awɩ ha ayɩ: Da kɔ̃tɩ̃ɩ na kɔɔ fʋ sɩ ɔbɔɔkɛ a‐n kɔɔ mɩɩ sɩnɩ hʋɛra da‐n nɩna sɩ Thãgbaa sɛbɛ kɩrʋaa? 33Dɩ wɩ ɩɩr dapaara a kɛr bir Jerujalɛm, a yɩ yʋɔr bɩɛlɩkɛ kɔɔ gbɛbanɩ kha na awɩ kpakpaarsɔɔkɛ 34kɔɔ sɔ warnɩ ayɩ: Sobɔr gɩ, Kɔ̃tɩn kɔɔ ɩɩrɛ a the khirera a nɩna ɔɔbara Sɩmɔ̃. 35Dɩ le yenyɔɔle dakha kɔɔ mɩɩ wɩ gɩrɛɛkɛ kɔɔ dana wɩnɩ hʋɛra, na mɔ̃kɛ wɩ jɩɩnɩ dabɔɔkɛ a‐n kɔɔ kuurni buru.

Mɔ̃ Jeju kɔɔ nɩnanɩ ɔɔbara kpãkpãadara

(Mat 28:16–20; Mar 16:14–18; Jã 20:19–23; Th t t 1:6–8)

36Ɔbɔɔkɛ wɩ‐n mɩɩnɩ thakɛ, Jeju lʋʋn ɔɔbara awɩ thɩ̃thɩɩn sa so war ayɩ: Nɩ hanana ha ɩɩ. 37Dɩ maar fʋlɛ wɩ dɩ wa‐n jẽ, a ka jɩna khɩ̃didaar wɩ yɩ. 38Sɩ Jeju so warɛ: Mɔ̃gɩdo dɩ haar fuu ni, dɩ mɔ̃gɩdo dɩ kpɩɛr caar thakɛ ɩɩr anɩ hara? 39Nɩ hɩnɛ ɩ̃ nyɛ̃ na ɩ̃ nɛ, mɛr gɩ bɔɔbɔɔ. Nɩ tha mar hɩnɛ, gɩdonɩ khɩ̃didaar na‐n hana tomɩr dɩ khubu gɩ mɔ̃kɛ nɩ yɩ mɩnɩ dɩ ɩ̃ ha ga. 40Dɩ ɔbɔɔkɛ a kɔɔ mɩɩnɩ gele, a nɩna wɛr ɔɔ nyɛ̃ na ɔɔ nɛ. 41Mɔ̃ daʋ kɔɔ fʋlɛ wɩnɩ wa kɔɔ pɛr haar pɩrakaˈ, dɩ nʋɔ kɔɔ kpaa wɛr wo, dɩ Jeju bule wer: Nɩ hananɛ dɩkhaa thɩ̃ khona kɩɛr ya? 42Dɩ wɩ haa thʋ̃ ˈwana kur bɩɛl. 43Dɩ gba a kho awɩ ƴɛra.

44Agɩpɩ dɩ so war ayɩ: Gɛr dʋɔn gɩrɛɛkɛra mɩ‐n kɔɔ so narnɩ, ɔbɔɔkɛ mɩ kɔɔ hanɩ kha na nɛrɛ ayɩ: Dɔ gɩrɛɛkɛ fɛʋ kɔɔ kherene marnɩ Mʋɩjɩɩ jɔfʋra, na Thãgbaa bobonaa sɛbɛra, na Khɩkhɩɩ nɩ sɛbɛra n dã oti. 45Dɩ Jeju cʋʋ awɩ kpɩɛr dɩɩ jaa war, wɩ puno wɩ jɩ Thãgbaa sɛbɛ kɩrʋ. 46Dɩ a so warɛ: Mɛ̃ gɩ khere, dɩ gɩ kɔɔ teenanɛ mɛr Kirisiti n kɔɔ gaar bʋɔ sɩ ɩ̃ ɩɩr ɩ̃ the khirera wire yẽther wirera. 47Dɩ ɩ̃ i wa gba na mɩɩna ha debire, na sopugo faa thɩmɩɩr tibil caarra fɛʋ, sɩ Jerujalɛm ga kɔɔ fʋ. 48Nɛr dɔ sobɔ so jɩdara ga thɩnaakɛra. 49Sɩ nɩ hɩnɛ mɛrɛ, ma thɔna narɛ gɩrɛɛkɛ ɩ̃ Thɩ kɔɔ ʋlfɛnɩ, sɩ nɛrɛ nɩ tɔɔ kɛ dɩ bɩnɔ phaphapha nɩ ˈlɛ fãgaakɛ na thɛnɩ ƴũ.#Th t t 1:4

Jejuu Thãgbaa dɩ jʋʋn

(Mar 16:19–20; Th t t 1:9–11)

50Agɩpɩ Jeju jalna wɩ a dana Betanɩ khʋra, a ˈlaa nyɛ̃ɛ ƴũ sa bɩɛl Thãgba a pɛ war.#Th t t 1:9–11 51Ɔbɔɔkɛ a kɔɔ bɩɛlnɩ Thãgba a pɛ war a faa wɛr, sɩ dɩ Thãgba khəsuu da‐n jʋʋn Thãgbaa dʋɔ. 52Sɩ wɛr, ɔbɔɔkɛ wɩ kɔɔ fʋɔrʋʋnɩ pɩ, wɩ kɛrrɛ bir kɔ̃ Jerujalɛm na da kɔ̃tɩ̃ɩ. 53Dɩ le wɩ kɔɔ too Thãgba fʋɔr cɔ kɔ̃tɩɩna wire fɛʋ dɩ wa‐n khɩɩ Thãgba.

Attualmente Selezionati:

Luki 24: LOBIRI

Evidenziazioni

Copia